Иеговэ къытхуиІэ пэжагъ зыхэлъ лъагъуныгъэр къызыхэщыр сыт?

1. Иеговэ сытым дыхуигъэушрэ?

ИЕГОВЭ пэжагъ зыхэлъ лъагъуныгъэр зэригъэлъагъуэм гуфІэгъуэ хех (Ос. 6:6). Абы нэмыщІ ар хуейщ а хьэл-щэн дахэр и лэжьакІуэхэми ягъэлъэгъуэну. Бегъымбар Михей къигъэсэбэпу Алыхьым дыхуегъэуш «фІыр», е, нэгъуэщІу жыпІэмэ, пэжагъ зыхэлъ лъагъуныгъэр, фІыуэ тлъагъуну (Мих. 6:8). Ауэ ар зэрыдгъэлъэгъуэну щІыкІэр тщІэн щхьэкІэ пэжагъ зыхэлъ лъагъуныгъэр зищІысыр сытми къыдгурыІуэн хуейщ.

2. Пэжагъ зыхэлъ лъагъуныгъэм лъабжьэ хуэхъур сыт?

² ДунеищІэкІэ еджэу урысыбзэкІэ зэдзэкІа Тхыгъэ ЛъапІэм «пэжагъ зыхэлъ лъагъуныгъэ» жыхуиІэ псалъэхэм 230 хуэдизрэ дыщрохьэлІэ. Сыт абыхэм къикІыр? А Библием ит «Словарь библейских слов и выражений» жыхуиІэм деплъмэ, а хьэл-щэным теухуауэ мыпхуэдэу итщ: «Апхуэдэ лъагъуныгъэр зэпІэзэрыту щытщ, принципхэм тетщ, сыт щыгъуи пэжагъ егъэлъагъуэ икІи ныбжьэгъугъэ быдэ хэлъщ. Алыхьым цІыхухэм яхуиІэ лъагъуныгъэм и гугъу щащІым деж а псалъэхэр щІэх-щІэхыурэ къагъэсэбэп. Ауэ цІыхухэми я зэхуаку апхуэдэ лъагъуныгъэ дэлъыфынущ». Мы статьям дэ дыщытепсэлъыхьынущ Иеговэ пэжагъ зыхэлъ лъагъуныгъэр цІыхухэм дапхуэдэу яхуигъэлъагъуэми. КъыкІэлъыкІуэ статьям щызэпкърытхынущ Алыхьым и лэжьакІуэхэм Иеговэ щапхъэ трахыу а хьэл-щэныр дауэ ягъэлъэгъуэфынуми.

ИЕГОВЭ «ФІЫЛЪАГЪУНЫГЪЭР И КУЭДЩ»

3. Иеговэ езым теухуауэ Мусэ сыт къыхузэІуихар?

³ Иеговэ израил лъэпкъыр Мысыр гъэрыпІэм къришыжа иужь куэд дэмыкІыу езымрэ и цІэмрэ теухуауэ мыхьэнэшхуэ зиІэ гуэр Мусэ жриІащ: «Иеговэ, Иеговэ — Алыхь гу щабэщ икІи гущІэгъу хэлъщ, тэмакъкІыхьщ, фІылъагъуныгъи пэжагъи и куэдщ, и лъагъуныгъэр мин бжыгъэхэм ярегъэлъагъу, хабзэншагъэр, щІэпхъаджагъэр, гуэныхьыр егъэгъу» (Исх. 34:6, 7). ДауикІ, Иеговэ апхуэдэ хьэл-щэн дахэхэр хэлъу зэрытщІэм дэ хуабжьу дегъэгушхуэ. Ауэ пэжагъ зыхэлъ лъагъуныгъэм теухуауэ Иеговэ Мусэ иджыри зыгуэр къыхузэІуихащ. Сыт ар зищІысыр?

4, 5. 1) Иеговэ езым теухуауэ сыт къытхузэІуихар? 2) АдэкІэ сыт хуэдэ упщІэхэр зэпкърытхыну?

⁴ Библиер Иеговэ щытепсэлъыхьым деж абы пэжагъ зыхэлъ лъагъуныгъэр игъэлъагъуэ закъуэу жиІэкъым. Иеговэ «фІылъагъуныгъэр и куэдщ», нэгъуэщІу жыпІэмэ, ар апхуэдэ лъагъуныгъэкІэ зэхэлъщ. ДунеищІэкІэ еджэу урысыбзэкІэ зэдзэкІа Библием апхуэдэ псалъэхэм иджыри блэнейрэ ущрохьэлІэ (Чис. 14:18; Неем. 9:17; Пс. 86:15; 103:8; 145:8; Иоиль 2:13; Иона 4:2, сноскэ)b. А псалъэхэр Иеговэ фІэкІа нэгъуэщІ зыми хуэгъэзауэ Библием иткъым. Сыт абы и щхьэусыгъуэр? ГурыІуэгъуэщ: Иеговэ хуейщ а хьэл-щэныр зэрыхэлъыр дэ тщІэну. Абы теухуауэ пащтыхь Даут итха псаломым мыпхуэдэ псалъэхэр итщ: «Иеговэ, уэ бгъэлъагъуэ пэжагъ зыхэлъ лъагъуныгъэр уафэм нос... Сыту лъапІэ уэ бгъэлъагъуэ пэжагъ зыхэлъ лъагъуныгъэр, си Алыхь! Уи дамэхэм я жьауэм цІыхухэм хъумапІэ къыщагъуэт» (Пс. 36:5, 7). Дэри, Даут хуэдэу, Иеговэ пэжагъ зыхэлъ лъагъуныгъэр зэригъэлъагъуэр фІыщІэ тщІыуэ пІэрэ?

⁵ Пэжагъ зыхэлъ лъагъуныгъэр зищІысыр сытми нэхъыфІу къыдгурыІуэн щхьэкІэ дэ упщІитІ зэпкърытхынущ: Иеговэ пэжагъ зыхэлъ лъагъуныгъэр зыхуигъэлъагъуэр хэт? Апхуэдэ лъагъуныгъэр Иеговэ зэрытхуигъэлъагъуэм сыт хуэдэ фІыгъуэхэр къытхуихьрэ?

ИЕГОВЭ ПЭЖАГЪ ЗЫХЭЛЪ ЛЪАГЪУНЫГЪЭР ЗЫХУИГЪЭЛЪАГЪУЭР ХЭТ?

6. Иеговэ пэжагъ зыхэлъ лъагъуныгъэр зыхуигъэлъагъуэр хэт?

⁶ Мы дунейм Іуэхугъуэ куэд фІыуэ пхуэлъагъунущ. Псалъэм папщІэ, Библием щыжыІащ зыгуэрым щІым телэжьыхьыныр, шагъырыр, дагъэр, ущиер, щІэныгъэр, Іущагъыр икІи нэгъуэщІ гуэрхэри фІыуэ зэрилъагъуфынур (2 Лет. 26:10; Прит. 12:1; 21:17; 29:3, Гъэсэпэтхыдэхэр). Ауэ хьэпшыпхэм икІи нэгъуэщІ Іуэхугъуэхэм пэжагъ зыхэлъ лъагъуныгъэр уахуиІэфынукъым, ар зыхуэгъэзар цІыхухэращ. НтІэ, Иеговэ апхуэдэ лъагъуныгъэр цІыхухэм псоми яхуиІэу пІэрэ? Хьэуэ. Ар зыхуигъэлъагъуэр и ныбжьэгъу пэжхэращ. Иеговэ абыхэм теухуауэ мурад дахэ иІэщ икІи ар абы имыгъэзащІэу къэнэнукъым.

7. Иеговэ цІыхухэр псори фІыуэ зэрилъагъур сытым къыхэщрэ?

⁷ Иеговэ цІыхухэм псоми лъагъуныгъэ яхуегъэлъагъуэ. Хьисэ Никодим мыпхуэдэу жриІауэ щытащ: «Тхьэм дунейм и цІыхухэр апхуэдизкІэ фІыуэ илъэгъуати, езым и Къуэ закъуэр итащ, Тхьэм и КъуэмкІэ фІэщхъуныгъэ зиІэ дэтхэнэри мыкІуэду къелын икІи мыкІуэдыжын гъащІэ иІэ хъун щхьэкІэ» (Ин. 3:1, 16; Мт. 5:44, 45).

8, 9. 1) Иеговэ и лэжьакІуэхэм пэжагъ зыхэлъ лъагъуныгъэр щІахуигъэлъагъуэр сыт? 2) АдэкІэ сыт зэпкърытхынур?

⁸ Ауэ, ипэкІэ зэрыжытІащи, Иеговэ пэжагъ зыхэлъ лъагъуныгъэр зыхуигъэлъагъуэр зэхущытыкІэ хэха зыхуиІэхэращ — ар и лэжьакІуэ пэжхэращ. Пащтыхь Даутрэ бегъымбар Данилрэ ятха Библием ит псалъэхэм ар ІупщІу къыхощ. Даут мыпхуэдэу жиІащ: «Уэ укъэзыцІыхухэр фІыуэ плъагъун щомыгъэт»; «Иеговэ фІэлІыкІхэм пэжагъ зыхэлъ и лъагъуныгъэр игъащІэкІэ зыхащІэнущ» (Пс. 36:10; 103:17). Бегъымбар Данили мыпхуэдэу итхащ: «Тепщэу си Тхьэ ин, телъыджэ! Уи лъэпкъым епщІылІа зэгурыІуэныгъэр пхъумэу, фІыуэ укъэзылъагъуу уи унафэхэр зыгъэзащІэхэм Уэ уахуэпэжщ [пэжагъ зыхэлъ лъагъуныгъэр яхубогъэлъагъуэ]» (Дан. 9:4, ДБ, 2018). Мы псалъэхэм къызэрагъэлъагъуэмкІэ, Иеговэ и лэжьакІуэхэм пэжагъ зыхэлъ лъагъуныгъэр яхуегъэлъагъуэ, сыт щхьэкІэ жыпІэмэ абыхэм ар яцІыху, щошынэ, фІыуэ ялъагъу икІи и хабзэхэм тетщ. Иеговэ пэжагъ зыхэлъ лъагъуныгъэр и лэжьакІуэ пэжхэм фІэкІа нэгъуэщІхэм зыми хуигъэлъагъуэкъым.

⁹ Дэ Иеговэ иджыри дыщыхуэмылажьэм щыгъуэ, абы цІыхухэр псори фІыуэ зэрилъагъум хуэдэу, дэри дилъагъут (Пс. 104:14). Ауэ абы и лэжьакІуэ дыхъуа иужь пэжагъ зыхэлъ и лъагъуныгъэр дэ зыхэтщІащ. Иеговэ дэтхэнэ зы и лэжьакІуэми мыпхуэдэ псалъэ гуапэхэмкІэ зыхуегъазэ: «Пэжагъ зыхэлъ лъагъуныгъэ пхузиІэм зэи кІэух иІэнукъым» (Ис. 54:10). Дэри, Даут хуэдэу, ди щхьэкІэ зыхэтщІащ «Иеговэ и нэфІыр къыхуэпэжхэм псом хуэмыдэу» зэрыщыхуэр (Пс. 4:3). Иеговэ апхуэдэу хэхауэ къызэрытхущытым дэ сытым дыхуигъэушын хуей? Абы теухуауэ псаломыр зытхам мыпхуэдэ псалъэхэр жиІащ: «Іущагъ зыхэлъым абы гу лъитэнщ икІи Иеговэ къытхуиІэ пэжагъ зыхэлъ лъагъуныгъэм куууэ щІэгупсысынщ» (Пс. 107:43). Мы псалъэхэр дигу илъу Иеговэ и лэжьакІуэхэм пэжагъ зыхэлъ лъагъуныгъэр зэрахуигъэлъагъуэм и лъэныкъуищым дегупсысынщ.

ИЕГОВЭ ПЭЖАГЪ ЗЫХЭЛЪ ЛЪАГЪУНЫГЪЭР КЪЫЗЭРЫТХУИІЭМ СЫТ ХУЭДЭ ФІЫГЪУЭХЭР КЪЫТХУИХЬРЭ?

10. Иеговэ къытхуиІэ пэжагъ зыхэлъ лъагъуныгъэм кІэух зэримыІэр тщІэным мыхьэнэшхуэ щІиІэр сыт? (Псалом 31:7).

¹⁰ Алыхьым къытхуиІэ пэжагъ зыхэлъ лъагъуныгъэм кІэух иІэнукъым. Псалом 136-м а мыхьэнэшхуэ зиІэ гупсысэм 26-рэ щытопсэлъыхь. Ар мыпхуэдэ псалъэхэмкІэ щІедзэ: «Иеговэ фІыщІэ хуэфщІ, сыт щхьэкІэ жыпІэмэ ар фІыщ. Абы къытхуиІэ пэжагъ зыхэлъ лъагъуныгъэм кІэух иІэнукъым» (Пс. 136:1). Абы иужь етІуанэ едзыгъуэм щыщІэдзауэ 26-м нэс мыпхуэдэ псалъэхэр къытригъэзэжурэ жеІэ: «Сыт щхьэкІэ жыпІэмэ пэжагъ зыхэлъ абы и лъагъуныгъэр сыт щыгъуи щыІэнущ». А псаломым дыщеджэкІэ дэ хуабжьу догъэщІагъуэ Иеговэ пэжагъ зыхэлъ лъагъуныгъэр Іэмал зэмылІэужьыгъуэ куэдкІэ къызэрытхуигъэлъагъуэр. А псалъэхэм дыкъагъэгугъэ Иеговэ и лъэпкъыр фІыуэ илъагъуну зэи зэрыщимыгъэтынур. Ди ныкъусанхэм емылъытауэ, Иеговэ зыри къытхэмыкІыну дыкъилъытэкъым икІи и щІыб къытхуигъазэкъым, атІэ и гур къыткІэрыпщІауэ щыту жыпІэ хъунущ икІи ныбжьэгъу пэжу къытхущытыну ар хуейщ, псом хуэмыдэу гугъуехьхэм дыщыпэщІэхуэм деж. ДауикІ, ар зэрытщІэм дэ гупсэхугъуэ къыдет. Сыт хуэдэ фІыгъуэхэр дэ абы къытхуихьрэ? Иеговэ апхуэдэу гуапэу къызэрытхущытым дэ гуфІэгъуэ къытхуехь, абы нэмыщІ ди гугъуехьхэм дыпэлъэщын икІи абы хуэпэжу дыхуэлэжьэн щхьэкІэ къару къытхелъхьэ. (Къеджэ Псалом 31:7.)

11. Псалом 86:5 зэритымкІэ, Иеговэ ди гуэныхьхэр къытхуигъэгъуну хуэзыгъэушыр сыт?

¹¹ Пэжагъ зыхэлъ лъагъуныгъэм Алыхьыр хуегъэуш ди гуэныхьхэр къытхуигъэгъуну. ЦІыхур и гуэныхьым щыхущІегъуэжым икІи и гъащІэм зэхъуэкІыныгъэ щыхилъхьэм деж Иеговэ абы гу лъетэ. Пэжагъ зыхэлъ лъагъуныгъэм ар хуегъэуш а цІыхум хуигъэгъуну. Иеговэ теухуауэ Даут мыпхуэдэу жиІащ: «Абы ди гуэныхьхэр къытхуегъэгъу икІи ди мыхъумыщІагъэхэм къыпэкІуэр дигъэпшыныжкъым» (Пс. 103:8—10). Езы Даут фІыуэ ищІэт цІыхум и напэр къыщеныкъуэкъум деж ар и гум къызэрытехьэлъэр. Ауэ абы иджыри ищІэт Иеговэ къытхуигъэгъуну зэрыхьэзырыр. Апхуэдэу къытхущытыну Иеговэ сыт хуэзыгъэушыр? А упщІэм и жэуапыр Даут Псалом 86:5 иритхащ (къеджэ). А псаломым ит тхьэлъэІум къыдгурегъаІуэ Иеговэ зыкъыхуэзыгъазэ псоми хуигъэгъуну зэрыхьэзырыр, сыт щхьэкІэ жыпІэмэ абы и «пэжагъ зыхэлъ лъагъуныгъэр инщ» (Пс. 103:11).

12, 13. Япэм тщІа щыуагъэхэр ди гум егъэлеяуэ къытехьэлъэу щытмэ, сыт дэ къыддэІэпыкъунур?

¹² ЦІыхум гуэныхь зэрищІар и жагъуэ хъумэ, ар фІыщ, уеблэмэ, абы и сэбэпи къыхэкІынущ. Сыт щхьэкІэ жыпІэмэ абы и напэр къызэреныкъуэкъум къыхэкІкІэ и гуэныхьым хущІегъуэжынкІэ хъунущ икІи и гъащІэм зэхъуэкІыныгъэхэр хилъхьэфынущ. Ауэ Алыхьым и лэжьакІуэ гуэрхэм япэм ящІа щыуагъэхэм щхьэкІэ я напэр егъэлеяуэ къоныкъуэкъу. Ахэр я гуэныхьхэм хущІегъуэжауэ щытми, я гум адэкІи егъэкъуаншэ икІи Иеговэ абыхэм зэи къахуимыгъэгъуну я гугъэщ. Апхуэдэ гурыщІэхэр фиІэу щытмэ, фэ абыхэм фыпэлъэщыфынущ. Сыт абыкІэ къывдэІэпыкъунур? Иеговэ пэжагъ зыхэлъ лъагъуныгъэр къызэрыфхуиІэм фегупсыс, сыт щхьэкІэ жыпІэмэ абыкІэ езы Алыхьым фыкъегъэгугъэ.

¹³ Сыт хуэдэ фІыгъуэхэр дэ абы къытхуихьрэ? Дэ ныкъусан зэрытхэлъым емылъытауэ, напэ къабзэ диІэу икІи гуфІэгъуэ ди гум илъу Иеговэ дыхуэлэжьэфынущ. Сыт щхьэкІэ жыпІэмэ «Тхьэм и Къуэу Хьисэм и лъыуэ жорым [«пкъом», ДЩІ] щыщІэкІам гуэныхь псори ди гум ирегъэкъэбзыкІыж» (1 Ин. 1:7). Фи щыуагъэхэм фыхущІегъуэжамэ, ауэ фи гур адэкІи къывэныкъуэкъуу щытмэ, зыщывмыгъэгъупщэ: Иеговэ къыфхуигъэгъуну хьэзыру зэрыщытым нэмыщІ, ар абы хуабжьу хуейщ! Псалом 103-м Даут къыхигъэщащ Иеговэ къытхуиІэ пэжагъ зыхэлъ лъагъуныгъэмрэ гуэныхьхэр къытхуигъэгъуну зэрыхуеймрэ зэрызэпхар. Абы итхащ: «Уафэр щІылъэм нэхърэ нэхъ лъагэу зэрыщытым хуэдэу, Алыхьым фІэлІыкІ хузиІэхэм яхуигъэлъагъуэ пэжагъ зыхэлъ лъагъуныгъэр инщ. КъуэкІыпІэмрэ къухьэпІэмрэ зэрызэпэжыжьэм хуэдэу, абы ди гуэныхьхэр тпэжыжьэ ищІащ» (Пс. 103:11, 12). Пэжщ, Иеговэ и гум къыбгъэдэкІыу къытхуигъэгъуну сыт щыгъуи хьэзырщ (Ис. 55:7).

14. Иеговэ къытхуиІэ пэжагъ зыхэлъ и лъагъуныгъэм дыкъызэрихъумэр Даут сытым иригъэщхьа?

¹⁴ Иеговэ пэжагъ зыхэлъ и лъагъуныгъэм абырэ дэрэ ди зэхуаку дэлъ зэхущытыкІэр къехъумэ. Даут Иеговэ хуиуса уэрэдым мыпхуэдэ псалъэхэр хэтт: «Уэращ си хъумапІэр. Уэ гузэвэгъуэшхуэхэм сыщыпхъумэнущ икІи сыкъебгъэлынущ — сыкъэзыухъуреихь цІыхухэри гуфІэгъуэшхуэм зэщІищтэнущ. ...Иеговэ щыгугъыр пэжагъ зыхэлъ и лъагъуныгъэмкІэ къехъумэ» (Пс. 32:7, 10). Даут щыпсэуа зэманым къалэр бийхэм щахъумэн щхьэкІэ ихъуреягъкІэ блын яухуэт. Апхуэдэ дыдэу Иеговэ пэжагъ зыхэлъ и лъагъуныгъэмкІэ дыкъеухъуреихь абырэ дэрэ ди зэхуаку дэлъ зэхущытыкІэр ихъумэн щхьэкІэ. Абы нэмыщІ апхуэдэ лъагъуныгъэм Иеговэ и ныбжьэгъу дыхъуну Іэмал къыдет икІи а ныбжьэгъугъэм дэ дыкъехъумэ (Иер. 31:3).

15. Иеговэ пэжагъ зыхэлъ и лъагъуныгъэр хъумапІэмрэ быдапІэмрэ щІебгъэщхь хъунур сыт?

¹⁵ Иеговэ и лъэпкъыр къызэрихъумэм щытепсэлъыхьым щыгъуэ Даут иджыри зы щапхъэ дахэ къигъэсэбэпащ: «Уэращ, си Алыхь, си хъумапІэ быдэу щытыр, пэжагъ зыхэлъ лъагъуныгъэкІэ фІыуэ сыкъэзылъагъу Алыхьыр». НэгъуэщІ псаломыми абы Иеговэ теухуауэ мыпхуэдэу щыжиІащ: «Пэжагъ зыхэлъ и лъагъуныгъэмкІэ абы фІыуэ сыкъелъагъу, ар си быдапІэщ, си хъумапІэ быдэщ, си къегъэлакІуэщ, си мэІухущ. Абы и деж сэ хъумапІэ къыщызгъуэтащ» (Пс. 59:17; 144:2). Иеговэ пэжагъ зыхэлъ и лъагъуныгъэр Даут хъумапІэмрэ быдапІэмрэ сыт щІригъэщхьар? Иеговэ сыт и лъэныкъуэкІи и нэІэ къыттригъэтынущ абырэ дэрэ ди зэхуаку дэлъ зэхущытыкІэр тхъумэфын щхьэкІэ икІи дэ дыздэщыІэм ар елъытакъым, мыхьэнэ зиІэр абы пэжу дызэрыхуэлажьэращ. Апхуэдэ гупсысэр 91-нэ Псаломым къыхощ. А псалъэхэр Мусэ итхауэ къыщІэкІынущ: «Сэ Иеговэ жесІэнущ: „Уэращ си хъумапІэр икІи си быдапІэр“» (Пс. 91:1—3, 9, 14). Иеговэ хъумапІэу зэрыщытыр Мусэ 90-нэ Псаломыми щыжиІащ (Пс. 90:1, сноскэ). Абы и гъащІэр и кІэм щынэсам щыгъуэ Иеговэ теухуауэ мыпхуэдэу жиІащ: «Алыхьыр — ижь зэман лъандэрэ уи хъумапІэщ, игъащІэкІэ щыІэну и ІэхэмкІэ ар щІэгъэкъуэн къыпхуохъу» (Втор. 33:27). «ИгъащІэкІэ щыІэну и ІэхэмкІэ ар щІэгъэкъуэн къыпхуохъу» жыхуиІэ псалъэхэм Иеговэ пэжагъ зыхэлъ и лъагъуныгъэм теухуауэ иджыри зы лъэныкъуэ къытхузэІуах. Сыт хуэдэ?

16. Иеговэ сыт хуэдэ лъэныкъуитІкІэ къыддэІэпыкъурэ? (Псалом 136:23).

¹⁶ Иеговэ ди дежкІэ хъумапІэу щытмэ, дэ зы щхьэкІи дыгузэвэнукъым. Ауэ ди лъэр щІэхуауэ, къару дыщимыІэжи къохъу. Апхуэдэу дыщыщытым деж сыт Иеговэ ищІэр? (Къеджэ Псалом 136:23.) Дэ дыкъызэфІэувэжын щхьэкІэ абы и Іэхэр къешийри, щабэу къыддоІэпыкъу (Пс. 28:9; 94:18). Сыт хуэдэ фІыгъуэхэр дэ абы къытхуихьрэ? Иеговэ сыт щыгъуи щІэгъэкъуэн къызэрытхуэхъунум дэ шэч къытетхьэкъым. Япэрауэ, дэнэ дыщымыІэми, Иеговэ хъумапІэ къызэрытхуэхъуфынур дэ дощІэ. ЕтІуанэрауэ, уафэм щыІэ фІыуэ дыкъэзылъагъу ди Адэм гуапэу и нэІэ къызэрыттригъэтыр ди фІэщ мэхъу.

ИЕГОВЭ ПЭЖАГЪ ЗЫХЭЛЪ ЛЪАГЪУНЫГЪЭР КЪЫЗЭРЫФХУИІЭМ ШЭЧ КЪЫТЕВМЫХЬЭ

17. Иеговэ пэжагъ зыхэлъ лъагъуныгъэр къызэрытхуиІэм къыхэкІкІэ сыт дэ шэч къызытедмыхьэр? (Псалом 33:18—22).

¹⁷ Мы статьям къызэрыщытщІащи, сыт хуэдэ гъэунэхуапІэ димыхуами, Иеговэ пэжу дыкъыхуэнэну къызэрыддэІэпыкъунум шэч къытедмыхьэми хъунущ (2 Кор. 4:7—9). Бегъымбар Иеремие жиІащ: «Иеговэ игъэлъагъуэ пэжагъ зыхэлъ лъагъуныгъэм и фІыгъэкІэ ди гъащІэр тфІэкІуэдакъым, сыт щхьэкІэ жыпІэмэ абы и гущІэгъум кІэух иІэкъым» (Плач 3:22). Дэ быдэу ди фІэщ мэхъу Иеговэ пэжагъ зыхэлъ лъагъуныгъэр сыт щыгъуи къызэрытхуиІэнур, сыт щхьэкІэ жыпІэмэ псаломыр зытхам мыпхуэдэ псалъэхэр жиІащ: «Иеговэ кІэлъоплъ абы фІэлІыкІхэмрэ пэжагъ зыхэлъ и лъагъуныгъэм щыгугъхэмрэ». (Къеджэ Псалом 33:18—22.)

18, 19. 1) Сыт дэ зыщыдгъэгъупщэн хуэмейр? 2) КъыкІэлъыкІуэ статьям сыт щызэпкърытхынур?

¹⁸ Сыт дэ зыщыдгъэгъупщэн хуэмейр? Иеговэ цІыхухэр псори фІыуэ елъагъу. Абы и лэжьакІуэ дыхъун ипэ а лъагъуныгъэр дэ зыхэтщІащ. Ауэ Иеговэ и унагъуэшхуэм щыщ дыхъуа иужь дэ пэжагъ зыхэлъ и лъагъуныгъэри зыхэтщІащ. А лъагъуныгъэм къыхэкІкІэ Иеговэ сыт щыгъуи дыкъехъумэ. Абы зэи дыкъигъэнэнукъым, зэпымыууэ щІэгъэкъуэн къытхуэхъунущ икІи дыкъызэригъэгугъа псори игъэзэщІэжынущ. Ар хуейщ абырэ дэрэ ди зэхуаку дэлъ зэныбжьэгъугъэм кІэух имыІэну! (Пс. 46:1, 2, 7). Аращи, сыт хуэдэ гъэунэхуапІэ дыпэщІэмыхуэми, Иеговэ къару къыдитынущ абы хуэпэжу дыкъэнэн щхьэкІэ.

¹⁹ Иеговэ пэжагъ зыхэлъ лъагъуныгъэр и лэжьакІуэхэм дапхуэдэу яхуигъэлъагъуэми мы статьям къыщытщІащ. Ауэ апхуэдэ лъагъуныгъэр дэри ди зэхуаку дэлъыну ар къытщогугъ. Дапхуэдэу ар тщІы хъунуми къыкІэлъыкІуэ статьям дыщытепсэлъыхьынущ.