21 SAMUẸLE
Ọmọzae nọ Ọ Ta Ẹme Jihova Via
IKU Samuẹle e rọ oghẹrẹ jọ tho erọ ọmọtẹ Jẹfta avọ Samsin. Evaọ oghẹrẹ vẹ? Aimasa na a jọ eware esa nana thoma. Esẹgbini rai i fiobọhọ kẹ ae gaga evaọ oghẹrẹ uzuazọ nọ a yeri. Samuẹle ọ rehọ uzuazọ riẹ kpobi ru iruo Jihova wọhọ epanọ o jọ kẹ ọmọtẹ Jẹfta. (1 Sam. 2:1) Samuẹle ọ jọ Nazaraet evaọ edẹ uzuazọ riẹ kpobi wọhọ epanọ Samsin ọ jọ. (Ibr. 13:7) U te je wo oke jọ nọ o gwọlọ nọ Samuẹle ọ rẹ gudu wọhọ epanọ o jọ kẹ ọmọtẹ Jẹfta avọ Samsin na.
Nọ Samuẹle ọ jọ oware wọhọ ikpe esa hayo dina kpako vrẹ ere, Hana oni riẹ o ro bru rie evie. Ọ tẹ wọe kpobọ uwou-udhu Jihova nọ o jọ Shailo re ọ jọ obei ru iruo, wọhọ epanọ ọ ya eyaa kẹ Jihova. Rekọ Hana ọ jẹ hai weze bru ei kukpe kukpe. Yọ oke kpobi nọ ọ nya, ọ jẹ hae wha ewu ọkpokpọ sei nọ o re kuhọ evaọ uwou-udhu na. Samuẹle ọ tẹ whẹro evaọ uwou-udhu na. Yọ Ilai ozerẹ okpehru na nọ ọ kpako no ọ jẹ rẹrotei. Ẹsejọhọ eyae jọ nọ i je ru iruo evaọ uwou-udhu na a fiobọhọ yọrọ Samuẹle re.
Rekọ evaọ oke yena, ahwo a je ru eware etọtọ evaọ uwou-udhu na. Yọ Ilai o je ru emamọ oware ọvuọvo kpahe iẹe he. Emezae ivẹ riẹ nọ a re se Hofini avọ Finihas a je ru eware imuomu. A je lele eyae jọ nọ i je ru iruo evaọ uwou-udhu na wezẹ. U te no ere no, u wo eware iyoma efa nọ a je ru re. Fiki uvou uthethei gbe ẹme nọ a ta kẹ idibo nọ i je ru iruo evaọ uwou-udhu na, idibo na i te je dhuaro kẹ ahwo nọ a jẹ nyaze etẹe. A jẹ hae rọ ogaga mi ahwo na ẹkẹ nọ ọ mai woma evaọ arao nọ a bi ro dhe idhe kẹ Jihova. Ilai ọ riẹ oware nọ emezae riẹ i je ru. Ukpenọ o re le ai no uwou-udhu na, kọ ẹme ọvo ọ ta kẹ ae. O tẹ whae ze nọ emọ na a gbẹ jẹ tubẹ daezọ riẹ hẹ. Kọ ẹvẹ kpahe Samuẹle? O make rọnọ ahwo a je ru eware iyoma evaọ etẹe na, ọ rọ aro kele ai hi. Fikiere o te wo aruoriwo evaọ aro Ọghẹnẹ gbe aro ahwo nọ ọ be rro ze na. Nọ u te oke nọ Jihova ọ rẹ rọ kpọ eware iyoma na vi, Samuẹle ọ salọ re ọ jọ ọtota riẹ.
Evaọ aso ẹdẹ jọ, Samuẹle o te yo urru jọ. Jihova o je sei na! Rekọ o je roro nọ Ilai o je sei. Fikiere ọ tẹ dhẹ bru Ilai re ọ nọe oware nọ o bi ro sei. Oke yena yọ Ilai ọ who no, ọ gbẹ jẹ ruẹ ude he. Ilai ọ tẹ vuẹe nọ ọ wariẹ nyai kiẹzẹ, inọ o se rie he. Oware ovona o tẹ wariẹ via isiava efa. Ukuhọ riẹ Ilai o te vuhumu nọ Jihova họ ọnọ o je sei na. Ọ tẹ ta kẹe nọ ọ wariẹ nyai kiẹzẹ. Ọ tẹ jẹ vuẹe nọ otẹrọnọ ọ wariẹ sei, jọ ọ ta nọ: “Ta ẹme Jihova, keme odibo ra ọ be gaviezọ.” Samuẹle ọ tẹ nyai kiẹzẹ.
Jihova ọ tẹ wariẹ se Samuẹle ọrọ avọ isiane: “Samuẹle, Samuẹle!” Samuẹle ọ tẹ ta nọ: “Ta ẹme, keme odibo ra ọ be gaviezọ.” Jihova ọ tẹ ta kẹe nọ ọ be ruẹ eware iyoma kpobi nọ e be via evaọ Shailo na, yọ ọ te kpọ eware na vi. Ọ ta kẹe nọ ọ te kẹ Ilai uye keme ọ whọku emezae riẹ hẹ. Yọ uye u ti te uwou riẹ soso, te emezae imuomu riẹ na. Ọ tẹ ta kẹ Samuẹle nọ ọ vuẹ Ilai eme nana kpobi.
Samuẹle ọ tẹ wariẹ kiẹzẹ. Rekọ Ebaibol na ọ ta ha sọ owezẹ u gbe su ei vrẹ ere. Nọ oke o ke no, ọ tẹ kpama nyai rovie ethẹ uwou-udhu na. Rekọ “ozọ u te je mu Samuẹle re ọ vuẹ Ilai kpahe eruẹaruẹ na.” Ilai o te se Samuẹle, ọ tẹ nọe ẹme nọ Ọghẹnẹ ọ ta kẹe. Ẹsejọhọ o muẹrohọ nọ ozọ u je mu ei. Fikiere ọ tẹ ta kẹe nọ: “Ivie, whọ ko ẹe dhere omẹ hẹ.”
O make jọ nọ Samuẹle ọ jọ ọmaha gheghe, ọ vuẹ Ilai nọ ọ jọ ozerẹ okpehru ẹdhoguo Jihova
Ma riẹ nọ oware nọ o jọ otọ kẹ Samuẹle na o lọhọ kẹe vievie he. O sae jọ nọ o rri Ilai wọhọ ọsẹ ologbo riẹ, yọ ọ jẹ kẹe adhẹẹ ziezi. U te no ere no, Ilai ọ jọ ozerẹ okpehru evaọ orẹwho Izrẹl oke yena. O make jọ ere na, Samuẹle ọ ta ẹme na kẹe. Ebaibol na dede ọ ta nọ, “Samuẹle ọ tẹ vuẹe oware kpobi.” Ilai ọ tẹ riẹ nọ uye u bi ti tei avọ uviuwou riẹ kẹle. Kọ Ilai ọ whọku emezae imuomu riẹ na no umuo oke yena vrẹ? Ebaibol na ọ ta ere he.
Jihova ọ ghale Samuẹle gaga fikinọ o dhesẹ nọ ọ gudu. Ebaibol na ọ ta nọ: “Jihova omariẹ ọ jọ kugbei.” U te no ere no, Samuẹle o zihe ruọ ọruẹaro Ọghẹnẹ. Yọ Ọghẹnẹ “ọ kuvẹ re ẹme ọvo evaọ usu eme [Samuẹle] kpobi ọ seba erugba ha.” Eme kpobi nọ Samuẹle ọ ta kpahe Ilai avọ emezae riẹ i rugba uwhremu na. Ikpe buobu Samuẹle ọ jọ ọruẹaro Jihova, ọ tẹ jẹ jọ obruoziẹ. Evaọ oke yena kpobi na, ọye ọ jẹ hae vuẹ ahwo Izrẹl ẹme Jihova. Samuẹle o yeri emamọ uzuazọ, yọ ọ rria tọ. No anwọ oke emaha riẹ ze o ro wuhrẹ epanọ a rẹ gudu. Yọ ọ gudu evaọ etoke uzuazọ riẹ kpobi.
Se iku Ebaibol na:
Onọ nọ a rẹ ta ẹme kpahe:
Eme gbe eme Samuẹle o ru ro dhesẹ nọ ọ gudu?
Gbẹ Kiẹ Kodo
1. Dhesẹ epanọ Shailo ọ jọ, onọ o jọ oria nọ uwou-udhu Jihova o jọ. (w92 11/1 8-9) Uwoho 1
Todd Bolen/BiblePlaces.com
Uwoho 1: Oria nọ Shailo ọ jọ evaọ oke anwae
2. Ẹvẹ eware e jọ kẹ Samuẹle evaọ uwou-udhu na? (ia 60-62 ¶9-13) Uwoho avọ 2
Uwoho 2
3. Eme họ otọ ẹme nọ Ebaibol na ọ ta inọ “evaọ oke yena Samuẹle ọ re riẹ Jihova ha”? (1 Sam. 3:7; w03 1/1 7 ¶5-6)
4. Ẹvẹ eruẹaruẹ nọ a ruẹ kpahe uviuwou Ilai i ro rugba? (it “Ilai, I” ¶5-7)
Roro Kpahe Eware nọ Who Wuhrẹ Noi Ze
Eme emaha a rẹ sai wuhrẹ mi Samuẹle re a jọ . . .
ahwo nọ a re yoẹme? (1 Sam. 3:5)
ahwo nọ a rẹ kẹ amọfa adhẹẹ? (1 Sam. 3:6-10)
ahwo nọ a re fievahọ? (1 Sam. 3:15) Uwoho avọ 3
Uwoho 3
Oke vẹ o sae rọ gwọlọ nọ ọmaha ọ rẹ ta ẹme nọ ọ riẹe eva? Kọ ẹvẹ oriruo Samuẹle ọ sai ro fiobọhọ kẹe?
Oghẹrẹ ọfa vẹ whọ sae rọ rehọ aro kele Samuẹle gudu?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku nana i ro dhesẹ oware nọ Jihova ọ gwọlọ ru via?
Enọ vẹ mẹ te nọ Samuẹle nọ a tẹ kpare iẹe ze no?
Gbe Wuhrẹ Eware Efa
Oke vẹ o sae rọ gwọlọ nọ ọmaha hayo ọkpako ọ rẹ gudu re o dikihẹ kẹ oware uwoma?
O make jọ nọ ahwo nọ Samuẹle ọ jẹ rria kugbe a je yoẹme kẹ Ọghẹnẹ hẹ, ọ rehọ aro kele ai hi.
“Samuẹle Ọ Salọ nọ Ọ rẹ Gọ Jihova” (ijwis uzoẹme avọ 15)