Пасэрей Израилым къыщекІуэкІа лъагъуныгъэмрэ захуагъэмрэ (ІыхьиплІым и япэр)

1, 2. 1) Дэтхэнэ цІыхури сыт зыхуэныкъуэр? 2) Сыт шэч къызытедмыхьэр?

ДЭТХЭНЭ ЗЫРИ дыхуэныкъуэщ лъагъуныгъэрэ захуагъэрэ хэлъу цІыхухэр къытхущытыну. Апхуэдэу щымытмэ, дэ зыри къытхуэмейуэ икІи хэкІыпІэ димыІэу къытщыхъункІэ хъунущ.

² Иеговэ ещІэ дэ захуагъэмрэ лъагъуныгъэмрэ егъэлеяуэ дызэрыхуэныкъуэр (Пс. 33:5). Шэч къытедмыхьэми хъунущ дэ Иеговэ икъукІэ фІыуэ дыкъызэрилъагъум икІи захуагъэм тету цІыхухэр къытхущытыну ар зэрыхуейм. Абы щыхьэт тохъуэ Иеговэ Мусэ къигъэсэбэпу Израилым ирита Хабзэр. ФІыуэ укъамылъагъумэ е лей къыплъысмэ, Иеговэ и лъэпкъыр фІыуэ зэрилъагъур Мусэ и хабзэмb къызэрыхэщым куууэ егупсыс.

3. 1) Рим 13:8—10 зэритымкІэ, Мусэ и хабзэм дыщегупсысым деж сыт абы хэтлъагъуэр? 2) Мы статьям сыт хуэдэ упщІэхэр щызэпкърытхыну?

³ Мусэ и хабзэм дыщегупсысым деж, абы хыдолъагъуэ фІыуэ дыкъэзылъагъу Иеговэ гурыщІэ хуабэхэр къызэрытхуиІэр. (Къеджэ Рим 13:8—10.) Мы статьям Израилым яІа хабзэхэм щыщу языныкъуэхэр зэпкърытхынущ икІи мыпхуэдэ упщІэхэм жэуап еттынущ: Мусэ и хабзэм лъагъуныгъэр лъабжьэ хуэхъуауэ икІи а Хабзэм захуагъэ пхэлъу адрейхэм ухущытыну ухуигъэушу сыт жыпІэ щІэхъунур? Тепщэныгъэ зиІэхэм дапхуэдэут Хабзэр зэрагъэзэщІэн хуейр? Хэтыт псом хуэмыдэу Хабзэм къихъумэр? Мы упщІэхэм я жэуапхэм дэ гупсэхугъуэрэ гугъапІэрэ къыдатынущ икІи фІыуэ дыкъэзылъагъу ди Адэм нэхъ гъунэгъу дыхуащІынущ (Апост. 17:27; Рим 15:4).

ЛЪАГЪУНЫГЪЭМ ТЕГЪЭЩІА ХАБЗЭР

4. 1) Мусэ и хабзэм лъагъуныгъэр лъабжьэ хуэхъуауэ сыт жыпІэ щІэхъунур? 2) Маттэ 22:36—40 зэритымкІэ, сыт хуэдэ унафитІыра псом нэхърэ нэхъапэр?

⁴ Иеговэ сыт имыщІэми псори лъагъуныгъэм къыхэкІыу ещІэ. Аращ Мусэ и хабзэм лъагъуныгъэр лъабжьэ хуэхъуауэ жыпІэ щІэхъунур (1 Ин. 4:8). Ар зытегъэщІар мыпхуэдэ унафитІырат — Алыхьыр фІыуэ лъагъу, уи гъунэгъури фІыуэ лъагъу (Лев. 19:18; Втор. 6:5; къеджэ Маттэ 22:36—40). Апхуэдэу щыщыткІэ, унафэ 600-м щІигъум щыщу дэтхэнэ зыми Алыхьым и лъагъуныгъэр къыхэщт. Языныкъуэ щапхъэхэр зэпкърытхынщ.

5, 6. Иеговэ зэщхьэгъусэхэм сыт къахуигъэувыр икІи Іэмал имыІэу сытым абы гу лъитэрэ? Щапхъэ къэфхь.

⁵ Уи щхьэгъусэм хуэпэжу щыт икІи уи сабийхэм уи нэІэ ятегъэт. Иеговэ хуейщ зэщхьэгъусэхэм зэхуаІэ лъагъуныгъэр зэи мыужьыхыжыну (ЩІэдз. 2:24; Мт. 19:3—6). Уи щхьэгъусэм уепцІыжыныр гущІэгъуншагъэ дыдэщ. УнафипщІым щыщу ебланэм щыжыІат: «Зинэ умыщІэ» (Втор. 5:18). Зинэ зыщІэм Алыхьым и пащхьэ гуэныхь къыщехь икІи и щхьэгъусэм и гум уІэгъэ трелъхьэ (ЩІэдз. 39:7—9). А уІэгъэр илъэс бжыгъэкІэ щымыхъуж къохъу.

⁶ Иеговэ елъагъу зэщхьэгъусэхэр зэрызэхущытыр. Абы мыхьэнэшхуэ иритт журт лъэпкъым щыщ цІыхухъур и щхьэгъусэм фІыуэ хущытыным. ЛІым Хабзэм пщІэ хуищІмэ, и щхьэгъусэр фІыуэ илъагъут икІи мыхьэнэ зимыІэм щхьэкІэ ар иригъэкІыжтэкъым (Втор. 24:1—4; Мт. 19:3, 8). Унагъуэм гугъуехьышхуэ илъмэ икІи абы щхьэкІэ лІым и фызыр иригъэкІыжыну унафэ ищІмэ, абы и фызым иритын хуейт зэрыригъэкІыжым щыхьэт техъуэ тхылъ. А тхылъым цІыхубзыр къихъумэт, абы зинэ ищІауэ пцІы къытрамылъхьэн щхьэкІэ. Абы нэмыщІ и фызыр иригъэкІыжын ипэ, лІым къалэм дэс нэхъыжьхэм захуигъэзэн хуейуэ къыщІэкІынт. Абы и фІыгъэкІэ нэхъыжьхэр зэщхьэгъусэхэм я нэчыхьыр яхъумэну дэІэпыкъуфт. ЩхьэзыфІэфІагъым къыхэкІыу цІыхухъум и щхьэгъусэр щыригъэкІыжым деж, Иеговэ а Іуэхум щыхэмыІэбэ къэхъут. Ауэ абы щыгъуэми Иеговэ цІыхубзым и нэпсхэр илъагъут, и узри зыхищІэт (Мал. 2:13—16).

7, 8. 1) Иеговэ адэ-анэхэм сыт хуэдэ къалэн яритар? (Обложкэм тет сурэтым феплъ.) 2) Сыт хуэдэ дерс дэ абы къыхэтхыр?

⁷ Мусэ и хабзэм къыхощ сабийхэр фІы хуэзэну Иеговэ зэрыхуейр. Адэ-анэхэм я къалэнт я сабийхэр зыхуей зэрыхуагъазэм нэмыщІ, Алыхьым теухуауэ ирагъэджэну. Абыхэм сыт хуэдэ Іэмалри къагъэсэбэпу я сабийхэр Хабзэм ирагъэджэн хуейт икІи Иеговэ фІыуэ ялъагъуу ирагъэсэн хуейт (Втор. 6:6—9; 7:13). Иеговэ журт лъэпкъым тезыр щІытрилъхьам и щхьэусыгъуэхэм ящыщ зыт ахэр сабийхэм гущІэгъуншэу зэрахущытар (Иер. 7:31, 33). Адэ-анэхэм я сабийхэм сыт иращІэми хъуну ябжын хуейтэкъым, атІэ ахэр «Иеговэ къыбгъэдэкІ щІэину», тыгъэ лъапІэу ялъытэн хуейт (Пс. 127:3).

⁸ Дерсыр. Иеговэ елъагъу зэщхьэгъусэхэр зэрызэхущытыр. Ар хуейщ адэ-анэхэм я сабийхэр фІыуэ ялъагъуну икІи ахэр я сабийхэм Іейуэ хущытмэ, Иеговэ и деж жэуап щатыжынущ.

9—11. «Хъуэпсэныгъэ мыхъумыщІэ уи гум йомыгъэлъ» жыхуиІэ унафэр Иеговэ журт лъэпкъым щІритар сытыт?

⁹ «Хъуэпсэныгъэ мыхъумыщІэ уи гум йомыгъэлъ». УнафипщІым щыщу иужьрейм къыхуриджэт цІыхур мыфыгъуэну е, нэгъуэщІу жыпІэмэ, зыгуэрым ейр зыІэригъэхьэну хэмытыну (Втор. 5:21; Рим 7:7). А унафэмкІэ Иеговэ и лъэпкъыр мыхьэнэшхуэ зиІэ гуэрым хуригъэсэну хуейт: уи гур пхъумэн хуейщ, абы хохьэ уи гурыщІэхэмрэ уи гупсысэхэмрэ узэрыкІэлъыплъын хуейр. Алыхьым ещІэ Іуэхугъуэ Іейр гупсысэ мыхъумыщІэм къызэрыщежьэр (Прит. 4:23, Гъэсэпэтхыдэхэр). Израилым щыщ гуэрым гупсысэ мыхъумыщІэхэм и гум лъабжьэ щригъэщІамэ, ар адрейхэм лъагъуныгъэ хэлъу яхущытыжтэкъым. Апхуэдэ щыуагъэщ пащтыхь Даут ищІар. Даут цІыхуфІт, ауэ зэгуэр ар нэгъуэщІым и фызым ехъуэпсащ. Хъуэпсэныгъэ мыхъумыщІэм къыхэкІыу абы гуэныхь илэжьащ (Екъуб 1:14, 15). Даут а цІыхубзым и гъусэу зинэ ищІащ, абы и лІыр къигъэпцІэну хэтащ икІи иужькІэ а лІыр иригъэукІащ (2 Сам. 11:2—4; 12:7—11).

¹⁰ ЦІыхум и гум хъуэпсэныгъэ мыхъумыщІэ илъмэ, Иеговэ абы занщІэу гу лъитэт (1 Лет. 28:9). Хабзэм фыгъуэныр зэримыдэм цІыхухэр хуигъэушт гуэныхь щІэным ухуэзышэфыну гупсысэхэм пэІэщІэ зыхуащІыну. Абы ди Адэ Иеговэ и лъагъуныгъэмрэ и Іущагъымрэ къыхощ.

¹¹ Дерсыр. Иеговэ и дежкІэ цІыхум и теплъэракъым мыхьэнэ зиІэр, атІэ абы и гум илъыращ (1 Сам. 16:7). Алыхьым псори елъагъу: ди гупсысэхэри, ди гурыщІэхэри, ди ІуэхущІафэхэри. Абы фІы тхэлъым гу лъетэ икІи нэхъыфІыж дыхъуну дыхуегъэуш. Ауэ Иеговэ иджыри хуейщ ди гупсысэ къемызэгъхэм гу лъыттэну икІи абыхэм Іей гуэр дагъэщІэну хуит дымыщІыну (2 Лет. 16:9; Мт. 5:27—30).

ЗАХУАГЪЭМ УТЕТЫНУ УХУЭЗЫГЪЭУШ ХАБЗЭ

12. Мусэ и хабзэм сыт иджыри дэ къыщытщІэр?

¹² Мусэ и хабзэм къыхощ Иеговэ захуагъэр фІыуэ зэрилъагъур (Пс. 37:28; Ис. 61:8). Захуагъэ тхэлъу нэгъуэщІхэм дазэрыхущытын хуейм теухуауэ щапхъэ нэхъыфІ дыдэр Иеговэ дегъэлъагъу. Израил цІыхухэм Иеговэ и унафэхэр щагъэзащІэм деж, абы и нэфІ ящыхуэт. Ауэ захуагъэ зыхэлъ унафэхэм ахэр щебакъуэм деж, гузэвэгъуэ куэдым пэщІэхуэт. УнафипщІым щыщу иджыри тІум дыхэплъэнщ.

13, 14. УнафипщІым щыщу япэ унафитІым сытыт итыр икІи а унафэхэм журт лъэпкъыр зэрыхущытым сытыт къахуихьыр?

¹³ Иеговэ нэмыщІ нэгъуэщІым ухуэмылажьэ. УнафипщІым щыщу япэ унафитІым зэрыжаІэмкІэ, журтхэр Иеговэ закъуэт зыхуэлэжьэн хуейр икІи ахэр тхьэ нэпцІхэм хуэлажьэ хъунутэкъым (Исх. 20:3—6). Иеговэ и фейдэ хэлъу аратэкъым а унафэхэр и лъэпкъым щІыритар, атІэ сэбэпынагъ къыхуихьын щхьэкІэщ. Израил лъэпкъыр Иеговэ пэжу щыхуэлажьэм деж, ехъулІэныгъэ иІэт. Ауэ тхьэ нэпцІхэм щыхуэлажьэм деж, гузэвэгъуэ куэдым хэхуэт.

¹⁴ Хананей цІыхухэм девгъэгупсыс. Ахэр зыхуэлажьэр Алыхь пэжыратэкъым, атІэ псэ зыІумыт тхьэ нэпцІхэрат. ИкІэм-икІэжым абыхэм я щытыкІэр нэхъыкІэ хъуащ (Пс. 115:4—8). Псалъэм папщІэ, хананейхэм я диным хыхьэт цІыху гупыр зэгъусэу зинэ щІэным зэрыхэтымрэ гущІэгъуншэу сабийхэр къурмэныпхъэу къызэрахьымрэ. А псор гущыкІыгъуэт. Израил цІыхухэм Иеговэ къагъанэу, тхьэ нэпцІхэм хуэлэжьэн щыщІадзэм деж, абыхэм я щытыкІэр нэхъыкІэ хъут икІи абыкІэ я Іыхьлыхэм я гум еуэт (2 Лет. 28:1—4). А псом нэмыщІ тепщэныгъэ зиІэхэри Алыхьым къыбгъэдэкІ захуагъэм ебакъуэт. Абыхэм я тепщэныгъэр тэмэму къамыгъэсэбэпу, цІыху тхьэмыщкІэхэмрэ къыщхьэщыжын зимыІэхэмрэ хьэзаб тралъхьэт (Иез. 34:1—4). Иеговэ и лъэпкъым жриІэт Іыхьэншэу къэна цІыхубзхэмрэ сабийхэмрэ гущІэгъуншэу яхущытым хьэкум зэрытрищІыхьынур (Втор. 10:17, 18; 27:19). Ауэ Иеговэ израил цІыхухэм и нэфІ ящыхуэт, ахэр абы хуэпэжу къанэмэ икІи зыр адрейм захуагъэ хэлъу хущытмэ (1 Цар. 10:4—9).

15. Мусэ и хабзэм сыт хуэдэ дерс иджыри къыхэтхыр?

¹⁵ Дерсыр. Иеговэ къуаншэкъым абы и лэжьакІуэу зызыбжыжыр Библием ит хабзэхэм ебакъуэу, адрейхэм зэран яхуэхъумэ. Иеговэ дэ фІыуэ дыкъелъагъу икІи лей къыттехьам гугъу дызэрыригъэхьым гу лъетэ. Анэм сабийм и узыр зэрызыхищІэм нэхърэ нэхъыбэу Иеговэ ди узыр зыхещІэ (Ис. 49:15). Ар занщІэу Іуэхум щыхэмыІэбэ къэхъуми, и зэманыр къэсмэ, хущІемыгъуэжу адрейхэм гущІэгъуншэу яхущыт цІыхухэм жэуап яригъэтыжынущ.

ХАБЗЭР ДАПХУЭДЭУТ ЗЭРЫЛАЖЬЭР?

16—18. ГъащІэм и сыт хуэдэ лъэныкъуэхэрат Мусэ и Хабзэм къызэщІиубыдэр икІи сыт хуэдэ дерс дэ абы хэтхыр?

¹⁶ Мусэ и хабзэм гъащІэм и лъэныкъуэ псори зэщІиубыдэт. Абы къыхэкІкІэ мыхьэнэшхуэ иІэт Израилым и нэхъыжьхэм лъэпкъым и Іуэхухэр захуагъэм тету зэхагъэкІыну. Алыхьым зэрыхуэлажьэм пыщІа упщІэхэм нэмыщІ, гражданскэ, уголовнэ Іуэхухэри зэхагъэкІыну абыхэм я къалэнт. Щапхъэ зыбжанэ зэпкърытхынщ.

¹⁷ Израил цІыхум зыгуэр иукІамэ, ар занщІэу яукІыжтэкъым. Къалэм дэс нэхъыжьхэм абы и Іуэхур зэпкърахт икІи зэхагъэкІт лІэныгъэ абы къилэжьрэ къимылэжьрэ (Втор. 19:2—7, 11—13). Абы нэмыщІ нэхъыжьхэм махуэ къэс зэпкърах упщІэ зэмылІэужьыгъуэхэм хыхьэт журтхэм мылъкур щахуэмыгуэш Іуэхухэр, унагъуэм къихьэ гугъуехьхэр, нэгъуэщІхэри (Исх. 21:35; Втор. 22:13—19). Нэхъыжьхэм захуагъэ хэлъу унафэ ящІмэ, израил цІыхухэми Хабзэр ягъэзащІэмэ, псори гъащІэмкІэ арэзыуэ псэут икІи лъэпкъым Иеговэ игъэлъапІэт (Лев. 20:7, 8; Ис. 48:17, 18).

¹⁸ Дерсыр. Сыт хуэдэ Іуэхуми дызэрыбгъэдыхьэм Иеговэ мыхьэнэшхуэ ирет. Иеговэ хуейщ цІыхухэм я деж дэ лъагъуныгъэрэ захуагъэрэ щыдгъэлъэгъуэну. Дэ жытІэу хъуари, тщІэуэ хъуари Иеговэ сытым щыгъуи зэхех икІи елъагъу, ди закъуэу дыкъыщынэм дежи (Евр. 4:13).

19—21. 1) Нэхъыжьхэмрэ хьэкум зыщІхэмрэ Алыхьым и лъэпкъым дапхуэдэут зэрыхущытын хуейр? 2) Иеговэ и лъэпкъым лей къытемыхьэн щхьэкІэ сыт ищІар икІи сыт хуэдэ дерс дэ абы къыхэтхыр?

¹⁹ Иеговэ хуейт и лъэпкъыр адрей къэзыухъуреихь лъэпкъхэм къыщекІуэкІ мыхъумыщІагъэ псом щихъумэну. Абы къыхэкІкІэ Иеговэ нэхъыжьхэмрэ хеящІэхэмрэ унафэ яхуищІащ нэфІ-ней яхэмылъу Хабзэр къагъэсэбэпыну. Нэхъыжьхэр лъэпкъым ткІийуэ икІи пхъашэу хущытын хуейтэкъым, атІэ лъагъуныгъэрэ захуагъэрэ ягъэлъэгъуэн хуейт (Втор. 1:13—17; 16:18—20).

²⁰ Иеговэ и лэжьакІуэхэм яхуэгумащІэщи аращ абыхэм лей къатемыхьэн щхьэкІэ а хабзэхэр щІаритар. Псалъэм папщІэ, Хабзэм цІыхур къихъумэт, имыщІа гуэр къытрамылъхьэн щхьэкІэ. Ягъэкъуаншэр хуитт зыгъэкъуаншэр хэтми ищІэну (Втор. 19:16—19; 25:1). Ар къуаншэу къалъытэн щхьэкІэ, абы илэжьа Іуэхум щыхьэтитІ иІэн хуейт (Втор. 17:6; 19:15). А Іуэхум теухуауэ зы цІыху фІэкІа щыхьэту къэмыувмэ-щэ? Ягъэкъуаншэр тезырыншэу къэнэну щыгугъ хъунутэкъым, сыт щхьэкІэ жыпІэмэ Иеговэ псори илъэгъуат. Унагъуэм и нэхъыжьым тепщэныгъэ иІэми, а тепщэныгъэм гъунэ иІэт. Языныкъуэхэм деж унагъуэм и зэгурымыІуэныгъэр къалэм дэс нэхъыжьхэм щызэпкърах къэхъут икІи пыухыкІа унафэр зыщІыр ахэрат (Втор. 21:18—21).

²¹ Дерсыр. Иеговэ ищІэу хъуам захуагъэ хэлъщ. АбыкІэ абы щапхъэ нэхъыфІ дыдэр дегъэлъагъу (Пс. 9:7). Иеговэ и нэфІ щохуэ пэжагъ хэлъу и хабзэхэр зыгъэзащІэм, ауэ и тепщэныгъэр тэмэму къимыгъэсэбэпу, Іей зыщІэм тезыр трелъхьэ (2 Сам. 22:21—23; Иез. 9:9, 10). Лей зезыхьэхэмрэ цІыху бзаджащІэхэмрэ тезырыншэу къанэу къыщыпщыхъу щыІэщ, ауэ, и зэманыр къэсмэ, абыхэм Иеговэ жэуап яригъэтыжынущ (Прит. 28:13, Гъэс.). ЩІэпхъэджагъэ зылэжьауэ хущІемыгъуэжхэм мы псалъэхэм къикІыр куэд мыщІэу къагурыІуэнущ: «Къуаншагъэ зэрыпщІам щхьэкІэ гъащІэ зиІэ Тхьэм и ІэмыщІэ уихуэныр куэду шынагъуэшхуэщ» (Евр. 10:30, 31).

ПСОМ ХУЭМЫДЭУ ХАБЗЭМ ХЭТЫТ КЪИХЪУМЭР?

22—24. 1) Псом хуэмыдэу Хабзэм хэтыт къихъумэр икІи сыт хуэдэ дерс абы къыхэтхыр? 2) Исход 22:22—24 итыр сыт?

²² Псом хуэмыдэу Хабзэм къихъумэт дэІэпыкъуэгъу зимыІэхэр — зеиншэхэр, фызабэхэр, хэхэсхэр. Израилым щыІэ хеящІэхэм хуэгъэзат мы псалъэхэр: «Хэхэсым е зеиншэм и Іуэхур щызэпкърыпхкІэ захуагъэм уемыбакъуэ, фызабэм и щыгъынри шэсыпІэу къомыщтэ» (Втор. 24:17). Къыщхьэщыжын зимыІэхэм Иеговэ щабэу и нэІэ ятригъэтт икІи абыхэм я жагъуэ зыщІхэм тезыр ятрилъхьэт. (Къеджэ Исход 22:22—24c.)

²³ Хабзэм унагъуэм исхэр къихъумэт, абыхэм я благъэхэм лей кърамыхын щхьэкІэ, сыт щхьэкІэ жыпІэмэ зэблагъэхэр зэгъусэ хъунутэкъым (Лев. 18:6—30). Къэзыухъуреихь лъэпкъхэм апхуэдэ зинэ щІэным зыри Іей халъагъуэтэкъым икІи къезэгъыу ябжт. Иеговэ и дежкІэ а Іуэхухэр гущыкІыгъуэт икІи израил цІыхухэми апхуэдэ еплъыкІэт яІэн хуейр.

²⁴ Дерсыр. Иеговэ хуейщ тепщэныгъэ зыритахэр адрейхэм лъагъуныгъэ яхэлъу яхущытыну. Алыхьым илъагъу хъукъым лей ехыныр. Абы и дежкІэ мыхьэнэ иІэщ къыщхьэщыжын зимыІэхэр мышынэу, хуиту псэуну икІи адрейхэр захуагъэм тету абыхэм къахущытыну.

ХАБЗЭР — «КЪЭКІУЭНУ ІУЭХУФІХЭМ Я НЫБЖЬЩ»

25, 26. 1) Лъагъуныгъэмрэ захуагъэмрэ сыт щІебгъэщхь хъунур гъащІэмрэ бэуэнымрэ? 2) КъыкІэлъыкІуэ статьям сыт щызэпкърытхынур?

²⁵ Лъагъуныгъэмрэ захуагъэмрэ зэпхащ, гъащІэмрэ бэуэнымрэ зэрызэпхам хуэдэу. Иеговэ захуагъэ хэлъу къызэрытхущытыр тщІэуэ щытмэ, абы худиІэ лъагъуныгъэр хохъуэ. Алыхьымрэ абы къыдита хабзэхэмрэ худиІэ лъагъуныгъэм дыхуегъэуш захуагъэ тхэлъу адрейхэм дахущытыну.

²⁶ Мусэ и хабзэр нэхъыфІкІэ зэхъуэкІа хъуащ Хьисэ къакІуэу ар игъэзэщІа иужь (Рим 10:4). Паул зэрыжиІамкІэ, Хабзэр — «къэкІуэну ІуэхуфІхэм я ныбжьщ» (Евр. 10:1). ІыхьиплІу зэхэлъ статьяхэм щыщу къыкІэлъыкІуэм щызэпкърытхынущ «ІуэхуфІ» хъужыр сытми икІи дытепсэлъыхьынущ лъагъуныгъэмрэ захуагъэмрэ зэхуэсым сыт хуэдэ мыхьэнэ щаІэми.