Kọ Whọ Kareghẹhọ?

Kọ whọ romatotọ se Uwou-Eroro nọ a siobọno enukpe nana? Dai rri sọ whọ sae kẹ iyo enọ nọ e rrọ obotọ na:

Fikieme ma rẹ rọ kẹ Jihova oruaro?

Ma be kẹ Jihova oruaro fikinọ ma be kẹe adhẹẹ gaga, yọ ma you rie gaga re. Ma be kẹ Jihova oruaro re keme ma gwọlọ nọ ahwo a riẹe.—w25.01, ẹwẹ. 3.

Otẹrọnọ ohwo jọ o ru omai thọ, eme ma re ru re ma sae rọvrẹ riẹ?

Ma rẹ faki ru wọhọ ẹsenọ oware ọvo o via ha ha. Ma re si oware nọ a ru omai thọ na no eva. Nọ ma te ru ere, u re ru nọ oware na o gbẹ rọ da omai rifihọ họ. —w25.02, ẹwẹ. 15-16.

Emamọ uruemu vẹ olele nọ a re se Mak na o wo nọ inievo-emezae nọ e gbẹ maha a rẹ rọ aro kele?

O sae jọ nọ o kẹ Mak uye okenọ Pọl ọ ta nọ o lele iei kpohọ erẹ usi uwoma ha. Rekọ avọ ere ghele na, Mak ọ rọwo nọ o re kpohọ usi uwoma evaọ oria ofa. Yọ o gbe je kuomagbe Pọl gbe inievo efa nọ e jẹ daoma ziezi evaọ ukoko na.—w25.04, ẹwẹ. 27.

Eme họ otọ olẹ nọ Jesu ọ lẹ inọ: “Me dhesẹ odẹ ra via kẹ ae no”? (Jọn 17:26)

Ilele Jesu a riẹ vẹre nọ odẹ Ọghẹnẹ họ Jihova. Rekọ oware nọ Jesu o wuhrẹ i rai họ oghẹrẹ nọ Jihova nọ o wo odẹ na ọ rrọ, eware nọ o ti ru, eware nọ o ru no, te uruemu riẹ.—w25.05, ẹwẹ. 20-21.

Ma tẹ riẹ nọ u wo eware jọ nọ ma riẹ hẹ, ẹvẹ u ti ro fiobọhọ kẹ omai?

U ti ru nọ ma te rọ riẹ nọ orọnikọ eware kpobi ma riẹ hẹ. Eware itieye jọ họ, ma riẹ ẹdẹ nọ Ọghẹnẹ ọ te raha akpọ na ha, yọ ma riẹ eware jọ nọ Jihova o ti ru oke yena ha. Ere ọvo ho, ma riẹ odẹ hẹ, yọ ma riẹ epanọ Jihova ọ riẹ omai te he.—w25.06, ẹwẹ. 16-18.

Enọ vẹ ma rẹ nọ omamai re ma sai wuhrẹ oware jọ no ovuẹ ogbotu hayo uzoẹme jọ ze, jẹ rehọ iẹe fiobọhọ kẹ amọfa?

Ma sae nọ omamai nọ: ‘Eme a ta ẹme te ro dhesẹ nọ oware nọ a be ta na ginọ uzẹme? Kọ a jariẹ kẹ oriruo jọ nọ mẹ sai ro ru ẹme nọ a be ta na vẹ kẹ ohwo re u tei udu ziezi? Amono uzoẹme nana o te were gaga?’—w25.07, ẹwẹ. 19.

Ma te roro kpahe oghẹrẹ nọ Ọghẹnẹ ọ rọ rehọ iruthọ Devidi rọvrẹ riẹ, eme ma wuhrẹ noi ze?

Devidi ọ raha izi ilogbo. Rekọ nọ o kurẹriẹ no eva ze Jihova ọ rọvrẹ riẹ. (1 Iv. 9:4, 5) Nọ Ọghẹnẹ ọ tẹ rọvrẹ ohwo no, ọ rẹ gbẹ rọ fiki oware na ru ohwo na oware ovo ho evaọ ẹdẹfa.—w25.08, ẹwẹ. 17.

Who te bi wuhrẹ ohwo Ebaibol, rekọ oware jọ u bi vẹe ẹro ho, eme who re ru?

Whọ tẹ ruẹ nọ oware jọ nọ who bi wuhrẹ ohwo na u bi vẹe ẹro ho dede nọ whọ daoma ru ei vẹ kẹe gaga no, wha sai kpohọ ọfa tao, re ẹdẹfa wha wariẹ wuhrẹ oware na.—w25.09, ẹwẹ. 24.

A jọ Ebaibol ta ẹme te “ogaga eviẹhọ uzioraha.” (Hib. 3:13) Kọ eme họ otọ ẹme na?

Uzioraha nọ ma reuku riẹ na o rẹ so ẹe ze nọ ekpehre eware i re ro si omai urru. O sae jẹ viẹ omai họ, ma ve bi wo avro ẹsikpobi evaọ udu mai. O sai ru nọ ma rẹ rọ vro nọ Jihova o you omai hi.—w25.10, ẹwẹ. 16.

Eware esa vẹ e rẹ sai fiobọhọ kẹ omai ru re olẹ mai u woma viere?

Orọ ọsosuọ, ma re roro kpahe uruemu nọ Jihova o wo. Orọ avọ ivẹ, ma rẹ kaki roro kpahe eware nọ e be kẹ omai uye, ma vẹ lẹ kpahe ae, o sae jọ ohwo jọ nọ o ru omai thọ nọ u fo nọ ma rẹ rọvrẹ. Orọ avọ esa, ma variẹ oma fihọ olẹ na ha. Nọ ma gbẹ variẹ oma ha, ẹsiẹe ma te mae rọ ginẹ ta eva mai kẹ Jihova.—w25.10, ẹwẹ. 19-20.

Ẹvẹ ma sai ro fiobọhọ kẹ inievo nọ e kpako no?

Ma rẹ rọ ifonu se ai, jẹ daoma te obọ uwou rai. Ma sai je lele ai kpobọ ọspito. Yọ ma sai lele ai kpohọ usi uwoma re, te usi uwoma ifonu, hayo oghẹrẹ ofa kpobi. —w25.11, ẹwẹ. 6-7.

Re ehaa orọo e nya kpatiẹ jẹ wha orro se Jihova, eme u fo nọ ma re ru?

Ru lele izi egọmeti. Eware nọ wha ti ru evaọ ehaa orọo na gbe oria ẹkeriotọ omawere na, wha ru ai oghẹrẹ nọ ahwo nọ ẹzi Ọghẹnẹ ọ be kpọ a re ru eware. Jọ iwu nọ whọ te wha e jọ kpatiẹ. Whaha oware kpobi nọ o rẹ dha Jihova eva evaọ ehaa na o tẹ make rọnọ ere a re ru evaọ ẹwho ra. Wha lele ohwohwo jiroro jẹ vuẹ ahwo uviuwou rai oware nọ wha gwọlọ vevẹ.—w25.12, ẹwẹ. 21-25.