Yovu
3 Ĩtina wa maũndũ asu, nĩvo Yovu wambĩĩie kũneena na kũumanĩa mũthenya ũla wasyaiwe.* 2 Yovu aisye:
3 “Mũthenya ũla nasyaiwe nũthele,
O na ũtukũ ũla mũndũ waisye: ‘Kavĩsĩ nĩkaitavwa!’
4 Mũthenya ũsu nĩwĩthĩwe kĩvindu.
Ngai ũla wĩ ĩũlũ ndakaũngane nawʼo;
Ndũkamulĩkwe nĩ kyeni.
5 Kĩvindu kingĩ mũno* kĩwose.
Ĩtu ya mbua yũke ĩũlũ wawʼo.
Kĩndũ o na kĩva kĩtumaa mũthenya wĩthĩwa na kĩvindu kĩũtelemye.
6 Ũtukũ ũsu, nũvulwʼe nĩ ũtuku;
Ndũkatane mĩthenyanĩ ya mwaka,
Na ndũkalike ũtalonĩ wa myei.
7 Vate ndĩi! Ũtukũ ũsu nũtwʼĩke ngũngũ;
Wasya wa kũtana ndũkewʼĩke nthĩnĩ wawʼo.
8 Ala maumanĩaa mũthenya nĩmaũumanĩe,
Ala matonya kũamũkya Leviathani.*
9 Ndata syawʼo sya kũikya imesye kĩvindu;
Nĩweteele kyeni kya kũikya kĩeme kũvika,
Na ndũkese kwona kyeni kya kũithea.
10 Nũndũ ndwaavinga mĩomo ya ĩvu ya inyia wakwa;
O na ndwaavitha metho makwa thĩna.
11 Nĩkĩ ndaakwʼa ndisyawa?
Nĩkĩ ndaathela yĩla naumie ĩvunĩ ya inyia wakwa?
12 Nĩkĩ vaĩ mau ma kũmbosa
Na nondo sya kũmbongya?
13 Nũndũ yu nĩthĩwa ngomete ndeũthĩnwʼa;
Nĩthĩwa ngomete na nthũmũĩte
14 Vamwe na asumbĩ ma nthĩ na atai moo,
Ala meeyakĩie kũndũ kũla yu nĩ kũombokangu,*
15 Kana na anene ala maĩ na thaavu,
Ala nyũmba syoo syausĩe vetha.
16 Kana nĩkĩ naemie kwĩthĩwa ta ĩvu yĩtĩku yĩtesĩkĩe,
Ta syana ila itaaĩsa kwona kyeni?
17 Vau o na ala athũku nĩmaekaa kũthokoeka;
Vau ala manoete mũno methĩawa mathũmũĩte.
18 Vau ala ove methĩawa mauĩtye vamwe;
Mayĩwʼaa wasya wa ũla ũkũmalasimĩthya kũthũkũma.
19 Ala anini na ala anene me vau methĩawa mailye ũndũ ũmwe,
Na ngombo yĩthĩawa ĩthaĩtwʼe kuma kwa vwana wayo.
20 Nĩkĩ ũnengae kyeni ũla ũkũthĩna
Na thayũ ala me na ũũ nũndũ wa thĩna mwingĩ?*
21 Nĩkĩ methĩawa na wendi mwingĩ wa kĩkwʼũ, ĩndĩ kĩyũkaa?
Menzaa maikĩmantha kwĩ ũthwii mũvithe,
22 Ala maendeee kũtana mũno,
Ala matanaa moona mbũa.
23 Nĩkĩ ũnengae kyeni mũndũũme waĩtye nzĩa,
Ũla Ngai ũmwiĩĩe?
24 Nĩkwĩthĩwa kũvevũũka kũtwʼĩkĩte lĩu wakwa,
Na kũluma kwakwa kwonoawʼa ta kĩwʼũ.
25 Nĩkwĩthĩwa kĩla ngĩaa mũno nĩkĩmbũkĩe,
Na kĩla ngĩaa nĩkĩngwatĩte.
26 Ndyĩthĩĩtwe na mũuo, ndiuĩtye, ndi na ũthũmũo,
Ĩndĩ thĩna ũtindĩaa kũka.”