Nthimo
2 Ndia ndyendeeawʼa nĩ kwĩthĩwa na ũtonyi wa kũelewa maũndũ;
Nĩ kavaa ĩkavuanyʼa kĩla kĩ ngoonĩ yayo.
3 Mũndũ mũthũku ooka, o nakyo kĩvũthya nĩkyũkaa,
Na vala vate ndaĩa vethĩawa na nthoni.
4 Ndeto sya kanyw’a wa mũndũ nĩ kĩwʼũ kĩliku.
Mbuluti ya* ũĩ nĩ ta kalũsĩ kavĩtĩtye kĩwʼũ.
5 Ti ũseo kwonyʼa ũla mũthũku kyende
Kana kũima ũla mũlũngalu ũsili wa katĩ.
6 Ũneeni wa ndia ũetae ĩteta,
Na kanywʼa wayo ũtumaa angĩ menda kũmĩkũna.
7 Kanywʼa wa ndia nĩwʼo wanangĩko wayo,
Na ilomo syayo nĩ kĩtei kya thayũ wayo.
8 Ndeto sya mwilĩanĩli nĩ ta tũlungu twa lĩu wĩ mũyo;*
Imelawʼa na mĩtũkĩ ikalika ĩmwe kwa ĩmwe ĩvunĩ.
9 Mũndũ o na wĩva mũtulu wĩanĩ wake
Nĩ mwana-a-ĩthe wa ũla ũetae wanangĩko.
10 Ĩsyĩtwa ya Yeova nĩ mwako mũtũlu na mũlũmu.
Mũndũ ũla mũlũngalu asembaa vo na aikwata ũsũvĩo.*
11 Malĩ ya mũthwii nĩ ndũa yake mbiĩĩe;
Mosũanĩonĩ make, yĩthĩawa ĩilye ta ũkũta wa kũmũsũvĩa.
12 Mũndũ atanamba kũvalũka, ngoo yake yĩthĩawa na mĩtũlyo,
Na mbee wa ũkumyo vethĩawa wĩnyivyo.
13 Yĩla mũndũ o na wĩva wasũngĩa ũndũ atanamba kũmanya ũwʼo wa maũndũ,
Nĩ ũtumanu na nthoni.
14 Veva wa mũndũ no ũmũtetheesye awaa,
Ĩndĩ nũũ ũtonya kũmĩĩsya veva mũtũlĩku?*
15 Ngoo ya mũndũ ũla ũeleawa maũndũ nĩkwataa ũmanyi,
Na kũtũ kwa ũla mũĩ kũmanthaa ũmanyi.
16 Mũthĩnzĩo wa mũndũ nũmũvingũĩaa nzĩa;
Ũmũnengae mwanya wa kũthi vala ve anene.
17 Ũla ũneenaa wa mbee ĩkoaninĩ yake onekaa ta we ũkũneena wʼo,
Nginya mũndũ ũla ũngĩ ayũka na aimũkũlya makũlyo.*
18 Kũkũna kula nĩkũminaa ngananĩo
Na kula nitusaa maũndũ katĩ wa* andũ elĩ me vinya meũsindana.
19 Mwana-a-ĩthe ũvĩtĩwʼe ethĩawa e mũmũ mũno kwĩ ndũa mbiĩĩe,
Na ve ngananĩo syĩthĩawa iilye ta mĩamba ya ngome.
20 Ĩvu ya mũndũ yĩkausũwʼa nĩ ũsyao wa ũneeni* wake;
Akavũnwʼa nĩ ũsyao wa ilomo syake.
21 Kĩkwʼũ na thayũ syĩ ũtonyinĩ wa ũĩmĩ;
Ala mendete kũũtũmĩa makaya ũsyao wawʼo.
22 Mũndũ ũla ũkwatĩte kĩveti kĩseo nũkwatĩte kĩndũ kĩseo,
Na nũkwataa ũseo kuma kwa* Yeova.
23 Mũndũ ngya nĩwĩsũvanaa yĩla ũkũneena,
Ĩndĩ mũndũ mũthwii asũngĩaa e mũkalĩ.
24 Ve anyanya methĩawa meyũmbanĩtye kũminana,
Ĩndĩ ve mũnyanya ũlũmanasya na mũndũ o na kwĩ mwana-a-inyia.