45 СТАТЬЯР
Алыхьым и къару лъапІэр дапхуэдэу къызэрыддэІэпыкъур?
«Апхуэдэу щІэхъуар лъэкІыныгъэшхуэ зиІэр дэрмырауэ, атІэ Тхьэрауэ зэрыщытыр нахуэ хъун щхьэкІэщ» (2 КОР. 4:7).
104-НЭ УЭРЭДЫР Къару лъапІэр — Алыхьым къыбгъэдэкІ тыгъэщ
МЫ СТАТЬЯР ЗЫТЕПСЭЛЪЫХЬЫРa
1, 2. 1) Махуэ къэс дызыпэщІэхуэ гугъуехьхэм дыпэлъэщыну сыт къыддэІэпыкъур? КъыдгурывгъаІуэ. 2) Мы статьям сыт щызэпкърытхынур?
«СИ ЗАКЪУЭУ а гъэунэхуапІэм зэи сыпэлъэщынутэкъым!» Зэгуэр апхуэдэу фэри жыфІауэ пІэрэ? Фэ уз хьэлъэ гуэр къывэуэлІамэ е фІыуэ флъагъу цІыхур лІэныгъэм фІэщІихамэ, къывгурыІуэу къыщІэкІынщ а псор зэрыфхуэшэчар Иеговэ и къару лъапІэм и фІыгъэу зэрыщытыр (2 Кор. 4:7—9).
2 Абы нэмыщІ Алыхьым и къару лъапІэм дыхуэныкъуэщ, мы дуней бзаджэм и еплъыкІэр зэран зыхуэдмыгъэхъун щхьэкІэ (1 Ин. 5:19). Дэ иджыри «жин бзаджэхэм» дапэщІэтын хуейщ (Еф. 6:12). А псом къыхэкІкІэ Алыхьым и къару лъапІэр къызэрыддэІэпыкъу ІэмалитІ зэпкърытхынщ. ИужькІэ дытепсэлъыхьынщ Алыхьым и къару лъапІэр нэгъэсауэ къыдитын щхьэкІэ сыт тщІэн хуейми.
АЛЫХЬЫМ И КЪАРУ ЛЪАПІЭМ КЪАРУ КЪЫДЕТ
3. Иеговэ гугъуехьхэм дыпэлъэщыну къызэрыддэІэпыкъу япэ Іэмалыр къыжыфІэ.
3 Иеговэ и къару лъапІэм къару къытхелъхьэ ди къалэнхэр гугъуехь дызыпэщІэхуэхэм емылъытауэ тхуэгъэзэщІэн щхьэкІэ. Апостол Паул къыгурыІуэт гугъуехь зыпэщІэхуэхэм емылъытауэ Иеговэ и лэжьыгъэм адэкІи зэрыхэтыфынур, сыт щхьэкІэ жыпІэмэ ар «Мэссихь и лъэкІыныгъэм» щыгугът (2 Кор. 12:9). Паул миссионер лэжьыгъэр игъэзащІэу етІуанэу гъуэгу щытетам, жыджэру хъыбарыфІыр зэригъэІум нэмыщІ, лажьэт зэрыпсэун ахъшэ къилэжьын щхьэкІэ. Коринф къалэм ар Акилэрэ Прискиллэрэ я унэм къыщыувыІат, абыхэм шэтырхэр ящІт. Паули арат и ІэщІагъэри, языныкъуэ махуэхэм абыхэм я гъусэу лажьэт (Апост. 18:1—4). Алыхьым и къару лъапІэм Паул къару къритт лэжьэн щхьэкІэ икІи Иеговэ и Іуэхум хэтын щхьэкІэ.
4. 2 Коринф 12:7—9 зэритымкІэ, сыт Паул зыпэщІэхуар?
4 Къеджэ 2 Коринф 12:7—9. Мы едзыгъуэхэм Паул «уз гуэр, банэм хуэдэу» къыхэуэу щыжиІащ. Банэ гуэр уи Іэпкълъэпкъым хэуамэ, абы гугъуехь куэд къыпхуехь. Аращи, Паул абыкІэ жиІэну хуеящ гугъуехь е «уз» езыгъэшэч гъэунэхуапІэ зэрыпэщІэхуар. Паул а гъэунэхуапІэм «шейтІаным и ІуэхутхьэбзащІэу» еджащ. Паул уз езыгъэшэч и гугъуехьыр ШейтІанымрэ абы и жин бзаджэхэмрэ къабгъэдэмыкІынкІэ хъунут. Ауэ а «банэр» Паул зэрыхэлъым гу лъатэу ахэр иужь ихьауэ къыщІэкІынущ ар нэхъ куууэ хагъэхьэну, Паул нэхъ гугъу ирагъэхьын щхьэкІэ. Паул дауэ ар къызэрыщыхъуар?
5. Паул и лъэІухэм Иеговэ дауэ жэуап зэрыритар?
5 ЯпэщІыкІэ Паул хуейт а «банэр» Иеговэ хихыну. Абы жиІащ: «А банэр схихыжыну Зиусхьэным [Иеговэ] щэнейрэ селъэІуащ». Ауэ Паул и лъэІум емылъытауэ, банэр зыщІыпІи кІуакъым. Абы къикІрэ Паул и лъэІум Иеговэ жэуап иримытауэ? ДауикІ, къикІкъым. Иеговэ абы жэуап иритащ. А гугъуехьыр Иеговэ Іуимыха щхьэкІэ Паул абы пэлъэщыну къару иритащ. Иеговэ жиІащ: «Уэ лъэкІыныгъэ уимыІэ щыхъукІэ, си лъэкІыныгъэшхуэр нэхъ къолъагъуэ» (2 Кор. 12:8, 9). Иеговэ зэрыдэІэпыкъуам и фІыгъэкІэ Паул гуфІэгъуэрэ гупсэхугъуэрэ фІэкІуэдакъым (Флп. 4:4—7).
6. 1) Ди лъэІум Иеговэ дауэ жэуап зэрыритыфынур? 2) Псалом 61:3, 4; 2 Коринф 4:8, 9; Филиппи 4:13 къыщыхьа Иеговэ къыбгъэдэкІ сыт хуэдэ гугъэхэра къару къывэзытыр?
6 Къэхъуауэ пІэрэ зэгуэр Паул хуэдэу фи гугъуехьыр фщхьэщихын щхьэкІэ Иеговэ фыщелъэІуа? Фи лъэІу гуащІэхэм емылъытауэ, фи гугъуехьыр ІумыкІамэ е нэхъ Іеиж хъуамэ, фигугъауэ пІэрэ Иеговэ фэркІэ мыарэзыуэ? Апхуэдэу щытмэ, Паул и щапхъэм фегупсыс. Иеговэ абы и лъэІум жэуап иритащ, фэри фи лъэІум Іэмал имыІэу жэуап иритынущ! Иеговэ фи гугъуехьыр ІуимыхынкІэ хъунущ, ауэ и къару лъапІэмкІэ къывдэІэпыкъунущ абы фыпэлъэщыну (Пс. 61:3, 4). Фагъэджалэу, «щІым фытрадзауэ» къыфщыхъункІэ хъунущ, ауэ Иеговэ фыкъигъэнэнукъым (2 Кор. 4:8, 9; Флп. 4:13).
АЛЫХЬЫМ И КЪАРУ ЛЪАПІЭР КЪЫДДОІЭПЫКЪУ АДЭКІИ ИЕГОВЭ И ЛЭЖЬЫГЪЭМ ДЫХЭТЫНУ
7, 8. 1) Иеговэ и къару лъапІэр жьым сыткІэ ещхь? 2) Алыхьым и къару лъапІэр къызэрыддэІэпыкъум теухуауэ Петр сыт хуэдэ щапхъэ къихьар?
7 Алыхьым и къару лъапІэр дапхуэдэу иджыри къызэрыддэІэпыкъур? Иеговэ и къару лъапІэр жьым едгъэщхь хъунущ. Толъкъун инхэм емылъытауэ кхъухьыр здэкІуэн хуей щІыпІэм тэмэму кІуэн щхьэкІэ жьы къепщэр къигъэсэбэпыфынущ. Апхуэдэу Алыхьым и къару лъапІэр дэ къыддоІэпыкъу гугъуехь дызыпэщІэхуэхэм емылъытауэ адэкІи Иеговэ и лэжьыгъэм дыхэтыну, абы дыкъызэригъэгугъа дунеищІэр къэсыху.
8 Апостол Петр бдзэжьеящэу щытти, абы ищІэт парускІэ зекІуэ кхъухьыр зэрызебгъэкІуэнур. Арауэ къыщІэкІынщ Петр Алыхьым и къару лъапІэр къызэрыддэІэпыкъум теухуауэ щытепсэлъыхьам щыгъуэ кхъухькІэ псым тетыным пыщІа псалъэхэр къыщІигъэсэбэпар. Абы итхащ: «Бегъымбархэм я псалъэхэр езыр-езыру жаІакъым, атІэ Тхьэм и Псэ ЛъапІэм [«къару лъапІэм», ДЩІ] а псалъэхэр бегъымбархэм я гум кърилъхьэри къаригъэІуэтащ». Мы едзыгъуэм Петр къигъэсэбэпа псалъэхэм алыджыбзэкІэ кхъухьыр «жьым зэрызригъакІуэр» уи нэгу къыщІагъэхьэ (2 Пет. 1:21).
9. «Жьым зэрызригъакІуэр» жыхуиІэ псалъэхэр Петр алыджыбзэкІэ щыжиІам щыгъуэ, сытыт цІыхухэм я нэгу къыщІагъэхьэну зыхуеяр?
9 «Жьым зэрызригъакІуэр» жыхуиІэ псалъэхэр Петр алыджыбзэкІэ щыжиІам щыгъуэ, сытыт цІыхухэм я нэгу къыщІагъэхьэну зыхуеяр? Апхуэдэу Лукаи «толъкъунхэм дызэрахьэрт» жиІэу Апостолхэм тхылъым щитхам щыгъуэ алыджыбзэ а псалъэ дыдэхэр къигъэсэбэпащ (Апост. 27:15). Библием елэжь зы щІэныгъэлІым зэрыжиІэмкІэ, Петр «кхъухькІэ псым тетыным пыщІа щапхъэфІ дыдэ» къихьащ, Библиер зытхахэм Алыхьым и къару лъапІэр къадэІэпыкъуауэ щыжиІам щыгъуэ. Петр мыпхуэдэу жиІауэ жыпІэ хъунущ: жьым кхъухьыр зэрызригъакІуэм хуэдэу, бегъымбархэмрэ Библиер зытхахэмрэ Алыхьым и къару лъапІэм и фІыгъэкІэ я къалэныр ягъэзащІэт. А щІэныгъэлІ дыдэм жиІащ: «Бегъымбархэм я кхъухьым и парусхэр къаІэту жыпІэ хъунут». Иеговэ и къалэныр игъэзащІэт: абы жьы яритт, нэгъуэщІу жыпІэмэ, и къару лъапІэр. Библиер зытхахэми я къалэныр ягъэзащІэт: ахэр Алыхьым и къару лъапІэм здиунэтІымкІэ кІуэт.
1 ЛЪЭБАКЪУЭР. Зэпымыууэ Алыхьым и лэжьыгъэм фыхэт.
2 ЛЪЭБАКЪУЭР. ЗэрыхъукІэ жыджэру Алыхьым и лэжьыгъэм фыхэт. (11-нэ абзацым феплъ.)d
10, 11. Сыт хуэдэ лъэбакъуитІ тчын хуейр Алыхьым и къару лъапІэр къыддэІэпыкъурэ къыддэмыІэпыкъурэ зэхэдгъэкІын щхьэкІэ? Щапхъэ къэфхь.
10 Иеговэ и къару лъапІэр къигъэсэбэпу Библиер ятхыну цІыхухэр щыхуигъэушу щыта зэманыр, дауикІ, блэкІащ. Ауэ абы ноби и къару лъапІэр къегъэсэбэп, и лъэпкъым унафэхэр иритын щхьэкІэ. Иеговэ япэм хуэдэуи и къалэныр егъэзащІэ. Алыхьым и къару лъапІэр къыддэІэпыкъун щхьэкІэ сыт дэ тщІэн хуейр? ЗэхэдгъэкІын хуейщ дэри ди лъэныкъуэкІэ ди къалэныр дгъэзащІэрэ дымыгъэзащІэрэ. Сыт абыкІэ къыддэІэпыкъунур?
11 Зы щапхъэ зэпкърытхынщ. Кхъухьзехуэхэм жьыр сэбэп къахуэхъун щхьэкІэ ІуэхугъуитІ ящІэн хуейт. Япэрауэ, хым техьэн хуейт, жьыр къаубыдын щхьэкІэ. Кхъухьыр жьыр къыщемыпщэ щІыпІэм деж щытмэ, зыщІыпІи кІуэнукъым. ЕтІуанэрауэ, парусхэр къаІэту, зэрыхъукІэ нэхъ ину зэкІуэцІахын хуейт. Сыт щхьэкІэ жыпІэмэ, хым жьыр къыщепщэми, кхъухьыр ипэкІэ щыкІуэтэнур парусхэм жьыр из хъуа иужькІэщ. Апхуэдэу дэри Иеговэ и къару лъапІэмкІэ къыддэІэпыкъумэщ абы и лэжьыгъэм адэкІи дыщыхэтыфынур. Алыхьым и къару лъапІэр къыддэІэпыкъун щхьэкІэ лъэбакъуитІ тчын хуейщ. Япэрауэ, жьы къыщепщэ хым дытехьэн хуейщ, нэгъуэщІу жыпІэмэ Иеговэ и къару лъапІэр здэщыІэ лэжьыгъэм дыхэтын хуейщ. ЕтІуанэрауэ, ди кхъухьым и «парусхэр зэрыхъукІэ нэхъ ину зэкІуэцІытхын хуейщ», нэгъуэщІу жыпІэмэ Иеговэ и лэжьыгъэм ди къарум къызэрихькІэ дыхэтын хуейщ (Пс. 119:32). Апхуэдэу тщІэмэ, Алыхьым и къару лъапІэр къыддэІэпыкъунущ гугъуехь дызыпэщІэхуэхэм емылъытауэ адэкІи Иеговэ и лэжьыгъэм дыхэтыну, абы дыкъызэригъэгугъа дунеищІэр къэсыху.
12. Сыт дэ адэкІэ зэпкърытхынур?
12 Иеговэ и къару лъапІэр къызэрыддэІэпыкъу ІэмалитІ зэпкърытхащ. Абы къару къыдет гъэунэхуапІэхэм дыщыпэщІэхуэм деж Алыхьым хуэпэжу дыкъэнэн щхьэкІэ. Абы нэмыщІ Алыхьым и къару лъапІэр къыддоІэпыкъу ипэкІэ дыкІуэтэну икІи гъащІэ мыухыжым ухуэзышэ гъуэгум дытемыкІыну. Алыхьым и къару лъапІэр нэгъэсауэ къыдитын щхьэкІэ адэкІэ чэнджэщиплІ зэпкърытхынщ.
АЛЫХЬЫМ И КЪАРУ ЛЪАПІЭР НЭГЪЭСАУЭ КЪЫДИТЫН ЩХЬЭКІЭ СЫТ ТЩІЭН ХУЕЙР?
13. 2 Тимофей 3:16, 17 зэритымкІэ, Библием дапхуэдэу дызэрихъуэжыфынур? Абы щхьэкІэ сыт дэ тщІэн хуейр?
13 Япэрауэ, Алыхьым и Псалъэр вджы. (Къеджэ 2 Тимофей 3:16, 17.) Дэ дощІэ: Библиер Алыхьым «деж къикІащ». Иеговэ и къару лъапІэр къигъэсэбэпащ езым и гупсысэхэр Библиер зытхахэм яригъэтхын щхьэкІэ. Дэ Библием дыщеджэм икІи дызэджам дыщегупсысым деж, Алыхьым и гупсысэкІэр къыдгуроІуэ. Абы и фІыгъэкІэ Иеговэ игу ирихь зэхъуэкІыныгъэхэр ди гъащІэм хыдолъхьэ, ди гупсысэкІэри ди гум илъри дохъуэж (Евр. 4:12). Ауэ Алыхьым и къару лъапІэр нэгъэсауэ къыдитын щхьэкІэ зэман хухэтхын хуейщ Библием зэпымыууэ деджэным икІи дызэджам куууэ дегупсысыным. Апхуэдэу тщІэмэ, Алыхьым игу ирихь псэлъэкІэ диІэнущ, ди ІуэхущІафэри Библием итым техуэнущ.
14. 1) Ди зэхуэсхэм Иеговэ и къару лъапІэр зэрыщыІэм сыт шэч къыщІытедмыхьэр? 2) «Зи парусыр Іэта кхъухьым хуэдэу» адэкІэ дыкІуэтэну сыт къыддэІэпыкъунур?
14 ЕтІуанэрауэ, къуэш, шыпхъухэм я гъусэу Иеговэ фыхуэлажьэ (Пс. 22:22). Ди зэхуэсхэм Иеговэ и къару лъапІэр щыІэщ (Апок. 2:29). Сыт дэ абы шэч къыщІытедмыхьэр? Ди къуэш, ди шыпхъухэм я гъусэу Алыхьым дыщыхуэлажьэкІэ дэ абы долъэІу и къару лъапІэр къыдитыну, Тхыгъэ лъапІэм тегъэщІа уэрэдхэр жыдоІэ, Алыхьым и къару лъапІэм тригъэува къуэшхэм жаІэ псалъэхэм додаІуэ. Абы нэмыщІ Алыхьым и къару лъапІэр шыпхъухэми доІэпыкъу заданиехэр ягъэхьэзырыну икІи ахэр зэІущІэм къыщагъэлъэгъуэну. Алыхьым и къару лъапІэр нэгъэсауэ къыдитын щхьэкІэ зэІущІэхэм зыхуэдгъэхьэзырын хуейщ икІи абыхэм жыджэру жэуап щыттын хуейщ. Апхуэдэу тщІэмэ, «зи парусыр Іэта кхъухьым хуэдэу» адэкІэ дыкІуэтэнущ.
15. ХъыбарыфІыр щыдгъэІукІэ Алыхьым и къару лъапІэр дауэ къызэрыддэІэпыкъур икІи сыт дэ тщІэн хуейр?
15 Ещанэрауэ, хъыбарыфІ гъэІуным фыхэт. ХъыбарыфІымкІэ цІыхухэм дащыдэгуашэкІэ Библиер къэдгъэсэбэпмэ, Алыхьым и къару лъапІэр къыддоІэпыкъу пэжыр цІыхухэм яжетІэну икІи ахэр едгъэджэну (Рим 15:18, 19). Алыхьым и къару лъапІэр нэгъэсауэ къыдитын щхьэкІэ зэпымыууэ хъыбарыфІ гъэІуным дыхэтын хуейщ икІи зэрыхъукІэ Библиер нэхъыбэрэ къэдгъэсэбэпын хуейщ. ХъыбарыфІ гъэІуным нэхъыфІу дызэрыхэтын Іэмалхэм ящыщ зыщ — «Ди гъащІэмрэ лэжьыгъэ лъапІэмрэ» жыхуиІэ дызэрылажьэ тхылъым ит «цІыхухэм узэрепсалъэ хъун планхэр» къызэрыдгъэсэбэпыр.
16. Алыхьым и къару лъапІэр къызэрыпІэрыхьэну Іэмал нэхъыфІ дыдэр сыт хуэдэ?
16 ЕплІанэрауэ, Алыхьым лъэІукІэ зыхуэвгъазэ (Мт. 7:7—11; Лк. 11:13). Алыхьым и къару лъапІэр къызэрыпІэрыхьэну Іэмал нэхъыфІ дыдэр — Иеговэ ар къыуитыну уелъэІуныращ. Дэ зыри — тутнакъри, езы ШейтІанри — зэран къытхуэхъуфынукъым Иеговэ лъэІукІэ зыхуэдгъэзэну икІи абы и къару лъапІэр къытІэрыхьэну (Екъуб 1:17). Дапхуэдэу Иеговэ дызэрелъэІун хуейр и къару лъапІэр нэгъэсауэ къытІэрыхьэн щхьэкІэ? Мы упщІэм и жэуапыр къэдгъуэтын щхьэкІэ Лука итхыжа ХъыбарыфІым ит ущие хъыбарым деплъынщ. А хъыбарыр Лука закъуэщ зытхыжарb.
ЗЭПЫМЫУУЭ АЛЫХЬЫМ ФЕЛЪЭІУ
17. Лука 11:5—9, 13 ит Хьисэ и ущие хъыбарым сыт хуэдэ дерс хэтхыфынур?
17 Къеджэ Лука 11:5—9, 13. Хьисэ и ущие хъыбарым къыдгурегъаІуэ Алыхьым и къару лъапІэр къыдитын щхьэкІэ дапхуэдэу делъэІун хуейми. Хьисэ зи гугъу ищІ цІыхухъур жэщыбг зэрыхъуам емылъытауэ мыукІытэу и ныбжьэгъум къыдэІэпыкъуну йолъэІу. МыувыІэу зэрелъэІум и фІыгъэкІэ ар щІэлъаІуэр къыІэрохьэc. А ущие хъыбарымрэ тхьэлъэІумрэ Хьисэ дапхуэдэу зэрызэпищІар? Абы жиІащ: «ФелъэІуи, Тхьэм къывитынущ; фылъыхъуи, къэвгъуэтынущ; куэбжэм фытеуІуи, Тхьэм къыфхуІуихынущ». Сыт хуэдэ дерс абы хэтхыфынур? Алыхьыр и къару лъапІэмкІэ къыддэІэпыкъун щхьэкІэ дэ зэпымыууэ абы делъэІун хуейщ.
18. Хьисэ и ущие хъыбарым къызэрыхэщымкІэ, сыт шэч къытетхьэн щІыхуэмейр Иеговэ и къару лъапІэр къызэрыдитынум?
18 Хьисэ и ущие хъыбарым къыдгурегъаІуэ Иеговэ и къару лъапІэр Іэмал имыІэу къыщІыдитынум и щхьэусыгъуэр сытми. Ущие хъыбарым зи гугъу ищІ цІыхухъур жэщым къэкІуа и хьэщІэр игъэшхэну хуейуэ арат. Ауэ абы шхын иІэтэкъыми и гъунэгъум деж кІуащ. Хьисэ зэрыжиІамкІэ а цІыхухъум и гъунэгъум щІакхъуэ къыщІритар мыувыІэу зэрелъэІуаращ. Хьисэ абыкІэ сыт къыдгуригъэІуэну зыхуеяр? МыувыІэу къелъэІу и гъунэгъум гуэныхь зыхэлъ цІыхур щыдэІэпыкъуакІэ, фІыуэ дыкъэзылъагъу ди Адэм и къару лъапІэм щхьэкІэ зэпымыууэ делъэІумэ, дауикІ, ар къыдитынущ! Хьисэ и ущие хъыбарым къызэрыхэщымкІэ, Иеговэ лъэІу гуащІэкІэ зыхуэдгъазэмэ, шэч хэмылъу и къару лъапІэр къыдитынущ (Пс. 10:17; 66:19).
19. Сыт дэ шэч къыщІытедмыхьэр ШейтІаным дызэрыпэлъэщыфынум?
19 Дэ шэч къытетхьэкъым: сыт щыгъуи дриудыхыну ШейтІаныр зэрыхэтым емылъытауэ, дэ абы дыпэлъэщыфынущ. Сыт щхьэкІэ жыпІэмэ, Алыхьым и къару лъапІэр ІэмалитІкІэ къыддоІэпыкъу. Япэрауэ, абы къару къыдет гъэунэхуапІэхэм дыщыпэщІэхуэм деж Алыхьым хуэпэжу дыкъэнэн щхьэкІэ. ЕтІуанэрауэ, Алыхьым и къару лъапІэр къыддоІэпыкъу ипэкІэ дыкІуэтэну икІи гъащІэ мыухыжым ухуэзышэ гъуэгум дытемыкІыну. Абы къыхэкІкІэ къарууэ диІэр едвгъэхьэлІэ Алыхьым и къару лъапІэр нэгъэсауэ къыдитын щхьэкІэ!
41-НЭ УЭРЭДЫР Си тхьэлъэІур зэхэх
a Мы статьяр топсэлъыхь Иеговэ и къару лъапІэр гугъуехьхэм дыпэлъэщыну къызэрыддэІэпыкъум. Абы нэмыщІ зэпкърытхынущ Алыхьым и къару лъапІэр нэгъэсауэ къыдитын щхьэкІэ тщІэн хуейр сытми.
b Хьисэ и гъащІэм тепсэлъыхьыж тхылъхэм щыщу Лука и тхылъыр псом нэхърэ нэхъыфІу къыддоІэпыкъу къыдгурыІуэну Хьисэ и гъащІэм тхьэлъэІум мыхьэнэшхуэ щиІэу зэрыщытар (Лк. 3:21; 5:16; 6:12; 9:18, 28, 29; 18:1; 22:41, 44).
c 2018 гъэм, бадзэуэгъуэм къыдэкІа «Ди гъащІэмрэ лэжьыгъэ лъапІэмрэ» жыхуиІэ дызэрылажьэ тхылъым и 6-нэ напэкІуэцІым ит «настойчивость» псалъэм и комментарием феплъ.
d СУРЭТХЭР. 1 ЛЪЭБАКЪУЭР. Ди къуэшымрэ шыпхъумрэ дыщызэхуэс Унэм щІохьэ. Ди къуэш, ди шыпхъухэм щахэтым деж абыхэм Иеговэ и къару лъапІэр зыхащІэ. 2 ЛЪЭБАКЪУЭР. Абыхэм зэІущІэм зыхуагъэхьэзыращ икІи жэуап щат. Мы лъэбакъуитІыр статьям къыщыхьа нэгъуэщІ чэнджэщхэми хуэпхь хъунущ: Алыхьым и Псалъэр вджы, хъыбарыфІ гъэІуным фыхэт, Алыхьым лъэІукІэ зыхуэвгъазэ.