Нухь, Даниил, Іэиуб сымэ я фІэщхъуныгъэмрэ жыІэдаІуэныгъэмрэ щапхъэ тефх

1, 2. 1) Нухь, Даниил, Іэиуб сымэ я щапхъэр зэпкърытхмэ сыткІэ къыддэІэпыкъуну? 2) Иезекииль 14:14 ит псалъэхэр сыт хуэдэ зэманым ятхат?

ИДЖЫПСТУ уэ уи узыншагъэм, ахъшэ къэлэжьыным е Алыхьым узэрыхуэлажьэм щхьэкІэ къызэрыппэщІэувэм пыщІа гугъуехьхэр уиІэу къыщІэкІынщ. Абы нэмыщІ хъыбарыфІыр щыбгъэІукІэ гуфІэгъуэр пхъумэну тынш хъункъым. Апхуэдэ гугъуехьхэм упэлъэщыну къыбдэІэпыкъунущ Нухь, Даниил, Іэиуб сымэ я щапхъэр зэпкърыпхмэ. Абыхэми гуэныхь яхэлът икІи дэ диІэ гугъуехьхэм хуэдэ ахэри пэщІэхуэт. Я гъащІэр яфІэкІуэдынкІэ шынагъэ щыщыІи къэхъут. Ауэ сыт къэмыхъуами, ахэр Алыхьым хуэпэжу къэнащ икІи фІэщхъуныгъэмрэ жыІэдаІуэныгъэмрэ теухуауэ щапхъэфІ къытхуагъэнащ. (Къеджэ Иезекииль 14:13, 14a.)

² Мы статьяр зытегъэщІа пычыгъуэм ит псалъэхэр ди эрэм ипэ 612 гъэм Иезекииль Бабилэн щІыналъэм щитхащ (Иез. 1:1; 8:1)b. Алыхьым зэрыжиІам хуэдэу, Ерусалимыр щызэтракъутэну гъэр къэблагъэт. Ар къэхъуащ ди эрэм ипэ 607 гъэм. Абы щыгъуэ къелахэр мащІэщ — Нухь, Даниил, Іэиуб сымэ щапхъэ тезыхахэращ (Иез. 9:1—5). Абыхэм ящыщт Иеремие, Варух, Авдемелех икІи рехавитхэр.

3. Сыт мы статьям щызэпкърытхынур?

³ Дэ дыщыпсэу дунейр и кІэм хуокІуэ, икІи къелынухэр Нухь, Даниил, Іэиуб сымэ хуэдэу, Алыхьым цІыху пэжу илъытэхэращ (Апок. 7:9, 14). Девгъэплъ Иеговэ ахэр цІыху пэжу щІилъытам икІи ахэр щапхъэу къыщІытхуихьам и щхьэусыгъуэм. Дэ дытепсэлъыхьынущ: 1) сыт хуэдэ гугъуехьхэм дэтхэнэ зыри пэщІэхуами икІи 2) абыхэм я фІэщхъуныгъэмрэ жыІэдаІуэныгъэмрэ щапхъэ зэратетхыфынум.

НУХЬ АЛЫХЬЫМ ХУЭПЭЖУ ИКІИ ХУЭЖЫІЭДАІУЭУ ИЛЪЭС ЩИБГЪУКІЭ ЩЫТАЩ!

4, 5. Сыт хуэдэ гугъуехьхэм Нухь пэщІэхуа? Абы теубыдагъэ хэлъам теухуауэ сыт ффІэгъэщІэгъуэн хъуар?

⁴ Нухь зыпэщІэхуа гугъуехьхэр. Нухь и адэшхуэм и адэ Инус и зэманым щІылъэм бзаджагъэр тез хъуат. Уеблэмэ, Иеговэ теухуауэ абыхэм «псалъэ Іейхэр» жаІэт (Иудэ 14, 15). Дунейр кІуэ пэтми гущІэгъуншэ хъут, икІи Нухь и зэманым щІылъэр «ем зэщІищтат». Алыхьым пэщІэува мелыІычхэм цІыху Іэпкълъэпкъ защІри, щІылъэм щыпсэу цІыхубзхэр «я фызхэу, щхьэж къызэрыхихкІэ» къащтащ. Абыхэм къуэ къалъхухэр егъэлеяуэ гущІэгъуншэхэт (ЩІэдз. 6:2—4, 11, 12). Ауэ Нухь абыхэм ещхьтэкъым. Библием щыжеІэ: «Зиусхьэныр нэфІкІэ къеплъащ Нухь». Ар «цІыху пэжу а зэманым псэу цІыхухэм яхэтащ; щыпкъагъэкІэ Тхьэм хуэпсэуащ» (ЩІэдз. 6:8, 9).

⁵ Мы псалъэхэм Нухь теухуауэ сыт къыдагъащІэр? Япэрауэ, Псыдзэшхуэр къэсын ипэ Нухь Алыхьым илъэс 70-80 хуэдизкъым зэрыхуэлэжьар (иджыпсту цІыхухэр апхуэдизрэщ зэрыпсэур). АтІэ, Алыхьым зи щІыб хуэзыгъэза дунейм, Нухь илъэс 600-кІэ Иеговэ хуэпэжу щыпсэуащ! (ЩІэдз. 7:11). ЕтІуанэрауэ, дэ дэлъытауэ, ар Иеговэ хуэпэжу къыхуэнэну хуэзыгъэушын зэхуэс абы щыгъуэ щыІэтэкъым, икІи и къуэш, и шыпхъу дыдэхэри абы и лъэныкъуэу щытауэ къыщІэкІынукъымc.

6. Нухь лІыгъэ хэлъу щытауэ сыт жыпІэ щІэхъунур?

⁶ Нухь къыгурыІуэт цІыхуфІу дунейм утетын къудейр зэрымащІэр. Абы лІыгъэ хэлъу Иеговэ фІэщхъуныгъэ хуиІэм теухуауэ цІыхухэм яжриІэт. Библием щыжыІащ ар «щыпкъагъэм и гъуэгум и хъыбарыр иІуатэу зэрыщытар» (2 Пет. 2:5). Апостол Паул Нухь щхьэкІэ мыпхуэдэу итхащ: «ФІэщхъуныгъэмкІэ дунейм и цІыхухэм я къуаншагъэр нахуэ яхуищІащ» (Евр. 11:7). Шэч хэмылъу, цІыхухэр абы щыдыхьэшхт, зэран хуэхъуну иужь итт. Абы нэмыщІ Іей гуэр иращІэну жаІэу ягъэшынэуи къыщІэкІынт. Ауэ ар цІыхухэм щышынакъым (Прит. 29:25, Гъэсэпэтхыдэхэр). Иеговэ Нухь лІыгъэ хилъхьащ. Ноби Алыхьым пэжу хуэлажьэхэм апхуэдэ лІыгъэ яхелъхьэ.

7. Нухь кхъухьышхуэр щищІым сыт хуэдэ гугъуехьхэм пэщІэхуа?

⁷ Нухь илъэс 500-кІэ Иеговэ хуэпэжу хуэлэжьа иужь, абы унафэ хуищІащ кхъухьышхуэ ищІыну, цІыхухэмрэ хьэкІэкхъуэкІэхэмрэ къригъэлын папщІэ (ЩІэдз. 5:32; 6:14). А къалэныр Нухь егъэлеяуэ гугъуу къыщыхъуауэ къыщІэкІынт икІи абы и щхьэусыгъуэр кхъухь лъагэшхуэр зэрищІынум и закъуэтэкъым. Абы къыгурыІуэт цІыхухэр нэхъ Іейуэ къызэрыщыдыхьэшхынур икІи къызэрыпэщІэувэнур. Ауэ Библием жеІэ: «ИгъэзэщІащ Нухь а псори; Тхьэм унафэ къызэрыхуищІам хуэдэу ищІащ». АбыкІэ абы къигъэлъэгъуащ Иеговэ хуэпэжу икІи хуэжыІэдаІуэу зэрыщытар (ЩІэдз. 6:22).

8. Нухь Алыхьым щыгугъыу зэрыщытар сытым къыхэщрэ?

⁸ Абы нэмыщІ Нухь и дежкІэ тынштэкъым и щхьэгъусэмрэ и бынхэмрэ зыхуей хуигъэзэну. Псыдзэшхуэр къэхъун ипэ цІыхухэм яшхын яІэн щхьэкІэ, гугъу ехьу щІым телэжьэн хуейт (ЩІэдз. 5:28, 29). Нухьи и унагъуэр зыхуей хуигъэзэн хуейми, абы Алыхьым хуэлэжьэныр къигъанэу, унагъуэр зыхуей хуэгъэзэныр ипэ иригъэщакъым. Нухь кхъухьыр илъэс 40-кІэ е 50-кІэ иухуами, ар Иеговэ хуэпэжу къэнащ. Псыдзэшхуэ нэужьми, ар илъэс 350-кІэ псэуащ икІи а зэманми Иеговэ псом ипэ иригъэщу щытащ (ЩІэдз. 9:28). Нухь фІэщхъуныгъэмрэ жыІэдаІуэныгъэмрэ теухуауэ икъукІэ щапхъэфІ дигъэлъэгъуащ!

9, 10. 1) Нухь и фІэщхъуныгъэмрэ жыІэдаІуэныгъэмрэ дауэ щапхъэ тетх хъуну? 2) Иеговэ и хабзэхэм утетмэ, сыт быдэу уи фІэщ пщІы хъунур?

⁹ Нухь и фІэщхъуныгъэмрэ жыІэдаІуэныгъэмрэ дауэ щапхъэ тетх хъуну? Дэ Нухь щапхъэ тыдох лІыгъэ тхэлъу Иеговэ и еплъыкІэхэр цІыхухэм яжетІэмэ, ШейтІаным и дунейм щыщ дымыхъумэ икІи Иеговэ хуэлэжьэныр ди гъащІэм псом ипэ идгъэщмэ (Мт. 6:33; Ин. 15:19). ДауикІ, апхуэдэ щытыкІэ диІэмэ, дэ мы дунейм фІыуэ дыкъилъагъунукъым. Псалъэм папщІэ, унагъуэр зэрыщытын хуейм икІи зинэ щІэным теухуауэ Иеговэ и хабзэхэм быдэу дызэрытетым щхьэкІэ, языныкъуэ къэралхэм цІыхухэм СМИ-р къагъэсэбэпу Іей къытхужаІэ. (Къеджэ Малахия 3:18d.) Дэ, Нухь хуэдэу, Иеговэщ дызыщышынэр, цІыхухэракъым. Дэ дощІэ: Иеговэ закъуэщ гъащІэ мыухыжыр цІыхухэм езытыфынур (Лк. 12:4, 5).

¹⁰ ФызэупщІыж: «Къысщыдыхьэшхыу икІи Іей къысхужаІэу щытми, адэкІэ Алыхьым и лъэныкъуэр сІыгъыну пІэрэ? АхъшэкІэ гугъу сехьу щІэздзэмэ, си унагъуэр зыхуей хуэзгъэзэну Иеговэ адэкІи къызэрыздэІэпыкъунур си фІэщ хъурэ?» Нухь и фІэщхъуныгъэмрэ жыІэдаІуэныгъэмрэ щапхъэ тефх. Абы щыгъуэ фэ шэч къытевмыхьэми хъунущ, Иеговэ Іэмал имыІэу къызэрывдэІэпыкъуным (Флп. 4:6, 7).

ДАНИИЛ АЛЫХЬЫМ ХУЭПЭЖУ ИКІИ ХУЭЖЫІЭДАІУЭУ ЩЫТАЩ, ТХЬЭНЭПЦІХЭР ЩАГЪЭЛЪАПІЭ КЪАЛЭМ ЗЭРЫЩЫПСЭУАМ ЕМЫЛЪЫТАУЭ

11. Даниилрэ абы и ныбжьэгъуищымрэ Бабилэным щашам сыт хуэдэ гугъуехьхэм пэщІэхуа? (Статьям ипэм ит сурэтым феплъ.)

¹¹ Даниил зыпэщІэхуа гугъуехьхэр. Тхьэ нэпцІ гъэлъэпІэнымрэ Іэзэгъуазэмрэ зэщІищта Бабилэным Даниил залымыгъэкІэ яшат. Бабилэным щыпсэухэм журтхэр фІыуэ ялъагъутэкъым, ахэр ауан ящІт, я Алыхь Иегови щыдыхьэшхт (Пс. 137:1, 3). Даниили Алыхьым хуэпэж адрей журтхэми а псор хуабжьу я гум щІыхьэу къыщІэкІынт. Абы нэмыщІ Даниилрэ абы и ныбжьэгъуищ — Анание, Мисаил, Азарие сымэ ящІэнум псори кІэлъыплът, сыт щхьэкІэ жыпІэмэ, ахэр Бабилэным и пащтыхьым хуэлэжьэн щхьэкІэ ирагъэджэн хуейуэ щытт. ИкІи абыхэм сыт ящІэнуми яшхынуми и унафэр ящІат. Абыхэм Иеговэ и лъэпкъым ишхын хуэмейуэ унафэ хуищІа ерыскъыр къратт. Ауэ Даниил Алыхьым къабзэу хуэлэжьэн щхьэкІэ и гум ирилъхьат «пащтыхьым и шхыныгъуэмрэ и шагъырымрэ» зыІуимылъхьэну (Дан. 1:5—8, 14—17).

12. 1) Сыт хуэдэ цІыхуу щыта Даниил? 2) Дауэ Иеговэ Даниил зэрыхущытар?

¹² Даниил нэгъуэщІ гъэунэхуапІи иІащ, ауэ ар, япэщІыкІэ, гугъуу къыпщымыхъункІэ хъунущ. Ар цІыху акъылыфІэти, куэд дзыхь хуащІат (Дан. 1:19, 20). Даниил пагэ хъуфынут, ауэ абы Іэдэбагъ хэлът икІи и зэфІэкІыр здынэсыр ищІэжт. Даниил щІыхь зыхуригъэщІыну иужь иттэкъым, абы зэфІэкІ иІэхэр Иеговэ и фІыщІэу зэрыщытыр сыт щыгъуи къыхигъэщт (Дан. 2:30). ГъэщІэгъуэнщ, Иеговэ Нухьрэ Іэиубрэ я гъусэу Даниил щапхъэу къызэрихьар. Сыт щхьэкІэ жыпІэмэ, абы щыгъуэ Нухьи Іэиуби я гъащІэ псокІэ Алыхьым хуэпэжу хуэлэжьат, ауэ Даниил иджыри щІалэт. Иеговэ шэч къытрихьэтэкъым Даниил хуэпэжу къызэрынэным икІи ар лІэжыху Алыхьым хуэжыІэдаІуэу щытащ. Ар илъэсищэм нэблэгъауэ Алыхьым и мелыІычым абы гуапэу зыкъыхуигъазэри жиІащ: «Уэ, Даниил, цІыху лъапІэ» (Дан. 10:11).

13. Иеговэ Даниил увыпІэ лъагэ щІритам и зы щхьэусыгъуэр сыт хуэдэу къыщІэкІыну?

¹³ Иеговэ зэрыдэІэпыкъуам и фІыгъэкІэ Даниил увыпІэ лъагэ Бабилэнми Мидо-Персиеми щиІащ (Дан. 1:21; 6:1, 2). А увыпІэ лъагэр Иеговэ Даниил иритауэ къыщІэкІынщ и лъэпкъым дэІэпыкъун щхьэкІэ, Исуф Мысырым щыщыІам икІи Эсфиррэ Мардохейрэ Персием щыщыІам и лъэпкъым зэрыдигъэІэпыкъуам хуэдэу (Дан. 2:48)e. Фи нэгу къыщІэвгъэхьэт, гъэрыпІэм щыІэ журтхэр, Иезекииль я гъусэу, зэрыгуфІар Иеговэ и лъэпкъым зэрыдэІэпыкъур щалъагъум!

14, 15. 1) Даниил щыпсэуа зэманымрэ дэ дыщыпсэу зэманымрэ сыткІэ зэщхь? 2) Адэ-анэхэм Даниил и адэ-анэм сыткІэ щапхъэ трахыфыну?

¹⁴ Даниил и фІэщхъуныгъэмрэ жыІэдаІуэныгъэмрэ дауэ щапхъэ тетх хъуну? Нобэ дыщыпсэу дунейм мыхъумыщІагъэмрэ дин нэпцІымрэ тез хъуащ. ЦІыхухэр Бабилэн къалэшхуэм — дин нэпцІу дуней псом тетым я империем — и ІэмыщІэ илъщ. Библиер абы «жинхэм я унэкІэ» йоджэ (Апок. 18:2). Дэ хамэу икІи хэхэсу мы дунейм дыщопсэу. Абы къыхэкІкІэ цІыхухэм къагуроІуэ абыхэм дакъызэрыщхьэщыкІыр икІи абы щхьэкІэ ауан дащІ (Мк. 13:13). Ауэ а псом емылъытауэ, Даниил щапхъэ тедвгъэх икІи ди Алыхь Иеговэ нэхъ гъунэгъу зэрызыхуэтщІыным иужь дивгъэт. Ди гум пагагъэ имылъмэ, Алыхьым дедаІуэмэ икІи сыт и лъэныкъуэкІи абы дыщыгугъмэ, дэри абы и дежкІэ цІыху лъапІэу дыщытынущ (Агг. 2:7).

¹⁵ Адэ-анэхэм Даниил и адэ-анэм сыткІэ щапхъэ трахыфыну? Даниил мыхъумыщІагъэ зыщІэ цІыху бзаджэхэм яхэту Иудэм къыщыхъуащ. Ауэ абы емылъытауэ, щІалэ цІыкІум Иеговэ фІыуэ илъэгъуащ икІи ар нэхъыбэу зи фІыщІэр и адэ-анэм зэрагъэсарауэ къыщІэкІынущ (Прит. 22:6, Гъэс.). Даниил цІэ фІащам къыхощ и адэ-анэм Алыхьыр фІыуэ ялъагъуу зэрыщытар. Абы и цІэм «Си хеящІэр (судья) Алыхьыращ» къокІ. Адэ-анэхэ, фэри фи сабийхэм шыІэныгъэ фхэлъу адэкІи пэжыр ябгъэдэфлъхьэ. Зэи фи Іэр евмыхьэх! (Еф. 6:4). Сабийхэм я гъусэу Иеговэ фелъэІу, абы нэмыщІ фэ езыр Иеговэ фыщелъэІукІэ ахэри фи лъэІум хэвгъыхьэ. Иеговэ и хабзэр фи сабийхэм фІыуэ ялъагъуну зэревгъэсэным иужь фит икІи абы къару ефхьэлІэм фІыгъуэ къызэрыпэкІуэным шэч къытевмыхьэ (Пс. 37:5).

ІЭИУБ АЛЫХЬЫМ ХУЭПЭЖУ ИКІИ ХУЭЖЫІЭДАІУЭУ ЩЫТАЩ, КЪУЛЕЙУЭ ЩЫЩЫТАМИ И МЫЛЪКУР ЩЫФІЭКІУЭДАМИ

16, 17. Іэиуб сыт хуэдэ гъэунэхуапІэхэм пэщІэхуа: 1) къулейуэ икІи пщІэ къыхуащІу щыщытам? 2) и мылъкур щыфІэкІуэдам?

¹⁶ Іэиуб зыпэщІэхуа гугъуехьхэр. Іэиуб и гъащІэм зэхъуэкІыныгъэшхуэхэр къыхыхьат. Насыпыншагъэхэр къыщыщІын ипэ, ар щыпсэуа щІыпІэм абы нэхърэ нэхъ щІыхь зиІэ цІыху щыІакъым (Иов 1:3). Іэиуб мылъкушхуэ иІэт, цІэрыІуэт икІи пщІэ зыхуащІ цІыхут (Иов 29:7—16). Абы емылъытауэ Іэиуб псом нэхърэ нэхъыфІу зыкъилъытэжтэкъым икІи Алыхьыншэу псэуфыну егупсыстэкъым. Иеговэ абы и лэжьакІуэкІэ еджэт икІи абы щхьэкІэ мыпхуэдэу жиІэт: «Ар къуаншагъэ зыбгъэдэмылъ цІыху пэжщ, Алыхьым щошынэ икІи Іейм зыщедзей» (Иов 1:8).

¹⁷ Ауэ Іэиуб и гъащІэм зэуэ зихъуэжащ. Абы иІауэ хъуар фІэкІуэдат икІи къыщыщІа псом апхуэдизкІэ и гур ириудати, лІэну хуейт. Нобэ дэ дощІэ Іэиуб и гугъуехьхэр ШейтІаным къызэрыбгъэдэкІар. Абы жиІащ Іэиуб Иеговэ щІыхуэпэжыр ар къызэрихъумэмрэ и Іуэхухэр зэригъэкІуатэмрэ щхьэкІэу. (Къеджэ Иов 1:9, 10f.) Иеговэ ШейтІаным жиІа пцІыр гулъытэншэу къигъэнакъым. Алыхьым Іэиуб Іэмал иритащ ар и гум къыбгъэдэкІыу хуэпэжу зэрыхуэлажьэр игъэлъэгъуэну.

18. 1) Іэиуб Алыхьым хуэпэжу зэрыщытам теухуауэ сыт ффІэгъэщІэгъуэн хъуар? 2) Іэиуб и хъыбарым Иеговэ теухуауэ сыт къыдигъащІэр?

¹⁸ ШейтІаныр хуейт, Іэиуб зыпэщІигъэхуа гъэунэхуапІэхэмкІэ ар иригъэгупсысыну и гугъуехьу хъуар Алыхьым къыбгъэдэкІыу (Иов 1:13—21). Абы иужь Іэиуб и ныбжьэгъухэр къакІуэри псалъэ гуауэхэр къыжраІэурэ ягъэкъуаншэу щІадзащ. Абыхэм жаІэт Іэиуб Іей ищІахэм щхьэкІэ Алыхьым тезыр къытрилъхьауэ (Иов 2:11; 22:1, 5—10). Ауэ а псом емылъытауэ Іэиуб Алыхьым хуэпэжу къыхуэнащ. Пэжщ, Іэиуб и гур зэреудыхам щхьэкІэ Иеговэ хуэгъэзауэ зэмыгупсыса псалъэхэр жиІащ, ауэ Иеговэ къыгурыІуэт абы гугъуехь зэришэчыр (Иов 6:1—3). Иеговэ илъагъут Іэиуб абы зэремыпцІыжар. БзаджащІэр цІыху гуэрым теуэу ар щІым тридзэу зы удыным адрей удыныр къыкІэлъыкІуэу зэриукІым хуэдэу, ШейтІаным Іэиуб и ныбжьэгъу нэпцІхэм я псалъэ дыджхэмкІэ хиутэжами, Іэиуб Алыхьым хуэпэжу къэнащ. Абы и гугъуехьхэр щхьэщыкІа иужь, Иеговэ Іэиуб иІахэм нэхърэ тІукІэ нэхъыбэ иритыжащ, абы нэмыщІ и гъащІэм илъэс 140 хупищащ (Екъуб 5:11). Іэиуб лІэжыху Алыхьым хуэпэжащ. Дэнэ дэ ар щытщІэр? Мы статьяр зытегъэщІа пычыгъуэм ит псалъэхэр Иезекииль щитхар Іэиуб лІэуэ, лІэщІыгъуэ зыбжанэ дэкІа иужьщ.

19, 20. 1) Іэиуб и фІэщхъуныгъэмрэ жыІэдаІуэныгъэмрэ дауэ щапхъэ тетх хъуну? 2) Дауэ Иеговэ хуэдэу нэгъуэщІхэм гущІэгъу зэрахуэтщІыфынур?

¹⁹ Іэиуб и фІэщхъуныгъэмрэ жыІэдаІуэныгъэмрэ дауэ щапхъэ тетх хъуну? Дэ сыт хуэдэ Іуэхугъуэ дыпэщІэмыхуэми, Иеговэ сыт щыгъуи япэ идгъэщын хуейщ, абы сыт и лъэныкъуэкІи дзыхь хуэтщІын хуейщ икІи ди гум къыбгъэдэкІыу хуэжыІэдаІуэу дыщытын хуейщ. Іэиуб нэхърэ дэ щхьэусыгъуэ нэхъыбэ диІэщ апхуэдэу тщІэну. Фегупсысыт: дэ нобэ ШейтІанымрэ абы дыкъигъэпцІэн щхьэкІэ къигъэсэбэп Іэмалхэмрэ теухуауэ куэд дощІэ (2 Кор. 2:11). Библием, псом хуэмыдэу Иов тхылъым, къыдгурегъаІуэ гугъуехь дыпэщІэхуэну Алыхьым хуит щІищІым и щхьэусыгъуэр. Даниил бегъымбарым и тхылъым къыдегъащІэ: Алыхьым и Пащтыхьыгъуэр — пэжу щыІэ правительствэщ. Хьисэ Мэссихь абы и пащтыхьу щытщ (Дан. 7:13, 14). ИкІи дэ дощІэ а Пащтыхьыгъуэм куэд мыщІэу гугъуехьхэм кІэ къызэрыхуигъэкІуэнур.

²⁰ Абы нэмыщІ Іэиуб къыщыщІам дыхуегъасэ гугъуехьхэм пэщІэхуа ди къуэш, ди шыпхъухэм гущІэгъу яхуэтщІын зэрыхуейм. Псалъэм папщІэ, языныкъуэхэм, Іэиуб хуэдэу, емыгупсысауэ псалъэ жагъуэхэр жаІэнкІэ хъунущ (Эккл. 7:7). Дэ абыхэм ІейкІэ дегупсысын икІи дгъэкъуэншэн хуейкъым, абы нэхърэ нэхъыфІщ ахэр къыдгурыІуэу, гущІэгъу яхуэтщІмэ. Апхуэдэу тщІэмэ, фІыуэ дыкъэзылъагъу, гущІэгъу зыхэлъ ди Адэ Иеговэ щапхъэ тыдох (Пс. 103:8).

ИЕГОВЭ КЪАРУ КЪЫВИТЫНУЩ

21. 1 Петр 5:10 ит псалъэхэм дауэ дигу къагъэкІыжрэ Нухь, Даниил, Іэиуб сымэ я гъащІэм къыщыхъуар?

²¹ Нухь, Даниил, Іэиуб сымэ щыпсэуа лъэхъэнэри, зыпэщІэхуа гугъуехьхэри зэмыщхьми, ахэр гъэунэхуапІэ щихуам Алыхьым хуэпэжу къэнэну яхузэфІэкІащ. Абыхэм я гъащІэм дигу къегъэкІыж Петр итха псалъэхэр: «НэфІ щыхуэныгъэ псори зиІэ Тхьэм... зы мащІэкІэ гугъуехь фшэча нэужь... фыкъызэфІигъэувэжынущ, фигухэр игъэбыдэнурэ, фІэщхъуныгъэм и гъуэгум фыкъимыкІуэтыжу быдэу фытригъэтынущ» (1 Пет. 5:10).

22. КъыкІэлъыкІуэ статьям сыт дызытепсэлъыхьынур?

²² 1 Петр 5:10 ит псалъэхэр ди зэманми Алыхьым и лъэпкъым хуэгъэзащ. Петр и псалъэхэмкІэ Иеговэ дыкъегъэгугъэ къыддэІэпыкъуну икІи къарурэ теубыдагъэрэ къытхилъхьэну. Дэ псори дыхуейщ Иеговэ къару къытхилъхьэну икІи абы дыщыхуэлажьэкІэ теубыдагъэ диІэну къыддэІэпыкъуну. Аращи, Нухь, Даниил, Іэиуб сымэ я фІэщхъуныгъэмрэ жыІэдаІуэныгъэмрэ щапхъэ тедвгъэх. Абыхэм Иеговэ хуэпэжу къэнэну ящІыхузэфІэкІар, ар фІыуэ яцІыхуу зэрыщытаращ. КъыкІэлъыкІуэ статьям абы теухуауэ нэхъыбэ къэтщІэнущ. Нухь, Даниил, Іэиуб сымэ фІыуэ къагурыІуэт сыт Алыхьым къахуигъэувми (Прит. 28:5, Гъэс.). Дэри ар тхузэфІэкІынущ.