Ди тхыгъэхэм еджэхэм я упщІэхэр

ЩІылъэм щыпсэун щхьэкІэ, къэтэджыжынур хэт икІи сыт абыхэм къапэщылъыр?

А упщІэхэм Библием жэуап зэрыритым деплъынщ.

Апостолхэм 24:15 щыжыІащ «щыпкъагъэ зиІэхэмрэ зимыІэхэмрэ» лІахэм къазэрыхэтэджыкІыжынур. «Щыпкъагъэ зиІэхэр» — ар лІэн ипэ Алыхьым пэжу хуэлэжьахэращ. Аращи, абыхэм я цІэхэр гъащІэм и тхылъым итщ (Мал. 3:16). «Щыпкъагъэ зимыІэхэр» — ар Иеговэ фІыуэ къацІыхуну Іэмал зимыІа цІыхухэращ. Абы къыхэкІкІэ абыхэм я цІэхэр гъащІэм и тхылъым иткъым.

Иуан 5:28, 29 зи гугъу ищІ лІахэм къахэтыджыкІыжыну цІыху гупитІыр Апостолхэм 24:15 зытепсэлъыхь гупитІыращ. Хьисэ мыпхуэдэу жиІат: «ФІы зыщІахэр псэуну къэтэджыжынущ, Іей зыщІахэри я къуаншагъэм хуэфащэр ягъуэтыжыну [хьэкум тращІыхьыну, ДЩІ] къэтэджыжынущ». «Щыпкъагъэ зиІэ» цІыхухэр лІэн ипэ фІы ящІэу псэуащ. Ахэр гъащІэ мыухыжыр къалъысыну къэтэджыжынущ, сыт щхьэкІэ жыпІэмэ абыхэм я цІэхэр гъащІэм и тхылъым иджыри иту щытщи. «Щыпкъагъэ зимыІэхэм» и гугъу пщІымэ, ахэр лІэн ипэ Іей ялэжьу псэуащ. Абыхэм я цІэхэр зэкІэ гъащІэм и тхылъым иткъым. Абы къыхэкІкІэ уафэм щыІэ хьэкумыщІэхэр а цІыхухэм набдзэгубдзаплъэу кІэлъыплъынущ. А зэманым абыхэм Іэмал яІэнущ Иеговэ къацІыхуну икІи я цІэхэр гъащІэм и тхылъым иратхэну.

Апокалипсис 20:12, 13 щыжыІащ къэтэджыжа цІыхухэм псоми тхылъыщІэхэм итыр ягъэзэщІэн зэрыхуеинур. НэгъуэщІу жыпІэмэ, дунеищІэм щыІэну Алыхьым и хабзэщІэхэм тету ахэр псэун хуеинущ. А хабзэхэм тетын зымыдэнухэр Иеговэ игъэкІуэдынущ (Ис. 65:20).

Даниил 12:2 итщ: «Жейхэм ящыщ куэдыр къызэщыужынущ: языныкъуэхэр мыкІуэдыж гъащІэм къыхуэушыжынущ; адрейхэр игъащІэ псокІи я напэр текІыным къыхуэтэджыжынущ». Мы едзыгъуэм щыжыІащ къэтэджыжыну цІыхухэм икІэм-икІэжым сыт къапэщылъми — «мыкІуэдыж гъащІэр» е «игъащІэ псокІи я напэр текІыныр». НэгъуэщІу жыпІэмэ, илъэс 1 000-м икІэм языныкъуэхэм гъащІэ мыухыжыр къалъысынущ, адрейхэр игъащІэкІэ ягъэкІуэдыжынущ (Апок. 20:15; 21:3, 4).

Зы щапхъэ къэтхьынщ. Къэтэджыжа цІыху гупитІым щыщхэр хамэ къэралым щыпсэун щхьэкІэ кІуэну хуейхэм ебгъэщхь хъунущ. «Щыпкъагъэ зиІэхэр» зэман куэдкІэ хамэ къэралым щыпсэун щхьэкІэ визэ зиІэхэм хуэдэщ. А визэм и фІыгъэкІэ улэжьэну икІи нэгъуэщІ хуитыныгъэхэри къыпІэрыхьэну Іэмал уиІэ мэхъу. «Щыпкъагъэ зимыІэхэми» визэ къратауэ жыпІэ хъунущ, ауэ ар зэман нэхъ кІэщІкІэщ зэрылажьэр. А къэралым нэхъыбэрэ щыІэн щхьэкІэ, ахэр къэрал унафэщІхэм къыдагъэкІа хабзэхэм тету псэун хуейщ. Абы ещхьу лІахэм къахэтэджыкІыжа «щыпкъагъэ зимыІэхэр», жэнэт дахащэм къыщынэн щхьэкІэ, Иеговэ и хабзэхэм тету псэун хуеинущ. ЦІыхум сыт хуэдэ визэ имыІэми, ар а къэралым къинэну хуит ящІыфынущ е къыздикІа къэралым ягъэкІуэжыфынущ. Ар зэлъытауэ щытынур къэралым и хабзэхэм тету ар псэурэ мыпсэурэщ. Апхуэдэ дыдэуи лІахэм къахэтэджыкІыжахэр гъащІэ мыухыж яІэу дунеищІэм щыпсэунрэ щымыпсэунрэ зэлъытауэ щытынур ахэр Алыхьым зэрыхуэпэжымрэ я дуней тетыкІэмрэщ.

Иеговэ гущІэгъушхуэ зэрыхэлъым нэмыщІ захуагъэми зэи текІкъым (Втор. 32:4; Пс. 33:5). Лъагъуныгъэм къыхэкІкІэ абы «щыпкъагъэ зиІэхэри зимыІэхэри» лІахэм къахигъэтэджыкІыжынущ. Ауэ Іеймрэ фІымрэ теухуауэ и хабзэхэм ар зэи текІынукъым. Аращи, гъащІэ мыухыж яІэу дунеищІэм щыпсэуну хуит ящІынур Иеговэ фІыуэ зылъагъунухэмрэ абы и унафэхэм тету псэунухэмрэщ.