Yovu
2 Ĩtina, mũthenya nĩwavikie yĩla ana ma Ngai ũla wa wʼo* malikile maũngame mbee wa Yeova, na Satani o nake alika vamwe namo aũngame mbee wa Yeova.
2 Na ĩndĩ Yeova akũlya Satani: “Wauma va?” Nake Satani asũngĩa Yeova amwĩa: “Nauma kwanganga kũũ na kũũ ĩũlũ wa nthĩ na kũtembeanga ĩũlũ wayo.” 3 Na Yeova eea Satani atĩĩ: “We nĩwonete* mũthũkũmi wakwa Yovu? Vai ũngĩ ũilye take ĩũlũ wa nthĩ. Nĩ mũndũ mwĩanĩu ũlũmanasya na kĩla kyaĩlĩte,* ũkĩĩte Ngai na wĩsiĩanĩaa na kĩla kĩthũku. No ũendeee kũlũmanyʼa vyũ na wĩanĩu wake, o na kau wĩtata kũmbĩkĩa vinya nĩmwanange* vate kĩtumi.” 4 Ĩndĩ Satani asũngĩie Yeova amwĩa atĩĩ: “Kĩkonde vandũ va kĩkonde. Mũndũ akanengane kyonthe kĩla wĩ nakyo kwondũ wa thayũ wake. 5 Ĩndĩ, nĩ kana maũndũ mavĩndũke, tambũũkya kwʼoko kwaku na ũikũna ĩvĩndĩ yake na nyama yake, na vate nzika akakũuma mbee wa ũthyũ waku.”
6 Nĩvo ĩndĩ Yeova weeie Satani atĩĩ: “Sisya! E kwʼokonĩ kwaku!* Ate o ndũkamũae!”* 7 Kwoou Satani auma mbee* wa Yeova na akũna Yovu na mĩimũ yĩ woo* mũno kuma nyaaĩnĩ sya maaũ make nginya lolotyanĩ wa mũtwe wake. 8 Na ĩndĩ Yovu oosa kĩlĩo kya mbisũ ekulye nakyo, na ekalaa mũunĩ.
9 Mũthya, kĩveti kyake kyamwĩie atĩĩ: “O na yu we no ũlũmanĩtye vyũ na wĩanĩu waku? Mũume Ngai ũkwʼe!” 10 Ĩndĩ Yovu akĩie atĩĩ: “Wĩneena ta ũmwe wa aka ala atumanu. Twaĩle kwĩtĩkĩla o kĩla kĩseo kuma kwa Ngai ũla wa wʼo na tũilea kwĩtĩkĩla o na kĩla kĩthũku?” Maũndũnĩ asu onthe, Yovu ndaavĩtya na ilomo syake.
11 Anyanya* atatũ ma Yovu nĩmeewie mĩisyo yonthe ĩla yamũkwatĩte, na kĩla ũmwe auma kwake. Anyanyae asu maĩ Elivasi ũla waĩ Mũtemani, Mbilitati ũla waĩ Mũsuua, na Nzovali ũla waĩ Mũnaamathi. Kwoou meewʼana makomane mathi makonyʼe Yovu kana nĩmeũmwĩwʼĩa tei na maimũkiakisya. 12 Yĩla mamwonie me vaasanga, mayaamũmanya nesa. Nĩmambĩĩie kũĩa na wasya mũnene na matembũanga ngũa syoo, na mekasya kĩtoo ĩũlũ kĩkatheea mĩtwenĩ yoo.* 13 Nĩvo ĩndĩ mekalile nthĩ vamwe nake mĩthenya mũonza, mũthenya na ũtukũ. Vai ũmwe waamũtavya ũndũ o na ũmwe, nĩkwĩthĩwa nĩmoonie aĩ na woo mwingĩ mũno.