Jọ Ehaa Orọo Ra E Wha Orro Se Jihova

1-2. Ẹvẹ Jihova ọ gwọlọ nọ ehaa orọo e jọ?

KỌ WHẸ avọ oniọvo jọ wha ta nọ wha be te rehọ ohwohwo? O tẹ rrọ ere, kiyọ u woma. Ẹsejọhọ wha mu ẹme họ ẹta kpahe oghẹrẹ nọ ehaa orọo rai ọ te jọ no. Jihova ọ gwọlọ nọ ehaa orọo rai e nya kpatiẹ. Ọ gwọlọ nọ eva e were owhẹ evaọ ẹdẹ nọ wha ti ru ehaa orọoa na gbe okenọ wha tẹ ruọ orọo na no.—Itẹ 5:18; Ole. 3:11.

² O ginẹ roja gaga re wha ru ehaa orọo rai oghẹrẹ nọ o rẹ rọ wha orro se Jhova. Fikieme? Kọ ẹvẹ wha sai ro ru ei? Ma te jọ uzọeme nana ta kpahe epanọ ahwo nọ a be te rọo a rẹ rọ ruẹrẹ oma kpahe kẹ ehaa orọo rai. Eware nọ ma te jariẹ wuhrẹ i ti je fiobọhọ kẹ omai kpobi ru oware nọ o rẹ wha orro se Jihova nọ ma te kpohọ ehaa orọo. Yọ otẹrọnọ ọmọtẹ avọ ọmọzae nọ a gwọlọ ru ehaa orọo a nọ omai kpahe oware jọ, uzoẹme nana u ti fiobọhọ kẹ omai riẹ oware nọ ma rẹ vuẹ ae nọ o rẹ were Jihova.

FIKIEME MA JE RU OWARE NỌ O RẸ WHA ORRO SE JIHOVA?

3. Eme u fo nọ idibo Jihova nọ e gwọlọ ru ehaa orọo a re ru, kọ fikieme?

³ U fo re idibo Jihova nọ e gwọlọ ru ehaa orọo a lele ehrẹ nọ Jihova ọ kẹ omai evaọ Ebaibol na. Fikieme? Keme Jihova họ ọnọ o ru nọ orọo o rọ rrọ akpọ na. Ọye ọ ma Ivi kẹ Adamu re ọ jọ aye riẹ. (Emu. 1:28; 2:24) Fikiere oware nọ u fo nọ o rẹ mae jọ ọmọzae avọ ọmọtẹ nọ a gwọlọ ru ehaa orọo oja họ epanọ a re ro ru oware nọ o rẹ were Jihova.

4. Fikieme idibo Ọghẹnẹ a je ru ehaa orọo rai oghẹrẹ nọ o rẹ were Jihova?

⁴ Oware jọ nọ u ro wuzou re who roro kpahe epanọ who re ro ru ehaa orọo ra oghẹrẹ nọ o rẹ were Jihova họ, Jihova yọ Ọsẹ ra nọ ọ rrọ obọ odhiwu, ọ tẹ jẹ rrọ Ogbẹnyusu ezi ra. (Hib. 12:9) Ma riẹ nọ whọ gwọlọ ru oware ovo nọ o rẹ kẹe uye evaọ ẹdẹ ehaa orọo ra gbe ẹdẹ ọfa kpobi hi, keme whọ gwọlọ nọ ọ gbẹ jọ Ọsẹ ra gbe Ogbẹnyusu ra. (Ol. 25:14) Jihova o ru eware buobu kẹ owhẹ no, yọ o ti gbe ru eware efa buobu kẹ owhẹ. Kọ onana u gbe te epanọ who re ro ru ehaa orọo ra oghẹrẹ nọ o rẹ rọ wha orro sei?—Ol. 116:12.

ẸVẸ WHỌ SAI RO RU OWARE NỌ O RẸ WHA ORRO SE JIHOVA?

5. Eme o sai fiobọhọ kẹ omai ru ehaa orọo nọ o rẹ wha orro se Jihova?

⁵ Ebaibol ọ vuẹ omai eware nọ a re ru gbe enọ a re ru hu hu evaọ ehaa orọo Oleleikristi, yọ o vuẹ omai oghẹrẹ nọ ẹkeriotọ ọfa nọ a te jariẹ wo ọ rẹ jọ họ. Oghẹrẹ nọ ohwo jọ ọ gwọlọ nọ o re ru ọriẹ ọ sai wo ohẹriẹ no orọ omọfa, yọ oghẹrẹ nọ a re ru evaọ ewho jọ, ere a re ru evaọ ewho efa ha. Idibo Jihova a re lele izi nọ Siza o fihọ re. (Mat. 22:21) O make rrọ ere na, ma te rri ehrẹ nọ e rrọ Ebaibol ro ru ehaa orọo mai, o rẹ wha orro se Jihova je ru eva were iẹe. Kọ ehrẹ vẹ u fo nọ who re roro kpahe?

6. Ma te rri obe Ahwo Rom 13:1, 2, fikieme ahwo nọ a be te rọo a re ro lele izi nọ egọmeti o fihọ?

⁶ Lele izi egọmeti. (Rom 13:1, 2) Evaọ erẹwho buobu, nọ ọmọzae avọ ọmọtẹ a tẹ gwọlọ rọo, u wo eware nọ egọmeti ọ ta nọ a re ru. Ọmọzae avọ ọmọtẹ na a rẹ daoma re a riẹ oware nọ egọmeti orẹwho rai ọ ta nọ a re ru. Otẹrọnọ whọ riẹ oghẹrẹ nọ a rẹ jọ oborai ru hu, hayo oware jọ u vẹ owhẹ ẹro ho, nyae nọ ekpako ukoko na. A ti ru ei vẹ kẹ owhẹ.b

7. Ẹvẹ u fo nọ ehaa orọo mai e rẹ jọ?

⁷ Jọ ehaa orọo na ọ jọ wọhọ ehaa orọo eg’Ọghẹnẹ. (1 Kọr. 10:31, 32) Ru eware oghẹrẹ nọ ohwo nọ ẹzi Ọghẹnẹ ọ rrọ oma o re ru eware. Wha ru eware wọhọ ahwo nọ a riẹ Ọghẹnẹ hẹ hẹ. (Gal. 5:19-26) Ebaibol ọ ta nọ ọzae o wuzou aye. Fikiere ọmọzae na ọye o re ru re eware kpobi nọ a ti ru evaọ ehaa orọo na, a ru ai kpatiẹ avọ evawere. Kọ ẹvẹ ọ sai ro ru ei? Ovuẹ nọ a rẹ rọ Ebaibol kẹ evaọ ẹdẹ ehaa orọo na u re fiobọhọ gaga. Ọnọ ọ be kẹ ovuẹ na ọ rẹ ta ẹme na avọ evawere gbe adhẹẹ re a riẹ nọ orọo yọ emamọ oware nọ Ọghẹnẹ ọ rọ ghale ohwo-akpọ. Ẹme na o re fiobọhọ kẹ ahwo kpobi nọ a nyaze keme o rẹ lẹliẹ ae riẹ nọ orọo yọ oware arozaha ha. Inievo buobu a rẹ gwọlọ nọ, o tẹ lọhọ, Ọgwa Uvie a re jo ru ehaa orọo rai. Otẹrọnọ whọ gwọlọ jọ Ọgwa Uvie jọ ru ehaa orọo ra, whọ rẹ kaki kere se ekpako nọ e rrọ ukoko jọ nọ a be jọ Ọgwa Uvie yena ru ewuhrẹ.

8. Eme ma re ru re ẹkeriotọ emuọriọ na ọ sae jọ malẹ? (Ahwo Rom 13:13)

⁸ Se Ahwo Rom 13:13. Otẹrọnọ wha gwọlọ wo ẹmẹkeria jọ nọ a rẹ jọ re emu jẹ da umudi, eme wha re ru nọ wha gbe ru wọhọ ahwo nọ a riẹ Ọghẹnẹ hẹ? Ẹme Griki nọ a fa “ehaa nọ a rẹ jọ ru eware odode” evaọ obe Ahwo Rom 13:13 na u dhesẹ ehaa nọ a rẹ jọ da idi vrẹ oma je kporo ile ruọ aso. Otẹrọnọ whọ gwọlọ fi idi nọ i re mu hotọ, ru oware jọ re ohwo ọvo ọ gbẹ sae da bu hrọ họ.c Who te bi kporo ile, who kporo ile na do ga hrọ họ re ahwo nọ a nyaze a sai yo ẹme ohwohwo. Kake riẹ oghẹrẹ nọ ile na e rrọ tao, re eghẹrẹ ile nọ who ti kporo gbe eme ile na e gbẹ kẹ ohwo ọvo uye he.

9. Otẹrọnọ whọ te kẹ ahwo jọ uvẹ re a ta ẹmẹme, hayo who ti dhesẹ iwoho gbe ividio je ru eware efa nọ e rẹ lẹliẹ ahwo hwẹ, eme who re ru?

⁹ Kọ whọ te kẹ ahwo jọ uvẹ re a ta ẹmẹme, hayo kọ a ti dhesẹ iwoho hayo ividio, je ru eware efa nọ e rẹ lẹliẹ ahwo hwẹ? Eware itieye na, a tẹ riẹ ai ru, e rẹ ginẹ lẹliẹ ehaa na were. Rekọ jọ eware nọ a ti ru kpobi e jọ eware nọ i kiehọ. (Fil. 4:8) Nọ omara nọ: ‘Kọ eme nọ a te ta gbe eware nọ a ti dhesẹ e te jọ enọ i kiehọ binikọ e te kẹ amọfa uye? Kọ e te lẹliẹ ahwo rri orọo oghẹrẹ nọ u fo nọ a rri rie?’ Onọ nọ o mai wuzou nọ whọ rẹ nọ omara họ: ‘Kọ e te wha orro se Jihova?’ O thọ họ re a ta emiehwẹ hayo ru eware nọ i re fou ahwo ehwẹ. Rekọ jọ a ta eme nọ i kiekpahe owezẹ ọzae-avọ-aye he hayo eme efa kpobi nọ i kiehọ họ. (Ẹf. 5:3) Otẹrọnọ imoni rai jọ e te ta ẹme ẹdẹ yena, kake vuẹ ae nọ, ‘Wha ta eme itiena gbe itiena ha.’ A vẹ jẹ rọwo nọ a ti ru epanọ whọ ta na.

10. Fikieme ọmọzae avọ ọmọtẹ nọ a be rọo na a gbe ru eware vrẹta ha? (1 Jọn 2:15-17)

¹⁰ Who ru eware vrẹta ha. (Se 1 Jọn 2:15-17.) Nọ Jihova ọ tẹ ruẹ nọ ma bi ru ikpeware re ahwo a muẹrohọ omai hi, rekọ ma gwọlọ ru eware nọ e rẹ wha orro sei, eva mai e rẹ were iẹe gaga. Ileleikristi nọ e gwọlọ ru eware vrẹta ha, eware “oma-udhesẹ” e rẹ were ai hi. A re mu raha igho re odẹ rai u do ho. Kọ erere vẹ o ti te owhẹ nọ who gbe ru ehaa orọo ra rro ho? Ẹsejọhọ ọkpọ erere nọ o te Mike na o ti te owhẹ. Mike yọ oniọvo-ọmọzae nọ ọ be rria obọ Norway. Ọ ta nọ: “Ma re esa vọ uzou ho. O tẹ so ẹe ze nọ ma gbe bi ro ru ọkobaro mai vrẹ. Dede nọ ma ru ehaa orọo mai rro ho, ọ were gaga.” Oniọvo-ọmọtẹ jọ nọ a re se Tabitha evaọ obọ India ọ ta nọ: “Ma jẹ ruawa gaga kpahe epanọ ma ti ro ru ehaa orọo na ha. Fikinọ ma gwọlọ ru ehaa orọo na rro ho, ma je roro eware buobu nọ ma ti ru hu, yọ eware nọ e rẹ wha ikẹ-isio egaga ze e jariẹ hẹ.”

11. Fikieme ọmọzae avọ ọmọtẹ nọ a be rọo na a jẹ sẹ osẹ nọ o rrọ kpatiẹ? (Rri iwoho na re.)

¹¹ Kọ whọ riẹ ewu nọ who ti kuhọ no? Ma riẹ nọ whọ te gwọlọ nọ whọ tẹ nya lahwe ẹdẹ yena, oma ra o rẹ were ahwo kpobi. Makọ evaọ oke anwae, Ebaibol ọ vuẹ omai nọ ọva gbe ọmọtibobo a jẹ hae sẹ ziezi. (Aiz. 61:10) Ma riẹ nọ ewu nọ whọ te wha kpohọ ehaa orọo ra ọ te nwane wọhọ ewu nọ whọ rẹ wha kpohọ oria kpobi hi. O make rrọ ere na, jọ ewu nọ who ti kuhọ ẹdẹ yena ọ jọ kpatiẹ, re osẹ ra o gbẹ jọ onọ o rẹ dha ahwo eva, hayo lẹliẹ ae roro ikpehre iroro ho. (1 Tim. 2:9) U te no ere no, whọ nwane sẹ osẹ na hayo ru oware jọ oghẹrẹ nọ a re ro rri nọ oware nọ o mae rrọ owhẹ oja oye he.—1 Pita 3:3, 4.

12. Fikieme enọ i bi ru ehaa orọo a jẹ whaha eware nọ Ebaibol o mukpahe nọ ahwo a re ru evaọ ehaa orọo rai?

¹² Who ru eware nọ Ebaibol o mukpahe hayo eware egagọ erue he. (Evia. 18:4) Akpọ Ẹdhọ nana nọ ma rrọ na, ahwo a rẹ jọ ehaa orọo ru eware nọ i wobọ kugbe edhọgọ gbe izi imuomu. U wo eware jọ nọ a re ru nọ a roro nọ a gbe ru ai hi, oware jọ o te via kẹ ae. Jihova ọ vuẹ omai nọ ma kẹnoma kẹ iruemu igbegbe itieye na kpobi. (2 Kọr. 6:14-17) Otẹrọnọ a rẹ jọ oborai ru oware jọ nọ o rrọ oghẹrẹ jọ, daoma nọ re whọ riẹ oria nọ oware na u no ze, who ve je rri eme nọ Ebaibol ọ ta nọ e sae lẹliẹ owhẹ riẹ sọ who re ru oware na evaọ ehaa orọo ra hayo who re ru ei hi.

13. Oghẹrẹ vẹ enọ i bi ru ehaa orọo a sae rọ rehọ aro kele Jihova evaọ ẹme okẹ nọ a rẹ kẹ?

¹³ Ẹsejọhọ evaọ oria nọ whọ be rria, a te bi ru ehaa orọo, ahwo a rẹ fare umuko jọ se ọmọtẹ avọ ọmọzae nọ a be rọo na. Ahwo jọ a wo te ahwo jọ họ, fikiere oware nọ ahwo jọ a te rọ ze o te rro te onọ amọfa a te rọ ze he. Ma riẹ nọ Ebaibol ọ ta nọ ma hae kẹ okẹ keme o rẹ lẹliẹ eva were omai. (Itẹ 11:25; Iruẹru 20:35) Rekọ who ru re ahwo nọ a nyaze a roro nọ o gba rai họ nọ a rẹ kẹ okẹ hẹ, yọ u fo gbe he re ma ru oware nọ o rẹ lẹliẹ ahwo roro nọ okẹ nọ a kẹ u te he. Joma rọ aro kele Jihova. Jihova ọ gwọlọ nọ onọ obọ ohwo u te ọ rẹ rọ kẹ okẹ. Yọ ọ gwọlọ nọ ohwo ọ rẹ kẹ okẹ na no eva ze, orọnikọ o re ru ei wọhọ oware nọ a gba riẹ họ bi ru hu.—2 Kọr. 9:7.

EBẸBẸ JỌ NỌ E SAE ROMAVIA GBE OWARE NỌ MA RẸ SAI RU

14. Eware vẹ e rẹ sae bẹ enọ e gwọlọ ru ehaa orọo?

¹⁴ Nọ whọ tẹ gwọlọ ru ehaa orọo nọ o rẹ wha orro se Jihova, eware jọ e sae dina bẹ owhẹ. Ojọ họ, o sae dina bẹ owhẹ re whọ riẹ oghẹrẹ nọ who re ro ru ehaa na re e gbẹ rro ga hrọ họ. Oniọvo jọ nọ a re se Charlie nọ ọ be rria obọ Solomon Islands ọ ta nọ: “Okenọ ma jẹ ma omaa unu ahwo nọ ma ti zizie kpohọ ẹkeriotọ emuọriọ na, re mẹ riẹ ahwo nọ me re zizie gbe enọ me re zizie he, ọziọ oware he. Keme ma wo egbẹnyusu buobu, yọ evaọ obomai, ahwo ra kpobi a rẹ gwọlọ nọ a rẹ nyaze!” Tabitha nọ ma ta ẹme te ẹsejọ na ọ ta nọ: “Evaọ ẹwho mai, ahwo a te bi ru ehaa orọo, ẹkeriotọ emuọriọ na ọ rẹ rro gaga. Nọ ma vuẹ esẹgbini mai nọ ahwo wọhọ udhusoi (100) ọvo ma gwọlọ zizie, a jẹ kake rọwo ho.” Sista Sarah nọ ọ be rria obọ India ọ ta nọ: “Ahwo jọ, epanọ a rẹ rọ riẹ ae odẹ a rẹ gwọlọ. Nọ imoni mẹ jọ a ru ehaa orọo rai a ru rie ruaro. Fikiere ahwo a jẹ gwọlọ nọ ọmẹ ọ rẹ rro vi ọrọ imoni mẹ dede.” Kọ who te wo ebẹbẹ nana hayo efa, eme o sai fiobọhọ kẹ owhẹ?

15. Nọ ma tẹ be ruẹrẹ oma kpahe kẹ ehaa orọo, fikieme ma jẹ lẹ kpahe iẹe?

¹⁵ Lẹ se Jihova kpahe ehaa orọo na. Ẹbẹbẹ kpobi nọ who wo kpahe ehaa orọo nọ whọ be ruẹrẹ oma kpahe kẹ na, tae kẹ Jihova. Vuẹe epanọ oware na o be kẹ owhẹ uye te. (Fil. 4:6, 7) Lẹ sei nọ jọ ọ kẹ owhẹ areghẹ nọ whọ rẹ rọ jẹ emamọ iroro. Lẹ sei nọ o fiobọhọ kẹ owhẹ re whọ gbẹ ruawa ga hrọ họ, je fiobọhọ kẹ owhẹ ga ẹro re whọ sai ru oware nọ u fo. (1 Pita 5:7) Nọ whọ jẹ te ruẹ oghẹrẹ nọ Jihova o ti ro fiobọhọ kẹ owhẹ, u ti ru nọ who ti ro fievahọ họ iẹe viere. Tabitha nọ ma ta ẹme kpahe ẹsiẹ na ọ ta nọ: “Mẹ avọ ọzae nọ mẹ be te rehọ ma jẹ ruawa inọ ma te rọ eware jọ si ikẹ, yọ ahwo uviuwou mai a te rọwo fihọ oghẹrẹ nọ ma gwọlọ ru eware na ha. Fikiere, oke kpobi nọ ma gwọlọ ta ẹme kpahe ehaa orọo na, ma rẹ lẹ tao. Yọ Jihova o gine fiobọhọ kẹ omai keme ikẹ e jariẹ hẹ.”

16-17. Fikieme ma jẹ ta oware nọ ma gwọlọ ru evaọ ehaa orọo na vevẹ jẹ tae avọ adhẹẹ?

¹⁶ Wha ta oware nọ wha gwọlọ ru vevẹ jẹ tae avọ adhẹẹ. (Itẹ 15:22) Eware buobu e riẹ nọ whai imava nọ wha be te rọo na wha rẹ ta ẹme kpahe. Whai imava wha ti fi ẹdẹ họ nọ wha ti ro ru ehaa orọo na. Yọ wha te ta ẹme kpahe unuigho nọ wha te raha, ahwo nọ wha ti zizie, gbe eware efa buobu. Whai imava wha lele ohwohwo ta ẹme kpahe eware nọ wha ti ru gbe enọ wha ti ru hu. Nọ wha te jiroro na, wha ta ẹme kpahe ehrẹ Ebaibol nọ e sai fiobọhọ kẹ owhai. Wha sae jẹ nọ inievo nọ i kruga evaọ ukoko na nọ e riẹ epanọ u fo nọ ehaa orọo Oleleikristi e rẹ jọ. Nọ wha be jiroro na, whọ tẹ be ta oware nọ whọ gwọlọ, rọ unu kpotọ tae, ta oware nọ o rẹ bẹ eru hu, yọ who si ikẹ hẹ. Otẹrọnọ esẹgbini rai hayo ahwo uwou rai jọ nọ a kpekpe owhai oma gaga a ta nọ wha ru oware jọ, oware na u gbe yoma ha, yọ o te bẹ hẹ, wha sai ru ei ro bru ọghọ họ ae oma. Keme whai ọvo wha wo ehaa orọo na ha, rekọ te ai te wha gbe woi. Otẹrọnọ wha te sai ru oware nọ a ta na ha, wha vuẹ ae oware nọ wha gbẹ te sai ru ei hi. Rekọ wha ta ẹme na avọ adhẹẹ. (Kọl. 4:6) Wha daoma vuẹ ahwo uviuwou rai vevẹ nọ oware nọ o rrọ owhai oja kpobi họ epanọ wha sai ro ru eware na kpobi re e wha ujiro se Jihova.

¹⁷ Ọsẹgboni ra a gbẹ rrọ ukoko na ha, ẹsejọhọ a te gwọlọ rọwo fihọ eware jọ họ, rekọ eware e sae riẹ nya ghele. Oniọvo-ọmọzae jọ nọ a re se Santhosh evaọ obọ India ọ ta nọ: “Ahwo uviuwou mai a jẹ gwọlọ nọ ma ru eware buobu nọ a rẹ jọ egagọ Hindu ru evaọ ehaa orọo mai. Mẹ avọ oniọvo-ọmọtẹ nọ mẹ gwọlọ rehọ na ma vuẹ rai oware nọ ma gwọlọ ru rekọ a jẹ kake rọwo ho. Ma ru eware jọ nọ e rẹ were ai nọ ma riẹ nọ e rẹ dha Jihova eva ha. Ma nyase oghẹrẹ emu nọ ma je ti there ba, ma te there ọnọ ọ rẹ were ai. Ma jẹ ta vẹre nọ ma rẹ so ile je gbile, rekọ ma gbe ru eyena kpobi hi keme eware itieye na e rẹ were ae he.”

18. Whọ tẹ gwọlọ nọ eware kpobi e nya malẹ evaọ ehaa orọo ra eme who re ru? (1 Ahwo Kọrint 14:40) (Rri uwoho na re.)

¹⁸ Wha ruẹrẹ oma kpahe ziezi. Wha tẹ nya onya eware na kpobi no re ẹdẹ na o te ti te, o te whae ze nọ udu u ti ro te owhẹ otọ evaọ ẹdẹ ehaa orọo na. (Se 1 Ahwo Kọrint 14:40.) Oniọvo jọ nọ a re se Wayne evaọ obọ Taiwan ọ ta nọ: “Nọ ehaa orọo na i te otọ no, ma te lele ahwo nọ a ta nọ a ti lele omai ru eware na gba ẹgwae kpahe oghẹrẹ nọ eware e te jọ ẹdẹ yena. Ma tubẹ ta nọ a dhesẹ oghẹrẹ nọ a ti ro ru eware jọ ze re ma rọ ẹro ruẹ e riẹ, re ma riẹ sọ eware na e te ginẹ riẹ nya.” Wha lele oke nọ wha fihọ. Wha te lele oke nọ wha fihọ u re dhesẹ nọ wha kẹ enọ wha zizie ze adhẹẹ.

19. Ono ọ sai fiobọhọ kẹ owhẹ ru re eware kpobi e nya kpatiẹ evaọ ehaa orọo ra?

¹⁹ Who te roro kpahe eghẹrẹ eware jọ nọ e sae via evaọ ẹdẹ ehaa orọo na, o te lẹliẹ owhẹ ma omaa nọ u re fiobọhọ kẹ owhẹ kpahotọ. (Itẹ 22:3) Wọhọ oriruo, evaọ eria jọ, a te bi ru ehaa orọo, ahwo nọ a zizie he a rẹ gwọlọ nyaze gaga. Otẹrọnọ ere a re ru evaọ oborai, roro kpahe oware nọ whọ rẹ sai ru re oware utioye na o gbẹ via ha. Otẹrọnọ imoni ra jọ nọ e rrọ ukoko na ha a te nyaze, vuẹ ae oghẹrẹ nọ ehaa orọo na ọ te jọ, gbe oghẹrẹ nọ who rri eware jọ nọ ahwo a re ru evaọ ehaa orọo. Whọ sai dhesẹ uzoẹme na “Ẹvẹ Isẹri Jihova A re Ru Ehaa Orọo Rai? nọ o rrọ jw.org na kẹ ae. Re ohwo ọvo o gbe mu eware ru hu, vuẹ oniọvo-ọmọzae jọ nọ o kruga evaọ ukoko na re ọ jọ “ọnọ o wuzou ehaa orọo na.” (Jọn 2:8) Whọ tẹ vuẹe eware nọ whọ gwọlọ nọ a ru evaọ ehaa orọo na kpobi gbe enọ a re ru hu, ọ sai fiobọhọ kẹ owhẹ ru re eware na kpobi e nya kpatiẹ wọhọ epanọ whọ gwọlọ na.

20. Eme u fo nọ imava nọ e be te rọo na a rẹ kareghẹhọ kpahe ẹdẹ ehaa orọo na?

²⁰ Who te roro kpahe epanọ whọ te rọ ruẹrẹ oma kpahe kẹ eware kpobi nọ wha ti ru evaọ ehaa orọo na, o sae lẹliẹ owhẹ roro nọ, ‘Kinọ uyuye nọ a re ro ru ehaa orọo!’ Rekọ kareghẹhọ nọ ẹdẹ yena ọvo who ti ru ehaa orọo na. Yọ ẹdẹ yena whai imava wha ti ro mu Jihova họ ẹgọ kugbe, yọ eva e te were owhai. Fikiere daoma re ehaa orọo ra ọ jọ umumuo, jẹ jọ kpatiẹ. Rẹroso Jihova, o ti fiobọhọ kẹ owhẹ. Ọ te kẹ owhẹ areghẹ nọ who re ro ru ehaa orọo na evaọ oghẹrẹ nọ whọ tẹ kareghẹhọ iẹe ẹdẹfa kọ eva ọvo e rẹ were owhẹ, whọ rẹ gbẹ rowo obọ họ inọ mẹ riẹ mẹ hai ru oware yena ha.—Ol. 37:3, 4.