Rehọ Edhere Owowou Ta Uzẹme Na

1. Re ma jọ usu ahwo Jihova, eme ma re ru?

NỌ MA te kpohọ oria jọ, nọ ma jẹ ruẹ ohwo nọ ma gbẹ be gọ Jihova ma rẹ nọ enọ jọ. Enọ wọhọ: “Ẹvẹ whọ rọ riẹ uzẹme na?” Ahwo jọ a rẹ kẹ uyo inọ “ukoko na a jo yẹ ai.” Efa a rẹ ta nọ “u ri kri nọ a rọ riẹ uzẹme na ha.” Enana kpobi i dhesẹ nọ ma rehọ eware nọ ma jọ Ebaibol wuhrẹ na nọ uzẹme. Yọ ma be daoma ru oware nọ ma wuhrẹ. Fikieme ma bi ro ru oware nọ ma wuhrẹ na? Keme ma gbe ru oware nọ Ebaibol ọ ta ha, u dhesẹ nọ uzẹme na o were omai hi, yọ ma gwọlọ jọ usu ahwo Jihova ha. Oware ofa jọ nọ u re dhesẹ nọ uzẹme na o were omai họ, ma rẹ ta uzẹme je ru oware nọ Jihova o wuhrẹ omai.—Ol. 15:1-3.

2. (a) Eme ahwo a riẹ kpahe Jesu? (b) Eme uzẹme nọ Jesu o je wuhrẹ ahwo o wha ze?

² Uzẹme na ọvo Jesu ọ jẹ hae ta. Makọ ewegrẹ riẹ dede a riẹ nọ Jesu ọ rẹ siọ uzẹme na ba ẹta ha o tẹ make rọnọ o were rai hi. (Mat. 22:16) Jesu ọ vuẹ ilele riẹ nọ eva e te were ahwo ho fikinọ o bi wuhrẹ ahwo uzẹme na. Ọ ta nọ: “Mẹ nyaze ti fi ohẹriẹ họ udevie ọmọzae avọ ọsẹ riẹ, udevie ọmọtẹ avọ oni riẹ, gbe udevie aye uwou-orọo avọ oniọrọo riẹ.” (Mat. 10:35) Orọnikọ ẹme yena o dhesẹ nọ Jesu ọ gwọlọ wuhrẹ ae eware nọ e rẹ lẹliẹ eva dha ae he. Rekọ ọ riẹ nọ eware nọ tei te ilele riẹ a bi wuhrẹ ahwo na e te siọ ahwo jọ eva ba ẹdha ha. (Mat. 23:37) Ọ riẹ nọ uzẹme na nọ ọ be ta na o te hẹriẹ ahwo kpohọ abava, enọ e gwọlọ riẹ uzẹme na gbe enọ e gwọlọ riẹe he.—2 Tẹs. 2:9-11.

3. Eme ma ti wuhrẹ evaọ uzoẹme nana?

³ Wọhọ epanọ Jesu ọ jẹ ta uzẹme na, ere ma rẹ daoma ta uzẹme ẹsikpobi o tẹ make rọnọ o rẹ were ahwo jọ họ. Nọ ma bi wuhrẹ ahwo ẹme Ọghẹnẹ na, ma rẹ vuẹ ae oware nọ Ebaibol ọ ta, dede nọ o te dha ejọ eva. Kọ fikinọ ma rẹ wharo ta uzẹme na u dhesẹ nọ ma re duwu eme họ kẹ ahwo? Hayo kọ u dhesẹ nọ ma re gbe roro kpahe oke nọ u fo nọ ma re ro wuhrẹ ohwo oware jọ evaọ Ebaibol ho? Orọnọ ere he! Ma te jọ uzoẹme nana kẹ iyo enọ jọ nọ i wuzou gaga. Enọ na họ: Diẹse ma sae jọ ruẹ uzẹme na? Fikieme u ro fo nọ ma ta uzẹme na? Oghẹrẹ vẹ u fo nọ ma re ro wuhrẹ ahwo uzẹme na? Kọ oke vẹ u fo nọ ma re ro dhesẹ uzẹme na kẹ ohwo? Ma tẹ riẹ iyo enọ nana, ma te sae rọ edhere owowou ta uzẹme na kẹ ahwo ziezi. Koyehọ ma ti duwu eme họ kẹ ahwo ho, yọ ma ti wuhrẹ ahwo uzẹme na evaọ oke nọ o mai fo.

DIẸSE MA SAE JỌ RUẸ UZẸME NA?

4. Fikieme ma sae rọ ta nọ obọ Jihova uzẹme u re no ze?

⁴ Obọ Jihova uzẹme u re no ze. O re gu ọrue vievie he. Jihova ọ vuẹ omai oware nọ u woma gbe onọ u woma ha no. Yọ epanọ ọ vuẹ omai na, ere o ginẹ rrọ. (Ol. 19:9; 119:142, 151) Nọ ọ tẹ ta nọ oware jọ o te via evaọ obaro, o rẹ via. (Aiz. 55:10, 11) O re ru eyaa riẹ kpobi gba. (Ik. 23:19) Ọghẹnẹ ọ rẹ sae ta ọrue vievie he. (Hib. 6:18) Oyejabọ nọ a ro se Jihova “Ọghẹnẹ nọ ọ rẹ ta uzẹme” na.—Ol. 31:5.

5. Fikieme o gbẹ rọ bẹ hẹ re ma riẹ “Ọghẹnẹ nọ ọ rẹ ta uzẹme” na? (Iruẹru Ikọ 17:27)

⁵ Ahwo jọ a rẹ ta nọ Ọghẹnẹ ọ rrọ họ. Efa e ta nọ ohwo ọ sae riẹ oghẹrẹ ohwo nọ ọ rrọ họ. Rekọ o bẹ hẹ re ma riẹ “Ọghẹnẹ nọ ọ rẹ ta uzẹme” na. Oria kpobi nọ ma rrọ, ma rẹ ruẹ eware nọ i dhesẹ nọ Ọghẹnẹ ọ rrọ. (Rom 1:20) Nọ Pọl o je lele ahwo Griki nọ a riẹ obe gaga ta ẹme, ọ vuẹ rai nọ Ọghẹnẹ ọ gwọlọ nọ a “ruẹ e riẹ,” yọ “o thabọ no omai omomọvo ho.” (Se Iruẹru Ikọ 17:27.) Jihova o bi tube si ahwo nọ a wo omaurokpotọ nọ a gwọlọ riẹe kẹle oma riẹ.—Jọn 6:44.

6. Eware jọ vẹ Ebaibol ọ ta nọ whọ riẹ nọ uzẹme, kọ eme i ro mu owhẹ ẹro?

⁶ Re ma riẹ Ọghẹnẹ o gwọlọ nọ ma re wuhrẹ Ebaibol na. Ẹzi Ọghẹnẹ a ro kere Ebaibol na. (2 Pita 1:20, 21) Fikiere oware kpobi nọ o rrọ Ebaibol na uzẹme. Ma sai fievahọ iẹe. Ebaibol ọ ta nọ Jihova ọye ọ ma idhiwu gbe akpọ na te eware nọ e rrọ uzuazọ kpobi. Yọ ma riẹ nọ ere o rrọ. (Emu. 1:1, 26) Ebaibol o tẹ jẹ vuẹ omai oware nọ o wha riẹ ze nọ ma jẹ be ruẹ uye nẹnẹ je whu. O tẹ jẹ vuẹ omai oware nọ ma rọ rrọ erahaizi. Yọ ma riẹ nọ uzẹme na ọye. (Rom 5:12; 6:23) Ebaibol na ọ vuẹ omai re nọ okpẹtu nọ Ẹdhọ nọ ọ rrọ “ọsẹ ọrue” na ọ so fihotọ na, Jihova ọ te rọ Ọmọ riẹ si ei notọ. Ma rọwo nọ ere o te via. (Jọn 8:44; Rom 16:20) Yọ ma rọwo ẹme nọ Ebaibol ọ ta inọ Jesu o ti kpe ahwo omuomu na no, jẹ kpare ahwo nọ a whu no ze, o ti ru akpọ na fihọ aparadase, je ru nọ ma te rọ jọ gbagba. (Jọn 11:25, 26; 1 Jọn 3:8) Oware riẹ o rro kẹhẹ nọ Jihova o bi ro wuhrẹ omai uzẹme na. Orọnọ ewuhrẹ ọvo ho, o vi omai re ma nyai wuhrẹ amọfa uzẹme na.—Mat. 28:19, 20.

FIKIEME U RO FO NỌ MA TA UZẸME NA?

7-8. Kọ Jihova o re rri oware nọ ma be rọ fiki riẹ ta uzẹme na? Kẹ oriruo jọ. (Mak 3:11, 12) (Rri iwoho na re.)

⁷ Ẹsejọ ma ta nọ re ma sae jọ usu ahwo Jihova, ma rẹ ta uzẹme na ẹsikpobi. Rekọ orọnọ thakpinọ ma ta uzẹme ọvo ho. Ma rẹ riẹ oware nọ ma be rọ fiki riẹ tae. Keme Jihova o re rri oware nọ ma be rọ fiki riẹ ta uzẹme na. Joma ta kpahe oware nọ o via okenọ Jesu ọ jọ otọakpọ. (Se Mak 3:11, 12.) Ẹdẹ jọ nọ Jesu ọ jẹ ta usi uwoma evaọ akotọ abade Galili, ahwo buobu a tẹ yẹ bru ei ze. Ahwo jọ nọ izi igbegbe e jọ oma nọ e jọ etẹe a te kie fihọ aro riẹ bi bo nọ: “Whẹ họ Ọmọ Ọghẹnẹ.” Fikieme izi igbegbe na a jẹ rọ ta uzẹme kẹ ahwo inọ Jesu yọ Ọmọ Ọghẹnẹ? O sae jọ nọ a ru ere re ahwo a rri rai nọ a rẹ ta uzẹme, re ahwo a gaviezọ kẹ ae viukpenọ a gaviezọ kẹ Jihova. Uzẹme na a ginẹ ta na, rekọ oware nọ a rọ fiki riẹ ta uzẹme na u woma ha. Jesu ọ riẹ nọ ẹme nọ a ta na o no rai eva ze he, yọ o rri rai nọ a ta emamọ ẹme jọ họ. Fikiere ọ rọwo nọ a vuẹ ahwo oghẹrẹ ohwo nọ ọ rrọ họ.

⁸ Kọ eme ma wuhrẹ no oware nọ o via na ze? Ma wuhrẹ nọ ma tẹ make be ta uzẹme, Jihova o re rri oware nọ o be wọ omai ta uzẹme na. Fikiere ma te bi wuhrẹ ahwo, jọ o thakpe jọ nọ ma bi wuhrẹ ae re a kẹ Jihova orro nọ u te rie, orọnikọ re a jiri omai hi. Otẹrọnọ a bi jiri omai, ma re ru re a riẹ nọ Jihova a rẹ kẹ orro na orọnọ omai hi.—Mat. 5:16; je rri Iruẹru Ikọ 14:12-15.

9. Eme u fo nọ ma re ru hu, kọ fikieme o rọ thọ?

⁹ Joma kẹ oriruo jọ nọ u dhesẹ nọ o thọ re ma ru re ahwo a kẹ omai adhẹẹ. Ma rehọ iẹe nọ oniọvo jọ nọ o bi ru oghẹrẹ iruo jọ evaọ ukoko na ọ vuẹ owhẹ ẹme jọ nọ u fo nọ whọ rẹ ta kẹ omọfa ha. Rekọ whọ tẹ vuẹ amọfa ẹme na. Ahwo nọ whọ vuẹ na a tẹ riẹ nọ ẹme nọ whọ vuẹ rai na uzẹme, ẹsejọhọ a ti rri owhẹ nọ whọ riẹ eware buobu kpahe ukoko na nọ amọfa a riẹ hẹ. O vẹ te whae ze nọ a te rọ kẹ owhẹ adhẹẹ gaga. Kọ oware yena nọ who ru na u ti ru nọ Ọghẹnẹ o ti ro rri owhẹ nọ whọ riẹ gaga? Ijo. (Itẹ 11:13) Keme ma vuẹ amọfa oware nọ u fo nọ ma rẹ vuẹ ae he, yọ oware nọ o wọ omai vuẹ ae na họ re a rri omai fihọ ohwo nọ ọ riẹ gaga.

OGHẸRẸ VẸ U FO NỌ MA RE RO WUHRẸ AHWO UZẸME NA?

10. Nọ a ta nọ eme mai “e hae jọ wowou” na, eme họ otọ ẹme na? (Ahwo Kọlọsi 4:6)

¹⁰ Se Ahwo Kọlọsi 4:6. Pọl ukọ na o kere se inievo obọ Kọlọsi inọ eme rai “e hae jọ wowou ẹsikpobi.” Kọ eme họ otọ ẹme na? Ẹme nọ a fa ẹme yena no ze u dhesẹ nọ ẹme nọ ma be ta kẹ ohwo ọ rẹ jọ ẹme nọ o ti fiobọhọ kẹe ọvo ho. Rekọ ẹme na ọ rẹ jọ wolẹ, ọ vẹ jẹ were ohwo na oma.

11-12. Ma te bi wuhrẹ ahwo oware nọ Ebaibol ọ ta, fikieme ma jẹ rọ areghẹ ru ei? Kẹ oriruo. (Rri iwoho na re.)

¹¹ Nọ ma tẹ be ta usi uwoma kẹ ohwo, ma rẹ daoma re ẹme mai ọ jọ wowou wọhọ epanọ Pọl ọ ta na. Ebaibol ọ ta nọ ẹme Ọghẹnẹ ọ wọhọ ọgbọdọ ọdada nọ o rẹ fere oghẹrẹ nọ ohwo ọ ginẹ rrọ evaọ okafe gbe obeva via. Ẹme yena o dhesẹ nọ ẹme Ọghẹnẹ ọ rẹ sai ru nọ a rẹ rọ riẹ oghẹrẹ nọ iroro mai e rrọ gbe oware nọ o be lẹliẹ omai ru oware. (Hib. 4:12) Rekọ ma gbẹ rọ areghẹ wuhrẹ ahwo oware nọ Ebaibol ọ ta ha, ma vẹ te ta ẹme nọ ọ te kẹ ahwo uye hayo wha ikẹ-isio egaga ze. Ẹvẹ oware utioye na o sae rọ via?

¹² Dae rehọ iẹe nọ whọ rrọ usi uwoma, whọ tẹ nyaku ọzae jọ nọ ọ rẹ jọ aro emema lẹ. Yọ tei te ahwo uwou riẹ a re ru Kresimesi avọ Ista. Ọ riẹ nọ eware nọ o bi ru na e thọ họ. Kọ whọ te nwani se Ebaibol kẹe inọ emema gheghe nọ i wiruo ọvo ho whọ be lẹ se? Hayo kọ whọ te nwane vuẹe nọ Kresimesi avọ Ista yọ ehaa egedhọ? (Aiz. 44:14-20; 2 Kọr. 6:14-17) Whọ tẹ vuẹ ohwo na ere ẹdẹ ọsosuọ nọ whọ rọ nyaku ei, kiyọ whọ be rọ areghẹ wuhrẹ ohwo na Ebaibol ho, dede nọ uzẹme na whọ be ta kẹe na.

13. Ẹvẹ ẹme mai ọ sae rọ jọ wọhọ ẹsenọ a fi uwhei họ iẹe?

¹³ Pọl ọ ta nọ eme mai e hae mere wọhọ uwhei. Nọ ọ ta nọ eme mai e mere wọhọ uwhei na, orọnikọ ma tẹ ruẹ uzẹme oware ma rẹ tae hi hi, hayo ma vẹ rọ oghẹrẹ jọ ruru ẹme na. Ẹme nọ ọ be ta na họ, ma rẹ ta uzẹme na evaọ oghẹrẹ nọ o rẹ rọ were ohwo nọ ma be tae kẹ na ezọ. (Job 12:11) Re ma ta eme nọ e rẹ were ahwo ezọ o rẹ nwane lọhọ họ. Ma te bi there emu, ẹsejọ ma re roro nọ emu na ọ tẹ were evaọ unu mai no, koyehọ o te were amọfa. Nwanọ ere re, ẹsejọ ma re roro nọ oghẹrẹ nọ ma rẹ rọ ta ẹme o te were ahwo kpobi. Keme ma ruẹ oware ovo nọ o jariẹ thọ họ. Evaọ eria jọ, a tẹ be ta ẹme, a rẹ ta uzẹme na epanọ o nwane rrọ dẹẹ, a re ru onaa ọvo fihọ iẹe he, o tẹ make rọnọ ohwo nọ a be ta ẹme na kẹ na o vi rai. Evaọ eria efa, whọ tẹ ta ẹme kẹ ohwo ere, ohwo na ọ sai roro nọ whọ be bọwo eme họ. Pọl ọ ta nọ ma daoma re ma riẹ epanọ ma rẹ rọ kẹ “ohwo kpobi uyo.” Ẹme na o dhesẹ nọ ma rẹ daoma gaga re oghẹrẹ nọ ma be rọ ta ẹme ọ were ahwo nọ ma be ta ẹme kẹ. Orọnikọ oghẹrẹ nọ ma rẹ ta ẹme evaọ obomai ọvo ma re roro ho, rekọ oghẹrẹ nọ ohwo nọ ma be ta ẹme na kẹ na o ti rri ẹme na.

OKENỌ U FO NỌ MA RẸ RỌ TA UZẸME NA

14. Nọ Jesu o je wuhrẹ ilele riẹ, kọ eware na kpobi ọ kwa vọ ae uzou? Ru ei vẹ.

¹⁴ Oke kpobi nọ Jesu ọ tẹ be ta ẹme kẹ ilele riẹ, ọ jẹ hae rọ edhere owowou ta ẹme na. Yọ o wuhrẹ ilele riẹ eware buobu. (Mak 6:34) Rekọ orọnọ eware na kpobi ọ kwa vọ ae uzou ho. Ọ riẹ nọ eware efa e gbẹ vọ nọ a te riẹ. Ọ riẹ nọ ilele riẹ a te sae riẹ eware na kpobi ẹsiẹvo ho. Yọ ọ riẹ re nọ u ri te okenọ o re ro wuhrẹ ae eware jọ họ. Jesu dede ọ ta nọ a te sai wo otoriẹ eware na kpobi oke yena ha. (Jọn 16:12) Kọ eme ma wuhrẹ no oware nọ Jesu o ru na ze?

15. Ma te bi wuhrẹ ohwo Ebaibol, ma rẹ nwane kwa eware na kpobi fihọ iẹe uzou ẹsiẹvo? Ru ei vẹ. (Itẹ 25:11) (Rri uwoho na re.)

¹⁵ Ẹvẹ ma sae rọ rehọ aro kele Jesu? Orọnikọ epanọ ma riẹ eware bu te, ma rẹ rọ nwane kwa ae kpobi vọ ahwo uzou ẹsiẹvo ho. Ma rẹ hai roro kẹ amọfa. Joma zihe kpohọ oriruo ọzae oke ẹsiẹ na nọ tei te uviuwou riẹ a bi ru Kresimesi avọ Ista na. Ma riẹ nọ ehaa yena i woma ha keme egedhọ i mu rai họ, yọ Ebaibol ọ vuẹ omai hi inọ ma ru ehaa yena. Rekọ dae rehọ iẹe nọ who mu ọzae na Ebaibol họ ewuhrẹ oka ọvo hayo eka ivẹ re a te ti ru Kresimesi. Kọ whọ tẹ nwane jọ okioke yena vuẹe nọ ehaa yena yọ ehaa egedhọ je bi se Ebaibol kẹe nọ u fo re Oleleikristi o ru ehaa itieye na ha, u woma? Kọ ma te gwọlọ nọ o du ru Kresimesi ukpe yena ha? Who te wuhrẹ ahwo jọ oware jọ evaọ Ebaibol, a rẹ nwani mu ei họ eru okioke yena. Rekọ orọnọ ahwo kpobi a rrọ ere he. Ma te bi wuhrẹ ohwo, ma re muẹrohọ sọ u te epanọ ma sae rọ vuẹe oghẹrẹ oware jọ no. Nọ ma jẹ vuẹe, ẹme na o ve tei udu, ọ vẹ sai ru oware nọ ma bi wuhrẹ iẹe na.—Se Itẹ 25:11.

16. Ẹvẹ ma sai ro fiobọhọ kẹ ahwo nọ ma bi wuhrẹ re a gbẹ “nya evaọ uzẹme na”?

¹⁶ A rẹ ruẹ oware nọ o rẹ kẹ ohwo evawere te ewuhrẹ nọ ma re wuhrẹ ahwo re a riẹ Jihova ha. Ma sai fiobọhọ kẹ ahwo re a “nya evaọ uzẹme na.” (3 Jọn 3, 4) Edhere jọ nọ ma sai ro ru ei họ, ma re dikihẹ ga ziezi evaọ uzẹme na. Nọ a jẹ ruẹ oghẹrẹ nọ ma be rọ nya evaọ uzẹme na, a vẹ rọ aro kele omai. Fikiere daoma re oghẹrẹ nọ who bi yeri uzuazọ ra u dhesẹ nọ eyaa Ọghẹnẹ nọ e rrọ Ebaibol na i mu owhẹ ẹro. Yọ whọ tẹ be ta uzẹme, jọ oware nọ whọ be rọ fiki riẹ ta uzẹme na o jọ emamọ oware. Nọ who bi wuhrẹ ahwo na, daoma re eme ra e jọ wolẹ, who ve je roro kpahe oke nọ u fo nọ who re ro wuhrẹ ae oghẹrẹ oware jọ. Yọ nọ a te bi jiri owhẹ, ru re a riẹ nọ Jihova a re jiri orọnọ owhẹ hẹ. Who te ru ere, u dhesẹ nọ Jihova Ọghẹnẹ uzẹme na whọ be gọ.