28 СТАТЬЯР
Алыхьым и Пащтыхьыгъуэм тепщэн щІидзащ!
«Ди Зиусхьэнрэ езым и Мэссихьрэ мы дунейм тепщэныгъэшхуэ хуаІэ хъуащ» (АПОК. 11:15).
22-НЭ УЭРЭДЫР Алыхьым и Пащтыхьыгъуэр кърекІуэ!
МЫ СТАТЬЯР ЗЫТЕПСЭЛЪЫХЬЫРa
1. Сытым шэч къытедмыхьэми хъуну икІи сыт щхьэкІэ?
ДУНЕЙМ къыщекІуэкІ псор щыфлъагъум деж, къэкІуэну зэманым фІы гуэр къыфхуихьыну фыщыгугърэ? КІуэ пэтми, цІыхухэр нэхъ гущІэгъуншэ, щхьэхуещэ икІи тэмакъкІэщІ мэхъу. Куэдым нэчыхьым пщІэ хуамыщІыжу хъуащ. Абы нэмыщІ цІыхухэм къэрал унафэщІхэм дзыхь хуащІыжкъым. Ауэ а псор къызэрыхъум ди фІэщ ещІ куэд мыщІэу дунейм фІыкІэ зэрызихъуэжынур. Сыт щхьэкІэ жыпІэмэ цІыхухэм я щытыкІэр «мы дунейм и иужьрей махуэхэм» теухуауэ Библием ит къэхъун хуей псалъэхэм къанэ щымыІэу тохуэ (2 Тим. 3:1—5). ЦІыхум и щхьэр къимыгъэпцІэжу щытмэ, ди зэманым а псалъэхэр къызэрыхъум арэзы техъуэнущ. А Іуэхугъуэм къегъэлъагъуэ Хьисэ Алыхьым и Пащтыхьыгъуэм и Пащтыхь зэрыхъуар. Пащтыхьыгъуэм теухуауэ къэхъун хуей псалъэхэм мыр ящыщ зыщ. Библием ит къэхъун хуей псалъэ нэгъуэщІхэри иужьрей илъэсхэм гъэзэщІа зэрыхъуар зэпкърытхыу щытмэ, ди фІэщхъуныгъэр, дауикІ, нэхъ быдэ хъунущ.
Сурэтыр Іыхьэ-ІыхьэкІэ зэрызэпкъралъхьэм хуэдэу, Апокалипсис тхылъымрэ Даниил тхылъымрэ ит къэхъун хуей псалъэхэр зэгъусэу зэпкърытхмэ, Иеговэ и еплъыкІэкІэ зэманыр дэнэ нэсами къэтлъэгъунущ (2-нэ абзацым феплъ.)
2. Мы статьям сыт щызэпкърытхынур икІи сыт щхьэкІэ? (Обложкэм тет сурэтым феплъ.)
2 Мы статьям щызэпкърытхыну къэхъун хуей псалъэхэр къыддэІэпыкъунущ: 1) Пащтыхьыгъуэм тепщэн щыщІидза зэманыр зэхэдгъэкІыну, 2) Хьисэ уафэм Пащтыхьу зэрыщытым щыхьэт техъуэ Іуэхугъуэхэр къэтлъэгъуну, 3) Пащтыхьыгъуэм и бийхэм кІэ къазэрыхуэкІуэну щІыкІэр къэтщІэну. Сурэтыр Іыхьэ-ІыхьэкІэ зэрызэпкъралъхьэм хуэдэу, къэхъун хуей а псалъэхэр зэгъусэу зэпкърытхмэ, Иеговэ и еплъыкІэкІэ зэманыр дэнэ нэсами къэтлъэгъунущ.
АЛЫХЬЫМ И ПАЩТЫХЬЫГЪУЭМ ТЕПЩЭН ЩЫЩІИДЗА ЗЭМАНЫР ДАУЭ КЪЫЗЭРЫТЩІЭНУР?
3. Даниил 7:13, 14 ит къэхъун хуей псалъэхэм сыт къагъэлъагъуэр?
3 Даниил 7:13, 14 ит къэхъун хуей псалъэхэм къагъэлъагъуэ Алыхьым и Пащтыхьыгъуэм и Пащтыхьу щытыну Хьисэ Мэссихь зэрыхуэфащэр. Абы «лъэпкъ псори» я фІэфІу хуэлэжьэнущ икІи а увыпІэр нэгъуэщІым иратынукъым. Данил итха къэхъун хуей псалъэхэм иджыри щыжыІащ «зэманиблым» и кІэм Хьисэ Пащтыхьыгъуэр къызэрылъысынур. А псалъэхэр гъэзэщІа щыхъуа зэманыр къытхуэщІэну пІэрэ?
4. Хьисэ Алыхьым и Пащтыхьыгъуэм и Пащтыхьу щытеува гъэр зэхэдгъэкІыну Даниил 4:10—17 итыр дапхуэдэу къызэрыддэІэпыкъур? (Абы нэмыщІ сноскэм феплъ.)
4 Къеджэ Даниил 4:10—17. «Зэманиблыр» илъэс 2 520 мэхъу. А лъэхъэнэм щІидзащ ди эрэм ипэ 607-нэ гъэм. Абы щыгъуэ журтхэм я пащтыхьу Алыхьым тригъэувам и увыпІэр бабилэн цІыхухэм къыІэщІахащ. А лъэхъэнэр 1914-нэ гъэм иухащ. А илъэсым Иеговэ и Пащтыхьыгъуэм и Пащтыхьу «ар къызылъысыну хуитыныгъэ зиІэ» Хьисэ тригъэуващ (Иез. 21:25—27)b.
5. «Зэманиблым» теухуауэ къэхъун хуей псалъэхэр къыдгурыІуэным мыхьэнэ щІиІэр сыт?
5 Къэхъун хуей мы псалъэхэр къыдгурыІуэным мыхьэнэ щІиІэр сыт? «Зэманиблым» теухуауэ Библием итым быдэу ди фІэщ ещІ Иеговэ дыкъызэригъэгугъа псор игъуэу зэригъэзащІэр. Алыхьым триухуа зэманым и Пащтыхьыгъуэр щытригъэувакІэ, къэхъун хуей адрей псалъэхэри и зэманым гъэзэщІа хъунущ. Аращи, шэч къытедмыхьэми хъунущ: Иеговэ и махуэр «къыкІэрыхунукъым» (Авв. 2:3).
ХЬИСЭ ПАЩТЫХЬ ЗЭРЫХЪУАМ ЩЫХЬЭТ ТЕХЪУЭ ІУЭХУГЪУЭХЭР
6. 1) Нэрымылъагъу Пащтыхьыгъуэм и Пащтыхь Хьисэ зэрыхъуам сыт хуэдэ нэрылъагъу Іуэхугъуэхэр щыхьэт техъуэрэ? 2) Къэхъун хуей а псалъэхэр зэрыпэжым шэч къытедмыхьэну Апокалипсис 6:2—8 итыр дапхуэдэу къыддэІэпыкъурэ?
6 Хьисэ Алыхьым и Пащтыхьыгъуэм и тепщэу зэрытеувар и гъэсэнхэм къагурыІуэн щхьэкІэ, абы щыхьэт техъуэ Іуэхугъуэ гъэщІэгъуэнхэр дуней псом къызэрыщыхъун хуейр яжриІауэ щытащ, псалъэм папщІэ, зауэхэр. Абы нэмыщІ Хьисэ жиІащ: «ЩІыр щІыпІэ-щІыпІэхэмкІи хуабжьу щыхъеинущ икІи уз зэрыцІалэхэмрэ гъаблэхэмрэ къэхъунущ». А псалъэхэр зэрыпэжым COVID-19 пандемиер щыхьэт тохъуэ. А псор Хьисэ Пащтыхь зэрыхъуам и нэщэнэщ (Мт. 24:3, 7; Лк. 21:7, 10, 11). Хьисэ уафэм дэкІуеижа иужь илъэс 60-м нэблагъэ дэкІауэ а Іуэхугъуэхэр къызэрыхъунур абы апостол Иуан къыхузэІуихащ. (Къеджэ Апокалипсис 6:2—8.) 1914-нэ гъэм, Хьисэ уафэм Пащтыхьу зэрытеувэ лъандэрэ, къэхъун хуей а псалъэхэр гъэзэщІа зэрыхъур долъагъу.
7. Хьисэ Пащтыхь щыхъуам щыгъуэ, сыт дунейр нэхъ гужьеигъуэ щІэхъуар?
7 Хьисэ Пащтыхь щыхъуам щыгъуэ, сыт дунейр нэхъ гужьеигъуэ щІэхъуар? Апокалипсис 6:2 мыхьэнэшхуэ зиІэ Іуэхугъуэм топсэлъыхь: Хьисэ тепщэныгъэ къыІэрыхьа иужь, Алыхьым и бийхэм зауэ ирещІылІэ, ахэр уафэм тригъэкъэбзыкІыжын щхьэкІэ. Апокалипсис 12-нэ псалъащхьэм зэрыжиІэм хуэдэу, а зауэм Хьисэ текІуэныгъэ къихьащ икІи ШейтІанымрэ абы и жин бзаджэхэмрэ уафэм къридзыхащ. А Іуэхугъуэм ШейтІаныр егъэлеяуэ къызэригъэгубжьам къыхэкІкІэ и губжьыр цІыхухэм ятрикъутэу щІидзащ. Аращ мы дунейр гузэвэгъуэрэ хьэзабкІэ гъэнщІауэ щІыщытыр (Апок. 12:7—12).
ХъыбарыщІэ Іейхэм дамыгъэгуфІэми, Библием ит къэхъун хуей псалъэхэр гъэзэщІа зэрыхъум Алыхьым и Пащтыхьыгъуэр тепщэу зэрыщытыр ди фІэщ ящІ (8-нэ абзацым феплъ.)
8. Пащтыхьыгъуэм теухуауэ Библием ит псалъэхэр ди зэманым гъэзэщІа зэрыхъур къыдгурыІуэным мыхьэнэшхуэ щІиІэр сыт?
8 Къэхъун хуей мы псалъэхэр къыдгурыІуэным мыхьэнэ щІиІэр сыт? Дунейм къыщыхъухэмрэ цІыхухэм я щытыкІэм ІейкІэ зэрызихъуэжамрэ къыдгурагъаІуэ Хьисэ Пащтыхь зэрыхъуар. ДауикІ, дэ хуабжьу ди жагъуэ мэхъу цІыхухэр щхьэхуещэу икІи лъагъумыхъуныгъэ яхэлъу зэрыхъуар. Ауэ а Іуэхум и нэгъуэщІ лъэныкъуи щыІэщ: а псом къегъэлъагъуэ Библием ит къэхъун хуей псалъэхэр гъэзэщІа зэрыхъур. Алыхьым и Пащтыхьыгъуэм тепщэн щІидзащ! (Пс. 37:1). Аращи, Армагеддоныр нэхъ гъунэгъу хъуху, дунейр нэхъ бзаджэ зэрыхъунум шэч къытедмыхьэми хъунущ (Мк. 13:8; 2 Тим. 3:13). Апхуэдиз мыхъумыщІагъэр къыщІэхъур къыдгурыІуэну уафэм щыІэ ди Адэр къызэрыддэІэпыкъум щхьэкІэ, дэ фІыщІэшхуэ дощІ!
ПАЩТЫХЬЫГЪУЭМ И БИЙХЭМ КІЭ КЪАЗЭРЫХУЭКІУЭНУ ЩІЫКІЭР
9. Даниил 2:28, 31—35 итыр дапхуэдэу иужьрей дунейпсо державэм зэрытепсэлъыхьыр икІи дапщэщ ар къыщыунэхуар?
9 Къеджэ Даниил 2:28, 31—35. Мы псалъэхэр ди зэманым къызэрыхъур ди нэкІэ долъагъу. Мэссихь тепщэныгъэр къыІэрыхьа иужь, «лъэхъэнэм и кІэм къэхъунур» Навуходоносор и пщІыхьэпІэм къегъэлъагъуэ. А зэманым Хьисэ щІылъэм бий куэд щиІэнущ икІи абыхэм ящыщ зыр — Библием зи гугъу ищІ иужьрей дунейпсо державэращ. Ар статуем и лъапэу Алыхьым и Псалъэм къыщыгъэлъэгъуащ икІи ахэр «иныкъуэр гъущІт, иныкъуэр ятІэ гъэжат». А дунейпсо державэр ди зэманым къэунэхуащ. Дапщэщ ар къыщыхъуар? Япэ дунейпсо зауэшхуэм щыгъуэ, Великобританиемрэ США-мрэ зэгурыІуэныгъэ зращІылІэри, къэрал зэгухьа хъуащ. А дунейпсо державэр адрейхэм сыткІэ къащхьэщыкІми, Навуходоносор и пщІыхьэпІэм къыщыдощІэ.
10. 1) Великобританиемрэ США-мрэ Даниил тхылъым дапхуэдэу къызэрыщыгъэлъэгъуар? 2) Сыт дэ дызыхуэсакъын хуейр? («Фысакъ: ятІагъуэ!» жыхуиІэ рамкэм феплъ.)
10 Япэрауэ, ипэкІэ щыІа дунейпсо державэхэм елъытауэ, Великобританиемрэ США-мрэ дыщэ е дыжьын къабзэм къыхэщІыкІауэ Библием къыщыгъэлъэгъуакъым, атІэ ар гъущІымрэ ятІэ гъэжамрэ къыхэщІыкІауэ жеІэ. ЯтІэ гъэжам къигъэлъагъуэр цІыху къызэрыгуэкІхэращ (Дан. 2:43, сноскэ). Абыхэм къэрал унафэщІхэр хах, ахэр профсоюзхэм хэтщ, забастовкэхэр къаІэт икІи я хуитыныгъэхэм щІобэн. Абы къыхэкІкІэ, ипэкІэ щыІа дунейпсо державэхэм хуэдэу, иужьрей дунейпсо державэм къару щІэлъкъым икІи зыхуейр нэгъэсауэ ищІэну Іэмал иІэкъым.
11. Великобританиемрэ США-мрэ дунейпсо державэу зэрыщытыр иужьрей махуэхэм дызэрыщыпсэум дапхуэдэу щыхьэт техъуэрэ?
11 ЕтІуанэрауэ, Великобританиемрэ США-мрэ статуем и лъапэу къызэрыгъэлъэгъуам къыхэкІкІэ ар Библием зи гугъу ищІ иужьрей дунейпсо державэщ. Абы иужь цІыхухэм я ІэмыщІэ илъ пащтыхьыгъуэхэр афІэкІа щыІэжынукъым. Алыхьым и Пащтыхьыгъуэм иужьрей дунейпсо державэмрэ нэгъуэщІ правительствэхэмрэ напІэзыпІэм Армагеддон зауэм щигъэкІуэдынущ (Апок. 16:13, 14, 16; 19:19, 20)c.
12. Гупсэхугъуэрэ гугъэрэ къыдэзыт къэхъун хуей сыт хуэдэ псалъэхэр Даниил тхылъым иджыри ит?
12 Къэхъун хуей мы псалъэхэр къыдгурыІуэным мыхьэнэ щІиІэр сыт? Дунейм и кІэм дызэрыщыпсэум щыхьэт техъуэ нэгъуэщІ Іуэхугъуи Даниил тхылъым итщ. Илъэс 2 500 ипэ къихуэу Данил бегъымбарым итхащ Бабилэным иужь дунейпсо державэу иджыри плІы зэрыщыІэнур. Ахэри Алыхьым и лъэпкъым лъэныкъуэ гуэркІэ лъэІэсу щытынущ. Абыхэм щыщу Великобританиемрэ США-мрэ иужьрей дунейпсо державэщ. Ар къызэрыдгурыІуэм гупсэхугъуэрэ гугъэрэ къыдет, сыт щхьэкІэ жыпІэмэ куэд мыщІэу Алыхьым и Пащтыхьыгъуэм цІыхухэм я тепщэныгъэм кІэ иритынурэ, щІылъэ псом и тепщэу щытынущ (Дан. 2:44).
13. Апокалипсис 17:9—12 зи гугъу ищІ «еянэ пащтыхьымрэ» «пащтыхьипщІымрэ» къагъэлъагъуэр хэт икІи а псалъэхэр дапхуэдэу гъэзэщІа зэрыхъур?
13 Къеджэ Апокалипсис 17:9—12. Япэ дунейпсо зауэшхуэм къихьа гузэвэгъуэм къыхэкІкІэ иужьрей махуэхэм теухуауэ Библием ит къэхъун хуей псалъэхэм щыщу иджыри зы гъэзэщІа хъуащ. Къэрал унафэщІхэр хуейт дуней псом мамырыгъэр зэтезыІыгъэ организацэ гуэр щыІэну. Абы къыхэкІкІэ 1920-нэ гъэм Лига Наций жыхуаІэр къэунэхуащ. ИужькІэ 1945-нэ гъэм Организация Объединённых Наций жыхуаІэр абы и пІэм иуващ. А организацэр «еянэ пащтыхь» хъуащ, ауэ ар дунейпсо державэу щыткъым. Абы и тепщэныгъэр къызыбгъэдэкІыр и лъэныкъуэр зыІыгъ правительствэхэращ. Библиер щІагъыбзэкІэ абыхэм «пащтыхьипщІкІэ» йоджэ.
14, 15. 1) Апокалипсис 17:3—5 «Бабилэнышхуэм» теухуауэ сыт щыжыІар? 2) Дин нэпцІым хэт цІыху куэдым сыт ящІэр?
14 Къеджэ Апокалипсис 17:3—5. Алыхьым апостол Иуан и нэгу щІигъэкІам щригъэлъэгъуащ «Бабилэнышхуэ» псэжьыр. Абы дуней псом тет дин нэпцІхэр къегъэлъагъуэ. Къэхъун хуей а псалъэхэр дапхуэдэу гъэзэщІа зэрыхъур? Ижь-ижьыж лъандэрэ дин нэпцІхэр къэрал унафэщІхэм ядолажьэ икІи я Іуэхухэр даІыгъ. Ауэ куэд мыщІэу Иеговэ къэрал унафэщІхэм я гум ирилъхьэнущ «и мурадыр ягъэзэщІэну». Сыт абы къыпэкІуэнур? А къэрал унафэщІхэр, нэгъуэщІу жыпІэмэ, «пащтыхьипщІыр», дин нэпцІхэм теуэнурэ, ягъэкІуэдыжынущ (Апок. 17:1, 2, 16, 17).
15 Бабилэнышхуэм и кІэухыр къызэрысар дэнэ дэ щытщІэр? А упщІэм жэуап еттын щхьэкІэ, пасэрей зэманым щыІа Бабилэн къалэр Евфрат псым къихъумэу зэрыщытар дигу къэдгъэкІыжынщ. Апокалипсис тхылъым Бабилэнышхуэм и лъэныкъуэр зыІыгъ мелуан бжыгъэ хъу цІыхухэр ар къэзыхъумэ «псы куэдым» ирегъэщхь (Апок. 17:15). А тхылъым иджыри щыжыІащ а псыхэр зэригъущыкІынур, нэгъуэщІу жыпІэмэ, дуней псом тет дин нэпцІым и лъэныкъуэр зыІыгъ цІыху куэдым ар къызэрагъэнэнур (Апок. 16:12). Нобэ къэхъун хуей а псалъэхэр гъэзэщІа мэхъу, сыт щхьэкІэ жыпІэмэ цІыху куэдым яІэ упщІэхэм я жэуапхэр къамыгъуэту, дин нэпцІыр къагъанэ.
16. ООН-мрэ Бабилэнышхуэмрэ теухуа къэхъун хуей псалъэхэр къыдгурыІуэным мыхьэнэшхуэ щІиІэр сыт?
16 Къэхъун хуей мы псалъэхэр къыдгурыІуэным мыхьэнэ щІиІэр сыт? ООН-р къызэрыунэхуамрэ дин нэпцІым цІыху куэд къызэрыхэкІыжымрэ иужьрей махуэхэм дызэрыщыпсэум щыхьэт тохъуэ. Бабилэнышхуэр къэзыхъумэ псыхэр игъущыкІми, абы кІэ къыщІыхуэкІуэнум и щхьэусыгъуэр нэгъуэщІщ. ИпэкІэ зэрыжытІам хуэдэу, Иеговэ «пащтыхьипщІыр», нэгъуэщІу жыпІэмэ, ООН-м и лъэныкъуэр зыІыгъ правительствэхэр, «и мурадыр ягъэзэщІэну» хуигъэушынущ. Зыми имыгугъэххауэ ахэр Бабилэнышхуэм теуэнурэ, ар ягъэкІуэдыжынущ (Апок. 18:8—10)d. Бабилэнышхуэм къыщыщІынум дуней псор Іэнкун ищІынущ икІи абы гугъуехь куэд къыздихьынкІэ хъунущ. Ауэ Алыхьым и лъэпкъым щІэгуфІэн щхьэусыгъуитІ нэхъ мыхъуми иІэщ. Япэр — ар куэд щІауэ Иеговэ и бийуэ щыт дин нэпцІыр афІэкІа зэрыщымыІэжынуращ. ЕтІуанэр — ар мы дуней бзаджэм и кІэр къызэрысаращ! (Лк. 21:28).
КЪЭКІУЭНУ ЗЭМАНЫМ ИЕГОВЭ ДЫКЪЫЗЭРИХЪУМЭНЫМ ШЭЧ КЪЫТЕВМЫХЬЭ
17, 18. 1) Дапхуэдэу адэкІи ди фІэщхъуныгъэр нэхъ быдэ зэрытщІыфынур? 2) КъыкІэлъыкІуэ статьям сыт щызэпкърытхынур?
17 Данил бегъымбарым «щІэныгъэр [зэры]бэгъуэнур» жиІауэ щытащ. Ар къызэрыхъур дэ ди нэкІэ долъагъу. Ди зэманым теухуауэ къэхъун хуей псалъэхэм къикІыр Алыхьым къыдгурегъаІуэ (Дан. 12:4, 9, 10). А псалъэхэр гъэзэщІа зэрыхъум дыхуегъэуш Иегови абы и Псалъэми нэхъыбэжу пщІэ хуэтщІыну (Ис. 46:10; 55:11). Абы къыхэкІкІэ, адэкІи ди фІэщхъуныгъэр дгъэбыдэн щхьэкІэ, Библиер куууэ дджынщ икІи адрей цІыхухэми дадэІэпыкъунщ, ахэр Иеговэ и ныбжьэгъу хъун щхьэкІэ. Иеговэ нэгъэсауэ щыгугъхэр абы къихъумэнущ икІи «мамыр зэпыт яІэу игъэпсэунущ» (Ис. 26:3).
18 КъыкІэлъыкІуэ статьям иужьрей махуэхэм Алыхьым и лъэпкъым игъэзэщІэну лэжьыгъэм теухуа къэхъун хуей псалъэхэр щызэпкърытхынущ. Абыхэми къыдгурагъэІуэнущ дэ иужьрей махуэхэм дызэрыщыпсэур. Ди Пащтыхь Хьисэ и лъэужь ирикІуэхэр гъуэгу пэжымкІэ зэришэм щыхьэт техъуэ Іуэхугъуэ нэхъыбэж дэ къэтлъэгъунущ.
61-НЭ УЭРЭДЫР ФыкъимыкІуэт, Иеговэ и Щыхьэтхэ!
a ЦІыхухэр дунейм къызэрытехьэ лъандэрэ дэ дыщыпсэу зэманым нэхърэ нэхъ гъэщІэгъуэн къэхъуакъым! Библием ит къэхъун хуей псалъэхэм зэрыщыжыІам хуэдэу, Алыхьым и Пащтыхьыгъуэм тепщэн щІидзащ. Къэхъун хуей а псалъэхэм щыщ зыбжанэр мы статьям щызэпкърытхынущ. Абы и фІыгъэкІэ ди фІэщхъуныгъэр нэхъ быдэ хъунущ. Абы нэмыщІ ноби къэкІуэну зэманми зэпІэзэрыту дыкъэнэну икІи Алыхьым дзыхь хуэтщІыну ар къыддэІэпыкъунущ.
b «ГъащІэ мыухыж уиІэу псэу!» жыхуиІэ тхылъым и 32-нэ урокым ит 4-нэ Іыхьэм феплъ. Абы нэмыщІ «Алыхьым и Пащтыхьыгъуэм 1914 гъэм тепщэн щІидзащ» жыхуиІэ видеом jw.org сайтым фыщеплъ.
c Даниил тхылъым ит къэхъун хуей псалъэхэм теухуауэ 2012-нэ гъэм, мэкъуауэгъуэм и 15-м къыдэкІа «ХъумакІуэ чэщанэм» и 14—19 напэкІуэцІхэм нэхъыбэ къыщыфщІэфынущ.
d Куэд мыщІэу къэхъуным теухуауэ «Царство Бога правит!» жыхуиІэ тхылъым и 21-нэ псалъащхьэм нэхъыбэ къыщыфщІэфынущ.