Мы дунейр и кІэм хуэкІуэу пІэрэ?

Дунейм кІэ къызэрыхуэкІуэнур Библием зэрыжиІэр фэ зэхэфхауэ къыщІэкІынщ (1 Иуан 2:17). Абы къикІрэ цІыхухэр кІуэдыжыну? Ди щІылъэр нэщІу зыри темытыжу къэнэну ара? Хьэмэрэ ари кІуэдыжыпэну?

БИБЛИЕМ А УПЩІЭХЭМ ИРИТ ЖЭУАПЫР ЗЫЩ — ХЬЭУЭ!

МыкІуэдыжыныр сыт?

ЦІЫХУХЭР

Библием жиІэр: Алыхьым щІыр «мыхьэнэ имыІэу ауэ сытми къигъэщІакъым, цІыхухэр тез хъун щхьэкІэ къигъэщІащ ар» (ИСАИЯ 45:18).

ЩІЫЛЪЭР

Библием жиІэр: «Зы щІэблэр къохъу, зы щІэблэр малІэ, ауэ щІылъэр игъащІэкІи щыІэнущ» (ЭККЛЕЗИАСТ 1:4).

АБЫ КЪИКІЫР Библием жеІэр ди щІылъэр зэикІ зэрымыкІуэдыжынур икІи абы цІыхухэр сыт щыгъуи зэрыщыпсэунур. НтІэ, дунейм и кІэух хъужыр сыт?

ФЕГУПСЫСЫТ Дунейм и кІэухым деж къыщыхъуну Іуэхугъуэхэмрэ Нухь и зэманым къэхъуауэ щытахэмрэ Библием зэрегъэщхь. Нухь и зэманым щыгъуэ дунейр Іейм зэщІищтат (ЩІэдзапІэ 6:13). Нухь Алыхьым хуэпэжу, цІыхуфІу щытт. Абырэ и унагъуэмрэ Алыхьым къригъэлри, цІыху Іейуэ хъуар псыдзэшхуэм хигъэкІуэдащ. А Іуэхугъуэм теухуауэ Библием мыпхуэдэу итщ: «Псыр Тхьэм пасэрей дунейм къыщІигъауэри, игъэкІуэдыгъащ» (2 Петр 3:6). Апхуэдэ щІыкІэкІэ абы щыгъуэ щыІа дунейм кІэ къыхуэкІуауэ щытащ. Ауэ гу лъыфтэт — кІэ къызыхуэкІуар щІыракъым, атІэ абы щыпсэуа цІыху Іейхэращ. Аращи, дунейм и кІэухым Библиер щытепсэлъыхькІэ, щІылъэр кІуэдыжыну жиІэу аракъым. ЩымыІэжыну зи гугъу ищІыр цІыху Іейхэмрэ абыхэм къызэрагъэпэща пащтыхьыгъуэхэмрэщ.

КІуэдыжыныр сыт?

ГУГЪУЕХЬХЭМРЭ ХАБЗЭНШАГЪЭМРЭ

Библием жиІэр: «Иджыри тІэкІу дэкІмэ, цІыху хабзэншэр щыІэжынукъым; и дежкІэ уплъэмэ — ар щыІэжкъым. Іэдэбхэм мы щІыр щІэину къахуэнэнущ икІи мамырыгъэмкІэ затІыжынущ» (ПСАЛОМ 37:10, 11).

Сурэтхэр: 1) дыгъуакІуэхэм маскэ яІулъу тыкуэныр яхъунщІэ; 2) цІыхухъум ахъшэ зыдэлъ дипломатыр нэгъуэщІым ирет.

АБЫ КЪИКІЫР Псыдзэшхуэм цІыху Іейхэр хэкІуэда щхьэкІэ, Іейм кІэ къыхуэкІуакъым. Абы иужь дунейм къытехьа бзаджащІэхэм насыпыншагъэр щІылъэм тез ящІыжащ. Ауэ куэд дэмыкІыу Алыхьым Іейм кІэ иритыпэнущ. Библием жеІэ: «ЦІыху хабзэншэр щыІэжынукъым». Алыхьым и Пащтыхьыгъуэм Іейм кІэ иритынущ. Ар — уафэм щытеувэну правительствэщ икІи щІылъэм къытенэну цІыху пэжхэм ар я тепщэу щытынущ.

ФЕГУПСЫСЫТ Дуней псом щыІэ къэрал унафэщІхэм яІэщІэлъ тепщэныгъэр арэзыуэ Алыхьым и Пащтыхьыгъуэм иратыну пІэрэ? Хьэуэ. Ахэр Алыхьым и Пащтыхьыгъуэм пэщІэувэнущ (Псалом 2:2). Сыт абы кърикІуэнур? Алыхьым и Пащтыхьыгъуэм цІыху правительствэхэр игъэкІуэдыжынурэ «езыр игъащІэкІэ щытынущ» (Даниил 2:44). ЦІыхухэм я тепщэныгъэм кІэ къыщІыхуэкІуэн хуейр сыт?

ДЫЗЫХУЭНЫКЪУЭР: цІыху пащтыхьыгъуэхэм я пІэкІэ Алыхьым и Пащтыхьыгъуэм!

Библием жиІэр: «СощІэ, Иеговэ, цІыхур и гъуэгум зэрыхуимытыр, цІыху кІуэм и лъэр иунэтІыну зэрыхузэфІэмыкІыр» (ИЕРЕМИЯ 10:23).

Избирательнэ плакатхэр тезу зытет блыным цІыхухэр блокІ.

АБЫ КЪИКІЫР ЦІыхухэр зыр адрейм и тепщэу щытын хуейуэ Алыхьым къигъэщІакъым. Аращ нобэ щыІэ правительствэхэм ехъулІыныгъэ щІамыІэр икІи цІыхухэм я гугъуехьхэр Іуахыну абыхэм щІахузэфІэмыкІыр.

ФЕГУПСЫСЫТ «Британская энциклопедия» жыхуиІэм зэритымкІэ, къулейсызыгъэм, гъаблэм, узхэм, гузэвэгъуэшхуэхэм, зауэхэм, залымыгъэм правительствэхэр езыр-езыру зэи пэлъэщыфынукъым. Абы иджыри зэрыжиІэмкІэ, языныкъуэ цІыхухэм я гугъэщ гугъуехь псори Іупхын щхьэкІэ щІылъэ псом и тепщэу зы правительствэ тегъэувэн хуейуэ (Britannica Academic). Ауэ дуней псом щыІэ къэралхэм я правительствэхэр зэгухьэу зы хъуми, абы щыгъуи дунейм и тепщэу къэнэнур гуэныхь зыхэлъ цІыхухэращ. Абы къыхэкІкІэ абыхэм яхузэфІэкІынукъым ипэІуэкІэ зи гугъу тщІа гугъуехьхэр Іуахыну. Дуней псом щыІэ гугъуехьу хъуам кІэ езытыфынур Алыхьым и Пащтыхьыгъуэ закъуэращ.

Мис аращ дунейм кІэ къызэрыхуэкІуэм цІыхуфІхэр иригузэвэн хуэмейуэ Библием щІыжиІэр. Мы дунеижьым кІэ къыхуэкІуа иужь гъащІэ щІидзэнум и дахагъэр уи нэгу къыпхущІэгъэхьэнукъым!

Дапщэщ ар къыщыхъунур? Абы и жэуапыр къыкІэлъыкІуэ статьям къыщытщІэнущ.