Алыхьымрэ Хьисэ Мэссихьрэ теухуа пэжыр

Хэт хъуну Алыхьыр?

Хэт Алыхьым и цІэр? Мы упщІэм и жэуапыр езы Алыхьым ирет: «Сэ сы-Иеговэщ. Аращ си цІэр» (Исаия 42:8). Япэ дыдэу ятха Библием Алыхьым и цІэм 7 000 хуэдизкІэ ущрихьэлІэт. Ауэ языныкъуэхэм Библиер щызэрадзэкІым Алыхьым и цІэр титулхэмкІэ зэрахъуэкІащ, псалъэм папщІэ, «Зиусхьэн» титулкІэ. Алыхьым дыкъыхуреджэ и ныбжьэгъу дыхъуну икІи ар хуейщ и цІэмкІэ абы зыхуэдгъэзэну (Псалом 105:1).

Алыхьым и титулхэр. Библием Иеговэ и титулхэм ущрохьэлІэ, псалъэм папщІэ мыпхуэдэхэм: «Алыхь», «Зиусхьэн», «Адэ», нэгъуэщІхэри. Тхыгъэ ЛъапІэм цІыху куэдым я тхьэлъэІухэр итщ. Абыхэм Иеговэ и цІэмкІэ зыхуагъазэт икІи пщІэ хэлъу и титулхэр къагъэсэбэпт (Даниил 9:4).

Алыхьым и теплъэр. Алыхьым и Іэпкълъэпкъыр нэрымылъагъущ (Иуан 4:24, ДЩІ). Библием зэрыжиІэмкІэ, цІыхухэм щыщу зыми Алыхьыр илъэгъуакъым (Иуан 1:18). Ауэ Библием Алыхьым и гурыщІэхэм теухуауэ куэд къыщыдощІэ. ЦІыхухэм я ІуэхущІафэхэм Алыхьыр е ягъэгуфІэ е абы и жагъуэ ящІ (Псалом 78:40, 41; Притчи 11:20).

Алыхьым и хьэл-щэн дахэхэр. Алыхьым зэи лъэпкъ зэхэгъэж ищІкъым (Апостолхэм 10:34, 35). Алыхьыр «гу щабэщ икІи гущІэгъу хэлъщ, тэмакъкІыхьщ, фІылъагъуныгъи пэжагъи и куэдщ» (Исход 34:6, 7). Ауэ псом хуэмыдэу абы и хьэл-щэниплІ нэхъыщхьэхэм удахьэх.

Къарур. Иеговэ — «псори зыхузэфІэкІ Тхьэщ», абы и къарум гъунэ иІэкъым икІи езым къыбгъэдэкІ дэтхэнэ зы псалъэри игъэзэщІэжыфынущ (ЩІэдзапІэ 17:1).

Іущагъыр. Алыхьым бгъэдэлъ Іущагъым хуэдэ зыми иІэкъым. Аращ Библием щІыжиІэр Іущагъ нэсыр зыбгъэдэлъыр а зырауэ (Рим 16:27, ДЩІ).

Захуагъэр. Алыхьыр сыт щыгъуи захуагъэм тетщ. Алыхьым «и гъуэгуу хъуар захуагъэм тетщ» икІи абы хабзэншагъэ зэрихьэркъым (Второзаконие 32:4).

Лъагъуныгъэр. 1 Иуан 4:8 щыжыІащ: «Тхьэр езыр фІылъагъуныгъэщ». Алыхьым лъагъуныгъэр зэригъэлъагъуэм нэмыщІ, езыр фІылъагъуныгъэу жыпІэ хъунущ. Иеговэ сыт имыщІэми лъагъуныгъэм къыхэкІыу ещІэ икІи дэ абы насыпыфІэ дещІ.

Алыхьыр цІыхухэм зэрахущытыр. Алыхьыр — уафэм щыІэ ди Адэщ икІи дэ абы фІыуэ дыкъелъагъу (Маттэ 6:9). Абы ныбжьэгъу ухуэхъун щхьэкІэ дзыхь хуэпщІу зебгъэсэн хуейщ (Псалом 25:14). Иеговэ хуейщ уэ абы тхьэлъэІукІэ зыхуэбгъэзэну икІи узыгъэгузавэ псори абы бгъэдэплъхьэну, сыт щхьэкІэ жыпІэмэ «абы и нэІэ къыттригъэтщи» (1 Петр 5:7; Екъуб 4:8).

Алыхьымрэ Хьисэрэ сыткІэ зэщхьэщыкІрэ?

Хьисэ — Алыхькъым. Библием зэрыжиІэмкІэ, Хьисэ Алыхьым и Къуэщ. А зыращ Алыхьым езым къигъэщІар (Иуан 1:14, ДЩІ). Адрейхэр псори, псэ зыІути зыІумыти, Иеговэ Хьисэ зыдигъэІэпыкъуурэ къигъэщІащ. Библием ар «дэІэпыкъуэгъу ІэкІуэлъакІуэу» щытауэ жеІэ (Притчи 8:30, 31; Колоссэ 1:15, 16).

Хьисэ езыр Алыхьу зэи жиІакъым. Абы жиІар мыращ: «[Алыхьым] деж сыкъикІащ. Сэ абы сыкъигъэкІуащ» (Иуан 7:29, ДЩІ). Зэгуэр Иеговэ теухуауэ Хьисэ мыпхуэдэу жиІащ: «Сэ си Адэу, фэри фи Адэу, сэ си Тхьэу, фэри фи Тхьэм деж сыдэкІуеижынущ» (Иуан 20:17). Хьисэ лІа нэужь Иеговэ ар уафэм щыпсэуну къигъэтэджыжащ икІи тепщэныгъэшхуэ ІэщІилъхьэри «и ижьырабгъумкІэ зыбгъэдигъэтІысхьащ» (Маттэ 28:18; Апостолхэм 2:32, 33).

Хьисэ Мэссихь цІыхухэм ядоІэпыкъу ахэр Алыхьым гъунэгъу хуэхъуну

Хьисэ щІылъэм къехащ и Адэм теухуауэ цІыхухэм яжриІэн щхьэкІэ. Иеговэ езыр абы щыхьэт техъуащ, мыпхуэдэу щыжиІам: «Мыращ сэ фІыуэ слъагъу си Къуэ щІасэр. Абы жиІэм федаІуэ» (Марк 9:7). Хьисэ Алыхьыр зыми хуэмыдэу ецІыху. Аращ абы мыпхуэдэу щІыжиІар: «Адэ лъапІэр зыхуэдэр Къуэ лъапІэмрэ Къуэ лъапІэм ар зригъэщІэну хуей цІыхухэмрэ фІэкІа, зыми ищІэркъым» (Лука 10:22).

Хьисэ Алыхьым и хьэл-щэнхэм нэгъэсауэ щапхъэ трех. Хьисэ и Адэм хэлъ хьэл-щэнхэр сыт щыгъуи игъэлъагъуэти, мыпхуэдэу жиІащ: «Сэ сыкъэзылъэгъуам Адэ лъапІэри илъэгъуащ» (Иуан 14:9). Хьисэ и псалъэхэмрэ и Іуэхухэмрэ Иеговэ и лъагъуныгъэр къыхэщт икІи абы цІыхухэр хуигъэушт Алыхьым и деж къэкІуэну. Хьисэ жиІащ: «Гъуэгури, щыпкъагъэри, гъащІэри сэращ... Си гъуэгу иримыкІуэмэ, Адэ лъапІэм деж зы цІыхуи кІуэн лъэкІынукъым» (Иуан 14:6). Иджыри абы жиІащ: «Адэ лъапІэм щыпкъэу елъэІухэр гурэ псэкІи щыпкъагъэкІи щелъэІун махуэр къэсынущ икІи къэсакІэщ. Апхуэдэу елъэІухэращ Адэ лъапІэм и щІасэр» (Иуан 4:23). Дауэ къыпщыхъурэ, Иеговэ уэр хуэдэ цІыхухэр къелъыхъуэ — езым теухуауэ пэжыр къэзыщІэну хуейхэр!