Ọ Rẹriẹ Ovao Dhe Ezae Ivẹ nọ Eva E be Dha

U WO oke jọ nọ Abigẹle ọ rẹriẹ ovao dhe ẹbẹbẹ ologbo jọ fiki ezae ivẹ nọ eva e jẹ dha. Ọjọ yọ ọzae riẹ nọ a re se Nebale. Nebale ọ geva gaga, ọ jẹ hai dhuaro, yọ o wo areghẹ hẹ. Ọzae nọ o kiọkọ kọ Devidi nọ ọ jọ emamọ ohwo. Ọ jẹ gọ Jihova. Yọ ọye ọ te jọ ovie Izrẹl evaọ obaro. Nebale o ru eva dha Devidi gaga. Fikiere Devidi ọ tẹ gwọlọ nọ o re kpe ahwo uwou Abigẹle soso no. Whaọ Abigẹle yọ aye nọ o wo erru, o te je wo areghẹ. Kọ ọ te sae gudu re o ru oware areghẹ evaọ ẹme nọ ọ rrọ otọ na?

Nọ oware na o via, Abigẹle ọ kake riẹ hẹ. Odibo rai jọ họ ọnọ ọ vuẹ riẹ nọ ese ọ be tha fiki oware nọ ọzae riẹ o ru. Odibo na ọ vuẹ riẹ nọ Devidi avọ ezae egba ene (400) a be wọ ẹmo bru ai ze re a kpe Nebale “gbe uwou riẹ soso” no. Kọ eme ọ lẹliẹ ofu Devidi ga tere? U wo oke jọ nọ Devidi ọ jẹ rọ dhẹ dhere fiki Sọl nọ ọ jẹ gwọlọ iẹe kpe gheghe gheghe. Rekọ Devidi avọ ahwo riẹ a gbẹ jẹ thọ ahwo Izrẹl no obọ ewegrẹ rai. A tubẹ thọ Nebale re, te ithuru-igodẹ riẹ, avọ erao ibuobu riẹ. Fikiere nọ oke jọ o vrẹ no, Devidi o te vi ahwo bru Nebale re ọ kẹ ae ememu jọ. Rekọ Nebale o te do ku ai je tube ku eka họ ae oma dede. Ọ tubẹ ta nọ Devidi yọ odibo nọ ọ dhẹ siọ olori riẹ ba.

Odibo na ọ riẹ nọ ọ tẹ make lẹ Nebale re o nwene iroro, ọ te kẹe uzou sokpọ họ. Fikieme o rọ rrọ ere? Odibo na ọ ta kẹ Abigẹle nọ, Nebale “o re yo ẹme ohwo ho keme o fioka ohwo ho.” Rekọ ọ riẹ nọ ọ tẹ ta ẹme na kẹ Abigẹle, ọ te rọ areghẹ ru oware jọ vẹrẹ vẹrẹ. Kọ eme Abigẹle o ti ru na?

Abigẹle o bru ikpekpe he. Ukpoye, o ru oware jọ vẹrẹ vẹrẹ. Ọ ruẹrẹ emuore buobu họ kẹ Devidi avọ ahwo riẹ. Ọ tẹ vuẹ idibo na nọ a wọ ae fihọ eketekete. Kẹsena o te vi idibo na avọ emuore na karo, ọyomariẹ ọ tẹ ruọ eketekete lele ai. Rekọ ọ ta ẹme ọvo kẹ Nebale he. Fikieme? Ẹsejọhọ fikinọ ọ riẹ nọ Nebale ọ sai ru ei nọ o gbe ro ru emamọ oware he.

Evaọ okenọ Abigẹle ọ rọ jọ edhere jẹ nyabru Devidi avọ ahwo riẹ na, ugbehru jọ u ru nọ a gbẹ jẹ ruẹ ohwohwo ho. Rekọ nọ a nwane nyaku ohwohwo no, Abigẹle ọ tẹ la no eketekete na fihọ otọ, o te kigwẹ fihọ aro Devidi nọ eva e be dha gaga na. Ọ tẹ be lẹe nọ ọ gaviezọ kẹe. Nọ Devidi ọ ruẹ epanọ o wo omaurokpotọ te, oma u te ki ei ewhrọwhrọ. Ọ tẹ gaviezọ kẹe.

Abigẹle o te wounu kẹ Devidi fiki oware ugheghẹ nọ ọzae riẹ o ru na. Yọ ọ ta kẹ Devidi nọ eva e dha riẹ thọ họ. Ọ tẹ jẹ kareghẹhọ Devidi epanọ Jihova o ro fiobọhọ kẹe no, gbe eware nọ o ru no fiki Jihova. Kẹsena ọ tẹ ta kẹe nọ o te were Jihova ha nọ o te kpe azẹ ekueku fihọ uzou, yọ ọ te vioja riẹ evaọ obaro. U te no ere no, ọ vuẹ Devidi nọ Jihova ọ salọ e riẹ gbe uviuwou riẹ no re a su Izrẹl, yọ ọ te thọe no obọ ewegrẹ riẹ. O rrọ vevẹ nọ Abigẹle ọ riẹ nọ Jihova ọ salọ Devidi no re ọ jọ ovie Izrẹl, u te no Sọl no.

Eme areghẹ nọ Abigẹle ọ rọ unu kpotọ ta kẹ Devidi na, e lẹliẹ ofu riẹ kpotọ. Devidi ọ tẹ ta kẹe nọ: “Ujiro u te Jihova Ọghẹnẹ Izrẹl, ọnọ o vi owhẹ ze ti zere omẹ!” O te je jiri Abigẹle fiki emamọ areghẹ riẹ. Yọ ọ gaviezọ kẹ ohrẹ riẹ na. Ọ ta kẹe nọ, “me yo ẹme nọ whọ ta na.”

Nebale ọ riẹ oware ovo kpahe oware nọ o via na ha. Aso ẹdẹ yena, o ru ehaa emuọriọ ologbo, “ọ tẹ jẹ da idi bẹ.” Abigẹle ọ tẹ hẹrẹ bọo okiokiọ riẹ re idi na e hiẹ noi aro no. Rekọ o wọhọ nọ evaọ ohiohiẹ yena dede, ofu o je dhe Nebale wọhọ epanọ o re dhei ẹsikpobi na. Abigẹle o te gbiku na kpobi kẹe. Kọ Abigẹle ọ vuẹ omariẹ nọ ẹsejọhọ ọzae riẹ na o ti doku ei, hayo tube kpei dede? O tẹ rrọ ere, u du gwọlọ nọ ozọ yena u re mu ei hi. Keme Ebaibol na ọ ta kpahe Nebale nọ: “Udu riẹ o tẹ wọhọ orọ ohwo nọ o whu no, o te kiẹzẹ oria ọvo wọhọ utho.” Nọ oware wọhọ edẹ ikpe e vrẹ no, “Jihova ọ tẹ tehe Nebale kpe.” Ere Ọghẹnẹ ọ rọ rehọ umuomu Nebale hwosa kẹe fikinọ ọ rọwo fiobọhọ kẹ Devidi hi, ọnọ ọ salọ no re ọ jọ ovie. Jihova ọ tẹ jẹ rọ ere siwi Abigẹle no ekpehre orọo nọ ọ jọ na.

Jihova ọ ghale Abigẹle evaọ idhere efa re. Nọ Devidi o yo nọ Nebale o whu no, ọ tẹ ta kẹ Abigẹle nọ ọ jọ aye riẹ. Abigẹle ọ rọwo. Nọ oke jọ o vrẹ no, a tẹ rọ Devidi mu ovie Juda. Kẹsena a tẹ rehọ iẹe mu ovie Izrẹl soso. Yọ Abigẹle o yẹ ọmọzae jọ kẹe. U wo oke jọ nọ ewegrẹ Ọghẹnẹ a rọ wọ ẹmo ze, a te mu Abigẹle lele oma. Rekọ u kri hi, Devidi ọzae oyoyou riẹ nọ ọ gudu ziezi na, ọ tẹ dhogbo nyai siwi ei.

Se iku Ebaibol na:

• 1 Samuẹle 25:1-43; 30:1-6, 16-20

Onọ nọ a rẹ ta ẹme kpahe:

Eme gbe eme Abigẹle o ru ro dhesẹ nọ ọ gudu?

1. 3. Fikieme u ro fo nọ obọ nọ egbaẹmo Devidi a fihọ kẹ Nebale o rẹ dae ẹro? (ia 77-78 ¶9-10) Uwoho avọ 2

   Uyo ra

   

   Hanan Isachar/Alamy Stock Photo

2. 4. Eme họ otọ ẹme nọ Abigẹle ọ ta inọ Jihova ọ te “nabe fare uzuazọ [Devidi] uko fihọ ẹkpa uzuazọ”? (1 Sam. 25:29; it “Uzuazọ” ¶45)

   Uyo ra

Roro Kpahe Eware nọ Who Wuhrẹ Noi Ze

• Devidi ọ gaviezọ kẹ Abigẹle. Eme ezae nọ e rọo no a rẹ sai wuhrẹ no oyena ze? Uwoho avọ 3

  Uyo ra

  

• Eme inievo-emetẹ nọ ezae rai e rrọ ukoko na ha a rẹ sai wuhrẹ mi Abigẹle?

  Uyo ra

• Ẹvẹ whọ sae rọ rehọ aro kele Abigẹle gudu evaọ uzuazọ ra?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Abigẹle nọ a tẹ kpare iẹe ze no?

  Uyo ra

Gbe Wuhrẹ Eware Efa

Otẹrọnọ ọzae hayo aye oniọvo jọ ọ be gọ Jihova ha, eme ọ rẹ sai ru re orọo rai o jọ ziezi?

Orọo Yọ Ọgbakugbe Ebẹdẹ Bẹdẹ (4:30)

Abigẹle o fiobọhọ kẹ Devidi nọ ọ sae rọ kpọ ofu rie. Se kpahe eware nọ whọ rẹ sai ru rọ kpọ ofu ra nọ ohwo jọ ọ tẹ maki ru owhẹ eva dha.

“Otoriẹ Udidi nọ Ohwo O Wo U re Hrẹ Ofu Riẹ Kpotọ” (w14 12/1 12-13)