Ọ Wariẹ Gudu Evaọ Okenọ O gbe Wo Ogaga Ha

UYE o jẹ bẹ Samsin. Fikieme? Keme o ru oware ugheghẹ jọ. Ọ vuẹ aye jọ oware nọ o lẹliẹ e riẹ goma gaga. O tẹ whae ze nọ ahwo Filistia a sai ro mu ei. A te vre ibiaro riẹ no jẹ gbae abọ gbe awọ. Kẹsena a te fi ei họ uwou-odi. A te zihe iei ruọ ọrigbo rai nọ a je ro ru iruo. Rekọ evaọ obọnana, dede nọ ọ be ruẹ ude he, o bi yo eme nọ ogbotu ahwo Filistia a be ta ro se ọyomariẹ avọ Jihova Ọghẹnẹ riẹ ẹkoko. Samsin ọ riẹ nọ ọye họ ohwo nọ ọ wha uye nana ze. Samsin yọ ọzae nọ ọ gudu anwẹdẹ vẹre taure o te ti kieruọ uye nana. Kọ ọ te sae wariẹ gudu evaọ oke nana?

Samsin ọ jọ obruoziẹ Izrẹl evaọ oware wọhọ ikpe udhe (20) soso. Rekọ oghẹrẹ obruoziẹ nọ ọ jọ o wo ohẹriẹ no efa nọ ma riẹ, wọhọ Berak, Gidiọn, gbe Jẹfta. Ibruoziẹ nana e jẹ hae wha egbaẹmo kpohọ ẹmo nyae họre ewegrẹ Jihova. Rekọ ere o jọ kẹ Samsin hi. Ọyọvo họ ohwo nọ ọ jẹ hai kpohọ ẹmo. O make jọ nọ ọyọvo ọ jẹ hai kpohọ ẹmo na, Jihova ọ rehọ e riẹ fi ahwo Filistia buobu kparobọ! Ẹvẹ ọ jẹ sai ro ru ei?

Taure a te ti yẹ Samsin, ukọ-odhiwu ọ vuẹ ọsẹgboni riẹ nọ ọmọ na ọ te jọ Nazaraet kẹ Jihova. Nọ a yẹe no, a tẹ rehọ iẹe kẹ Jihova re o ru iruo riẹ. Fikiere, ọ nware eto riẹ vievie he, keme ahwo nọ a rrọ Nazaraet a rẹ nware eto ho. Yọ evaọ oke yena kpobi nọ o je gine ro ru oware nọ Nazaraet a re ru na, Jihova ọ ghale riẹ gaga. Ọ kẹ riẹ ogaga nọ u vi ogaga. U wo oke jọ dede nọ Samsin ọ rehọ abọ gheghe za okpohrokpo kpohọ ekẹ ivẹ, ere o ro kpei no! Evaọ oke yena, ahwo Filistia a jẹ rọsuọ ahwo Izrẹl. Yọ Samsin ọ jẹ rọ ogaga nọ Ọghẹnẹ ọ kẹ riẹ họre ahwo Filistia.

U wo oke jọ nọ ahwo Izrẹl a gba Samsin abọ gbe awọ, a tẹ rehọ iẹe kẹ ahwo Filistia fiki ozọ nọ u je mu ai. Rekọ Samsin ọ tẹ sawo ifi na no wọhọ ẹsenọ e rrọ ilulu gheghe. Ọ tẹ rehọ onwa agba eketekete gheghe kpe ahwo Filistia nọ a bu te odu ọvo (1,000) soso fihọ otọ. Evaọ ẹdẹ ọfa nọ Samsin ọ jọ okpẹwho Gaza, ewegrẹ riẹ a te dhere jẹ hẹrẹ iẹe inọ a re kpei no taure oke o tẹ te ke. Rekọ Samsin ọ tẹ kpama evaọ udevie aso. O te wolo ethẹ ilogbo unuẹthẹ okpẹwho na fihọ otọ, te ekpọ ivẹ nọ e rrọ tabọ tabọ na, gbe ọkpọ nọ a ro where ethẹ na. O te viabọ họ ai fihọ ẹkoko. Ọ tẹ wọ ai kpohọ obehru ugbehru nọ ọ kẹle Hebrọn, nọ o rehọ emaele ọgbagbihrẹ (37) thabọ no okpẹwho na (koyehọ ikilomita 60).

Unuẹse buobu Samsin o dhesẹ akpọ kẹ ahwo Filistia na, yọ a jẹ sai ru ei oware ovo ho. Ahwo Filistia na a wo eghẹnẹ nọ a jẹ gọ, wọhọ Degọn. Rekọ Samsin ọ rọ eware nọ o ru dhesẹ nọ eghẹnẹ yena e sai ru odibo Jihova oware ọvo ho. Rekọ uwhremu na, ahwo Filistia na a tẹ ruẹ edhere jọ nọ a rọ ruọ Samsin oma. A rehọ aye nọ a re se Dilaela ruọ ẹe oma.

Aye na ọ dhẹ ruọ Samsin oma, o te you rie gaga. Rekọ aye na ọ jọ ohwo ẹghẹ, o te vivie Samsin. Nọ ahwo Filistia a ta kẹe nọ a rẹ kẹe ugho re ọ vuẹ ae oware nọ o be kẹ Samsin ogaga ulogbo riẹ na, ọ tẹ rọwo. O te je dhe Samsin ẹtẹtẹzẹ. Ukuhọ riẹ, o tẹ vẹso Samsin no. Ọ tẹ vuẹe oware nọ o jẹ kẹe ogaga. Ọ ta kẹe nọ otẹrọnọ a nware eto riẹ, ogaga riẹ na o re noi oma no, o ve zihe ruọ ohwo gheghe. Nọ Samsin ọ vuẹ Dilaela no, Dilaela ọ tẹ jẹ hẹrẹ bẹsenọ owezẹ o re su ei no. Kẹsena o te se ohwo jọ ze re o bru eto ithethei riẹ na no. Ebaibol na ọ ta nọ “Jihova ọ tẹ nyase iẹe ba no.” Ere ogaga nọ Samsin o wo na o ro noi oma. Ahwo Filistia a tẹ họrọ ruọ eva, a te mu Samsin. A te vre ibiaro riẹ no.

Ukuhọ riẹ, ewegrẹ Samsin a te zihe iei ruọ ọnọ o re wuhu eka rọkẹ ae. Yọ iruo na e jọ gaga. Eva e tẹ jẹ were ahwo Filistia na. Keme ohwo nọ ọ jọ ọwegrẹ ologbo rai vẹre o zihe ruọ ọrigbo gheghe no nọ a rehọ egbregba ekọpa gba. Fikiere a te se ehaa nọ a te rọ kẹ ẹdhọ rai nọ a re se Degọn ọghọ. Nọ ẹdẹ na o te, idu ahwo buobu a te kokohọ etẹmpol ologbo rai jọ. Ahwo nọ a kokohọ obehru uwou na ẹdẹ yena a te oware wọhọ idu esa (3,000). Fikiere ahwo Filistia a tẹ ta nọ a rehọ Samsin ze, re o ru eware ehwẹ kẹ ai. A tẹ ginẹ rehọ Samsin ze. A tẹ rehọ iẹe dikihẹ udevie ipila ilogbo ivẹ nọ i kru uwou na. Whaọ evaọ oke yena yọ Samsin obruoziẹ na o kurẹriẹ no. Yọ eto riẹ i muhọ edi ze no.

Nọ o fi abọ họ ipila na no, ọ tẹ lẹ se Jihova re ọ wariẹ kẹe ogaga. Ọ lẹ nọ: “Kareghẹhọ omẹ re whọ kẹ omẹ ogaga, ivie, ẹsiẹvo nana ọvo, O Ọghẹnẹ.” Kẹsena o te bo nọ: “Jọ mẹ avọ ahwo Filistia na a gbe whu!” Ere Samsin ọ rọ rehọ ogaga riẹ kpobi tunye ipila ilogbo na, i te muhọ ẹvẹ. Taure ahwo Filistia a tẹ te dhẹ ze ti kru ei, etẹmpol na soso o te zurie kie ruru ai. Onana họ oware urere nọ Samsin ọ rehọ ogaga ulogbo riẹ nọ Ọghẹnẹ ọ kẹ riẹ ru. Ewegrẹ Ọghẹnẹ nọ o kpe evaọ ẹsiẹvo yena ọvo i bu vi enọ o kpe taure oke yena o te ti te.

Nọ ikpe-udhusoi buobu e vrẹ nọ, Pọl ukọ na o kere kpahe ezae nọ i wo ẹrọwọ ọgaga. O kere kpahe ejọ nọ, “dede nọ a ga ha a ru rai jọ egba.” Yọ taure o te ti kere ẹme yena, ọ fodẹ Samsin nọ ọ jọ obruoziẹ nọ ọ gudu na.—Hib. 11:32-34.

Se iku Ebaibol na:

• Ibruoziẹ 13:1–16:31

Onọ nọ a rẹ ta ẹme kpahe:

Eme gbe eme Samsin o ru ro dhesẹ nọ ọ gudu?

Gbẹ Kiẹ Kodo

1. 1. Uzi Ọghẹnẹ o ta nọ Nazaraet o te dhobọte ori yọ o zue omariẹ no. Kọ fikieme Samsin ọ gbẹ sae rọ jọ Nazaraet nọ ọ maki dhobọte ahwo nọ a whu no? (w05 1/15 30 ¶1–31 ¶1)

   Uyo ra

2. 2. Okenọ Samsin ọ wọ ethẹ unuẹthẹ okpẹwho na no Gaza kpobọ Hebrọn na, eme u dhesẹ nọ ogaga Ọghẹnẹ ọ sai ro ru ei? (w04 11/1 15 ¶7-8) Uwoho 1

   Uyo ra

   

3. 3. Fikieme ma sae rọ ta nọ o wọhọ nọ ohwo Izrẹl Dilaela ọ jọ? (w05 3/15 28 ¶3)

   Uyo ra

4. 4. Fikieme Samsin ọ rọ lẹ nọ ọ gwọlọ ru ahwo Filistia kele fiki “ubiẹro ovo” riẹ “evaọ usu ibiaro ivẹ” riẹ nọ a vre na? (Ibr. 16:28; it “Samsin” ¶10)

   Uyo ra

Roro Kpahe Eware nọ Who Wuhrẹ Noi Ze

• Dilaela o kpokpo Samsin te epanọ ọ rọ vuẹe oware nọ u fo nọ ọ rẹ vuẹe he. Eme ekpako ukoko avọ eyae rai a rẹ sai wuhrẹ no onana ze? Uwoho avọ 2

  Uyo ra

  

• O make rọnọ oware jọ o thọ Samsin obọ yoyoma, Jihova ọ rehọ e riẹ ru iruo ilogbo uwhremu na. Otẹrọnọ oware o thọ Oleleikristi jọ obọ nẹnẹ, ẹvẹ oriruo Samsin ọ sai ro fiobọhọ kẹe?

  Uyo ra

• Ẹvẹ whọ sae rọ rehọ aro kele Samsin gudu evaọ uzuazọ ra?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Samsin nọ a tẹ kpare iẹe ze no?

  Uyo ra

Gbe Wuhrẹ Eware Efa

Wuhrẹ emọ ra oware nọ o lẹliẹ Samsin jọ omọvo ahwo nọ a mae goma evaọ akpọ na.

“Ẹzi Ọfuafo Ọ Kẹ Samsin Ogaga” (ijwis uzoẹme avọ 14)

Eware efa vẹ ma rẹ sai wuhrẹ no iku Samsin na ze?

“Rẹroso Jihova Epanọ Samsin Ọ Rẹroso Ẹe” (w23.09 2-7)