Hai Roro Oware nọ Who bi Se na Wọhọ Ẹsenọ Whọ Rrọ Etẹe

A kere eware buobu nọ e via fihọ Ebaibol nọ ma re wuhrẹ no ze nọ ma te sei. Iku nọ e rrọ Ebaibol na i re vẹ omai ẹro otẹrọnọ ma tẹ be jọ uzou mai roro kpahe oware nọ ma bi se wọhọ ẹsenọ ma be ruẹ oware nọ o be via na. Yọ ẹsiẹe ma te mai wuhrẹ oware jọ noi ze. Joma ta ẹme te eware nọ ma re ru nọ u ti fiobọhọ kẹ omai roro oware nọ ma bi se na wọhọ ẹsenọ ma rrọ etẹe dẹẹ.

• Sei do via. Nọ who te bi se oria Ebaibol nọ who bi se do via, u ti fiobọhọ kẹ owhẹ ruẹ oware nọ o be via na dẹẹ. Kinọ o jẹ rọnọ whẹ avọ uviuwou ra wha bi sei? Re o sae jọ wọhọ ẹsenọ wha be ruẹ oware nọ o be via na, wha ghale ahwo nọ e ta ẹme evaọ oria nọ wha bi se na fihọ omoma rai re wha rọ ere sei.

• Roro oware nọ o be via na. Daoma riẹ oware nọ ahwo nọ a ta ẹme kpahe na a je roro. Re whọ sae riẹe, nọ omara nọ: ‘Fikieme ohwo nana ọ rọ ta ẹme nana hayo ru oware nọ o ru na? Kọ o hae jọ nọ mẹ oware na o via kẹ na, eme mẹ hai ti roro?’

• Drọ iwoho. Drọ iwoho eware jọ nọ who se na fihọ obe re nọ who te rri rie, whọ vẹ kareghẹhọ iku na. Yọ u ti ru nọ o te rọ wọhọ ẹsenọ whọ be ruẹ oware nọ o be via na. Nọ o tẹ make rọnọ whọ riẹ epanọ a rẹ drọ họ, drọ epa kpobi ghele. U ti fiobọhọ kẹ owhẹ.