Ди тхыгъэхэм еджэхэм я упщІэхэр

Тхьэ Іуэным теухуауэ сыт Библием жиІэр?

Словарым зэритымкІэ, тхьэ Іуэным къикІыр ар «жыпІэр зыжепІэм и фІэщ пщІын папщІэ тхьэм и цІэкІэ псалъэ быдэ тыныращ»a. Апхуэдэ тхьэрыІуэр псалъэкІэ жыІауэ е тхауэ щытыфынущ.

Хьисэ жиІащ: «Тхьэ зэи фІуэ хъунукъым... [] «Аращ» жыфІэу псалъэ жыфІэмэ, абы фытет, «Хьэуэ, аракъым» жыфІэмэ, абыи фытемыкІ. Абы къемызэгъыр шейтІаным и Іуэхум щыщщ» (Мт. 5:33—37). Аращ языныкъуэ цІыхухэм тхьэ пІуэ мыхъуну къыщІалъытэр. Ауэ сыт Хьисэ зи гугъу ищІар? ДауикІ, ар щыгъуазэт Алыхьым и лэжьакІуэхэм тхьэ яІуэну Мусэ и Хабзэм хуигъэушу зэрыщытар (ЩІэдз. 14:22, 23; Исх. 22:10, 11). Абы нэмыщІ Хьисэ ищІэт езы Иегови «езым и цІэкІэ псалъэ быдэ» зэритар (Евр. 6:13—17). КъызэрыщІэкІымкІэ, Хьисэ и псалъэхэм къикІкъым зэи тхьэ пІуэ мыхъуну. Абы апхуэдэу щІыжиІар цІыхухэм мыхьэнэшхуэ зимыІэ Іуэхухэм теухуауэ тхьэ ямыІуэн щхьэкІэу къыщІэкІынущ. Псалъэ ттар сыт щыгъуи дгъэзэщІэжыну ди къалэну щытщ, сыт щхьэкІэ жыпІэмэ апхуэдэу дыщытыну езы Иеговэ хуейщ.

Ауэ Іуэху гуэрым теухуауэ тхьэлъанэ къэфхьыну къыфпаубыду щытмэ, сыт фщІэ хъунур? Япэрауэ, ар вгъэзэщІэфынрэ фымыгъэзэщІэфынрэ фегупсыс. Абы шэч гуэр къытефхьэмэ, тхьэ фымыІуэмэ, нэхъыфІщ. Алыхьым и Псалъэм щыжыІащ: «Псалъэ умытмэ, нэхъыфІщ, ар птырэ умыгъэзэщІэж нэхърэ» (Эккл. 5:5). Абы нэмыщІ тхьэ Іуэным теухуауэ Библием ит принципхэм фыхэплъи, абыхэм тету гъэса фи напэм къезэгъ унафэ къафщтэ. Сыт хуэдэ принципхэм фегупсыс хъуну?

Языныкъуэ тхьэлъанэхэр Алыхьым и Іэмырым тохуэ. Псалъэм папщІэ, Иеговэ и Щыхьэтхэм нэчыхь щатхым деж псалъэ зрат. Апхуэдэу зрат псалъэхэм тхьэлъанэм иІэ къарум хуэдэ щІэлъщ. Алыхьымрэ цІыхухэмрэ я пащхьэм щауэмрэ нысащІэмрэ псалъэ щат «зэгъусэу дунейм тетыхукІэ» фІыуэ зэрылъагъуну икІи пщІэ зыхуащІыну. (Щауэмрэ нысащІэмрэ мы псалъэхэр жамыІэу щытми, абыхэм я зэгурыІуэныгъэр тхьэ яІуа хуэдэу Алыхьым къелъытэ.) Абы иужь ахэр зэщхьэгъусэ мэхъу икІи абыхэм я нэчыхьыр игъащІэкІэ яхъумэн хуейщ (ЩІэдз. 2:24; 1 Кор. 7:39). Апхуэдэ тхьэлъанэхэр Алыхьым и Іэмырым тохуэ.

Языныкъуэ тхьэлъанэхэр Алыхьым и Іэмырым техуэкъым. Алыхьым и лэжьакІуэ пэжым псалъэ итыну къыпаубыдынкІэ хъунущ щыпсэу къэралыр Іэщэ иІыгъыу ихъумэну е Иеговэ епцІыжыну. Ауэ абы апхуэдэ тхьэлъанэ итынукъым, сыт щхьэкІэ жыпІэмэ ар Алыхьым и хабзэхэм пэщІоувэ. Хьисэ зэрыжиІамкІэ, и лъэужь ирикІуэхэр «мы дунейм щыщкъым» (Ин. 15:19). Абы къыхэкІкІэ мы дунейм къыщекІуэкІ зауэхэмрэ зэдэуэныгъэхэмрэ дэ дыхэт хъунукъым (Ис. 2:4; Екъуб 1:27).

Иныкъуэхэм деж цІыхум тхьэ иІуэнрэ имыІуэнрэ зэлъытар абы и напэращ. Апхуэдэхэм деж тхьэлъанэ къэпхьын ипэ абы ит псалъэхэм куууэ уегупсысмэ, нэхъыфІщ. АбыкІэ Хьисэ жиІа мы псалъэхэр къыбдэІэпыкъуфынущ: «Кесарым ейр кесарым ефтыж, Тхьэм ейри Тхьэм ефтыж» (Лк. 20:25).

Псалъэм папщІэ, Алыхьым и лэжьакІуэм къещІэ, нэгъуэщІ къэралым и паспорт къратын щхьэкІэ, присягэ итын зэрыхуейр. А псалъэхэм Алыхьым ифІэмыфІ гуэр цІыхум ищІэн хуейуэ хэту щытмэ, Библием тету гъэса и напэм ар хуигъэушынущ апхуэдэ тхьэлъанэ имытыну. Ауэ иныкъуэхэм деж къэрал унафэщІхэм цІыхур хуит ящІ, и напэм къызэрезэгъым хуэдэу, присягэм ит псалъэхэр ихъуэжыну.

Рим 13:1 щыжыІащ: «Тепщэныгъэ зиІэхэм яхуэІурыщІэу щрет хэти». Абы къыхэкІкІэ Алыхьым и лэжьакІуэр мыпхуэдэу егупсысыфынущ: «Алыхьым и Іэмырым темыхуэ псалъэхэр иджы присягэм щыхэмыткІэ, ар къэсхьыным зыри Іей хэлъкъым».

Абы нэмыщІ, тхьэлъанэ птын щхьэкІэ, хьэпшып гуэр къэбгъэсэбэпыну е уи Іэр зыгуэру пщІын хуейуэ къыщыбжаІэм деж Библием тету гъэса уи напэм уедэІуэным мыхьэнэшхуэ иІэщ. Пасэрей зэманым псэуа римлянхэмрэ скифхэмрэ пэж зэрыжаІэм щыхьэт техъуэн щхьэкІэ, джатэ яІыгъыу зауэм и тхьэр къраІуэу тхьэлъанэ къахьт. Алыджхэми тхьэ щаІуэкІэ я Іэр уафэм драІэтейт. Апхуэдэу абыхэм къагъэлъагъуэт цІыхухэм я псалъэхэмрэ я ІуэхущІафэхэмрэ кІэлъыплъу уафэм къару гуэр зэрыщыІэр икІи абы и деж жэуап щатыжын зэрыхуейр.

ДауикІ, Иеговэ и лэжьакІуэм къэралым и дамыгъэр е тхьэ нэпцІхэм пыщІа хьэпшып гуэр къигъэсэбэпу тхьэ иІуэнукъым. Ауэ хеящІэм и пащхьэм уиту Библием уи Іэр теплъхьэу пэжыр зэрыжыпІэнымкІэ тхьэлъанэ къэпхьыну къыбжаІэмэ-щэ? Алыхьым и лэжьакІуэр абы арэзы техъуэнкІэ хъунущ, сыт щхьэкІэ жыпІэмэ пасэрей зэманым псэуа цІыхухэми тхьэ щаІуэкІэ я Іэхэр зыгуэру ящІт (ЩІэдз. 24:2, 3, 9; 47:29—31). ДауикІ, дэ зыщыдгъэгъупщэн хуейкъым: абы щыгъуэ Алыхьым и пащхьэм пцІы фымыупсыну псалъэ фот. Дэтхэнэ зы упщІэми жэуап пэж ефтыну фыхьэзыру фыщытын хуейщ.

Иеговэрэ дэрэ ди зэхуаку дэлъ зэхущытыкІэр дэ лъапІэу долъытэ. Абы къыхэкІкІэ тхьэ тІуэн ипэ Алыхьым лъэІукІэ зыхуэдгъэзэн хуейщ. Абы нэмыщІ Библием ит принципхэмрэ ди напэмрэ а тхьэлъанэр дгъэзэщІэну къезэгърэ къемызэгърэ зэхэдгъэкІмэ, нэхъыфІщ. Тхьэ пІуауэ щытмэ, абы уепцІыж хъунукъым (1 Пет. 2:12).