Адэ-анэхэ, фи сабийхэм псым зыщІагъэуэну зыхуагъэхьэзырыну фадэІэпыкъурэ?
«Сыт зыщІэбгъэгувэр? Къэтэдж, зызгъэумэхъ [псым зыщІэгъауэ, ДЩІ]» (АПОСТ. 22:16).
1. Іущагъ зыхэлъ адэ-анэхэм я сабийм псым зыщІигъэуэн ипэ сыт зэхагъэкІыну зыхуейр?
«МАЗЭ бжыгъэкІэ сэ си адэ-анэм псым зыщІэзгъэуэну сызэрыхуейр яжесІэт икІи ахэр абы теухуауэ щІэх-щІэхыурэ къызэпсалъэт. Абыхэм зэхагъэкІыну яхуейт а лъэбакъуэм мыхьэнэшхуэ зэриІэр фІыуэ къызгурыІуэрэ къызгурымыІуэрэ. А Іуэхугъуэ лъапІэр 1934 гъэм, дыгъэгъазэм и 31-м къэхъуащ». Апхуэдэу Блоссом Брандт псым зыщІигъэуэну мурад щищІам къэхъуа Іуэхугъуэм тепсэлъыхьыжауэ щытащ. Ноби адэ-анэхэм яхуейщ я сабийхэм Іущагъ зыхэлъ унафэхэр къащтэну. Щхьэусыгъуэ имыІэу уи сабийм «Псым зыщІэбгъэуэну жьыІуэщ» жепІэмэ, ар Иеговэ хуиІэ хущытыкІэм зэран хуэхъункІэ хъунущ (Екъуб 4:17). Іущагъ зыхэлъ адэ-анэхэм сабийм псым зыщІигъэуэн ипэ зэхагъэкІыну яхуейщ я сабийр хуэхьэзыррэ хуэмыхьэзыррэ Хьисэ и бжьыр къищтэну.
2. 1) Языныкъуэ районым и нэхъыжьхэм сыт гу зылъатар? 2) Мы статьям сыт щызэпкърытхынур?
2 Ди зэхуэсхэм зи ныбжьыр илъэс 20 хуэдиз хъу щІалэгъуалэ куэд хэтщ. Языныкъуэ районым и нэхъыжьхэм гу лъатащ, ахэр Иеговэ и Щыхьэту щыт унагъуэхэм къыщыхъуами, куэдым иджыри псым зэрызыщІамыгъэуам. Абыхэм щыщ я нэхъыбэр зэхуэсхэм макІуэ, хъыбарыфІыри ягъэІу. Абыхэм Иеговэ и Щыхьэту забжыж, ауэ щхьэусыгъуэ гуэр щхьэкІэ я гъащІэр Иеговэ и ІэмыщІэ иралъхьэу псым зыщІагъэуэну пІащІэкъым. Сыт щхьэкІэ? Языныкъуэм деж ар апхуэдэу щІыщытыр я адэ-анэхэм ахэр псым зыщІагъэуэну хуэмыхьэзыру зэрагугъэращ. АдэкІэ мы статьям щызэпкърытхынущ адэ-анэхэр зыгъэгузавэ упщІиплІ.
СИ САБИЙМ И НЫБЖЬЫР НЭСАУЭ ПІЭРЭ?
3. Блоссом и адэ-анэр сытыт зыгъэгузавэр?
3 Мы статьям ипэм зи гугъу тщІа Блоссом и адэ-анэхэр егупсыст: «Ди пхъум и ныбжьыр нэсауэ пІэрэ псы зыщІэгъэуэным къикІыр икІи абы мыхьэнэшхуэ зэриІэр къыгурыІуэн хуэдэу?» ИкІи абыхэм апхуэдэ упщІэ зэраІар гурыІуэгъуэщ. Дауэ-тІэ адэ-анэхэм къызэращІэнур я сабийр хуэхьэзыррэ хуэмыхьэзыррэ и гъащІэр Иеговэ и ІэмыщІэ ирилъхьэну?
4. Маттэ 28:19, 20 ит Хьисэ и унафэр дауэ адэ-анэхэм зэрыдэІэпыкъур я сабийхэр ирагъэджэну?
4 Къеджэ Маттэ 28:19, 20. Мыбы ипэ дызэджа статьям зэритамкІэ, Библием жиІэкъым псым зыщІэбгъэуэн щхьэкІэ илъэс бжыгъэ гуэр урикъун хуейуэ. Ауэ адэ-анэхэр Хьисэ жиІа псалъэхэм къикІым егупсысу щытмэ, ар сэбэп яхуэхъунущ. Абы жиІат: «Лъэпкъ псори си гъуэгу къытевгъыхьэ». Маттэ 28:19 ит «си гъуэгу къытевгъыхьэ» жыхуиІэ псалъэхэм алыджыбзэкІэ мурад хэха гуэр уиІэу зыгуэр егъэджэн къокІ. Хьисэ и лъэужь ирикІуэ цІыхур — ар Хьисэ зыхуригъаджэу щытахэр зэзыгъэцІыхур, ахэр къызыгурыІуэр икІи абыхэм тету псэуну мурад зыщІыращ. Абы къыхэкІкІэ адэ-анэхэм я сабийхэр зэрыцІыкІурэ щырагъаджэкІэ мурад яІэн хуейщ — абыхэм псым зыщІагъауэу Хьисэ и лъэужь ирикІуэ хъуну дэІэпыкъуну. ДауикІ, сабий цІынэхэр псым щІагъауэкъым, ауэ Библием зэритымкІэ, сабийхэми Алыхьым и Псалъэм ит пэжхэр къагурыІуэфынущ икІи фІыуэ ялъагъуфынущ.
5, 6. 1) Библием итым тепщІыхьмэ, дапщэщ Тимофей псым зыщыщІигъэуауэ къыщІэкІынур? 2) Іущагъ зыхэлъ адэ-анэхэм ехъулІэныгъэ яІэу дауэ я сабийхэм зэрадэІэпыкъуфынур?
5 Тимофей иджыри ныбжьыщІэу Иеговэ хуэлэжьэну мурад ищІауэ щытащ. Паул зэрыжиІамкІэ, Тимофей и «сабиигъуэм къыщыщІэдзауэ» Алыхьым и Псалъэм итыр ищІэт. Абы и унагъуэм щыщхэр псори Иеговэ хуэлажьэу щымытами, журту щыта и анэмрэ и анэшхуэмрэ Алыхьым и Псалъэр фІыуэ илъагъуу ягъэсащ. Абы и фІыгъэкІэ Тимофей фІэщхъуныгъэ быдэ зригъэгъуэтащ (2 Тим. 1:5; 3:14, 15). Тимофей илъэс 20 хуэдиз щыхъум, Хьисэ и лэжьакІуэу щытт икІи зэхуэсым пщІэ зыпылъ лэжьыгъэхэр дзыхь хуащІт (Апост. 16:1—3).
6 ДауикІ, сабийхэр псори зэщхькъым икІи Алыхьым и еплъыкІэ щызэрагъэгъуэт ныбжьыр зэтехуэкъым. Языныкъуэхэр иджыри ныбжьыщІэу Алыхьым и Псалъэм ит пэжхэр фІыуэ къагуроІуэ, Іущагъ зыхэлъ унафэхэр ящІыф икІи псым зыщІагъэуэну хуейщ. Адрейхэм псым зыщІагъэуэн щхьэкІэ нэхъ балигъ хъун хуейуэ къыщІэкІынщ. Абы къыхэкІкІэ Іущагъ зыхэлъ адэ-анэхэм я сабийхэм псынщІэу псым зыщІагъэуэну хагъэзыхьынукъым. АтІэ, ахэр я сабийхэм доІэпыкъу псым зыщІагъэуэну зыхуагъэхьэзырыну, сабийхэм яІэ ехъулІэныгъэхэм елъытауэ. ДауикІ, адэ-анэхэр мэгуфІэ, я сабийхэм Іущагъ щахэлъым деж. (Къеджэ Притчи 27:11, Гъэсэпэтхыдэхэр.) Ауэ абыхэм зэи зыщагъэгъупщэ хъунукъым мурад нэхъыщхьэу яІэн хуейр, сабийм Хьисэ и лъэужь ирикІуэ хъуну дэІэпыкъунырауэ зэрыщытыр. Адэ-анэхэм ар я гум илъу зэупщІыжын хуейщ: «Си сабийм и гъащІэр Иеговэ и ІэмыщІэ ирилъхьэу псым зыщІигъэуэн щхьэкІэ щІэныгъэ иІэр мымащІэу пІэрэ?»
СИ САБИЙМ ЩІЭНЫГЪЭ ИІЭР МЫМАЩІЭУ ПІЭРЭ?
7. Псым зыщІэбгъэуэн щхьэкІэ Библием иту хъуар пщІэн хуейуэ пІэрэ? КъыдгурывгъаІуэ.
7 Адэ-анэхэм я сабийхэр ягъэсэну я къалэнщи, гурыІуэгъуэщ абыхэм Библием ит щІэныгъэ пэжхэр бгъэдалъхьэну щІахуейр. Ауэ уи гъащІэр Иеговэ и ІэмыщІэ иплъхьэу, псым зыщІэбгъэуэн щхьэкІэ Библием иту хъуар пщІэн хуейуэ щыткъым. Псым зыщІэзыгъэуа Хьисэ и лъэужь ирикІуэ дэтхэнэ зыми адэкІи и щІэныгъэм хигъэхъуэн хуейщ. (Къеджэ Колоссэ 1:9, 10.) Ауэ цІыхум псым зыщІигъэуэн щхьэкІэ сыт хуэдиз щІэныгъэ иІэн хуей?
Псым зыщІэзыгъэуа Хьисэ и лъэужь ирикІуэ дэтхэнэ зыми адэкІи и щІэныгъэм хигъэхъуэн хуейщ
8, 9. Филиппи къалэм щыщ лъэхъуэщым и хъумакІуэм и щапхъэр сыткІэ гъэщІэгъуэн?
8 Дигу къэдгъэкІыжынщ япэ лІэщІыгъуэм псэуа зы унагъуэм и щапхъэр (Апост. 16:25—33). Паул миссионер лъэжьыгъэр игъэзащІэу етІуанэу къалэхэм кІуэурэ хъыбарыфІыр щигъэІуам щыгъуэ, ди эрэм ипэ хуэгъэфэщауэ 50-нэ гъэхэм, Филиппи къалэм дыхьащ. А къалэм Паулрэ Силэрэ щаубыдри, пцІы тралъхьэри лъэхъуэщым ирадзат. Жэщым щІыр хъейри лъэхъуэщым и бжэ псори къызэІукІащ. Лъэхъуэщым и хъумакІуэм абы щІэсахэр щІэпхъуэжауэ къыфІэщІати, зиукІыжыну хуежьат, ауэ Паул ар къигъэувыІащ. Паулрэ Силэрэ ІэмалыфІ яІэ хъуат лъэхъуэщым и хъумакІуэмрэ абы и унагъуэмрэ Хьисэ теухуауэ хъыбар ирагъэщІэну. Абыхэм пэжыр къызэращІам щхьэкІэ я гум фІыщІэ илъти, занщІэу псым зыщІагъэуащ. СыткІэ гъэщІэгъуэн мы щапхъэр?
9 Лъэхъуэщым и хъумакІуэр Рим зауэлІу щытауэ къыщэкІынущ. Абы Тхыгъэ ЛъапІэр ицІыхутэкъыми, Хьисэ и лъэужь ирикІуэ хъун щхьэкІэ, Библием ит щІэныгъэ нэхъыщхьэхэр къищІэн хуейт, Алыхьым и лэжьакІуэу ущытыным къикІыр къыгурыІуэн хуейт икІи Хьисэ зыхуригъаджэу щытахэм тету псэуну мурад ищІын хуейт. Зэман кІэщІкІэ абы Библием ит щІэныгъэ нэхъыщхьэхэр къищІащ, абыхэм мыхьэнэшхуэ зэраІэр икІи кІыхьлІыхь зимыщІу, псым зэрызыщІигъэуэн хуейр къыгурыІуащ. ДауикІ, псым зыщІигъэуа иужьи абы адэкІи щІэныгъэ зригъэгъуэтын щигъэтакъым. Иджы фи сабийм фегупсыс. Абы Иеговэ фІыуэ зэрилъагъум икІи абы и хабзэхэм тетыну зэрыхуейм щхьэкІэ псым зыщІигъэуэну хуейуэ къывжиІэмэ, сыт фщІэ хъунур? Фэ ар хуэвгъэуш хъунущ зэхуэсым и нэхъыжьхэм захуигъэзэну. Абы псым зыщІигъэуэну хуэхьэзыррэ хуэмыхьэзыррэ абыхэм зэхагъэкІынущa. Псым зыщІигъэуа иужь фи сабийм, Хьисэ и лъэужь ирикІуэ дэтхэнэ зыми хуэдэу, адэкІи Иеговэ теухуауэ иІэ щІэныгъэр псэухукІэ хигъэхъуэнущ (Рим 11:33, 34).
СИ САБИЙМ СЫТ ХУЭДЭ ЩІЭНЫГЪЭ ЗРИГЪЭГЪУЭТМЭ НЭХЪЫФІ?
10, 11. 1) Сыт хуэдэ гупсысэкІэ яІэ языныкъуэ адэ-анэхэм? 2) Сыт адэ-анэхэм зыщагъэгъупщэн хуэмейр?
10 Языныкъуэ адэ-анэхэм ябж я сабийм псым зыщІигъэуэн ипэ еджапІэ гуэр къиухыу, лэжьыгъэ тэмэм къигъуэтмэ нэхъыфІу. Абыхэм я быныр фІы хуагъэзэн ягугъэу апхуэдэу егупсысынкІэ хъунущ, ауэ ахэр зэупщІыжын хуейщ: «Си сабийм ехъулІэныгъэ иІэн щхьэкІэ ар пэжу сэбэп хуэхъуну пІэрэ? Библием дызыхуригъаджэм техуэу пІэрэ ар? Абы теухуауэ Алыхьым и Псалъэм сыт хуэдэ чэнджэщ къыдитыр?» (Къеджэ Экклезиаст 12:1b.)
11 Зыщыдгъэгъупщэ хъунукъым: мы дунеймрэ абы и еплъыкІэмрэ техуэкъым Иеговэ зыхуеймрэ абы и гупсысэкІэмрэ (Екъуб 4:7, 8; 1 Ин. 2:15—17; 5:19). ШейтІаным, абы и дунейм икІи дунейм и гупсысэкІэм сабийхэр щызыхъумэфынур езыхэмрэ Иеговэрэ я зэхуаку дэлъ зэныбжьэгъугъэращ. Адэ-анэхэм я сабийхэм дежкІэ щІэныгъэ зэгъэгъуэтыныр икІи лэжьыгъэр псом нэхъапэу ябжу щытмэ, сабийм игугъэнкІэ хъунущ а псор Иеговэрэ езымрэ я зэхуаку дэлъ зэхущытыкІэм нэхърэ нэхъапэу. Зи сабийхэр фІыуэ зылъагъу адэ-анэхэм яхуейуэ пІэрэ насыпыр зэлъытам теухуауэ ШейтІаным и дунейм и гупсысэкІэм хуэдэ яІэ хъуну? ЕхъулІэныгъэ уиІэну икІи насыпыфІэ дыдэ ухъуну Іэмал закъуэщ щыІэр — Иеговэ уи гъащІэм псом япэ иту щытмэщ. (Къеджэ Псалом 1:2, 3c.)
СИ САБИЙМ ГУЭНЫХЬ ИЩІЭМЭ-ЩЭ?
12. Сыт языныкъуэ адэ-анэхэм я сабийхэм псым зыщІамыгъауэу зэман гуэр дагъэкІмэ, нэхъыфІу щІалъытэр?
12 Ди зы шыпхъу гуэрым жиІэжащ ар щІыхуэмеяр и пхъум псым зыщІигъэуэну. Шыпхъур къыддогуашэ: «ЖысІэжынуи сроукІытэж, ауэ псом япэ сызыгъэгузавэу щытар ар зэхуэсым зэрыхагъэкІынкІэ хъунырат». А шыпхъум хуэдэу языныкъуэ адэ-анэхэм я гугъэщ «делагъэм сабиигур» щыдихьэх ныбжьым икІыхукІэ абы псым зыщІимыгъауэмэ нэхъыфІу (Прит. 22:15, Гъэс.; ЩІэдз. 8:21). Ахэр егупсысыфынущ: «Си сабийм псым зыщІигъэуауэ щымытмэ, ар зэхуэсым хагъэкІынукъым». Ауэ сыт апхуэдэу уегупсысыну щІэмытэмэмыр? (Екъуб 1:22).
13. ЦІыхум псым зыщІимыгъэуауэ щытмэ, Алыхьым и пащхьэм жэуап щимыхьу жыпІэ хъуну? КъыдгурывгъаІуэ.
13 ДауикІ, адэ-анэхэр хуейкъым я сабийхэм я гъащІэр Иеговэ и ІэмыщІэ иралъхьэну щыхуэхьэзыр ныбжьым нэмысауэ псым зыщІагъэуэну. Ауэ щыуагъэщ уегупсысыну, цІыхум псым зыщІимыгъэуауэ щытмэ, Алыхьым и пащхьэм жэуап щимыхьу. Сыт щхьэкІэ? Дэ псым зэрызыщІэдгъэуаракъым тщІа ІуэхухэмкІэ Иеговэ и пащхьэм жэуап щІэтхьыр. Сабийм Алыхьым и пащхьэм жэуап щихьын щІедзэ Иеговэ ифІэфІымрэ ифІэмыфІымрэ къыгурыІуэу щІидза иужь. (Къеджэ Екъуб 4:17.) Аращи, адэ-анэхэм я сабийхэм псым зыщІыщІамыгъэуэн щхьэусыгъуэ къыхуагупсыс нэхърэ, езыхэм щапхъэфІ ягъэлъэгъуэну хущІэкъумэ нэхъыфІщ. Іущагъ зыбгъэдэлъ адэ-анэхэм сабийр щыцІыкІум щыщІэдзауэ Алыхьым и хабзэхэр фІыуэ илъагъуну хуагъасэ (Лк. 6:40). Абы ар гуэныхьым щихъумэнущ, сыт щхьэкІэ жыпІэмэ абы езым къару ирихьэлІэнущ Иеговэ и мурадым тету псэун щхьэкІэ (Ис. 35:8).
НЭГЪУЭЩІХЭР ДАУЭ ДЭІЭПЫКЪУЭГЪУ ЗЭРЫХЪУФЫНУР?
14. Сабийхэм псым зыщІагъэуэну зыхуагъэхьэзырын щхьэкІэ дэІэпыкъу адэ-анэхэм, дауэ зэхуэсым и нэхъыжьхэр сэбэп зэрахуэхъуфынур?
14 Зэхуэсым и нэхъыжьхэр адэ-анэхэм дэІэпыкъуфынущ, сабийхэм Алыхьым хуэлэжьэн щхьэкІэ мурад ягъэув хъунухэр щабэу жраІэу щытмэ. Ди зы шыпхъум игу къегъэкІыж илъэсих фІэкІа щымыхъум щыгъуэ Расселл къызэрепсэлъауэ щытар. Абы жеІэж: «Алыхьым нэхъыбэу сыхуэлэжьэн щхьэкІэ мурад сиІэхэм теухуауэ дакъикъэ 15-кІэ ар къызэпсэлъащ» Сыт абы кърикІуар? ИужькІэ ар илъэс 70-м щІигъукІэ пионеру лэжьащ! Пэжщ, псалъэ гуапэхэмрэ щытхъумрэ цІыхум илъэс куэдкІэ къару къыхалъхьэфынущ (Прит. 25:11, Гъэс.). Абы нэмыщІ зэхуэсым и нэхъыжьхэм адэ-анэхэр, я сабийхэм я гъусэу, дыщызэхуэс Унэхэм щылэжьэну хуагъэушыфынущ, сабийхэм яхуэгъэзэщІэн къалэнхэр иратурэ.
15. Зэхуэсым щыщ къуэш шыпхъухэр дауэ ныбжьыщІэхэм зэрыдэІэпыкъуфынур?
15 Зэхуэсым щыщхэр дауэ дэІэпыкъуэгъу зэрыхъуфынур? НыбжьыщІэхэм гулъытэ хуэфщІ икІи ехъулІэныгъэ яІэхэм щхьэкІэ фыщытхъу. Псалъэм папщІэ, сабийм ущытхъу хъунущ и гум къыбгъэдэкІыу зэхуэсым жэуап щитамэ, зэІущІэм и пащхьэм Библием щыщ пычыгъуэ къеджамэ е Алыхьым и псалъэм тегъэщІа демонстрацие игъэлъэгъуамэ. Абы нэмыщІ, ар школым зыгуэрым хъыбарыфІымкІэ дэгуэшауэ е гъэунэхуапІэ пэщІэхуа иужь унафэ тэмэм ищІауэ къыщІэкІынщ. Апхуэдэу щытмэ, кІыхьлІыхь зывмыщІу фыщытхъу. ЗэІущІэм ипэ е иуха иужь, сабий гуэрым ди гум къыбгъэдэкІыу гулъытэ хуэтщІу депсэлъэну мурад дгъэув хъунукъэ? Абы и фІыгъэкІэ сабийхэм «зэхуэсышхуэм» зэрыщыщыр зыхащІэнущ (Пс. 35:18).
ФИ САБИЙХЭМ ПСЫМ ЗЫЩІАГЪЭУЭНУ ЗЫХУАГЪЭХЬЭЗЫРЫНУ ФАДЭІЭПЫКЪУ
16, 17. 1) Сыт сабийхэм псым зыщІагъэуэну мыхьэнэшхуэ щІиІэр? 2) Дэтхэнэ зы адэ-анэми сыт хуэдэ гуфІэгъуэ зыхищІэну хуей? (Статьям ипэм ит сурэтым феплъ.)
16 Адэ-анэхэм я сабийхэм Иеговэ фІыуэ ялъагъуу ягъэсэну щІыхьышхуэ зыпылъ я къалэн нэхъыщхьэщ (Пс. 127:3; Еф. 6:4). Япэм, израил цІыхухэм сабийр къызэралъхуу, ар Алыхьым и лъэпкъым щыщ хъут. Ауэ ди зэманым апхуэдэу щыткъым. Абы нэмыщІ адэ-анэхэм Иеговэрэ абы къыбгъэдэкІ пэжымрэ фІыуэ зэралъагъум щхьэкІэ я бынхэми апхуэдэ лъагъуныгъэ яІэну къикІкъым. Сабийр дунейм къызэрытехьэу адэ-анэхэм мурад ягъэувын хуейщ абы Хьисэ и лъэужь ирикІуэ хъун щхьэкІэ икІи и гъащІэр Иеговэ и ІэмыщІэ ирилъхьэу псым зыщІигъэуэн щхьэкІэ дэІэпыкъуну. Абы нэхърэ нэхъапэ щыІэ? ЦІыхум и гъащІэр Иеговэ и ІэмыщІэ ирилъхьэмэ, псым зыщІигъауэмэ икІи Алыхьым пэжу хуэлажьэмэ, Іэмал иІэ хъунущ гузэвэгъуэшхуэ зэманым къелыну (Мт. 24:13).
Адэ-анэхэм я мурад нэхъыщхьэр — я сабийр Хьисэ и лъэужь ирикІуэ хъуну дэІэпыкъуныращ. (16, 17-нэ абзацхэм феплъ.)
17 Блоссом Брандт псым зыщІигъэуэну мурад щищІам щыгъуэ, абы и адэ-анэр хуейт зэхагъэкІыну ар а мыхьэнэшхуэ зиІэ лъэбакъуэм хуэхьэзыррэ хуэмыхьэзыррэ. Я пхъур абы зэрыхуэхьэзырыр къагурыІуа иужь, мурад ищІар даІыгъащ. Блоссом псым зыщІигъэуэн ипэ къихуэ пщыхьэщхьэм и адэм ищІар жеІэж: «Зэрыунагъуэу лъэгуажьэмыщхьэу дыувыну къыдэлъэІури абы Алыхьым лъэІукІэ зыхуигъэзащ. Абы Иеговэ жриІащ и пхъу цІыкІум и гъащІэр абы и ІэмыщІэ ирилъхьэну мурад зэрищІам щхьэкІэ хуабжьу зэрыгуфІэр». Илъэс 60 нэхърэ нэхъыбэ дэкІауэ щытми, а пщыхьэщхьэм къэхъуар Блоссом и гум къинэжащ. Адэ-анэ лъапІэхэ, дэ дыхуейт фи сабийм и гъащІэр Иеговэ и ІэмыщІэ ирилъхьэу, псым зэрызыщІигъэуам щхьэкІэ фэри гуфІэгъуэшхуэ зыхэфщІэну!
a Адэ-анэхэм я сабийхэм я гъусэу «Уи упщІэхэм я жэуапхэр» жыхуиІэ тхылъым и етІуанэ томым 304—310 напэкІуэцІхэм ит чэнджэщыфІхэр зэпкърах хъунущ. Абы нэмыщІ феплъ 2011 гъэм, мэлыжьыхьым къыдэкІа «Наше священное служением» и 2-нэ напэкІуэцІым ит «Ящик вопросов» рубрикэм.
b Экклезиаст 12:1: «Псори къэзыгъэщІа уи Алыхь лъапІэр уи щІалэгъуэм уигу игъэлъ, зэман гугъухэр къэмыс щІыкІэ икІи „Абыхэм гуфІэгъуэ къысхуахьыжкъым“ зыхужыпІэну илъэсхэр къэмыблагъэ щІыкІэ».
c Псалом 1:2, 3: «Ауэ ар Иеговэ и хабзэхэм ирогушхуэ икІи жэщи махуи и хабзэхэм макъкІэ йоджэ. Псыежэхым и Іуфэм хаса, пхъэщхьэмыщхьэр и зэманым къызыпыкІэ, зи тхьэмпэхэр мыгъуж жыгым хуэдэнущ ар. Сыт имыщІэми, абы ехъулІэныгъэ иІэнущ».