Yovu
22 Elivasi, ũla waĩ Mũtemani, asũngĩie asya:
2 “We mũndũ no amũtethye Ngai?
We mũndũ wĩ na ũmanyi mũliku no amũune?
3 We Mwene Vinya Wʼonthe nĩwendaa kũmanya kana* wĩ mũlũngalu,
Kana we nũtethekaa aĩ nĩkwĩthĩwa nũatĩĩaa nzĩa ya wĩanĩu?
4 We akaũkanyʼa
Na akathi kotinĩ naku nũndũ nũmũkĩĩte?
5 Yo ti nĩkwĩthĩwa ũthũku waku mwene nĩ mũnene mũno
Na vai mũthya wa mavĩtyo maku?
6 Nĩkwĩthĩwa wosaa ngwatĩlĩlyo kuma kwa ana-a-ĩthe maku na vinya vate kĩtumi,
Na wumasya andũ ngũa syoo, ũkamatia me athei.*
7 Ndũnengae ũla mũnou kĩwʼũ kya kũnywʼa,
Na nũvataa ũla wĩ na nzaa lĩu.
8 Nthĩ nĩ ya mũndũ ũla wĩ ũtonyi,
Na ũla wonawʼa kyende ekalaa nthĩnĩ wayo.
9 Ĩndĩ nĩwalũngilye aka ndiwa mathi moko mathei,
Na watumbatumba moko ma syana ite aa-ĩthe.*
10 Nĩkyo kĩtumi ũthyũlũlũkĩtwe nĩ itei,*
Na ũũtĩswʼa nĩ maũndũ matataĩĩwe ma kũtelemya;
11 Nĩkyo kĩtumi kwĩ na kĩvindu kingĩ ũkethĩa ndũtonya kwona,
Na ũvwʼĩkĩtwe nĩ kĩwʼũ kingĩ.
12 We Ngai nde ĩũlũ vyũ ĩtunĩ?
Na sisya ũndũ ndata syonthe syĩ ĩũlũ mũno wĩana.
13 Ĩndĩ we waĩtye: ‘We Ngai kwa wʼo esĩ kĩ?
We no asile asiĩĩwe nĩ ũtuku mwingĩ?
14 Matu nĩmamũthwʼĩkaa ũkethĩa ndatonya kwona
Yĩla ũkũtembeanga kũũ na kũũ mũthyanĩ wa* ĩtu.’
15 We nũkũatĩĩa kasĩla ka tene
Kala andũ athũku mesĩlĩte,
16 Andũ ala mavulilwʼe* ĩvinda yoo yĩtavikĩte,
Ala mũsingi woo wakuiwe nĩ kĩwʼũ kingĩ?*
17 Matavasya Ngai ũla wa wʼo atĩĩ: ‘Ekana naitũ!’
Na ‘We Mwene Vinya W’onthe atonya kũtwĩka ata?ʼ
18 Ĩndĩ o na ũu wĩ o vo, Ngai nĩwe wausũisye nyũmba syoo syĩndũ nzeo.
(Mosũanĩo mathũkĩte ũu me vaasa na a makwa.)
19 Ala alũngalu makoona ũu na maitana,
Na ala mate na ĩvĩtyo makamathekeea na mayasya:
20 ‘Avĩnganĩsya maitũ nĩmaanangwa,
Na mwaki nũũvĩvya ũtialo woo.’
21 Mũmanye Ngai, naku ũkeethĩwa na mũuo;
Na ĩndĩ ũkakwata maũndũ maseo.
22 Ĩtĩkĩla mĩao kuma kanywʼanĩ wake,
Na ũyia ndeto syake ngoonĩ yaku.
23 Wasyokea Mwene Vinya Wʼonthe, ũkaendeea nesa ĩngĩ;
Wavetanga maũndũ mate ma ũlũngalu ĩeemanĩ yaku,
24 Keka no wĩkye thaavu waku* kĩtoonĩ
Na thaavu wa Ovilu myandanĩ yĩ* mavia,
25 Nĩvo ĩndĩ Mwene Vinya Wʼonthe ũkethĩwa thaavu waku,*
Na ũkethĩwa vetha waku ũla mũseo vyũ.
26 Nĩkwĩthĩwa vathi ũu, ũkeetanĩthya nthĩnĩ wa Mwene Vinya Wʼonthe,
Na ũkookĩlĩlya Ngai ũthyũ waku.
27 Ũkamwĩsũva, nake akakwĩwʼa;
Na ũkeanĩsya mawĩvĩto maku.
28 Ũndũ o na wĩva ũla ũkatwʼa kwĩka ũkaaĩla,
Na kyeni kĩkamulĩka kasĩla kaku.
29 Nũndũ ũkeekĩĩthwʼa nthoni waneena na mĩyimbyo,
Ĩndĩ akatangĩĩa ala me wĩnyivyo.*
30 Akavonokya ala mate na mavĩtyo;
Kwoou ethĩwa moko maku nĩ matheu, vate nzika, ũkavonokwʼa.”