Nĩ Ũndũ Waĩle Aklĩsto Kũtũmĩa Nzĩa sya Kũsiĩĩa Mũndũ Mũka Kũitava?

Ũndũ Mbivilia yaasya

Yesũ ndaatavya amanyĩwʼa methĩwe na syana kana maikethĩwe nasyo. O na vai ũmwe wa amanyĩwʼa make waaneenea ũndũ ũsu. Vai vandũ o na vamwe Mbivilia ĩneenete ĩũlũ wa kũsiĩĩa mũndũ mũka ndakaitave. Ĩndĩ ũndũnĩ ũsu, mwolooto ũla wĩ ĩandĩkonĩ ya Alomi 14:12 no ũtũmĩke: “Kĩla ũmwe waitũ akaumya ũvoo wake mbee wa Ngai.”

Kwoou, nĩ ĩũlũ wa andũ matwaanĩte matwʼe ethĩwa nĩmekwĩthĩwa na syana kana mayĩĩthĩwa nasyo. O na nomo maĩle kwĩtwʼĩĩa ũndũ makethĩwa na syana syĩana, na makeethĩwa nasyo ĩndĩĩ. Ethĩwa andũ matwaanĩte nĩmatwʼa kũtũmĩa nzĩa ya kũsiĩĩa kũitava, ũsu nĩ ũtwi woo, na vai mũndũ waĩle kũmasilĩla. Nzĩa ĩsu ĩyaĩle kũaa kana kaminĩte kũitavwa.—Alomi 14:4, 10-13.