Библие джыныр нэхъыфІ зэрыпщІ хъунур

1. Языныкъуэхэм Библиер яджыну сыт къащІехьэлъэкІыр?

НОБЭ узэрыпсэун къэблэжьыну гугъущ. Къуэш, шыпхъу куэдым я унагъуэр япІын щхьэкІэ лэжьыгъэм зэман куэд трагъэкІуэдэн хуей мэхъу. Куэдыр я лэжьапІэм кІуэуэ къэкІуэжын щхьэкІэ сыхьэт зыбжанэ ехь. Языныкъуэхэм къарукІэ лэжьыгъэ хьэлъэ ягъэзэщІэн хуей мэхъу. Аращи, махуэм икІэм къару къазэрыхуэмынэжым къыхэкІкІэ зыгуэр яджыну къохьэлъэкІ.

2. Библиемрэ абы тегъэщІа ди тхыгъэхэмрэ вджыну дапщэщ зэман къыщыдэвгъэкІыр?

² Дапхуэдэу щымытми, зэман хухэтхын хуейщ Алыхьым и Псалъэмрэ абы тегъэщІа ди тхыгъэхэмрэ джыным — куууэ джыным. Абы елъытащ Иеговэрэ дэрэ ди зэхуаку дэлъ зэхущытыкІэмрэ гъащІэ мыухыж диІэу дыпсэунрэ дымыпсэунрэ (1 Тим. 4:15, 16). Ар къагурыІуэу, языныкъуэхэр махуэ къэс жьыуэ къотэджри, пщэдджыжьым я щхьэм зигъэпсэхуауэ унэм щІэсхэр къэмытэдж щІыкІэ йоджэ. НэгъуэщІхэм зыри зэран къахуэмыхъуу еджэу, зэджам егупсысын щхьэкІэ пщыхьэщхьэм дакъикъэ зыбжанэ къыдагъэкІ.

3, 4. Тхыгъэ къыдагъэкІхэмрэ интернетым иралъхьэмрэ сыт хуэдэ зэхъуэкІыныгъэхэр халъхьа икІи сыт щхьэкІэ?

³ Фэ дауикІ, арэзы фытехъуэну къыщІэкІынщ зыгуэр вджын щхьэкІэ зэман хухэфхыным мыхьэнэшхуэ зэриІэм. Ауэ сыт бджын хуейр? Фэ жыфІэнкІэ хъунущ: «Псоми седжэну сыхунэскъым». Пэжщ, Иеговэ и организацэм къыдигъэкІыу хъуам еджэну, абы нэмыщІ ди сайтымрэ интернет телевидениемрэ къралъхьэу хъуам еплъыну псоми яхузэфІэкІкъым. УнафэщІ гупым ар къыгуроІуэ. Абы къыхэкІкІэ унафэ ящІащ тхыгъэ къыдагъэкІхэмрэ интернетым иралъхьэмрэ нэхъ мащІэ ящІыну.

⁴ Псалъэм папщІэ, «Ежегодник Свидетелей Иеговы» тхылъыр къыдагъэкІыжкъым, сыт щхьэкІэ жыпІэмэ jw.org^® ди сайтымрэ мазэ къэс къыдэкІ интернет-телевидениемрэ ди къуэш, ди шыпхъухэм я гъащІэм къыщыхъуа узыгъэгушхуэн хъыбар куэд къыщыбгъуэтыфынущ. «ХъумакІуэ чэщанэ» ягуэш журналымрэ «Фыкъызэщыу!» журналымрэ иджы илъэсым щэ къыдагъэкІыу аращ. Апхуэдэ зэхъуэкІыныгъэхэр щІащІар нэгъуэщІ Іуэхухэр тщІэным зэман нэхъыбэ къыхудэдгъэкІын щхьэкІэкъым, атІэ «псом нэхърэ нэхъапэм» мыхьэнэ нэхъыбэ еттын щхьэкІэщ (Флп. 1:10, ДЩІ). Ди гъащІэм япэ идгъэщынур зэхэдгъэкІыну икІи Библие джыныр нэхъыфІ тщІыну къыддэІэпыкъунум адэкІэ деплъынщ.

ЯПЭ ИБГЪЭЩЫН ХУЕЙР СЫТМИ ЗЭХЭГЪЭКІ

5, 6. Сыт дэ дегугъуу дджын хуейр?

⁵ Сыт псом япэу дджын хуейр? Дэ махуэ къэс Алыхьым и Псалъэр дджын хуейщ. Иджы «Ди гъащІэмрэ лэжьыгъэ лъапІэмрэ» жыхуиІэ зэІущІэм тхьэмахуэ къэс дызэджэ Библием щыщ псалъащхьэхэр нэхъ мащІэ хъуащ. Абы и фІыгъэкІэ дэ зэман нэхъыбэ диІэ хъуащ дызэджам дегупсысыну икІи нэхъыфІу къыдгурыІуэн щхьэкІэ къыддэІэпыкъуну информациер къэтлъыхъуэну. А псалъащхьэхэм ауэ сытми деджэнуракъым ди къалэныр, атІэ Библием ит пэжыр ди гум нэсын хуейщ, абы къыхэкІкІэ дэ Иеговэ нэхъ гъунэгъу дыхуэхъунущ (Пс. 19:14).

⁶ Сыт иджыри дэ дджын хуейр? ДауикІ, дэ дыхуейщ «ХъумакІуэ чэщанэм» ит статьяр щызэпкърытхыну зэІущІэмрэ «Ди гъащІэмрэ лэжьыгъэ лъапІэмрэ» жыхуиІэ зэІущІэмрэ зыхуэдгъэхьэзырыну. Абы нэмыщІ «ХъумакІуэ чэщанэ», «Фыкъызэщыу!» ягуэш журналхэм блэдмыгъэкІыу деджэн хуейщ.

7. Интернет-телевидениемрэ ди сайтымрэ къралъхьэхэм псоми фемыджэфу щытми, сыт абы Іейуэ фригузэвэн щІыхуэмейр?

⁷ «Ар хъарзынэщ, ауэ интернет-телевидениемрэ ди сайтымрэ къралъхьэхэр-щэ? Абы куэдыфІ илъщ!» — жыфІэнкІэ хъунущ фэ. Зы щапхъэ зэпкърытхынщ. Фэ рестораным фыкІуащ. Абы шхын зэмылІэужьыгъуэхэр яІэщ икІи узыхуейр къапщтэ хъунущ. А рестораным апхуэдизкІэ шхын куэд яІэщи, псори зэрыпхуэмышхынур къыбгуроІуэ. Аращи, уэ шхыныгъуэ зытІущщ къыхэпхыр. Абы ещхьу интернет-телевидениемрэ ди сайтымрэ къралъхьэхэм псоми фемыджэфу щытми, абы Іейуэ фримыгузавэ. ФхузэфІэкІым феджэ икІи феплъ. АдэкІэ зэпкърытхынщ ди тхыгъэхэр дапхуэдэу дджы хъунуми икІи ар нэхъыбэу сэбэп къытхуэхъун щхьэкІэ сыт къыддэІэпыкъунуми.

БИБЛИЕ ДЖЫНЫР — ЛЭЖЬЫГЪЭШХУЭЩ!

8. «ХъумакІуэ чэщанэм» ит статьяхэр дапхуэдэу бгъэхьэзыр хъуну? Апхуэдэу зэрызыбгъэхьэзырыр уэ сыткІэ къыбдэІэпыкъуну?

⁸ Зыгуэр джыным къикІыр псынщІэ-псынщІэу еджэн е упщІэхэм я жэуапхэр щІэтхъэныракъым, атІэ мурад гуэр уиІэу, уегупсысурэ уеджэныращ. Псалъэм папщІэ, «ХъумакІуэ чэщанэм» ит статьяр щывгъэхьэзырым деж, «мы статьяр зытепсэлъыхьыр» жыхуиІэм фегупсыс, абы нэмыщІ статьям и цІэм, подзаголовокхэм икІи къызэрапщытэж упщІэхэм феплъ. Абы иужькІэ фымыпІащІэу, фІыуэ фегупсысурэ езы статьям феджэ. ФыщеджэкІэ гупсысэ нэхъыщхьэхэр къэвгъуэт (и нэхъыбэм ахэр абзацым и япэ псалъэухам хэтщ). Абыхэм къывгурагъэІуэнущ абзацыр зытепсэлъыхьыр. Статьям фыщеджэкІэ абзацхэр подзаголовокым икІи статьям и темэ нэхъыщхьэм зэрепхам фегупсыс. ФымыцІыхуу къикІыр къэфщІэну фызыхуей псалъэхэмрэ нэхъ куууэ зэпкърыфхыну фызыхуей гупсысэхэмрэ къыхэфтхыкІ.

9. 1) «ХъумакІуэ чэщанэм» ит статьяр щыбгъэхьэзырым деж, абы къыщыхьа Библием ит едзыгъуэхэм гу лъыптэну сыт мыхьэнэшхуэ щІиІэр икІи дауэ ар зэрыпщІ хъунур? 2) Псалом 119:27 зэритымкІэ, Библием ит едзыгъуэхэм узэреджэм нэмыщІ сыт иджыри пщІэн хуейр?

⁹ «ХъумакІуэ чэщанэр» щыдджым деж, Библиер дджыуэ аращ. Абы къыхэкІкІэ статьям къыщыхьа Библием щыщ едзыгъуэхэм, псом хуэмыдэу «Къеджэ» жиІэу къыхэгъэщахэм нэхъ куууэ фегупсыс. Едзыгъуэхэм и псалъэ нэхъыщхьэхэмрэ абзацым ит гупсысэмрэ зэрызэпхам гу лъыфтэ. Абы нэмыщІ зэман хухэфх фызэджа едзыгъуэхэм фегупсысын щхьэкІэ икІи ахэр фи гъащІэм къызэрыщывгъэсэбэпынур къывгурыІуэн щхьэкІэ. (Къеджэ Псалом 119:27b.)

10. Еврейхэм 5:14 зэритымкІэ, адэ-анэхэм сабийхэр щрагъаджэкІэ абыхэм Библиер яджу, зэІущІэхэм зыхуагъэхьэзыру икІи Библием ит темэ гуэр зэпкърахыу щІагъэсэн хуейр сыт?

¹⁰ ДауикІ, адэ-анэхэр хуейщ унагъуэм Библиер зэгъусэу щаджкІэ, абы сабийхэм гуфІэгъуэ хахыну. Ауэ адэ-анэхэм сабийхэм я гъусэу Библиер яджын ипэкІэ зытепсэлъыхьынур траухуэн хуейми, Іэмал имыІэу щыткъым тхьэмахуэ къэс зы гъэщІэгъуэн гуэр къагупсысын хуейуэ. Ди интернет-телевидением мазэ къэс къралъхьэ программэм феплъ хъунущ икІи иныкъуэхэм деж гъэщІэгъуэн гуэрхэр фщІэ хъунущ, псалъэм папщІэ Нухь и кхъухьыр зэпкърыфлъхьэ хъунущ, ауэ сабийхэм Библиер яджу евгъэсэным мыхьэнэшхуэ иІэщ. Зэхуэсым дапхуэдэу зыхуэбгъэхьэзыр хъунуми евгъэлъагъу хъунущ икІи школым гугъуехь зыпэщІэхуэфынухэм теухуауэ информацие къагъуэтыну евгъасэ хъунущ. (Къеджэ Еврейхэм 5:14.) Сабийм Библием ит темэ гуэрхэр зэпкърихыу ебгъасэу щытмэ, абы и дежкІэ нэхъ тынш хъунущ зэхуэсым е конгрессым щыщыІэм деж жаІэм едэІуэну, сыт щхьэкІэ жыпІэмэ апхуэдэ зэІущІэхэм сыт щыгъуи видеороликхэр къыщагъэлъагъуэкъым. Сабийхэм я гъусэу Библиер щывджым деж дапхуэдиз зэманкІэ ар евгъэкІуэкІын хуей? Ар сабийхэм я ныбжьымрэ я зэфІэкІымрэ елъытащ.

11. Дэ едгъаджэхэр Библиер куууэ яджу едгъэсэным сыт мыхьэнэшхуэ щІиІэр?

¹¹ Библиер дапхуэдэу джын хуейми хэт иджыри едгъэсэн хуейр? Алыхьым гъунэгъу хуэхъуну хуейуэ ди гъусэу Библиер зыджхэр. ДауикІ, дэ догуфІэ еджэн щІэзыдзагъащІэм жэуапхэр щІитхъэмэ, псалъэм папщІэ Библием едгъэджэну дыкІуэн ипэ е зэІущІэхэм зыщыхуигъэхьэзырым деж. Ауэ дэ едгъаджэхэр едгъэсэн хуейщ Библием ит темэхэр езыхэм зэпкърахыу икІи Библиер куууэ яджу. Апхуэдэу есэмэ, гугъуехь гуэр пэщІэхуа иужь зэхуэсым щыщхэм ищІэн хуеймкІэ занщІэу емыупщІу, ди тхыгъэхэм информацие зыхуэныкъуэр езым къызэрыщигъуэтыным иужь итынущ.

УЩЕДЖЭКІЭ МУРАД ГУЭР УИІЭН ХУЕЙЩ

12. Библиер щыдджкІэ сыт хуэдэ мурадхэр диІэ?

¹² Фэ зыгуэр вджыну апхуэдэуи фыфІэмы фІмэ-щэ? Сыт къывдэІэпыкъунур? ЯпэщІыкІэ мащІэ-мащІэурэ вджы хъунущ, иужькІэ хуэмурэ абы тевгъэкІуадэ зэманым хэвгъахъуэ хъунущ. Библиер щІэвджым и щхьэусыгъуэр зыщывмыгъэгъупщэ. Абы и щхьэусыгъуэ нэхъыщхьэр, дауикІ, Иеговэ нэхъ гъунэгъу дыхуэхъуныращ, ауэ Библиер щыдджкІэ нэгъуэщІ мурадхэри диІэнкІэ хъунущ. Иныкъуэхэм деж упщІэ къыдатам и жэуапыр къыдолъыхъуэ, абы нэмыщІ Іуэхугъуэ гугъу гуэр дихуа иужь сыт тщІэнуми къыдгурыІуэн щхьэкІэ Библиер додж.

13. 1) Школым щІэс ди къуэшым е ди шыпхъум дауэ зэрызигъэхьэзыр хъунур и фІэщ хъум теухуауэ къыдеджэхэм яжриІэн щхьэкІэ? 2) Колоссэ 4:6 ит псалъэхэр дауэ къэбгъэсэбэп хъуну?

¹³ Псалъэм папщІэ, уэ школым ущоджэ. Къыбдеджэхэм къыщалъхуа махуэр ягъэлъапІэ. Уэ ухуейт апхуэдэ махуэхэр щІомыгъэлъапІэм Библием итыр лъабжьэ зэрыхуэхъур къагурыбгъэІуэну, ауэ щІэныгъэ уиІэр мащІэу къыпщохъу. Библиер бджыну ар щхьэусыгъуэфІщ. Уэ мурадитІ бгъэув хъунущ: япэрауэ, апхуэдэ махуэхэр бгъэлъэпІэну Алыхьым зэрыфІэмыфІыр уи фІэщ щІэхъур уигу къэбгъэкІыжыну, етІуанэрауэ, пэжыр нэгъуэщІхэм къагурыбгъэІуэфу нэхъыфІыжу зебгъэсэну (Рим 1:20; 1 Пет. 3:15). ЯпэщІыкІэ зэупщІыж: «Сэ къыздеджэхэм сыт а махуэр щІагъэлъапІэр?» ИужькІэ абы теухуауэ ди тхыгъэхэм итыр къэплъыхъуэ хъунущ. Уи фІэщ хъур нэгъуэщІхэм къагурыбгъэІуэну узэригугъам хуэдэу гугъуу щымытынкІэ хъунущ. И нэхъыбэ цІыхухэм къыщалъхуа махуэр щІагъэлъапІэр псоми апхуэдэу зэращІэм щхьэкІэщ. Библием жиІэр зэрыпэжыр къэзыгъэлъагъуэ гупсыситІ щы къэбгъуэтмэ, а упщІэм теухуауэ пэжыр къэзыщІэну хуей цІыхум ар къыдэІэпыкъунущ. (Къеджэ Колоссэ 4:6.)

БИБЛИЕ ДЖЫНЫР НЭХЪ ПФІЭГЪЭЩІЭГЪУЭН ХЪУН ЩХЬЭКІЭ КЪАРУ ЕХЬЭЛІЭ

14—16. 1) Библием ит фІыуэ дымыцІыху тхылъхэр зытеухуар нэхъыфІу къэтщІэн щхьэкІэ сыт къыддэІэпыкъунур? 2) 16-нэ абзацым и кІэм къыщыхьа едзыгъуэхэр дауэ къызэрыбдэІэпыкъур Амос тхылъыр зытепсэлъыхь зэманым къыщекІуэкІа Іуэхугъуэхэр къыбгурыІуэну? («Библиер зытепсэлъыхь цІыхухэр нэхъыфІу зэвгъэцІыху» рамкэм феплъ.)

¹⁴ Фи нэгу къыщІэвгъэхьэ: къыкІэлъыкІуэ тхьэмахуэм Библием щыщ зы тхылъ гуэр зэхуэсым зэпкърытхын щІыдодзэ, псалъэм папщІэ Амос и тхылъыр. А тхылъым теухуауэ фэ фщІэр мащІэу къыщІэкІынщ. А бегъымбарым итхар нэхъ ффІэгъэщІэгъуэн хъун щхьэкІэ къару ефхьэлІэ. Дапхуэдэу ар зэрыпщІ хъунур?

¹⁵ ЯпэщІыкІэ фызэупщІыж: «А тхылъыр зытхам теухуауэ сыт сэ сщІэр? Хэт хъунут ар, дэнэт щыпсэур икІи сытыт ищІэр?» А бегъымбарым теухуауэ нэхъыбэ къафщІэмэ, фэ къывгурыІуэнущ абы апхуэдэ псалъэхэр икІи щапхъэхэр къыщІигъэсэбэпар. А тхылъым фыщеджэм деж бегъымбарым хьэл-щэн хэлъахэр къызыхэщ псалъэхэм гу лъыфтэ.

¹⁶ Абы нэмыщІ а тхылъыр щатха зэманыр къапщІэ хъунущ. Ар гугъукъым. ДунеищІэкІэ еджэу урысыбзэкІэ зэдзэкІа Тхыгъэ ЛъапІэр къызэІупхыу, «Таблица библейских книг» жыхуиІэм уеплъ хъунущc. Абы нэмыщІ «Слово Бога в картах и схемах» жыхуиІэ брошюрэм ит «Пророки и цари Иуды и Израиля» схемэм феплъ (Часть 1 и Часть 2). Зэхуэсым щызэпкърытхыну тхылъыр къэкІуэну зэманым теухуа тхылъу щыщыткІэ, ар щатха зэманым къыщекІуэкІа Іуэхугъуэхэр къатщІэмэ нэхъыфІщ. Сыт хуэдэ Іуэхугъуэ Іейхэм зыпыІуадзыну бегъымбарым къыхуриджэрэт? Хэтыт а зэманым псэуар? А зэманыр фІыуэ уи нэгу къыщІэбгъэхьэн щхьэкІэ Библием ит нэгъуэщІ тхылъхэми зыхуэбгъазэ хъунущ. Апхуэдэу бегъымбар Амос щыпсэуа зэманым къыщекІуэкІа Іуэхугъуэхэр къыбгурыІуэн щхьэкІэ Амос 1:1 и перекрестнэ ссылкэхэр къэбгъэсэбэп хъунущ, псалъэм папщІэ «Вторая книга царей», «Вторая летопись» тхылъхэм уеплъ хъунущ. Абы нэмыщІ Амос и зэманым псэуауэ щытынкІэ хъуну бегъымбар Осие итха тхылъым ухэплъэж хъунущ. Ар къыбдэІэпыкъунущ Амос и зэманым къэхъуа Іуэхугъуэхэр нэхъыфІу къыбгурыІуэну (2 Цар. 14:25—28; 2 Лет. 26:1—15; Ос. 1:1—11; Ам. 1:1).

НАБДЗЭГУБДЗАПЛЪЭУ ЕДЖЭ

17, 18. Набдзэгубдзаплъэу узэреджэр дапхуэдэу къызэрыбдэІэпыкъунур Библие джыныр нэхъ гъэщІэгъуэн пщІыну? Абзацым къыщыхьа щапхъэхэр е фэ езым фи щапхъэр къэфхь.

¹⁷ Библием ущеджэм деж нэхъыбэ къэпщІэну ухущІэкъумэ нэхъыфІщ. Псалъэм папщІэ, Мэссихь зэрылІэнур щыжыІа Захарие и тхылъым, 12-нэ псалъащхьэм уеджэн хуейщ (Зах. 12:10). Уэ уеджэурэ 12-нэ едзыгъуэм унос, абы щыжыІащ «Нафан и унэм щыщ унагъуэм» Мэссихь зэрагъеинур. Мы псалъэхэм гулъытэ хуомыщІу ублэмыкІыу, укъоувыІэри уогупсыс: «Нафан и унэмрэ Мэссихьрэ дауэ зэрызэпыщІар? Абы теухуауэ дэнэ нэхъыбэ къыщысщІэфынур?» УпщІэ уиІэхэм и жэуапхэр къэбгъуэтыну иужь уохьэ. Уэ болъагъу мы едзыгъуэм «Нафан» псалъэм перекрестнэ ссылкэу тІу зэриІэр. Зы ссылкэм 2 Самуила 5:14 ухуешэ, абы щыжыІащ пащтыхь Даут и къуэхэм ящыщ зыуэ Нафан зэрыщытыр. Адрей ссылкэм Лука 3:31 ухуешэ, мы едзыгъуэм къыбгурегъаІуэ Мэрием и лъэныкъуэкІэ Хьисэ Нафан къытехъукІауэ зэрыщытырd. Ар пфІэгъэщІэгъуэн мэхъу! Уэ бощІэ Мэссихь Даут и щІэблэм къызэрыхэкІынур Библием щыжыІауэ зэрыщытар (Мт. 22:42). Ауэ Даут къуэуэ 20-м нэхърэ нэхъыбэ иІащ. ГъэщІэгъуэнкъэ-тІэ Захарие Хьисэ зыгъеинухэм я гугъу щищІым Нафан и унэр къызэрыхигъэщар?

¹⁸ Иджыри зы щапхъэ зэпкърытхынщ. Лука итхыжа хъыбарыфІым и япэ псалъащхьэм Мэрием къуэ иІэнум теухуауэ мелыІыч ДжэбрэІил жиІа псалъэхэр итщ: «Ар цІыхушхуэ хъунущ, Тхьэуэ Лъагэм и КъуэкІэ еджэнущ. И адэшхуэ Даут и тахътэр Зиусхьэну Тхьэм абы къритынущ. МыкІуэдыжын тепщэныгъэ Екъуб и лъэпкъым хуиІэнущ абы. И тепщэныгъэшхуэм зэи кІэ иІэнукъым» (Лк. 1:32, 33). Дэ ДжэбрэІил жиІа псалъэхэм и япэ Іыхьэм занщІэу гу лъыттэу къыщІэкІынщ: «Тхьэуэ Лъагэм и КъуэкІэ» Хьисэ зэреджэнум. Ауэ, абы нэмыщІ ДжэбрэІил жиІат Хьисэ тепщэныгъэ зэриІэнур. А псалъэхэр Мэрием щызэхихам щыгъуэ сытым егупсысыфынут? Пащтыхь Ирод е абы и пІэкІэ теувэну гуэрым и увыпІэр Хьисэ иубыдыну и гугъауэ пІэрэ Мэрием? Ар мыпхуэдэу егупсысынкІэ хъунут: «Хьисэ пащтыхь хъумэ, сэ пащтыхь гуащэ сыхъунущ икІи си унагъуэр пащтыхь унэм щыпсэунущ». Ауэ Библием зыщІыпІэ дежи иткъым Мэрием апхуэдэ гуэр ДжэбрэІил жриІауэ. Абы нэмыщІ Екъубрэ Иуанрэ хуэдэу Мэрием Пащтыхьыгъуэм увыпІэ лъагэ къыщритыну зэи Хьисэ елъэІуакъым (Мт. 20:20—23). Абы къыдгурегъаІуэ Мэрием егъэлеяуэ цІыху Іэдэбу зэрыщытар.

19, 20. Екъуб 1:22—25; 4:8 зэрыжиІэмкІэ, Библиер щыдджым деж сыт хуэдэ мурадхэр диІэн хуей?

¹⁹ Зыщывмыгъэгъупщэ: Библиемрэ абы тегъэщІа тхыгъэхэмрэ щІэдджым и щхьэусыгъуэ нэхъыщхьэр — Иеговэ нэхъ гъунэгъу дыхуэхъуныращ. Абы нэмыщІ сыт хуэдэ цІыхуу дыщытми зэхэдгъэкІыну икІи Иеговэ дгъэгуфІэн щхьэкІэ тхъуэжын хуейр къыдгурыІуэну дыхуейщ. (Къеджэ Екъуб 1:22—25; 4:8.) Зыгуэр дджыну дыщытІысым деж Иеговэ и къару лъапІэр къыдитыну делъэІун хуейщ. Дэ Алыхьым делъэІун хуейщ дызэджэм сэбэпынагъ нэхъыбэ хэтхыну икІи абы и нэкІэ дызэплъыжыну къыддэІэпыкъуну.

²⁰ Иеговэ и лэжьакІуэ пэжым теухуауэ Псаломыр зытхам жиІат: «Ар Иеговэ и хабзэхэм ирогушхуэ икІи жэщи махуи и хабзэхэм макъкІэ йоджэ. [...] Сыт имыщІэми, абы ехъулІэныгъэ иІэнущ» (Пс. 1:2, 3). ДауикІ, дэри дыхуейщ апхуэдэу къытхужаІэну!