Дапхуэдэу Алыхьым дызэрелъэІун хуейр?

1, 2. ТхьэлъэІур — Иеговэ дэтхэнэ зыми къыдита тыгъэ лъапІэу жыпІэ щІэхъунур сыт? ТхьэлъэІум теухуауэ Библием итыр къэтщІэн щІыхуейр сыт?

ДУНЕИШХУЭМ елъытауэ щІыр цІыкІуу, абы щыпсэу цІыхухэри нэхъ цІыкІужу къыпщохъу. Библием зэрыжиІэмкІэ, Иеговэ и дежкІэ цІыху лъэпкъхэр зы псы ткІуэпс цІыкІум хуэдэщ (Псалом 115:15; Исаия 40:15). Ауэ Псалом 145:18, 19 щыжыІащ: «Иеговэ къезыджэ псоми япэгъунэгъущ, пэжым тету къезыджэ псоми. Абы фІэлІыкІхэм я гухэлъхэр яхуищІэнущ, и дэІэпыкъуэгъум хуэныкъуэхэм я макъыр зэхихынущ икІи къригъэлынущ». Сыту насып Иеговэ тхьэлъэІукІэ зыхуэдгъэзэну Іэмал дызэриІэр! Дунеишхуэр къэзыгъэщІа Алыхьыр ди ныбжьэгъуу щытыну икІи ди тхьэлъэІухэм едэІуэну хуейщ. ТхьэлъэІур — Иеговэ дэтхэнэ зыми къыдита тыгъэ лъапІэщ.

² Ауэ Иеговэ дэ дыщызэхихынур езыр зэрыхуейм хуэдэу делъэІумэщ. Абы къыхэкІкІэ тхьэлъэІум теухуауэ Библием итыр къэтщІэн хуейщ.

ИЕГОВЭ ТХЬЭЛЪЭІУКІЭ ЗЫЩІЫХУЭДГЪЭЗЭН ХУЕЙР СЫТ?

3. Алыхьым тхьэлъэІукІэ зыщІыхуэдгъэзэн хуейр сыт?

³ Иеговэ хуейщ дэ абы депсэлъэну. Дэнэ дэ ар щытщІэр? Филиппи 4:6, 7 укъеджэну дынолъэІу. Уи нэгу къыщІэгъэхьэт: дуней псор къэзыгъэщІа Алыхьым уэ укъыфІэІуэхущ икІи ар хуейщ уи гурыщІэхэри уи гугъуехьхэри абы бгъэдэплъхьэну.

4. ЩІэх-щІэхыурэ Иеговэ тхьэлъэІукІэ зэрызыхуэдгъазэр дауэ ди зэныбжьэгъугъэм сэбэп зэрыхуэхъур?

⁴ ТхьэлъэІум и фІыгъэкІэ дэ Иеговэ ныбжьэгъу дыхуэхъуфынущ. Зэныбжьэгъухэр я гупсысэхэмкІэ, я гурыщІэхэмкІэ, зыгъэгузавэмкІэ щІэх-щІэхыурэ зэрызэдэгуашэм я ныбжьэгъугъэр нэхъ быдэ ещІ. Иеговэ и гупсысэхэр, и гурыщІэхэр икІи къэкІуэну зэманым ищІэну зигъэхьэзырыр Библием къыщыпхузэІуихащ. Уэри уи гум илъ псори Алыхьым жепІэ хъунущ икІи абы фи зэныбжьэгъугъэр нэхъ быдэ ищІынущ (Екъуб 4:8).

СЫТ ДЭ ТЩІЭН ХУЕЙР АЛЫХЬЫМ ДИ ТХЬЭЛЪЭІУХЭР ЗЭХИХЫН ЩХЬЭКІЭ?

5. Иеговэ тхьэлъэІу псоми зэремыдаІуэр дэнэ дэ щытщІэр?

⁵ Иеговэ тхьэлъэІу псоми едаІуэу пІэрэ? Хьэуэ, едаІуэкъым. Бегъымбар Ешайа щыпсэуа зэманым Иеговэ израил цІыхухэм яжриІат: «Фэ куэдрэ фыкъызэлъэІуми, сэ сынывэдаІуэкъым. Фэ фи Іэхэр лъы защІэщ» (Исаия 1:15). Иеговэ илъагъу мыхъу икІи абы пэжыжьэ дыхуэзыщІын Іуэху дэ длэжьын хуейкъым. Армыхъумэ ди тхьэлъэІухэм къедэІуэн абы щигъэтынущ.

6. Сыт фІэщхъуныгъэ быдэ уиІэным мыхьэнэшхуэ щІиІэр? ФІэщхъуныгъэ быдэ узэриІэм сыт щыхьэт техъуэн хуейр?

⁶ Дэ Алыхьыр быдэу ди фІэщ хъун хуейщ, ар ди тхьэлъэІухэм къедэІуэн щхьэкІэ (Марк 11:24). Апостол Паул къыдгурегъаІуэ: «ЦІыхум фІэщхъуныгъэ имыІэмэ, Тхьэм игу ирихьынукъым; Тхьэм пэгъунэгъу хъуну хуей дэтхэнэми Тхьэр зэрыщыІэмкІи Тхьэм и гъуэгум лъыхъуэхэм я ІыхьэфІыр зэралъигъэсымкІи фІэщхъуныгъэ иІэн хуейщи» (Еврейхэм 11:6). «ФІэщхъуныгъэ сиІэщ» жыпІэкІэ зэфІэкІкъым, атІэ абы щыхьэт техъуэ Іуэхухэр бгъэлъэгъуэн хуейщ. (Къеджэ Екъуб 2:26.)

7. 1) Алыхьым тхьэлъэІукІэ зыщыхуэдгъазэкІэ ди зэфІэкІыр здынэсыр тщІэжу икІи пщІэ тхэлъу щІыщытын хуейр сыт? 2) ТхьэлъэІур ди гум къызэрыбгъэдэкІыр сыт къызыхэщынур?

⁷ Алыхьым тхьэлъэІукІэ зыщыхуэдгъазэкІэ ди зэфІэкІыр здынэсыр зэрытщІэжыр икІи пщІэ зэрытхэлъыр къыхэщын хуейщ. Пащтыхьым е президентым апхуэдэут дызэрепсэлъэнур, пэжкъэ? Иеговэ — псори зыхузэфІэкІ Алыхьщ. ПщІэ хуэпщІыну псом хуэмыдэу къэзылэжьыр, дауикІ, аращ (ЩІэдзапІэ 17:1; Псалом 138:6). Абы нэмыщІ тхьэлъэІур ди гум къыбгъэдэкІыу щытын хуейщ. ГукІэ зэбгъащІэу тхьэлъэІум и псалъэхэр къытебгъэзэжурэ жыпІэныр къезэгъкъым (Маттэ 6:7, 8).

8. Алыхьым зыгуэркІэ делъэІумэ, дэри ди лъэныкъуэкІэ сыт тщІэн хуейр?

⁸ Зыгуэр щхьэкІэ Алыхьым уелъэІумэ, уэри уи къару епхьэлІэн хуейщ. Иеговэ абыкІэ къыпщыгугъыу жыпІэ хъунущ. Псалъэм папщІэ, махуэ къэс узыхуэныкъуэ гуэрхэм щхьэкІэ Иеговэ ущелъэІум деж, уэ езым зыри умыщІэу, Алыхьым псори хьэзыру къыуитыну ущыгугъ хъунукъым. Уи къарум къихь сыт хуэдэ лэжьыгъэри бгъэзэщІэну ухьэзыру ущытын хуейщ (Маттэ 6:11; 2 Фессалоникэ 3:10). Иджыри зы щапхъэ: уэ гуэныхь гуэр къэбгъэнэн щхьэкІэ Алыхьыр къыбдэІэпыкъуну ухуейщ. Абы щыгъуэм, дауикІ, уэ зыпыІубдзын хуейщ а гуэныхьым ухуэзышэфыну Іуэхугъуэхэм (Колоссэ 3:5). Иджы тхьэлъэІум теухуа упщІэ зыбжанэ зэпкърытхынщ.

ТХЬЭЛЪЭІУМ ТЕУХУА УПЩІЭХЭР

9. Хэт тхьэлъэІукІэ зызыхуэдгъэзэн хуейр? Иуан 14:6 итым тепщІыхьмэ, хэт и цІэкІэ дэ Иеговэ зэрызыхуэдгъэзэн хуейр?

⁹ Хэт тхьэлъэІукІэ зызыхуэдгъэзэн хуейр? Хьисэ и гъэсэнхэр иригъаджэт «Адэ лъапІэу уафэм щыІэм» тхьэлъэІукІэ зыхуагъэзэну (Маттэ 6:9). Абы нэмыщІ Хьисэ жиІащ: «Гъуэгури, щыпкъагъэри, гъащІэри сэращ... Си гъуэгу иримыкІуэмэ, Адэ лъапІэм деж зы цІыхуи кІуэн лъэкІынукъым» (Иуан 14:6). Мы псалъэхэм къызэрагъэлъагъуэмкІэ, тхьэлъэІукІэ зызыхуэдгъэзэн хуейр Иеговэ закъуэщ икІи Хьисэ Мэссихь и цІэкІэщ. Хьисэ Мэссихь и цІэкІэ Алыхьым зыхуэбгъэзэным къикІыр сыт? Абы къикІыр Алыхьым и мурадыр гъэзэщІа хъун щхьэкІэ Хьисэ игъэзащІэ къалэныр къыбгурыІуэныращ. Хьисэ щІылъэм къыщІэкІуар гуэныхьымрэ лІэныгъэмрэ дакъыІэщІихын щхьэкІэщ (Иуан 3:16; Рим 5:12). Абы нэмыщІ Иеговэ ар дин пашэшхуэу тригъэуващ икІи хьэкум щІыныр и пщэм дилъхьащ (Иуан 5:22; Еврейхэм 6:20).

10. Алыхьым дапхуэдэу дызэрелъэІун хуейр?

¹⁰ Алыхьым дапхуэдэу дызэрелъэІун хуейр? Библием жиІэкъым Алыхьым зыщыхуэбгъазэм деж Іэмал имыІэу ущысын, узэфІэтын е лъэгуажьэмыщхьэу ущытын хуейуэ. Иеговэ и дежкІэ мыхьэнэшхуэ зиІэр пщІэ пхэлъыныращ икІи уи гур къабзэу щытыныращ (1 Летопись 17:16; Неемия 8:6; Даниил 6:10; Марк 11:25). Алыхьым тхьэлъэІукІэ зыхуэбгъэзэн щхьэкІэ щІыпІэ хэха е зэман хэха ухуейкъым икІи макъкІэ жыпІэм нэмыщІ, уигукІэ жыпІэри Иеговэ зэхех (Неемия 2:1—6).

11. ТхьэлъэІум сыт хэдгъэхьэ хъунур?

¹¹ ТхьэлъэІум сыт хэдгъэхьэ хъунур? Алыхьым и мурадым пэщІэмыувэ псори тхьэлъэІум хэбгъэхьэ хъунущ. Библием щыжыІащ: «Тхьэр зэрыхуейм тету Іуэхугъуэ гуэркІэ делъэІумэ, дызэрызэхихынур дощІэ» (1 Иуан 5:14). Уи щхьэм щхьэкІэ Алыхьым уелъэІу хъуну? Хъунущ. Иеговэ хуейщ дэ абы псори бгъэдэтлъхьэну, ди ныбжьэгъуфІым псори дзыхь зэрыхуэтщІым хуэдэу. Алыхьым тхьэлъэІукІэ зыщыхуэбгъазэкІэ уи гупсысэхэмрэ уи гурыщІэхэмрэ уриукІытэн хуейкъым (Псалом 62:8). Пэжым тету упсэун щхьэкІэ Иеговэ и къару лъапІэр къыуитыну уелъэІу хъунущ (Лука 11:13). Унафэ пэж пщІын щхьэкІэ Іущагъ къыуитыну, уи гугъуехьхэм узэрыпэлъэщын къаруи къыуитыну Алыхьым уелъэІу хъунущ (Екъуб 1:5). Иджыри мыхьэнэшхуэ иІэщ уи гуэныхьхэр Иеговэ къыпхуигъэгъуну уелъэІуным (Ефес 1:3, 7). Абы нэмыщІ уи унагъуэм е зэхуэсым щыщхэм щхьэкІи уелъэІун хуейщ (Апостолхэм 12:5; Колоссэ 4:12).

12. Ди тхьэлъэІум япэ дыдэу сыт хэдгъэхьэн хуейр?

¹² Ди тхьэлъэІум япэ дыдэу сыт хэдгъэхьэн хуейр? Иеговэрэ абы и мурадыр гъэзэщІа хъунымрэ пыщІа упщІэхэращ. Алыхьым къытхуищІэ псом щхьэкІэ ди гум къыбгъэдэкІыу фІыщІэ хуэтщІын хуейщ (1 Летопись 29:10—13). Аращ Хьисэ щІылъэм щыщыІам и гъэсэнхэр зыхуригъаджэу щытар. (Къеджэ Маттэ 6:9—13.) Япэрауэ, ахэр елъэІун хуейт Алыхьым и цІэр гъэлъэпІа хъуну. ЕтІуанэрауэ, Алыхьым и Пащтыхьыгъуэр къакІуэу, Иеговэ зыхуейр щІылъэм гъэзэщІа щыхъуну елъэІун хуейт. Абы иужь я щхьэм щхьэкІи елъэІу хъунут. Ди тхьэлъэІум япэ дыдэу Иеговэ пыщІа псор зэрыхэдгъэхьэмкІэ къыдогъэлъагъуэ абырэ дэрэ ди зэхуаку дэлъ зэхущытыкІэфІхэр псом нэхърэ нэхъ лъапІэу зэрытлъытэр.

13. Ди тхьэлъэІум и кІыхьагъыр сыт хуэдизу щытын хуей?

¹³ Ди тхьэлъэІум и кІыхьагъыр сыт хуэдизу щытын хуей? Абы теухуауэ Библием зыри щыжыІакъым. ТхьэлъэІум и кІыхьагъыр зэхуэмыдэу щытыфынущ. Псалъэм папщІэ, ушхэн ипэ жыпІэну тхьэлъэІур кІэщІу щытыну къыщІэкІынщ. Ауэ Иеговэ зыгуэр щхьэкІэ фІыщІэ хуэпщІыну ухуеймэ е узыгъэгузавэм теухуауэ жепІэну ухуеймэ, дауикІ, уи тхьэлъэІур нэхъ кІыхьу щытынущ (1 Самуила 1:12, 15). Уи тхьэлъэІу жыІыкІэр зыгуэрым гъэщІэгъуэн щыпщІыну ухуейуэ тхьэлъэІу кІыхьыІуэхэр щІыжыпІэн щыІэкъым. Хьисэ и зэманым языныкъуэхэм апхуэдэу ящІэу щытащ (Лука 20:46, 47). Апхуэдэ тхьэлъэІур Иеговэ ифІэфІкъым. Абы и дежкІэ нэхъапэр ди тхьэлъэІур ди гум къыбгъэдэкІыу щытыныращ.

14. Алыхьым щІэх-щІэхыурэ тхьэлъэІукІэ зыхуэдгъазэ хъуну икІи Иеговэ теухуауэ сыт абы къыдигъащІэр?

¹⁴ Алыхьым щІэх-щІэхыурэ тхьэлъэІукІэ зыхуэдгъазэ хъуну? Хъунущ, сыт щхьэкІэ жыпІэмэ Иеговэ хуейщ дэ абы щІэх-щІэхыурэ депсэлъэну. Библием дыкъыхуреджэ: «Тхьэм фелъэІу», «Тхьэм фелъэІу зэпыт», «Тхьэм зэпымыууэ фелъэІу» (Маттэ 26:41; Рим 12:12; 1 Фессалоникэ 5:17). Иеговэ сыт щыгъуи къыдэдэІуэну хьэзырщ. Дэ махуэ къэс Иеговэ фІыщІэ хуэтщІ хъунущ, и лъагъуныгъэмрэ и хьэлэлагъымрэ зэрызыхыдигъащІэм щхьэкІэ. Абы нэмыщІ чэнджэщрэ къарурэ къыдитыну икІи щІэгъэкъуэн къытхуэхъуну делъэІу хъунущ. ТхьэлъэІур пэж дыдэу тыгъэ лъапІэу тлъытэмэ, Иеговэ депсэлъэну зэман Іэмал имыІэу къэдгъуэтынущ.

15. ТхьэлъэІум и кІэм «Іэмин» щІыжыІэн хуейр сыт?

¹⁵ ТхьэлъэІум и кІэм «Іэмин» щІыжыІэн хуейр сыт? «Іэмин» псалъэм «пэжщ» е «апхуэдэу кърехъу» жиІэу аращ къикІыр. ТхьэлъэІум и кІэм жытІэ «Іэмин» псалъэм къегъэлъагъуэ жытІар ди гум къызэрыбгъэдэкІыр (Псалом 41:13). ЦІыху гупым и пащхьэм щыжаІа тхьэлъэІум и кІэм деж «Іэмин» жытІэм къегъэлъагъуэ жаІам арэзы дызэрытехъуэр. «Іэмин» псалъэр макъкІэ жыпІэми уигукІэ жыпІэми хъунущ (1 Летопись 16:36; 1 Коринф 14:16).

АЛЫХЬЫМ ДИ ТХЬЭЛЪЭІУХЭМ ДАПХУЭДЭУ ЖЭУАП ЗЭРЫРИТЫР?

16. Дэнэ дэ щытщІэр Иеговэ ди тхьэлъэІухэм жэуап зэрыритыр?

¹⁶ Дэнэ дэ щытщІэр Иеговэ ди тхьэлъэІухэм жэуап зэрыритыр? Алыхьым теухуауэ Библием щыжыІащ: «Уэращ тхьэлъэІухэм едаІуэр» (Псалом 65:2). Мелуан бжыгъэ хъу цІыхухэм я гум къыбгъэдэкІыу Иеговэ тхьэлъэІукІэ зыхуагъазэ. Алыхьым абыхэм я тхьэлъэІухэр зэхех икІи жэуап ирет.

17. Иеговэ ди тхьэлъэІухэм дапхуэдэу жэуап зэрыритыр? Щапхъэ къэхь.

¹⁷ Иеговэ и мелыІычхэмрэ и лэжьакІуэхэмрэ къегъэсэбэп, цІыхум и тхьэлъэІум жэуап иритын щхьэкІэ (Еврейхэм 1:13, 14). Куэдрэ къэхъуащ цІыхум Библием итыр къыгурыІуэну хуейуэ Алыхьым елъэІуа нэужь, Иеговэ и Щыхьэтхэм щыщ абы и деж къыщыкІуа. Абы къегъэлъагъуэ мелыІычхэр «хъыбарыфІ» гъэІуным жыджэру зэрыхэтыр. (Къеджэ Апокалипсис 14:6.) Абы нэмыщІ Иеговэ ди къуэш, ди шыпхъухэр хуегъэуш дэ дыщыхуэныкъуэ дыдэм деж ахэр къакІуэу къыддэІэпыкъуну. Ари ди тхьэлъэІум и жэуапщ (Притчи 12:25; Екъуб 2:16).

18. Дапхуэдэу иджыри Иеговэ ди тхьэлъэІухэм жэуап зэрыритыр?

¹⁸ Дапхуэдэу иджыри Иеговэ ди тхьэлъэІухэм жэуап зэрыритыр? Гугъуехь гуэрым дыпэлъэщын щхьэкІэ къарурэ чэнджэщрэ дыхуэныкъуэмэ, абы и къару лъапІэр къыдитыфынущ (2 Коринф 4:7). Унафэ гуэр щытщІын хуейм деж, ди Іуэхум хуэкІуэ гупсысэ Библием къыщыдгъуэтыну Иеговэ къыддэІэпыкъуфынущ. Иеговэ ди тхьэлъэІум жэуап иритын щхьэкІэ, дызыхуэныкъуэ гупсысэр ди къуэшым е ди шыпхъум зэІущІэм и Іэр щиІэту жиІэну хуигъэушыфынущ е Библием итымкІэ зэхуэсым и нэхъыжьыр къыддэгуэшэфынущ (Галатие 6:1).

19. Иеговэ ди тхьэлъэІум жэуап иримыту къытщыхъумэ, сыт зыщыдгъэгъупщэн хуэмейр?

¹⁹ Иныкъуэм деж дэ къытщыхъункІэ хъунущ Иеговэ ди тхьэлъэІум жэуап иримыту. Ауэ зыщумыгъэгъупщэ: Иеговэ ещІэ дэ дызыхуэныкъуэр, ар къыщыдитыну зэманыр икІи къызэрыдитыну щІыкІэр. Зэми ди Іуэхум теухуауэ мызэ-мытІэу Иеговэ делъэІун хуейщ. АбыкІэ дэ Иеговэ идогъэлъагъу дыщІелъэІум ди дежкІэ мыхьэнэшхуэ зэриІэр икІи жэуапыр къызэрытІэрыхьэнум шэч къызэрытедмыхьэр (Лука 11:5—10). Дызэримыгугъа щІыкІэу ди тхьэлъэІум Иеговэ жэуап къыщрити къохъу. Псалъэм папщІэ, дэ Иеговэ делъэІуащ ди гугъуехьыр Іуихыну, ауэ ди гугъуехьыр Іуимыхыу, абы дызэрыпэлъэщын къару къыдет. (Къеджэ 2 Коринф 4:7.)

20. ЩІэх-щІэхыурэ Иеговэ тхьэлъэІукІэ зыщІыхуэдгъэзэн хуейр сыт?

²⁰ Сыту насыпышхуэ Иеговэ тхьэлъэІукІэ зыхуэдгъэзэну Іэмал дызэриІэр! Иеговэ дызэрызэхихым шэч къытедмыхьэми хъунущ (Псалом 145:18). ЩІэх-щІэхыурэ Иеговэ тхьэлъэІукІэ зыхуэдгъазэмэ, ди зэныбжьэгъугъэр нэхъ быдэ хъунущ.