Ọ Gudu, Rekọ Ọ Gaviezọ Kẹ Obruoziẹ-Iroro Riẹ

DEVIDI họ ohwo nọ ọ jẹ hae wha ekwakwa ẹmo Sọl. Ọ tẹ jẹ jọ oletu egbaẹmo riẹ nọ o fievahọ. Rekọ obọnana, ọ be dhẹ dhere evaọ igbrẹwọ fikinọ Sọl ọ gwọlọ kpei no. Whaọ Ọghẹnẹ ọ ya eyaa kẹ Devidi nọ ọ te jọ ovie. Ghele na, o je dhere re ọ sae thọ omariẹ gbe ezae egba ezeza (600) nọ e jọ kugbei.

Sọl o zihe ruọ ovie ọgeva no. Fikinọ ọ jẹ re Devidi ihri, o te mukpahe iẹe gaga. Ọ tẹ jẹ gwọlọ epanọ o re ro kpei no. U wo oke jọ nọ Devidi o wo uvẹ nọ ọ hai ro ru Sọl họ no, rekọ ọ kẹ riẹ uvẹ. Ghele na, Sọl ọ gbẹ jẹ gwọlọ Devidi kpohọ oria kpobi re o kpei no. Ahwo okpẹwho jọ nọ a re se Zif a vivie Devidi. A vuẹ Sọl oria nọ Devidi o dhere. Yọ ona họ orọ avọ ivẹ nọ a bi ro vivie iei na. Fikiere Sọl ọ tẹ rehọ ogbaẹmo riẹ lele oma kpohọ obei nyae gwọlọ Devidi kpe.

Kọ eme Devidi o bi ti ru na? O yo nọ Sọl ọ gwọlọ e riẹ ziọ igbrẹwọ na, fikiere o te vi ahwo nyae kiẹ gwọlọ oria nọ Sọl ọ rrọ. O make rọnọ egbaẹmo nọ e jọ kugbe Sọl a te idu esa (3,000), ozọ u mu Devidi hi. Tubọ oke nana dede o ro kere nọ: “Rri! Ọghẹnẹ họ ofiobọhọ mẹ; Jihova ọ rrọ kugbe enọ e be tha omẹ uke.” (Ol. 54:4; ẹme nọ ọ rrọ ehru oria ikereakere) Devidi ọ tẹ ta nọ o re kpohọ oria nọ Sọl avọ egbaẹmo riẹ a wohọ na evaọ aso. Ọ tẹ nọ ezae nọ e jọ kugbei sọ ohwo jọ ọ sai lele iei nya.

Abishae ọ tẹ ta nọ o re lele iei nya. Abishae yọ ọmọ oniọvo Devidi. Ọ jọ ọgbaẹmo nọ ozọ u re mu hu, rekọ ẹsejọ ọ jẹ hae re ohrọ ohwo ho. Devidi avọ Abishae a tẹ kuẹlẹ ruọ oria nọ Sọl avọ egbaẹmo riẹ a wohọ. A tẹ ruẹ nọ ahwo na kpobi a wezẹ le no. Oware na họ, Jihova họ ọnọ o fou ezae yena kpobi họ owezẹ udidi na. A tẹ te kuẹlẹ te Sọl ovie na oma! Ọyomariẹ ọ wezẹ vrẹ no re. Ohwo ọvo o je rou rie he, yọ ọ thọrọ ozuẹ riẹ họ otọ kẹle uzou riẹ.

Kọ eme Devidi o bi ti ru na? Uvẹ nọ o re ro ru Sọl họ no lọlọhọ u rovie fihọ na! Kọ ogbẹrọnọ enẹ Devidi o ti ro si omariẹ no uye nọ Sọl ọ be rọ bẹe na? Ọyomariẹ o ve je zihe ruọ ovie? Evaọ iroro Abishae, u fo nọ Devidi o re roro iei tao ho re ọ tẹ te tọlọ uzou Sọl no. Ọ tẹ lẹlẹ ta kẹ Devidi nọ: “Ọghẹnẹ ọ rehọ ọwegrẹ ra họ obọ ra no nẹnẹ na. Ivie, kẹ omẹ uvẹ re mẹ rehọ ozuẹ na duwu iei nyaotọ ẹsiẹvo, me ti duwu iei isiava ha.”

Devidi ọ tẹ kareghẹhọ oke jọ nọ uvẹ utiọye u rovie fihọ kẹe evaọ udhude Ẹn-gẹdi. Oke yena, Sọl ọ rueva eghogho-utho nọ Devidi ọ jọ eva. Sọl ọ riẹ nọ Devidi ọ jọ etẹe he. Devidi ọ hae sai kpei no lọlọhọ. Rekọ o ru ere he. O bru ozọ ewu Sọl ọvo, ọ tẹ nyasiọ ẹe ba. Uwhremu na, udu Devidi u te je brukpei fikinọ o rri nọ oware nọ o ru na u dhesẹ adhẹẹ kẹ ovie nọ Jihova o ro mu hu.

Ẹsejọhọ evaọ aso nana, o lọhọ kẹ Devidi hi re ọ ta kẹ Abishae nọ o du kpe Sọl no ho. Abishae omariẹ ọ jẹ dhẹ kẹ uzuazọ riẹ re. O rrọ vevẹ nọ ezae nọ e jọ kugbe Devidi na kpobi a bi rẹro ẹdẹ nọ uye nana u ti kuhọ. Ghele na, Devidi ọ rọwo nọ a rọ obọ te Sọl ho. Ọ kpọ Abishae họ, ọ tẹ jẹ tuduhọ iẹe awọ nọ o thihakọ. Devidi ọ ta kẹ Abishae nọ: “Jihova ọvo o ti [kpe Sọl], hayo nọ ẹdẹ uwhu riẹ o te te o ti whu, hayo o ti kpohọ ẹmo, o ve whu fihọ ẹmo na.” Ọ tẹ jẹ ta kẹe ududu nọ: “Mẹ sae kpare obọ mẹ rọsuọ ọnọ Jihova o wholo vievie he, keme o te were Jihova ha.”

Devidi ọ riẹ nọ Jihova ọvo ọ te rọ umuomu Sọl hwosa kẹe evaọ oke nọ u fo. Evaọ olezi nọ ma ta ẹme kpahe no vẹre na, Devidi o kere kpahe Jihova nọ: “Ọ te rehọ eyoma ewegrẹ mẹ hwosa zihe kẹ ae.” (Ol. 54:5) Fikiere Devidi avọ Abishae a tẹ nya no evuẹ Sọl. A te kpohọ oria jọ nọ u kpehru nọ o kẹle etẹe. Devidi ọ tẹ jọ etẹe se Sọl avọ egbaẹmo riẹ. Ọ whọku egbaẹmo na inọ a ru thọ nọ a gbẹ rọ thọ ovie rai hi. Ọ tẹ jẹ ta kẹ Sọl nọ ọ be raha oke kufiẹ gheghe nọ ọ be rọ gwọlọ iẹe kpe. Ọ tẹ jẹ ta nọ ọyomariẹ Devidi na yọ “uthu gheghe” nọ ọ sai ru ovie na oware ovo ho. Oma o tẹ vuọ Sọl gholo gholo, ọ tẹ ta nọ: “Oware ugheghẹ me ru na, yọ me ru thọ gaga no.”

Kọ Sọl o no ere nwene? Vievie! Devidi ọ riẹ nọ Sọl o ri nwene he. Rekọ ọ vioja vievie he inọ o ru eva were Jihova, ọ tẹ jẹ gbaudu jiroro nọ i kiehọ! Nọ oke o be nyaharo na, Jihova ọ ghale Devidi evaọ idhere nọ ọ rẹro riẹ hẹ fikinọ ọ gudu, o te je yoẹme kẹe.

Se iku Ebaibol na:

• 1 Samuẹle 16:21; 18:5-14; 23:19; 24:3-7; 26:1-25

Onọ nọ a rẹ ta ẹme kpahe:

Eme gbe eme Devidi o ru ro dhesẹ nọ ọ gudu evaọ oke nana uzuazọ riẹ?

Gbẹ Kiẹ Kodo

1. 1. Ẹsibuobu, Abishae ọ re ohrọ ahwo ho, yọ ọ rọ okpakpa ru eware jọ. O make jọ ere na, ẹvẹ ọ rọ gbaudu thọ ahwo Jihova, je fiobọhọ kẹ Devidi? (it “Abishae” ¶3-5)

   Uyo ra

2. 2. Fikieme Devidi ọ rọ rehọ omariẹ dhesẹ “ọkokowa evaọ ehru igbehru”? (1 Sam. 26:20; it “Ọkokowa” ¶4) Uwoho 1

   Uyo ra

   

   Ekaterina Kolomeets/stock.adobe.com

3. 3. Fikieme o rọ gwọlọ nọ Devidi o re wo odiri? (w17.08 6 ¶14-15)

   Uyo ra

4. 4. Oghẹrẹ vẹ Devidi o ro dhesẹ nọ o gbe wo adhẹẹ kẹ Jihova nọ ikpe buobu e make vrẹ no? (w21.09 10 ¶8) Uwoho avọ 2

   Uyo ra

   

Roro Kpahe Eware nọ Who Wuhrẹ Noi Ze

• O make rọnọ Sọl o ru eware buobu thọ, Devidi ọ gbẹ jẹ kẹe adhẹẹ ghele. Ẹvẹ ma sae rọ rehọ aro kele Devidi evaọ oghẹrẹ nọ ma re rri . . .

  • esẹgbini mai? Uwoho avọ 3

    Uyo ra

    

  • isu egọmeti? Uwoho avọ 4

    Uyo ra

    

  • ekpako ukoko? Uwoho avọ 5

    Uyo ra

    

• Devidi ọ gbaudu gaviezọ kẹ obruoziẹ-iroro riẹ. Eware vẹ o sae jọ gwọlọ nọ ma gudu re ma sai lele obruoziẹ-iroro mai?

  Uyo ra

• Oghẹrẹ ọfa vẹ whọ sae rọ rehọ aro kele Devidi gudu wọhọ epanọ ma ruẹ evaọ iku nana?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Nọ a tẹ kpare Devidi ze no, enọ vẹ mẹ te nọe kpahe epanọ eware e jọ kẹe evaọ abọ nana uzuazọ riẹ?

  Uyo ra

Gbe Wuhrẹ Eware Efa

Rri ividio nọ i dhesẹ iku na ziezi.

Kareghẹhọ Oghẹrẹ nọ Uyoyou U re Ru—U re Wo Odiri Evaọ Eware Kpobi (1:29)

Sọl o wo omaurokpotọ vẹre, rekọ uwhremu na o te wo omorro. Eme emaha a rẹ sai wuhrẹ no iku riẹ na ze?

“Sọl Ovie Na” (Ekade Ebaibol evaọ itanẹte)