Onanyʼa Kana Nũtũngaa Mũvea Nũndũ wa Nthembo ya Wovosyo

1-2. Nthembo ya wovosyo ya Yesũ yaĩle kũtũthingʼĩĩsya twĩke ata, na nĩkĩ? (2 Akolintho 5:​14, 15) (O na ĩngĩ, sisya visa.)

ŨKETHĨWA ũtumbĩĩwe nĩ nyũmba na mũndũ mũna aikũvonokya, we wĩwʼa ata ĩũlũ wa mũndũ ũsu wavonokya thayũ waku? O na kau nĩvatonyeka mũkavonokwʼa mwĩ aingĩ, no wende kũĩkĩĩthya kana we mwene nĩwatũngĩa mũvea mũndũ ũsu waũvonokya na kana ndũũvũthĩĩsya kĩu weeka.

² O tondũ ĩsomo ĩvĩtu yĩeleetye, tũitonya kwĩvonokya ene ũkombonĩ wa naĩ. Ĩndĩ o na vailye ũu, nthembo ya wovosyo ya Yesũ nĩtũvonokasya nũndũ nĩtumaa (1) tũekewa naĩ sitũ, (2) twĩthĩwa na wĩkwatyo wa kũvetewa naĩ vyũ, na (3) twĩwʼanĩthwʼa na Ngai. Nũndũ wa ũu, nĩtwĩthĩawa na wĩkwatyo wa kwĩkala tene na tene ĩvinda yĩla Ngai ũkatwʼĩkĩthya maũndũ meũ ĩtunĩ na nthĩ. Vate nzika, nthembo ya wovosyo yonanasya ũndũ Yesũ wendete andũ mũno wĩana, na ambĩĩie kũmenda o na ataaĩsa kũsyawa vaa ĩũlũ wa nthĩ e mũndũ. (Nth. 8:​30, 31) Mũtũmwa Vaũlo aandĩkie kana “wendo ũla Klĩsto wĩ nawʼo nũtũthingʼĩĩasya.” (Soma 2 Akolintho 5:​14, 15.) Kĩu kĩonanyʼa kana nĩtwaĩle kũmũtũngĩaa Yesũ mũvea nũndũ wa wendo ũla ũtwonetye, na tũyaĩle kũvũthĩĩsya nthembo yake ya wovosyo.

3. Nĩkĩ kĩla ũmwe ũtonya kũtũnga mũvea nũndũ wa nthembo ya wovosyo kwa nzĩa yĩ kĩvathũkanyʼo na andũ ala angĩ?

³ Nthembo ya wovosyo ĩkũthingʼĩĩasya wĩke ata? Ũsũngĩo waku no wĩthĩwe wĩ kĩvathũkanyʼo na wa mũndũ ũngĩ. Nĩ kana tũelewe nĩkĩ, kwasũanĩa andũ atatũ maendete vandũ vamwe, ĩndĩ kĩla mũndũ euma vandũ ve kĩvathũkanyʼo na ũla ũngĩ. Nzĩa ila meũtũmĩa kũvika vau maendete syĩ kĩvathũkanyʼo. O ta ũu, “nzĩa” ĩla ũũtũmĩa, kana kwa ndeto ingĩ, mũvango ũla wĩ nawʼo wa kwonanyʼa kana nũũtũnga mũvea nũndũ wa nthembo ya wovosyo nũkonanĩtye na ũndũ ngwatanĩo yaku na Yeova yĩilye oyu. Na ũu nĩ kwasya, maũndũ ala tũtonya kwĩka ethĩwa twĩ ikundinĩ ii ĩtatũ me kĩvathũkanyʼo: (1) Amanyĩwʼa ma Mbivilia, (2) Aklĩsto ala avatise, na (3) malondu ala melelũkĩte makauma ĩĩthyanĩ. Ekai tũneenee kĩkundi kĩmwe kũthi kĩla kĩngĩ.

AMANYĨWʼA MA MBIVILIA

4. Yeova ethĩawa na woni wĩva ĩũlũ wa amanyĩwʼa ma Mbivilia?

⁴ Ethĩwa nũendeee kwĩmanyĩsya Mbivilia, kwasũanĩa ũndũ ũũ: Kwĩthĩwa wĩtĩkĩlĩte ũvoo mũseo kwĩonanyʼa kana wĩ ũmwe katĩ wa ala Yeova ũkusĩtye methĩwe na ngwatanĩo nzeo nake. (Yoa. 6:44; Meko 13:48) “Yeova nũtataa ngoo,” kana kwa ndeto ingĩ, nũithianaa. Kĩu kĩonanyʼa kana nĩwonaa kĩthito kyaku kya kwĩmanyĩsya ĩũlũ wake na nũtanaa oona ũendeee kũalyũla mwĩkalĩle waku nĩ kana wosane na myolooto yake. (Nth. 17:​3, BK; 27:11) Nthembo ya wovosyo nĩyo ĩtumaa wĩthĩwa na ngwatanĩo nzeo na Yeova. (Alo. 5:​10, 11) Mwa ndũkaaĩse kũmĩvũthĩĩsya!

5. Amanyĩwʼa ma Mbivilia matonya ata kũatĩĩa mwolooto ũla wĩ nthĩnĩ wa Avilivi 3:16?

⁵ Ethĩwa wĩ mũmanyĩwʼa wa Mbivilia, ũtonya kwĩka ata wonanyʼe kana nũtũngaa mũvea nũndũ wa nthembo ya wovosyo? Ũndũ ũmwe ũtonya kwĩka nĩ kũatĩĩa ũtao ũla mũtũmwa Vaũlo wanengie Avilivi. Ameie: “Maendeeo ala twĩkĩte kũvika yu, nĩtũendeei kwĩkala mũendelenĩ o ũsu.” (Avi. 3:16) Nayo Mbivilia ĩngĩ yaĩtye ũũ mũsoanĩ ũsu: “Nĩtũatĩĩei kĩla tũminĩte kũkwata kũka kũvika yu.” Kwosana na ũtao ũsu, ndũketĩkĩlye kĩndũ o na kĩmwe kĩũvĩngĩĩse ũeke kũkinyĩla nzĩanĩ ĩla ĩelete thayũnĩ.—Mt. 7:14; Lũka 9:62.

6. Amanyĩwʼa ma Mbivilia maĩle kwĩka ata ethĩwa meĩwʼa ve vinya kwĩka moalyũku mana? (Kũtũngĩlĩĩlwa kwa Mĩao 30:​11-14) (O na ĩngĩ, sisya visa.)

⁶ Nao nata ethĩwa wĩĩwʼa ve vinya kwĩtĩkĩlana na ũmanyĩsyo mũna wa Mbivilia ũneemanyĩisye o mĩtũkĩ? Ĩka ũkunĩkĩli ĩũlũ wawʼo na ũimũvoya Yeova aũtetheesye nĩ kana ũũelewe nesanga. (Sav. 86:11) Ethĩwa ĩtina wa kwĩka maũndũ asu wĩĩwʼa ve o vinya kũũelewa, amba kũekana nawʼo kwa oyu ĩndĩ ndũkaeke kwĩmanyĩsya Mbivilia. Nao nata ethĩwa wĩĩwʼa ve vinya kũtia mũtuo mũna Mbivilia ĩleanĩte nawʼo? Lilikana kana Yeova ndesa kũkũlya andũ mate eanĩu meke maũndũ matatonya. No ũvote kũatĩĩa myolooto yake thayũnĩ waku. (Soma Kũtũngĩlĩĩlwa kwa Mĩao 30:​11-14.) Na we nũkwathĩte kũũtetheesya. (Isa. 41:​10, 13; 1 Ako. 10:13) Kwoou ndũkakwʼe ngoo. Vandũ va kũtinda ũsũanĩĩte mawetu ala maũkwatĩte, tũnga kĩlĩko maũndũnĩ maseo ala Yeova ũkwĩkĩte; na asu nĩ vamwe na mũvango wa nthembo ya wovosyo. O ũndũ ũkũendeea kũmwenda Yeova mũnango, nowʼo ũkonaa “mĩao yake [ĩte] mũio mũito.”—1 Yoa. 5:3.a

7. Andũ ma mũika ala maeewe ũwʼonĩ maĩle kũvindĩĩsya ũndũ wĩva?

⁷ Nao nata inywʼĩ andũ ma mũika ala mũeewe ũwʼonĩ? O nenyu mwĩ amanyĩwʼa ma Mbivilia. Ũwʼo nĩ kana ninywʼĩ amanyĩwʼa ala ma vata vyũ asyai menyu me namo. Mbivilia yaĩtye: “Thengeeai Ngai, nake akamũthengeea inywʼĩ.” (Yak. 4:8; 1 Mav. 28:9) Yĩla we mwene woosa ĩtambya ya kũmũthengeea Yeova, o nake nĩwĩkaa ũu. Nũkwĩsĩ nesa na ndakwonaa ta wĩ wa mũsyĩ wa nganyʼa wa nganyʼa. Akusasya mũndũ ũmwe ũmwe, o na ala maeewe ũwʼonĩ. Nĩ kyaũ kĩtumĩte we mwene wĩthĩwa na ngwatanĩo nzeo na Yeova? Nĩ nthembo ya wovosyo, na ũsu nĩ mũthĩnzĩo wa mwanya ũtaĩle kũũvũthĩĩsya o na vanini. (Alo. 5:​1, 2) Kwoou ũtambĩte kũthi ũmbanonĩ wa kũlilikana kĩkwʼũ kya Yesũ mwaka ũũ, vindĩĩsya ũndũ kĩkwʼũ kya Yesũ kĩũtethetye. Na eka ũndũ ũsu ũũthangaasye wĩkĩe kĩthito wĩanĩsye mũvango ũla ũngĩ wa kĩ-veva wĩ nawʼo, o na ethĩwa nĩ wĩva, nĩ kana wonyʼe Yeova kana nũmũtũngĩaa mũvea nũndũ wa nthembo ya wovosyo ĩla waumisye kwĩsĩla Mwana wake.b

AKLĨSTO ALA AVATISE

8. Aklĩsto ala avatise monanĩtye ata kana nĩmaĩkĩĩe nthembo ya wovosyo?

⁸ Ethĩwa wĩ Mũklĩsto mũvatise, nũminĩte kwĩka maũndũ meana ũna ũkonanyʼa kana nũĩkĩĩe nthembo ya wovosyo. Kwa ngelekanyʼo, nĩwoosie matambya wamũthengeea Yeova na waalyũla mwĩkalĩle waku woosana na myolooto yake. O na ĩngĩ, nĩwaatĩĩie mwĩao wa Yesũ wa kũtwʼĩkĩthya andũ amanyĩwʼa kwa kũmatavya maũndũ ala ũĩkĩĩe. Na ĩndĩ nĩweeyumisye ũmũthũkũme Yeova na wavatiswa. Nĩwĩthĩwa ũkwatĩte ũvinganĩsya nũndũ wa kũlũmanyʼa na ũthaithi wa wʼo? (2 Tim. 3:12) Kwona ũendeee kũmĩĩsya wĩ mũĩkĩĩku kwĩonanyʼa kana nũmwendete Yeova na nũtũngaa mũvea nũndũ wa nthembo ya wovosyo ĩla waumisye kwĩsĩla Mwana wake.—Evl. 12:​2, 3.

9. Aklĩsto ala avatise maĩle kwĩsũvĩana na mũisyo wĩva?

⁹ Ethĩwa twĩ Aklĩsto avatise, ve mũisyo mũna twaĩle kwĩsũvĩana nawʼo. Ĩtina wa ĩvinda, no twambĩĩe kũvũthĩĩsya nthembo ya wovosyo. Ũu ũtonyeka ata? Kwasũanĩa kĩla kyakwatie Aklĩsto ma Eveso. Yesũ nĩwamakathie nũndũ wa wũmĩĩsyo woo. Ĩndĩ o na vailye ũu, ameie atĩĩ: “Nĩ na ũndũ ũũ ĩũlũ waku: nũtiĩte wendo ũla waĩ nawʼo mbeenĩ.” (Ũvu. 2:​3, 4) O tondũ ndeto isu sya Yesũ syonanĩtye, Mũklĩsto no ethĩwe aimũthaitha Yeova ta kĩmanyĩo, ĩndĩ ti kwĩthĩwa nũmwendete. Mũndũ ta ũsu no ethĩwe avoyaa, akathi maũmbanonĩ na ũtavanyʼa, na ũyĩthĩa ekaa ũu nũndũ kĩu nokyo wamanyĩie kwĩka. Ĩndĩ no ethĩwe atekaa ũu nũndũ nũmwendete Yeova. Kwoou ũtonya kwĩka ata ethĩwa wĩĩwʼa ta ũtamwendete Yeova ũndũ wamwendete mbeenĩ?

10. Ũtonya ata ‘kũsũanĩa mũno’ na ‘kwĩnengane vyũ’ maũndũnĩ ala makonetye ũthaithi wĩ Mũklĩsto? (1 Timotheo 4:​13, 15)

¹⁰ Mũtũmwa Vaũlo eeie Timotheo ‘asũanĩe mũno’ na ‘ayĩnengane vyũ’ maũndũnĩ ala makonetye ũthaithi e Mũklĩsto. (Soma 1 Timotheo 4:​13, 15.) Kwosana na ũtao ũsu, tata kũvindĩĩsya maũndũ ala ũtonya kwĩka ũkaĩlangya ũthaithi waku nĩ kana ũendeee ‘kwakana vevanĩ.’ (Alo. 12:11) Kwa ngelekanyʼo, no ũtũmĩae ĩvinda yingangĩ ũyĩyũmbanĩsya maũmbano, na kĩu kĩkatetheeasya kĩlĩko kyaku kĩikangange yĩla wĩ maũmbanonĩ. Kana yĩla ũkwĩmanyĩsya we mwene, no ũtetheke wanyuva kwĩkala vandũ vauĩtye vala ũtonya kũvindĩĩsya nesa maũndũ ala ũkwĩmanyĩsya. O tondũ waĩle kwongela ngũ mwakinĩ nĩ kana ũendeee kwakana, ũu nowʼo waĩle kũendeea kwĩka maũndũ asu nĩ kana ũendeee kũtũnga mũvea nũndũ wa maũndũ ala Yeova wĩkĩte kwondũ waku, na asu nĩ vamwe na nthembo ya wovosyo. O na ĩngĩ, wĩona ata syumwa mbũthũ tũtambĩte kũthi ũmbanonĩ wa kũlilikana kĩkwʼũ kya Yesũ ũkavindĩĩsya moathimo ala tũtanĩaa twĩ Ngũsĩ sya Yeova? Vate nzika, kĩu kĩkaũtetheeasya kũtũngaa mũvea mũnango nũndũ wa nthembo ya wovosyo, ĩla yatumie twĩthĩwa na ngwatanĩo nzeo na Yeova.

11-12. Ethĩwa mavinda amwe nĩwĩwʼaa ũte na kĩthito ta kĩla waĩ nakyo mbeenĩ, ũu nĩ kwonanyʼa kana ndwĩ na veva wa Ngai? Elesya. (O na ĩngĩ, sisya visa.)

¹¹ Ethĩwa ve mavinda wĩwʼaa ũte na kĩthito ta kĩla waĩ nakyo mbeenĩ ũimũthũkũma Yeova, kĩu kĩyaĩle kũtuma ũkwʼa ngoo kana ũkambĩĩa kwona Ngai ta ũekete kũũnenga veva wake. Lilikana kĩla mũtũmwa Vaũlo waandĩkĩie Akolintho ĩũlũ wa ũthũkũmi wake. Ameie: “O na ethĩwa ngaũtethya ndekwenda, nĩ o na ũthũkũmi nĩnengetwe.” (1 Ako. 9:17) We oonanasya ata?

¹² Ve mavinda Vaũlo weewʼaa ate na mea ma kũtavanyʼa. Ĩndĩ o na vailye ũu, nĩwatwʼĩte vyũ kũendeea kũmĩĩsya ũthũkũminĩ wake o na yĩla weewʼaa vate laisi kwĩka ũu. O naku no wĩke o take. Twʼa vyũ kwĩka kĩla kĩseo o na yĩla ũkwĩwʼa ũte na mea ma kũkĩka. Kwoou mũvoye Yeova aũnenge “wendi na ũtonyi wa kwĩka maũndũ onthe ala we wendaa.” (Avi. 2:13) Endeea kũlũmanyʼa na mũvango waku wa kwĩka maũndũ ma kĩ-veva. Na ĩndĩ no wĩthĩwe ũte na nzika kana ĩtina wa ĩvinda, wendo waku kwa Yeova nũũlũlũmĩĩla na ũisyokea kĩthito kĩla waĩ nakyo mbeenĩ.

13. Tũtonya ata kwĩyĩosya kana ithyĩ twĩ “ũla mũĩkĩĩonĩ”?

¹³ Mavinda kwa mavinda, wĩthĩwa wĩ ũndũ mũseo tũkethianaa ithyĩ ene kwosana na mwolooto ũla wĩ nthĩnĩ wa 2 Akolintho 13:​5, ũla waĩtye: “Endeeai kwĩyĩosya kana inywʼĩ mwĩ ũla mũĩkĩĩonĩ; endeeai kũĩkĩĩthya ũndũ inywʼĩ ene mũilye.” Kwa ngelekanyʼo, no twĩkũlye makũlyo ta: ‘Nyie nĩnĩvĩtasya maũndũ ma Ũsumbĩ mbee thayũnĩ wakwa?’ (Mt. 6:33) ‘Maũndũ ala nĩtanĩthasya namo nĩmonanasya kana nĩnĩmenete ũla ũthũku?’ (Sav. 97:10) ‘Nĩnĩkaa kyonthe kĩla ndonya nĩ kana nĩĩkĩĩthye kana ve na mũuo na ngwatanĩo katĩ wa athaithi ala angĩ?’ (Avs. 4:​2, 3) Ũmbano wa kũlilikana kĩkwʼũ kya Yesũ nĩ ĩvinda ĩseo mũno ya kũsũanĩa nthembo ya wovosyo ĩla Yeova waumisye. O na nũtũnengae mwanya wa kwĩyĩosya ithyĩ ene na kũĩkĩĩthya kana twĩkalaa kwondũ wa Klĩsto ĩndĩ ti kwondũ witũ ene.

MALONDU ALA MELELŨKĨTE MAKAUMA ĨĨTHYANĨ

14. Nĩ kyaũ kĩtonya kũtuma Aklĩsto amwe melelũka makauma ĩĩthyanĩ?

¹⁴ Aklĩsto amwe nĩmaekaa kũthi maũmbanonĩ myei mĩvũthũ ĩtina wa kũvatiswa kana o na ĩtina wa kwĩthĩwa mamũthũkũmĩte Yeova me aĩkĩĩku myaka mingĩ. Nĩkĩ? Nũndũ amwe methĩawa maitavĩwe nĩ “mawĩmakĩo ma thayũ.” (Lũka 21:34) Angĩ namo nĩmalulutĩkĩtwʼe nĩ ndeto kana meko ma mũthaithi ũngĩ. (Yak. 3:2) Na ĩndĩ ve angĩ meekie naĩ ngito na meewʼaa ve vinya kwĩtya ũtethyo. O na ethĩwa nĩ kyaũ kĩtumĩte welelũka ũkauma ĩĩthyanĩ, waĩle kwĩka ata? Nthembo ya wovosyo o vamwe na wendo ũla Yeova na Yesũ makwonetye waĩle kũũthingʼĩĩsya kwĩka ata?

15. Yeova onanĩtye ata kana nũthĩnĩkĩaa ala melelũkĩte makauma ĩĩthyanĩ? (Esekieli 34:​11, 12, 16)

¹⁵ Kwasũanĩa ũndũ Yeova wĩwʼaa ĩũlũ wa ala melelũkĩte makauma ĩĩthyanĩ? We ndamekĩasya ngoo. Vandũ va ũu, nũmanthaa malondu ala maĩte. Eka ũu, nũmaĩthasya na akamatetheesya mamũsyokee. (Soma Esekieli 34:​11, 12, 16.) Yeova no ethĩwe aendeee kwĩka ũu kwondũ waku? No twasye, Ĩĩ! Na kĩtumi nũndũ kwĩthĩwa ũisoma ĩsomo yĩĩ kwĩonanyʼa kana nũkwenda kũmwendeesya. O ũndũ Yeova woonie wĩ na ngoo nzeo na aũkusya ũwʼonĩ, we no ethĩwe aendeee kũũkusya ũmũsyokee?

16. Nĩ kyaũ kĩtonya kũtetheesya malondu ala maĩte mamũsyokee Yeova? (O na ĩngĩ, sisya visa.)

¹⁶ Mbulosua Mũsyokee Yeova yĩ na ndeto ii sya kwĩkĩa vinya: “Ũendeee kũmũsyokea Yeova, ĩthĩwa na mũĩkĩĩo vyũ kana nũkũũtetheesya. Akaũtetheesya ũmine mawĩmakĩo, ũeke kwĩthĩwa na woo ngoonĩ, na ũikwata mũuo wa kĩlĩko na wa ngoo, ũla mũndũ ũkwataa ĩtina wa kwĩthĩwa na wasya mũtheu wa ngoo. Na ĩndĩ nũtonya kwĩwʼa wakwata vinya wa kũmũthũkũma Yeova ĩngĩ wĩ vamwe na athaithi make.” O na ĩngĩ, lilikana kana atumĩa nĩmendaa mũno kũũtetheesya. No methĩwe “ta vandũ va kwĩvitha kĩseve, na ta kwĩvitha kĩuutani.” (Isa. 32:​2, BK) Nĩ kana wonanyʼe kana nũtũngaa mũvea nũndũ wa nthembo ya wovosyo, no wĩkũlye-ĩ, ‘Nĩ matambya meva naĩle kwosa oyu nĩ kana ‘nĩsũanĩe vamwe’ na Yeova, kana kwa ndeto ingĩ, nĩlũngalye maũndũ vamwe nake?’ (Isa. 1:​18, BK; 1 Vet. 2:25) Kwa ngelekanyʼo, no ũthi Nyũmbanĩ ya Ũsumbĩ kwondũ wa maũmbano? No ũneene na mũtumĩa ũmwe na ũimũkũlya aũtetheesye kĩ-veva? Mũtumĩa ũsu no eke mĩvango ũmanyĩwʼe Mbivilia vandũ va ĩvinda yĩana ũna. Kwoou no wĩthĩwe ũte na nzika kana Yeova nũkũathima kĩthito kyaku kya kwonanyʼa nũtũngaa mũvea nũndũ wa nthembo ya wovosyo ya Mwana wake.

KĨLA ŨTONYA KWĨKA

17-18. Tũtonya kũtũmĩa ata ĩvinda yitũ nesa ũmbano wa kũlilikana kĩkwʼũ kya Yesũ wa mwaka ũũ ũtanamba kũvika?

¹⁷ Yesũ aisye kana nthembo ya wovosyo yaumiwʼe “nĩ kana kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene.” (Yoa. 3:16) Yeova atũmĩaa nthembo ya wovosyo kũtũvonokya kuma ũkombonĩ wa naĩ na kĩkwʼũ. Na vai ũmwe witũ waĩle kũmĩvũthĩĩsya. (Alo. 3:​23, 24; 2 Ako. 6:1) Mĩthenya mĩvũthũ ũmbano wa kũlilikana kĩkwʼũ kya Yesũ ũtanamba kũvika, osa ĩvinda ũvindĩĩsye wendo ũla Yeova na Yesũ matwonisye, na wendo ũsu waĩle kũtũthingʼĩĩsya twonanyʼe kana nĩtũũmatũngĩa mũvea.

¹⁸ Ũtonya kwonanyʼa ata kana nũtũngaa mũvea nũndũ wa nthembo ya wovosyo? Ũsũngĩo waku no wĩthĩwe wĩ kĩvathũkanyʼo na wa mũndũ ũngĩ. Ĩndĩ no wĩthĩwe ũte na nzika kana Yeova nũkũathima kĩthito kyaku kya kwĩthĩwa vamwe ana-a-asa na eĩtu-a-asa maku milioni mbingĩ, ala ‘matethĩawa thayũ kwondũ woo ene, ĩndĩ kwondũ wa ũla wamakwʼĩĩe.’—2 Ako. 5:15.