ПщІэуэ пІэрэ?

Израил цІыхухэм къурмэныпхъэу губгъуэ тхьэрыкъуэм нэмыщІ, тхьэрыкъуэхэри къахь хъуну Иеговэ хуитІ щІищІар сытыт?

МУСЭ И ХАБЗЭМКІЭ тхьэрыкъуэхэм нэмыщІ губгъуэ тхьэрыкъуэхэри Иеговэ къурмэныпхъэу къыхуэпхь хъунут. Къурмэныпхъэхэм теухуа унафэхэм ущеджэкІэ а бзууитІыр зэкІэлъыкІуэу дэнэ дежи итщ икІи абыхэм щыщу дэтхэнэри къурмэныпхъэу къэпхьыну ухуитт (Лев. 1:14; 12:8; 14:30). Журтхэм я дежкІэ абы мыхьэнэшхуэ иІэт, сыт щхьэкІэ жыпІэмэ губгъуэ тхьэрыкъуэр щомыгъуэт куэдрэ къэхъут.

Губгъуэ тхьэрыкъуэхэр бзу лъэтэжхэм ящыщщ. Абы къыхэкІкІэ Израилым абыхэм ущрихьэлІэр щыхуабэм дежт. Жэпуэгъуэм ахэр щІыпІэ хуабэхэм мэлъэтэжри, къыщагъэзэжыр гъатхэращ (Песня 2:11, 12; Иер. 8:7). ГурыІуэгъуэщ пасэрей зэманым щІымахуэм губгъуэ тхьэрыкъуэхэр къэбгъуэтыну гугъуу зэрыщытар.

Ауэ тхьэрыкъуэхэр зыщІыпІи лъэтэжкъым. А бзухэм Израилым сыт хуэдэ зэманми ущрохьэлІэ икІи ахэр цІыхухэм зэрахуэ. (Евгъапщэ Иуан 2:14, 16.) Палестинэ щІыналъэм тхьэрыкъуэхэр къалэхэми къуажэхэми щыІэт. Зы тхылъ гуэрым мыпхуэдэу итщ: «ТхьэмыщкІэ дыдэ мыхъуу, адрейхэм псоми езыхэм я тхьэрыкъуэ яІэжт. [...] Мылъкушхуэ зыбгъэдэмылъ нэгъуни и пщІантІэм е и унэм тхьэрыкъуэ щызэрихуэт»a. И нэхъыбэм тхьэрыкъуэщыр цІыхур зыщІэс унэм и блыным хэщІыхьауэ арат. (Евгъапщэ Исайя 60:8.)

Зэрытлъагъущи, израил цІыхухэм мы бзууитІым щыщу къагъуэтыну нэхъ тыншыр къурмэныпхъэу къахь хъунут. Абы къегъэлъагъуэ Иеговэ лъагъуныгъэ зыхэлъ Алыхьу зэрыщытыр икІи тхузэфІэмыкІын зэи къызэрытхуимыгъэувыр.