Дунейм и кІэухыр дапщэщ? Абы теухуауэ Хьисэ Мэссихь жиІар

МЫ ДУНЕЙМ И КІЭУХЫМ ТЕУХУАУЭ ХЬИСЭ МЭССИХЬ ЖИІАУЭ ЩЫТА ПСАЛЪЭХЭР:

«Аращи, фымыжейуэ фысакъ, — къыщІигъуащ Хьисэ, ЦІыху Лъэпкъым и Къуэр дунейм къыщыкІуэжыну махуэри сыхьэтри фщІэркъыми» (МАТТЭ 25:13).

«Фымыжейуэ фысакъ, Тхьэми фелъэІу; а сыхьэтыр къыщысынур фщІэркъыми» (МАРК 13:33).

Зэрытлъагъущи, зы цІыхуми ищІэкъым мы дунейм и кІэухыр къыщысыну махуэр. Ауэ Алыхьым триухуащ а махуэри а сыхьэтри (Маттэ 24:36). Мы дунейм и кІэухыр къызэрыблагъэр дэ зыгуэру къытхуэщІэну пІэрэ? КъытхуэщІэнущ. Хьисэ и гъэсэнхэм яжриІауэ щытащ кІэухым ипэ къихуэу къэхъуну Іуэхугъуэхэр.

НЭЩЭНЭР

Хьисэ зи гугъу ищІа Іуэхухэр «мы дунейм и кІэухыр къызэрыкІуэнум» и нэщэнэ хъун хуейт. Абы жиІащ: «Зы лъэпкъыр адрей лъэпкъым, зы къэралри адрей къэралым езэуэну къызэщІэтэджэнущ. Гъабли къэхъунущ, щІыр щІыпІэ-щІыпІэхэмкІи хуабжьу щыхъеинущ» (Маттэ 24:3, 7). А псом нэмыщІ, Хьисэ зэрыжиІамкІэ, уз зэрыцІалэхэмрэ пандемиехэмрэ къэхъун хуейт (Лука 21:11). Хьисэ и псалъэхэр нобэ гъэзэщІа зэрыхъур плъагъурэ?

Зауэхэм, гъаблэм икІи уз зэрыцІалэхэм нобэ дуней псор зэщІащтащ. Псалъэм папщІэ, 2004-нэ гъэм Индийскэ хым щІыр хуабжьу зэрыщыхъеям къыхэкІкІэ цунами къэхъуащ икІи абы цІыху 225 000 хуэдиз ихьащ. Илъэсищым къриубыдэу COVID-19 жыхуаІэ узыфэм цІыху мелуан 6,9 хуэдиз илІыкІащ. Хьисэ зэрыжиІамкІэ, апхуэдэ Іуэхугъуэхэр щыхьэт тохъуэ дунейм и кІэухыр къызэрыблэгъам.

ИУЖЬРЕЙ МАХУЭХЭР

Библием «иужьрей махуэхэр» щыжиІэм деж, зи гугъу ищІыр мы дунейм и кІэухым ипэ къихуэ зэманыращ (2 Петр 3:3, 4). 2 Тимофей 3:1—5 зэритымкІэ, иужьрей махуэхэм цІыхухэм зэрахьэ хабзэншагъэр нэхъыбэ хъунущ. («Мы дунейм и кІэм ипэ къихуэу» жыхуиІэ рамкэм еплъ.) Ди зэманым цІыхухэр щхьэхуещэ, нэпсей, тэмакъкІэщІ зэрыхъуам икІи лъагъуныгъэр зищІысыр абыхэм зэращыгъупщэжам гу лъыптэрэ? А псом къегъэлъагъуэ мы дунейм и кІэухыр къызэрыблэгъар.

Иужьрей махуэхэр зэман кІыхь? Хьэуэ. Библием зэрыжиІэмкІэ, ар зэман кІэщІщ. А зэманыр иуха нэужь, Алыхьым щІылъэм зэран хуэхъу цІыхухэр игъэкІуэдыжынущ (Апокалипсис 11:15—18; 12:12).

КУЭД МЫЩІЭУ ЩІЫЛЪЭР ЖЭНЭТ ХЪУЖЫНУЩ!

Дэ къызэрытщІащи, мы дуней бзаджэм и кІэухыр къыщысыну махуэри сыхьэтри Алыхьым триухуащ (Маттэ 24:36). Абы нэмыщІ иджыри зы хъыбарыфІ щыІэщ. Алыхьыр хуейкъым зы цІыхуи кІуэдыну (2 Петр 3:9). Дыкъелыну дыхуеймэ тщІэн хуейр Алыхьым къыджеІэ. Сыт абы апхуэдэу щІищІэр? Алыхьыр хуейщ дэ дыкъригъэлу жэнэтыщІым дыщигъэпсэуну.

Алыхьым и Пащтыхьыгъуэм и лъабжьэ щІэту псэуну хуей цІыхухэм Іэмал яІэщ щІэныгъэ зрагъэгъуэтыну. Хьисэ жиІауэ щытащ Алыхьым и Пащтыхьыгъуэм теухуа хъыбарыфІыр дуней псом зэрыщагъэІунур (Маттэ 24:14). Иеговэ и Щыхьэтхэм сыхьэт миллиард куэд трагъэкІуадэа хъыбарыфІымкІэ цІыхухэм ядэгуэшэным. Хьисэ зэрыжиІамкІэ, а лэжьыгъэр дунейм и кІэухым ипэ къихуэу екІуэкІын хуейщ.

ЦІыхухэм я тепщэныгъэм куэд мыщІэу кІэ къыхуэкІуэнущ. Ауэ уэ укъелу дунеищІэм ущыпсэуну Іэмал уиІэщ, икІи ар хъыбарыфІщ. Абы щхьэкІэ уэ пщІэн хуейм теухуауэ къыкІэлъыкІуэ статьям къыщыпщІэнущ.