12-НЭ УРОК
ЛІыгъэ зыхэлъ щІалэ
Апостол Паул къезыгъэла щІалэм теухуауэ къэдгъащІэ. Ар Паул и шыпхъум и къуэу щытащ. Абы и цІэр дэ тщІэкъым, ауэ лІыгъэшхуэ къызыхэщ Іуэхугъуэ зэрищІар дощІэ. Абы ищІар къэпщІэну ухуей?~
Апостол Паул Ерусалим тутнакъым ист. Хьисэ теухуауэ цІыхухэм зэрыжриІэм щхьэкІэ ар ягъэтІысащ. ЦІыху бзаджэхэм Паул ялъагъу хъутэкъыми, мурад Іей къагупсысащ. Ахэр зэгурыІуащ: «Дзэпщым жедвгъэІэ, и зауэлІхэм жриІэу, Паул судым къригъэшэну. Дэ гъуэгум деж зыщыдгъэпщкІунщ. Паул абдеж щыблэкІым, дытеуэнщ!»
Мы щІалэм и анэ дэлъху апостол Паулрэ дзэпщымрэ мурад Іейм теухуауэ хъыбар яригъэщІащ
Ар Паул и шыпхъум и къуэм къищІащ. Сыт-тІэ абы ищІар? Ар тутнакъым кІуэри и анэ дэлъхум псори жриІэжащ. Паул занщІэу щІалэм унафэ хуищІащ дзэпщым деж кІуэуэ а мурад Іейм теухуауэ хъыбар иригъэщІэну. Дауэ уеплърэ, тыншу пІэрэт щІалэм дежкІэ дзэпщым епсэлъэну?~ ДауикІ, тынштэкъым. Сыт щхьэкІэ жыпІэмэ, дзэпщым увыпІэ лъагэ иІыгът. Ауэ а щІалэм лІыгъэ хэлъти псори абы жриІэжащ.
Дзэпщым щІэн хуейр ищІэт. Абы зауэлІу 500-м нэс зэригъэпэщащ, апостол Паул яхъумэн щхьэкІэ, икІи унафэ яхуищІащ а жэщ дыдэм ар Кеса́рие яшэну. Паул къелауэ пІэрэ-тІэ?~ Къелащ. ЦІыху бзаджэхэр Паул теуэну шынащ. Абыхэм я мурад Іейр къехъулІакъым.
Мы хъыбарым сытым ухуригъасэрэ?~ Паул и шыпхъум и къуэм лІыгъэ игъэлъэгъуам хуэдэ уэри бгъэлъэгъуэфынущ. Иеговэ теухуауэ цІыхухэм щажетІэм деж лІыгъэшхуэ тхэлъын хуейщ. Уэри лІыгъэ пхэлъу Иеговэ теухуауэ цІыхухэм яжепІэну?~ Апхуэдэу пщІэмэ, уэ зыгуэрым и гъащІэр къебгъэлынкІэ хъунущ.