Daoma Riẹ Otọ Oware nọ A ro Dhesẹ Oware Ofa Evaọ Ebaibol Na

Who te se Ebaibol na, whọ rẹ ruẹ eware buobu nọ a ro dhesẹ eware efa. Ahwo buobu a te se ku eme itieye na, a rẹ kake riẹ otọ ẹme nọ a be ta na ha. (Mat. 13:13) Kọ a tẹ be rọ oware jọ ta kpahe ofa, eme o sai fiobọhọ kẹ owhẹ riẹ oware nọ a be ta na? Daoma ru eware nana:

• Riẹ ẹme nọ ọ rrọ otọ na gbe oware nọ a ro dhesẹ iẹe na. Nọ ma tẹ riẹ ẹme nọ ọ rrọ otọ na gbe oware nọ a bi ro dhesẹ oware nọ a be ta kpahe na, u re fiobọhọ kẹ omai riẹ oware nọ a be ta na. Wọhọ oriruo, a jọ Eviavia 3:3 ta nọ Jesu ọ te nyaze wọhọ oji. Ẹnyaze Jesu họ oware nọ a be ta kpahe na. Oji họ oware nọ a ro dhesẹ iẹe.

• Muẹrohọ oghẹrẹ nọ ẹme nọ ọ rrọ otọ na ọ rọ wọhọ oware nọ a ro dhesẹ iẹe na. Nọ omara nọ, ‘Ẹvẹ ẹme nọ a be ta na ọ rọ wọhọ oware nọ a ro dhesẹ iẹe na?’

• Wo otoriẹ ogbagba na. Ẹsejọ, ẹme nọ a be ta na o re tho oware nọ a ro dhesẹ iẹe evaọ idhere buobu. Yọ who gbe roro ẹme na ziezi hi, whọ sai rri ẹme na thọ. Oriruo nọ ma kẹ evaọ obe Eviavia na, orọnikọ u dhesẹ nọ Jesu ọ be nyaze ti tho oware jọ họ. Eme efa nọ a jọ etẹe ta i dhesẹ nọ ọ te nyaze evaọ oke nọ ohwo ọvo ọ riẹ hẹ, wọhọ epanọ ohwo ọ rẹ riẹ oke nọ oji ọ rẹ rọ nyaze he na.