ПщІэуэ пІэрэ?

Израил цІыхухэм нысащІэм щхьэкІэ щхьэщэхуж уасэ щІатыр сытыт?

БИБЛИЕР зытепсэлъыхьыж зэманым нэчыхь зыщращІылІэкІэ щауэм и лъэныкъуэм нысащІэм и унагъуэм щхьэщэхуж уасэ иритт, псалъэм папщІэ, хьэпшып лъапІэхэр, псэущхьэхэр е ахъшэ. Иныкъуэхэм деж нысащІэр къищэхужын щхьэкІэ щауэм лэжьыгъэ гуэр игъэзэщІэн хуей хъут. Аращ Екъуб ищІауэ щытар: Рахэл и адэм и хъушэхэр илъэсиблкІэ игъэхъуащ а хъыджэбзыр къишэн щхьэкІэ (ЩІэдз. 29:17, 18, 20). Сытыт апхуэдэ хабзэ къыщІекІуэкІыр?

Зы тхылъ гуэрым зэрыжиІэмкІэ, «пасэрей Ираилым адэм и пхъур афІэкІа къызэрыдэмыІэпыкъужынум щхьэкІэ щауэм и щыкъу адэм [нысащІэм щхьэкІэ щхьэщэхуж уасэ] иритт»a. Мэкъумэш лэжьыгъэм ирипсэу унагъуэм и дежкІэ зы цІыхукІэ нэхъ мащІэ ухъуныр хэщІышхуэт. Абы нэмыщІ апхуэдэ хабзэм щауэмрэ нысащІэмрэ я унагъуэхэр зэкъуэт ищІт. Благъэ зэхуэхъуа унагъуитІыр зэман гугъум зэдэІэпыкъужт. НысащІэм щхьэкІэ щхьэщэхуж уасэ зэрыщІатам къигъэлъагъуэт ар куэд мыщІэу зэрыдэкІуэнур икІи дяпэкІэ ар зыхуей хуэзыгъэзэнур и адэр мыхъуу, и щхьэгъусэрауэ зэрыщытыр.

НысащІэм щхьэкІэ щхьэщэхуж уасэ зэратыр хабзэу къызэрекІуэкІым къикІтэкъым журтхэр цІыхубзым къэпщэху-пщэж хъун хьэпшыпым хуэдэу хущыту. Зы энциклопедием зэритымкІэ, «израил цІыхухъухэм я щхьэгъусэхэр къащэхуу жызыІэхэр щоуэ»b. НысащІэм щхьэкІэ ахъшэ е нэгъуэщІ мылъку зэрыщІатым апхуэдэу уригъэпсысыфынут, ауэ Библиер зыдж Боб Атли мыращ жиІэр: «НысащІэр къащэхуу аратэкъым, атІэ унагъуэм зы дэІэпыкъуэгъукІэ нэхъ мащІэ зэрыхъуар япшыныжу арат»c.

Языныкъуэ къэралхэм иджыри къыздэсым апхуэдэ хабзэ къыщокІуэкІ. Иеговэ и лэжьакІуэхэм я пхъум щхьэкІэ щхьэщэхуж уасэ къащтэну хуеймэ, сыт хуэдэ чэнджэщ зыщагъэгъупщэн хуэмейр? «Фи гущабагъэр цІыху псоми нахуэ яхурехъу» жыхуиІэ принципыр, дауикІ, мы Іуэхум хуокІуэ (Флп. 4:5; 1 Кор. 10:32, 33). Адэ-анэм зэхэщІыкІ яхэлъмэ, щауэм и унагъуэм хуэмыгъэкъаруун уасэ я пхъум хуагъэувынукъым, сыт щхьэкІэ жыпІэмэ ахэр хуейкъым ахъшэ фІыуэ зылъагъу цІыху нэпсейуэ щытыну (2 Тим. 3:2). Абы нэмыщІ адэ-анэм уасэ иныІуэ ямыгъэувмэ, щауэм хьэгъуэлІыгъуэр щытриухуа зэманым иригъэкІуэкІыфынущ икІи куэдыІуэрэ лэжьэн хуей хъунукъым. НысащІэм и адэ-анэр, дауикІ, хуейкъым малъхъэ яхуэхъуну щІалэм щхьэщэхужым и уасэр нэхъ псынщІэу зэхуихьэсын щхьэкІэ пионер лэжьыгъэр къигъэнэну.

НысащІэм щхьэкІэ ят щхьэщэхужым теухуауэ къэралым унафэ гуэрхэр къыдигъэкІауэ щытмэ, Иеговэ и лэжьакІуэхэм ахэр ягъэзэщІэн хуейщ. Сыт абы и щхьэусыгъуэр? Библием дэр щхьэкІэ мыпхуэдэ унафэ итщ: «Тепщэныгъэ зиІэхэм яхуэІурыщІэу щрет». Абы къыхэкІкІэ къэрал унафэр Алыхьым и хабзэхэм пэщІэмыувэмэ, дэ ар дгъэзэщІэну ди къалэнщ (Рим 13:1; Апост. 5:29).