Wektu Lara Parah

”Aku kagèt banget pas dikandhani dokter nèk aku lara kanker paru-paru lan usus. Sakwisé tekan omah, aku mikir, ’Iki mémang dudu sing tak karepké. Tapi, aku ora éntuk nyerah.’”—Linda, 71 taun.

”Aku lara gangguan saraf ing bagian wajah sebelah kiwa. Kadhang, rasané lara banget nganti nggawé aku dadi strès. Aku kerep ngrasa nèk ora ana sing perduli karo aku. Aku dadi péngin bunuh diri waé.”—Elise, 49 taun.

Wong sing lagi lara lungguh ing kursi roda lan dikelilingi keluargané

NJENENGAN mesthi sedhih banget wektu ngerti nèk njenengan utawa wong sing disayangi lara parah. Wektu ngadhepi situasi kaya ngono, isa waé njenengan dadi gampang nesu utawa kuwatir. Njenengan ya isa dadi tambah wedi lan kuwatir wektu arep ketemu dokter, ora isa nemokké perawatan sing cocog, ora nduwé dhuwit kanggo berobat, utawa ngrasakké èfèk samping saka perawatan mèdis. Kuwi kabèh isa nggawé njenengan tambah strès.

Apa sing isa mbantu awaké dhéwé ngadhepi situasi kaya ngono? Akèh wong ngrasa dikuwatké merga ndonga lan maca Alkitab. Anggota keluarga lan kanca-kanca ya isa nguwatké awaké dhéwé.

SARAN-SARAN SING ISA MBANTU

Robert, sing umuré 58 taun, ngomong, ”Awaké dhéwé perlu ngendelké Gusti Allah. Dhèwèké bakal mbantu awaké dhéwé ngadhepi penyakité awaké dhéwé. Wektu ndonga, critakna apa sing lagi diadhepi. Njaluka Yéhuwah mbantu awaké dhéwé bèn nduwé pikiran sing positif lan tetep tenang. Terus, awaké dhéwé ya isa njaluk Yéhuwah kanggo nguwatké keluargané awaké dhéwé.”

Robert ya ngomong, ”Dhukungan saka keluarga kuwi pengaruhé gedhé banget. Saben dina, aku ditélpon lan ditakoni kabarku. Kanca-kancaku ya nguwatké aku. Aku ngrasa dihibur. Kuwi mbantu aku bèn ora nyerah.”

Wektu niliki wong sing lagi lara, awaké dhéwé isa ngéling-éling apa sing diomongké Linda. Dhèwèké ngomong, ”Wong sing lara biasané ora péngin dianggep lara lan ora péngin ngomongké soal penyakité. Mula, luwih apik nèk awaké dhéwé ngomongké liyané.”

Dadi, nèk ngendelké Gusti Allah, maca Alkitab, lan didhukung karo keluarga lan kanca-kanca, awaké dhéwé isa tetep nduwé semangat urip meskipun lagi lara parah.

Ayat-Ayat Alkitab sing Isa Direnungké

Ngendelké Gusti Allah.

”Aku ndonga marang Yéhuwah, lan Dhèwèké njawab aku. Dhèwèké nylametké aku saka apa waé sing nggawé aku wedi. Aku iki wong cilik sing njaluk tulung marang Yéhuwah, lan Dhèwèké ngrungokké aku.”—Mazmur 34:4, 6.

Linda, sing wis disebutké mau, ngomong, ”Wektu ndonga, aku ora njaluk bèn isa mari. Tapi, aku njaluk bèn Gusti Allah nguwatké aku lan mbantu aku ngadhepi penyakitku.”

Maca Alkitab.

”Wong-wong sing manggon ing tanah kuwi ora bakal ngomong, ’Aku lara.’”—Yésaya 33:24.

Awaké dhéwé isa dikuwatké nèk ngrenungké janjiné Gusti Allah ing masa depan.

Nampa bantuan saka kanca-kanca lan keluarga.

”Kanca sejati kuwi terus nresnani lan dadi sedulur sing isa diendelké wektu ana kesusahan.”—Wulang Bebasan 17:17.

Elise, sing wis disebutké mau, ngomong, ”Mungkin njenengan ngrasa kesepian lan nganggep nèk Gusti Allah ora perduli. Tapi, njenengan kudu tetep kumpul karo kanca-kancané njenengan. Wènèhana kancané njenengan kesempatan kanggo mbantu.”