BAGIAN 5
’Balia marang Gembalamu lan Sing Njaga Uripmu’
Apa njenengan tau ngalami tantangan kaya sing disebutké ing brosur iki? Nèk tau, njenengan ora dhèwèkan. Akèh umaté Gusti Allah kèt jaman mbiyèn nganti saiki tau ngalami masalah sing padha. Meréka dibantu karo Yéhuwah kanggo ngatasi masalahé. Dadi, Yéhuwah ya mesthi bakal mbantu njenengan.
Yéhuwah bakal mbantu njenengan isa nduwé hubungan sing akrab manèh karo Dhèwèké
YAKINA nèk Yéhuwah bakal mbantu njenengan isa akrab manèh karo Dhèwèké. Yéhuwah bakal mbantu supaya njenengan ora kuwatir, ora lara ati, lan ngrasa ayem merga nduwé hati nurani sing resik. Bar kuwi, njenengan mungkin dadi péngin nglayani Yéhuwah manèh bareng karo para sedulur. Njenengan isa ngrasakké sing dialami beberapa wong Kristen pas jamané para rasul. Rasul Pétrus kandha, ”Mbiyèn kowé kaya wedhus sing kesasar. Saiki, kowé wis bali marang gembalamu lan sing njaga uripmu.”—1 Pétrus 2:25.
Isa nglayani Yéhuwah manèh kuwi pilihan sing paling apik. Kok isa? Soalé njenengan bakal nggawé Yéhuwah seneng. (Wulang Bebasan 27:11) Kaya sing wis njenengan ngerti, Yéhuwah kuwi nduwé perasaan. Dadi, keputusané njenengan ana pengaruhé karo perasaané Yéhuwah. Tapi, Yéhuwah ora tau meksa awaké dhéwé kanggo sayang lan nglayani Dhèwèké. (Pangandharing Torèt 30:19, 20) Ana peneliti Alkitab sing ngomong, ”Ora ana sing isa mbukak atiné njenengan, sakliyané njenengan dhéwé.” Nèk gelem nglayani Yéhuwah saktulusé ati, kuwi bukti nèk awaké dhéwé mbukak ati. Kuwi kaya ngekèki hadiah sing berharga kanggo Yéhuwah lan nggawé Yéhuwah seneng. Yakina, nèk nglayani Yéhuwah isa nggawé bener-bener bahagia.—Kisah 20:35; Wahyu 4:11.
Sakliyané kuwi, nèk ngibadah manèh, njenengan isa éntuk tuntunané Yéhuwah. (Matius 5:3) Kok isa? Akèh wong ing donya iki ngrasa ora puas lan péngin ngerti apa sakjané tujuan urip iki. Meréka ngrasa kaya ngono merga manungsa kuwi butuh tuntunané Gusti Allah. Dadi, nèk awaké dhéwé nglayani Yéhuwah saktulusé ati, awaké dhéwé bakal puas lan bahagia.—Mazmur 63:1-5.
Yakina nèk Yéhuwah péngin banget njenengan nglayani Dhèwèké manèh. Mulané brosur iki digawé khusus kanggo njenengan. Pas nggawé brosur iki, Pengurus Pusat kerep ndonga njaluk tuntunané Yéhuwah. Mungkin njenengan éntuk brosur iki saka pinituwa utawa para sedulur. Wektu maca brosur iki, njenengan mungkin péngin nyedhak manèh karo Yéhuwah. Nah, kuwi bukti nèk Yéhuwah ora lali karo njenengan. Malah, Yéhuwah péngin njenengan akrab manèh karo Dhèwèké.—Yohanes 6:44.
Awaké dhéwé mesthi terhibur merga Yéhuwah ora bakal lali karo umaté sing ngedoh saka Dhèwèké. Kuwi sing dirasakké Donna. Dhèwèké crita, ”Aku mulai ninggalké Yéhuwah. Tapi, aku kerep ngrenungké Mazmur 139:23, 24, sing isiné ’Oh Gusti Allah, deloken isi atiku, lan deloken aku iki wong sing kaya apa. Tulung deloken pikiranku sing marahi aku kuwatir. Tulung deloken apa aku nduwé kepénginan kanggo nindakké sing salah, lan tuntunen aku ing dalan sing langgeng.’ Aku dadi ngerti nèk kuduné ora mèlu-mèlu sing ana ing donya iki. Aku kuduné tetep ana ing organisasiné Yéhuwah. Terus, aku sadhar nèk Yéhuwah ora tau ninggalké aku. Mula, aku kudu ngupaya kanggo nyedhak manèh karo Dhèwèké. Aku seneng banget isa nyedhak manèh karo Yéhuwah.”
”Aku sadhar nèk Yéhuwah ora tau ninggalké aku. Mula, aku kudu ngupaya kanggo nyedhak manèh karo Dhèwèké.”
Kami terus ndonga supaya njenengan isa ngrasakké manèh ”rasa seneng saka Yéhuwah”. (Néhémia 8:10) Njenengan ora bakal menyesal nèk bali nglayani Yéhuwah manèh.