Oware nọ Ame-Ọhọ U Dhesẹ

1. Eme u dhesẹ nọ ẹme ame-ọhọ yọ oware jọ nọ u wuzou gaga evaọ Ebaibol na?

MA RẸ ghọghọ gaga nọ ma tẹ ruẹ ahwo nọ a be họ-ame. Nọ Ileleikristi a kokohọ evaọ Pẹntikọst 33 C.E., a ghọghọ gaga re keme ahwo buobu a họ-ame. Yọ taure a tẹ te họ-ame, a kẹ ovuẹ jọ nọ a jọ ta ẹme kpahe epanọ ame-ọhọ u wuzou te. (Iruẹru 2:38, 40, 41) Nọ Pọl ukọ na ọ jẹ ta ẹme kpahe “iwuhrẹ ọsosuọ kpahe Kristi,” oware jọ nọ ọ fodẹ họ “uwuhrẹ kpahe oghoghẹrẹ ame-ọhọ.” (Hib. 6:1, 2) Dede nọ ẹme ame-ọhọ yọ oware nọ ma riẹ gaga nọ ma wuhrẹ evaọ Ebaibol, u wuzou re ma gbẹ riẹ otọ riẹ ziezi. Fikieme?

2. Fikieme u ro wuzou re ma gbẹ riẹ oware nọ ame-ọhọ u dhesẹ?

² Nọ otọhotọ uwou o tẹ ga, uwou na o rẹ ga. Ere ọvona re, ma tẹ riẹ oware nọ ame-ọhọ u gine dhesẹ, o te lẹliẹ ẹrọwọ mai ga. O tẹ make rọnọ ma be daoma te ahwo nọ a rẹ họ-ame, hayo ma họ-ame kri no, o roja re ma gbẹ riẹ oware nọ ame-ọhọ u dhesẹ. Oyejabọ nọ ma te rọ kẹ iyo enọ nana evaọ uzoẹme nana: Eme ame-ọhọ u dhesẹ? Ẹvẹ ame-ọhọ Oleleikristi ọ rẹ jọ? Kọ fikieme ma rẹ rọ họ-ame evaọ odẹ Ọsẹ na, Ọmọ na, gbe ẹzi ọfuafo na?

OWARE NỌ AME-ỌHỌ U DHESẸ

3. Eme ame-ọhọ u dhesẹ?

³ Ohwo ọ tẹ họ-ame, u dhesẹ nọ o ru eware nọ ma bi ti kele na no. Ọ riẹ uzẹme na kpahe Jihova gbe Jesu Kristi no. O kurẹriẹ no izieraha riẹ no, yọ o mu oware nọ o rẹ were Jihova họ eru no. Ọ riẹ nọ Jesu họ ohwo nọ Ọghẹnẹ o ti ro siwi omai. Ọ lẹ se Jihova no udu ze inọ o ti ru oreva riẹ, yọ ọ te gọ Jihova evaọ ukoko riẹ. Nọ ohwo ọ tẹ lẹ olẹ yena jẹ ya eyaa kẹ Jihova no jẹ họ-ame no, koyehọ o mu Jihova họ ẹgọ no yọ o wo ẹruore uzuazọ ebẹdẹ bẹdẹ no.

4. Nọ a tẹ be họ ohwo ame, a te duwu ohwo na họ ame jẹ kpare iẹe ze, eme u dhesẹ? (Rri uwoho na re.)

⁴ A tẹ be họ ohwo ame, a re duwu ohwo na họ ame le no, a vẹ kpare iẹe no ame na ze.a O wọhọ ẹsenọ ohwo na o whu no a te je ki ei no, a tẹ kpare iẹe ze. (Je rri Ahwo Kọlọsi 2:12.) Nọ a te duwu owhẹ họ ame le no, u dhesẹ nọ whọ nyasiọ oghẹrẹ uzuazọ nọ who je yeri vẹre ba no. Nọ a jẹ kpare owhẹ no ame na ze no, u dhesẹ nọ oreva Ọghẹnẹ ọvo who bi ti ru no umuo oke yena vrẹ.

5. Fikieme ma sae rọ ta nọ eware nọ who bi ru re whọ sae họ-ame e wọhọ okọ nọ Noa o je ku na? (1 Pita 3:18-21)

⁵ Se 1 Pita 3:18-21. Ma sae ta nọ eware nọ ohwo o re ru re ọ sai te kẹ ame-ọhọ na e wọhọ okọ nọ Noa o je ku na. A te mu owhẹ Ebaibol họ ewuhrẹ obọ, nọ who je roro te eware nọ who bi ti ru re whọ sae họ-ame, whọ sai bo nọ, ‘Kinọ eweware nọ me ti ru?’ Whọ sai rri rie ruaro wọhọ epanọ ohwo o re rri rie nọ a tẹ ta kẹe nọ o ku okọ nọ o rrọ ruaro wọhọ okọ Noa na. Kọ o ginẹ roja re who ru eware yena kpobi? Uyo na họ Ee. Kareghẹhọ nọ Ọghẹnẹ ọ vuẹ Noa oghẹrẹ nọ o re ku okọ na. Noa o gbe ku okọ na lele oghẹrẹ nọ Ọghẹnẹ ọ ta ha, ọye avọ uviuwou riẹ a rẹ zọ họ. O wo ẹrọwọ, o te ru oware nọ Ọghẹnẹ ọ ta kẹe, Ọghẹnẹ o te fiobọhọ kẹe nọ ọ sai ro ku okọ na. Noa o “ru eware kpobi nọ Ọghẹnẹ ọ ta kẹe.” Yọ whọ sai ru ere re.—Emu. 6:22.

6. Fikieme Ebaibol ọ rọ ta nọ ame-ọhọ u bi siwi omai?

⁶ Evaọ obe 1 Pita 3:21, Pita ọ jọ etẹe ta nọ ame-ọhọ “u bi siwi owhai.” Orọnikọ ẹme yena o dhesẹ nọ a te duwu ohwo họ ame, yọ o wo esiwo no ye he. Yọ u re si uzioraha no ohwo oma ha. Azẹ Jesu oye o rẹ sai ru nọ a rẹ rọ rehọ izieraha mai vrẹ omai. (1 Jọn 1:7) Rekọ ame-ọhọ u wuzou gaga keme Ọghẹnẹ ọ gwọlọ nọ ma họ-ame. Nọ ma tẹ họ-ame, kiyọ ma be yare Ọghẹnẹ “inọ ọ kẹ [omai] emamọ obruoziẹ-iroro.” Yọ ọ te ginẹ rehọ iẹe kẹ omai. Oyejabọ nọ Ebaibol ọ rọ ta nọ ame-ọhọ u re siwi omai na. U re ru nọ ma sai ro wo uzuazọ ebẹdẹ bẹdẹ.

EPANỌ AME-ỌHỌ OLELEIKRISTI Ọ RẸ JỌ

7. Eme Ebaibol ọ ta kpahe ame-ọhọ?

⁷ Ebaibol ọ vuẹ omai eware buobu kpahe oghẹrẹ nọ ame-ọhọ ọ rẹ jọ họ. Ẹme nọ ọ ta ọvo họ, a re duwu ohwo na họ ame le no. O make rrọ ere na, Ebaibol ọ kẹ omai ehrẹ jọ nọ i re fiobọhọ kẹ ahwo nọ a gwọlọ họ-ame riẹ oghẹrẹ iwu nọ a re kuhọ rọ họ-ame. Yọ ehrẹ Ebaibol i re je fiobọhọ kẹ ahwo nọ a bi rri ahwo nọ a be họ-ame riẹ oghẹrẹ nọ u fo nọ a re ru. (1 Kọr. 14:40; 1 Tim. 2:9) Nẹnẹ na, ekpako ukoko họ ahwo nọ a rẹ mae họ ahwo ame. Ma re rri ahwo nọ a kẹ iruo nana wọhọ ahwo ologbo ho. (1 Kọr. 1:14, 15) Nọ ohwo ọ tẹ be họ-ame, ahwo nọ a rrọ etẹe a gbẹ maki bu hu, u dhesẹ nọ ame-ọhọ na u wiruo ho ho.—Iruẹru 8:36.

8. Enọ vẹ a rẹ nọ ahwo nọ a gwọlọ họ-ame, kọ fikieme? (Iruẹru Ikọ 2:38-42) (Rri uwoho na re.)

⁸ Ebaibol ọ vuẹ omai nọ ma te wo ẹrọwọ no, ma rẹ rọ unu mai ‘whowho iei via kẹ amọfa’ re ma “wo esiwo.” (Rom 10:9, 10) Nọ orọnọ ma be họ-ame re ma wo esiwo na, u wuzou gaga re ahwo nọ a be te họ-ame a rọ unu rai whowho oware nọ a rọwo via evaọ ẹdẹ yena. Oyejabọ nọ a rẹ rọ nọ ahwo nọ a gwọlọ họ-ame enọ ivẹ jọ. Orọ ọsosuọ họ, “Kọ who kurẹriẹ no izieraha ra no, roma mudhe kẹ Jihova no, jẹ rọwo nọ ẹkwoma Jesu Kristi o re ro siwi owhẹ?” Onọ nana o rẹ kareghẹhọ omai eware nọ ohwo o re ru re ọ sai te ohwo nọ ọ rẹ họ-ame. Pita ukọ na ọ fodẹ eware yena jọ evaọ Pẹntikọst 33 C.E. nọ ọ jẹ ta ẹme kẹ ahwo buobu nọ a kokohọ. Onọ avọ ivẹ họ, “Kọ whọ riẹ nọ ame-ọhọ ra u dhesẹ nọ whẹ yọ omọvo Isẹri Jihova nọ e rrọ ukoko riẹ?” Onọ nana o rẹ lẹliẹ omai kareghẹhọ nọ re ma sai dhesẹ nọ ma ginẹ roma mudhe kẹ Jihova no, ma re ru oware nọ ukoko Jihova o ta. Yọ ma re je kuomagbe inievo mai gọ Ọghẹnẹ wọhọ epanọ Ileleikristi ọsosuọ a jẹ hai ru. (Se Iruẹru Ikọ 2:38-42.) Ahwo nọ a gwọlọ họ-ame a te yo nọ Ee no udu ze rọkẹ enọ ivẹ nana, kiyọ a te ahwo nọ a rẹ họ-ame.

9. Eme ohwo kpobi o re ru re ọ sai ru eva were Ọghẹnẹ?

⁹ Ẹsejọhọ taure a te ti mu owhẹ Ebaibol họ ewuhrẹ, whọ jẹ kẹnoma kẹ oware uyoma, whọ jẹ raha uzi ulogbo ọvo ho. O sae jọ nọ ọsẹgboni ra a rrọ ukoko na, yọ a wuhrẹ owhẹ no emaha ze. O tẹ lẹliẹ owhẹ you Jihova. Kọ oyena u dhesẹ nọ who re kurẹriẹ jẹ họ-ame re eva ra e tẹ te were Ọghẹnẹ hẹ? Ijo, o rrọ ere he. Oghẹrẹ uzuazọ kpobi nọ ma yeri no kẹhẹ, ma rẹ kareghẹhọ nọ ma reuku uzioraha. U te ru nọ ma gbẹ kẹle Ọghẹnẹ hẹ. (Ol. 51:5) Rekọ nọ a wuhrẹ omai kpahe Jihova no, ma tẹ ta nọ oware nọ o rẹ were iẹe ọvo ma ti ru, orọnọ orọ udu mai hi. Nọ ma vuhu onana mu no na, ma re kurẹriẹ, ma ve mu oghẹrẹ uzuazọ nọ o rẹ were Jihova Ọsẹ mai họ eyeri. Ma te mu ere họ eru no, ma sae họ-ame.—Iruẹru 3:19.

10. Otẹrọnọ whọ jọ egagọ efa họ-ame no vẹre, eme who re ru?

¹⁰ Whọ tẹ make jọ egagọ efa họ-ame no vẹre, who te bi kurẹriẹ ziọ egagọ Isẹri Jihova, whọ rẹ wariẹ họ-ame. Fikieme? Keme oke yena whọ re ginẹ riẹ uzẹme na kpahe Jihova Ọghẹnẹ avọ Jesu Kristi ziezi hi. O tẹ make rọnọ oke yena whọ lẹ se Ọghẹnẹ jẹ ya eyaa kẹe inọ who re ru oreva riẹ, whọ re ginẹ riẹ oreva Jihova no oke yena ha. Pọl ukọ na ọ ruẹ ezae jọ evaọ obọ Ẹfisọs nọ a họ-ame no vẹre. Rekọ okenọ a rọ họ-ame na yọ a re riẹ eware nọ Ileleikristi a bi wuhrẹ hẹ. Fikiere Pọl ọ tẹ vuẹ ae nọ a rẹ wariẹ họ-ame.b (Iruẹru 19:1-5) Nẹnẹ na re, otẹrọnọ ohwo ọ họ-ame, rekọ oke yena ọ re riẹ oware nọ Ọghẹnẹ ọ ginẹ gwọlọ họ, ame-ọhọ riẹ na u wiruo ho.

“EVAỌ ODẸ ỌSẸ NA GBE ỌMỌ NA GBE ẸZI ỌFUAFO NA”

11. Eme u dhesẹ re a họ-ame “evaọ odẹ Ọsẹ na gbe Ọmọ na gbe ẹzi ọfuafo na”? (Matiu 28:18-20)

¹¹ Jesu ọ ta nọ ahwo nọ a gwọlọ jọ ilele riẹ, a rẹ họ ae ame “evaọ odẹ Ọsẹ na gbe Ọmọ na gbe ẹzi ọfuafo na.” (Se Matiu 28:18-20.) Eme họ otọ ẹme na? Ẹsibuobu a tẹ jọ Ebaibol ta ẹme te “odẹ,” yọ a be ta ẹme kpahe oghẹrẹ nọ ahwo a riẹ ohwo nọ o wo odẹ na. Rekọ ẹsejọ a rẹ jẹ rẹhọ iẹe ta ẹme kpahe ọkwa hayo udu nọ ohwo na o wo. Fikiere a tẹ ta nọ ma bi ru oware “evaọ odẹ” ohwo hayo oware jọ, u dhesẹ nọ ma riẹ udu nọ ohwo nọ o wo odẹ na o wo, hayo epanọ oware na u wuzou te. (Je rri Matiu 10:41.) Ma te ta ẹme te epanọ whọ sai ro dhesẹ nọ whọ riẹ udu nọ Ọsẹ na gbe Ọmọ na a wo, gbe oware nọ Ọghẹnẹ ọ be rọ ẹzi ọfuafo riẹ ru.

12. Eme u dhesẹ re a họ-ame evaọ odẹ Ọsẹ na? (Eviavia 4:11) (Rri iwoho na re.)

¹² Oware nọ u dhesẹ re a họ-ame evaọ odẹ Ọsẹ na. Ma rẹ riẹ nọ Jihova họ Ọsẹ obọ odhiwu mai. Ọye ọ ma omai, yọ ọye ọ ma eware efa kpobi, o te je wo ogaga kpobi. (Se Eviavia 4:11.) Ma riẹ nọ Jihova họ ọnọ o re yo elẹ na. Ma rẹ sai se odẹ riẹ nọ ma tẹ be lẹ sei gbe okenọ ma te bi wuhrẹ amọfa kpahe iẹe, rekọ ma re se odẹ na avọ adhẹẹ. (Ol. 65:2) A tẹ ta nọ ohwo ọ be họ-ame evaọ odẹ Ọsẹ na, orọnọ eware yena ọvo ọ rẹ riẹ hẹ. Ahwo nọ Pita ọ jẹ ta ẹme kẹ evaọ Pẹntikọst 33 C.E. a riẹ Jihova no vẹre. Rekọ u fo nọ a rẹ riẹ nọ Jihova ọ te kẹ omai uzuazọ ebẹdẹ bẹdẹ fiki Jesu nọ o vi ze na.—Rom 5:8.

13. Eme u dhesẹ re ma họ-ame evaọ odẹ Ọmọ na? (Rri iwoho na re.)

¹³ Oware nọ u dhesẹ re a họ-ame evaọ odẹ Ọmọ na. Ma rẹ riẹ nọ Jesu họ Ọmọvo Ọghẹnẹ. Jesu họ “edhere na.” Onana u dhesẹ nọ o gbẹ rrọ ọye he, ma sae kẹle Ọghẹnẹ hẹ. (Jọn 14:6) Ọye họ ohwo nọ o whu kẹ omai re ma sai wo uzuazọ ebẹdẹ bẹdẹ. Eware nana nọ ma riẹ na e rẹ so ẹe ze nọ ma rẹ rọ rehọ aro kele Jesu ẹsikpobi orọnikọ evaọ ẹdẹ nọ ma rọ họ-ame na ọvo ho. (1 Jọn 2:6) Ma rẹ rọ ajọwha ta usi uwoma wọhọ epanọ Jesu o ru na. Ma rẹ kuvẹ re oware ovo o whaha omai hi. (Luk 4:43) A tẹ maki bi kpokpo omai fikinọ ma be gọ Jihova, ma rẹ gbẹ gọ Jihova ghele. (2 Tim. 3:12) Ma riẹ nọ Jesu họ ohwo nọ “o wuzou ukoko na,” yọ ma rẹ kẹe adhẹẹ. Ma re ru oware nọ ahwo nọ o ro mu inọ a rẹrote omai evaọ ukoko na a ta.—Ẹf. 4:8, 11, 12; 5:23.

14. (a) Eme u dhesẹ re ma họ-ame evaọ odẹ ẹzi ọfuafo na? (Rri iwoho na re.) (b) Oghẹrẹ ame-ọhọ ọfa vẹ enọ a rọ ẹzi wholo na a rẹ họ? (Rri ẹkpẹti na “Oghoghẹrẹ Ame-Ọhọ nọ Enọ A rọ Ẹzi Wholo na A rẹ Họ.”)

¹⁴ Oware nọ u dhesẹ re a họ-ame evaọ odẹ ẹzi ọfuafo na. Ma rẹ riẹ oware nọ ẹzi ọfuafo na ọ ginẹ rrọ. Ẹzi ọfuafo na yọ ohwo ho. Orọnikọ yọ Ọghẹnẹ jọ nọ ọ rrọ usu eghẹnẹ esa nọ e rrọ ọvo ho. Rekọ ẹzi ọfuafo na yọ ogaga nọ Ọghẹnẹ o bi ro ru iruo. Oye Ọghẹnẹ ọ rọ kpọ eruẹaro gbe ahwo nọ a kere Ebaibol na. Nọ ma riẹ ere na, ma re se Ebaibol na kẹdẹ kẹdẹ, ma ve je ru oware nọ ma se. (2 Pita 1:20, 21) Ma rẹ jẹ daoma re ma siọ izi Ọghẹnẹ ba ẹraha. O gbẹ rrọ ere he, ẹzi Ọghẹnẹ o ti no omai oma no. Ẹzi na ọ sai tube no ukoko nọ ma rrọ no fiki mai.—Ẹf. 4:30.

15. Eme ma rẹ gbẹ daoma riẹ je ru?

¹⁵ Otẹrọnọ whọ họ-ame no, gbẹ daoma riẹ “uwuhrẹ kpahe oghoghẹrẹ ame-ọhọ”c ziezi. Who re je ru oware nọ whọ ya eyaa riẹ kẹ Jihova okenọ whọ roma mudhe kẹe na gba. Kọ otẹrọnọ whọ re họ-ame he, eme ọ be whaha owhẹ? Uzoẹme notha o te vuẹ omai eware nọ whọ rẹ sai ru re who te ohwo nọ ọ rẹ họ-ame.