Yovu
21 Yovu asũngĩie asya:
2 “Ĩthukĩĩsyei nesa kĩla ngũweta;
Ekai ũũ wĩthĩwe ũkiakisyo ũla mũũnenga.
3 Mbũmĩĩsyei ndineena;
Na ĩndĩ namina kũneena, no mũnthekeee.
4 Yo nĩnyungunyĩĩsya mũndũ?
Keka vailye ũu, yo ndiema* kwasya wũmĩĩsyo?
5 Nzisyei na mũingeteea mũsengʼete mũno;
Kunĩkai makanywʼa menyu na moko menyu.
6 Yĩla nasũanĩa ũndũ ũsu, nĩnĩthĩnĩkaa,
Na mwĩĩ wakwa wʼonthe ũitetema.
7 Nĩkĩ ala athũku maendeeaa kwĩkala thayũ,
Maikũa, na maithua?*
8 Maendeeaa kwĩthĩwa na syana syoo,
Na maendeeaa kwĩkala thayũ nginya makesa kwona nzyawa syoo.
9 Nyũmba syoo syĩthĩawa syĩ nzũvĩĩku, na maikĩaa,
Na Ngai ndamakũnaa na ndata yake.
10 Nzaũ syoo iiemaa kũsyaĩthya;
Na ngʼombe syoo nga nisyaaa na iivunaa.
11 Ivĩsĩ syoo isembaa kũu nza ta ndĩthya ya malondu,
Na syana syoo itũlĩlangaa kũũ na kũũ.
12 Mainaa na ndambulĩnĩ na mũio wa wathi wĩ na ndii 12*
Na maitana meewʼa wasya wa mũtũlilũ.
14 Ĩndĩ meaa Ngai ũla wa wʼo, ‘Ekana naitũ!
Tũikwenda kũmanya nzĩa syaku.
15 We Mwene Vinya W’onthe nũũ, nĩ kana tũmũthũkũme?
Tũkatetheka ata twamũmanya?’
16 Ĩndĩ nĩnĩsĩ kana mai na ũtonyi wa kũtuma ũndũ o na ũmwe woo ũthi nesa.
Mosũanĩo ma* ala athũku me vaasa nakwa.
17 Wʼo taa wa ala athũku ũvoawʼa keana?
Wʼo mũisyo ũkaa ĩũlũ woo keana?
We Ngai amanangĩaa ũthatunĩ wake keana?
18 Mo nĩmesaa kwĩthĩwa mailye ta ũseki mbee wa kĩseve
Na ta mavuti ala maũlũkawʼa* vyũ nĩ kĩseve kya kĩuutani?
19 Ngai akaiĩa ana ma mũndũ ũsilĩlo wa mũndũ ũsu.
Ĩndĩ Ngai namwĩvanĩsye nĩ kana amanye ũu.
20 Metho make mwene nĩmone wanangĩko wake,
Na nĩethĩwe ũla ũnyusaa ũthilĩkunĩ wa Mwene Vinya Wʼonthe.
21 Nĩkwĩthĩwa ve kĩtumi kyaũ kya kũthĩnĩka nũndũ wa kĩla kĩkakwata nyũmba yake ĩtina wake
Ethĩwa ũtalo wa myei yake ũkatilwa?*
22 Yo ve mũndũ o na ũmwe ũtonya kũmanyĩsya Ngai nĩ kana ethĩwe na ũmanyi,*
Nake nĩwe ũtwʼĩĩaa sila o na ala me ĩũlũ vyũ?
23 Mũndũ ũmwe akusaa e na vinya wake wʼonthe
Yĩla ũteũmaka o na vanini na ũthũmũĩte,
24 Ndambĩ syake syusĩe mauta
Na mavĩndĩ make me na vinya.*
25 Ĩndĩ mũndũ ũngĩ akusaa anyamaĩte mũno,*
Ataaĩsa kũsama syĩndũ nzeo.
26 Onthe makakoma kĩtoonĩ,
Na me elĩ makavwʼĩkwa nĩ iinyũ.
27 Sisyai! Nĩnĩsĩ nesa kĩla mũũsũanĩa
Na mĩvango ĩla mũvangĩte ya kũmbĩka ũthũku.*
28 Nĩkwĩthĩwa mwĩasya, ‘Yĩ va nyũmba ya ũla mũndũ wĩ ndaĩa,
Na yĩ va ĩeema yĩla ũla mũthũku ũnekalaa?’
29 Inywʼĩ mũyaakũlya aendi ma kyalo?
Na mũyĩmanyĩasya nesa maũndũ ala meyoneete,*
30 Kana mũndũ mũthũku nũekawa thayũ mũthenyanĩ wa mũisyo
Na nũvonokawʼa mũthenyanĩ wa ũthilĩku?
31 Nũũ ũkamũtavya ateũkĩa ĩũlũ wa nzĩa syake,
Na nũũ ũkamũĩvanĩsya kwondũ wa kĩla wĩkĩte?
32 Yĩla ũkatwawa mbũanĩ,
Mbũa yake ĩkasungwa.
33 Mavali ma mũthanga wa mwandanĩ* makeethĩwa me mũyo kwake,
Na andũ onthe nĩmamũatĩĩaa*
O ta ala matatalĩka maĩ mbee wake.
34 Kwoou, nĩkĩ mũũnenga ũkiakisyo ũte va ũĩ?
Vai ũndũ ũngĩ wĩ mosũngĩonĩ menyu eka o ũvũngũ!”