Алыхьым бегъымбархэр къигъэсэбэпурэ дыкъызэригъэгугъар

ПАСЭРЕЙ зэманым псэуа бегъымбархэм Алыхьыр я фІэщ хъут. Абы ахэр къызэригъэгугъа псалъэхэм дзыхь хуащІт икІи я гъащІэр а псалъэхэм тращІыхьт. СыткІэ къигъэгугъат ахэр?

Іэдэмрэ Хьэуарэ Алыхьым пэщІэува иужь, Алыхьым псалъэ итащ «блэм» — «благъуэжь абрагъуэу... иблису икІи шейтІану жыхуаІэ блэжьу» щытым и щхьэм еуэу кІэ къыхуэзыгъэкІуэнур къыхихыну (ЩІэдзапІэ 3:14, 15; Апокалипсис 12:9, 12). Апхуэдэу дэІэпыкъуэгъу яхуэхъуным бегъымбархэр пэплъэрт. Хэту пІэрэт къэкІуэн хуейр?

А псалъэр жиІа иужь илъэс 2 000 хуэдиз дэкІауэ, Иеговэ бегъымбар Ибрэхьим къигъэгугъат къэкІуэн хуейр и щІэблэу щытыну. Алыхьым Ибрэхьим жриІат: «Лъэпкъ псоми си нэфІ ящыхуэнущ уэ уи хьэтыркІэ» (Галатие 3:8).

Абы теухуауэ Алыхьым Мусэ бегъымбар нэхъыбэ къригъэщІащ ди эрэм ипэ къихуэу 1473-нэ гъэм. Ибрэхьим и лъэпкъым къыхэкІа Израил и къуэхэм Мусэ жриІащ: «Уи Алыхь Иеговэ уи лъэпкъым щыщу бегъымбар къыуитынущ, уи къуэшхэм щыщу, сэ схуэдэу (абы жиІэм федэІуэн хуейщ)» (Второзаконие 18:15). Абы къыхэкІыу, Мусэ хуэдэ бегъымбарыр Ибрэхьим и бынхэм къыхэкІын хуейт.

Абы нэмыщІ а бегъымбарыр пащтыхь Даут и щІэблэм щыщу щытын хуейт икІи езыри пащтыхьышхуэ хъун хуейт. Алыхьым пащтыхь Даут къигъэгугъащ: «Сэ Іэмал имыІэу уи яужькІэ уи щІэблэм щыщ тезгъэувэнущ... ...ИкІи Іэмал имыІэу и пащтыхьыгъуэм и тахътэм мыкІуэдыжын лъабжьэ быдэ хуэсщІынущ» (2 Самуила 7:12, 13). Абы нэмыщІ Алыхьым къызэІуихащ Даут и щІэблэм къыхэкІынум «мамырыгъэм и ПщыкІэ» зэреджэнур икІи жиІащ «И тепщэныгъэр ину убгъуа хъунущ икІи Даут и тахътэмрэ и пащтыхьыгъуэмрэ мамырыгъэм кІэ щиІэнукъым. Абы лъабжьэ быдэ иІэнущ икІи захуагъэрэ пэжагъкІэрэ сыт щыгъуи зэтеІыгъа хъунущ» (Исаия 9:6, 7). Пэжагъ зыбгъэдэлъ а Пащтыхьыращ щІылъэм мамырыгъэрэ захуагъэрэ зыухуэжынур. Ауэ дапщэщ ар къыщыкІуэнур?

ИужькІэ мелыІыч ДжэбрэІил бегъымбар Даниил жриІащ: «ЗэгъащІи зэхэщІыкІ: Ерусалим зэтрагъэувэжыну икІи яухуэжыну унафэ къыдэкІа нэужь, Пашэ Мэссихь къыщыкІуэну зэманым нэс тхьэмахуиблрэ тхьэмахуэ хыщІрэ тІурэ дэкІынущ» (Даниил 9:25). А тхьэмахуэ 69-р (зы тхьэмахуэр илъэсибл мэхъу) зэхэплъхьэмэ илъэс 483 мэхъу. А тхьэмахуэхэр ди эрэм ипэ къихуэу 455-нэ гъэм щІидзэри ди эрэм 29-нэ гъэм иухащa.

Куэдрэ зыпэплъа щІэблэу икІи Мусэ хуэдэ бегъымбару щыт Мэссихьыр ди эрэм 29-нэ гъэм пэжу къэкІуауэ жыпІэ хъуну? КъыкІэлъыкІуэ псалъащхьэм ар къыщыпщІэнущ.