Ọ Gudu jẹ Yọroma

NỌ OHWO ọ tẹ make gudu, ọ rẹ yọroma ghele. Ọ gbẹ be yọroma ha, ọ sai mu eware ru, u ve fi ei họ uye. Gidiọn ọ gudu, rekọ ọ jẹ yọroma re. Evaọ oke Gidiọn, yọ ahwo Izrẹl a wariẹ nyasiọ Jihova ba no. Fikiere Jihova ọ tẹ kuvẹ re ahwo Midian a vẹruọ otọ na, a te je gboja kẹ ae. Ahwo Izrẹl a gbẹ jẹ sai tube vu eware nọ a kọ fihọ idhu rai hi. Fikinọ Gidiọn ọ gudu, o gbe je ru iruo re ọ sae ko ahwo uwou riẹ. Rekọ ọ jẹ yọroma ru ere. O re dhere oria nọ a re jo ru udi re ọ tehe iwhiti no igbe rai. O sae jọ nọ oria nana yọ eghogho ologbo nọ a tọ fihọ utho.

Ahwo Izrẹl a te mu Jihova họ ẹlẹ inọ o fiobọhọ kẹ ae. Fikiere Jihova o te vi ọruẹaro jọ bru ae re ọ kareghẹhọ ae oware nọ ọ rọ nyasiọ ae ba. Kẹsena, o te vi ukọ-odhiwu bru Gidiọn re o siwi ahwo Riẹ. Gidiọn ọ tẹ vuẹ ukọ-odhiwu na nọ o dhesẹ oka jọ kẹe. Ukọ-odhiwu na ọ rọwo, o te ru oware igbunu jọ. O ru re erae e mahe idhe nọ Gidiọn o dhe. Nọ onana o via no, ukọ-odhiwu na ọ tẹ rayẹ se iẹe ba. Aso ẹdẹ yena, Jihova ọ tẹ ta kẹ Gidiọn nọ o kporo agbada-idhe Bale fihọ otọ, o ve je ko ọkpọ ọrẹri nọ ọ rrọ akotọ riẹ no. Kẹsena ọ vẹ bọ agbada-idhe kẹ Jihova re o dhe idhe fihọ iẹe kẹe. Gidiọn o ru oware nọ Jihova ọ ta kẹe na. Rekọ fikinọ ozọ ọsẹ riẹ gbe ezae okpẹwho na u je mu ei, o te ru ei evaọ aso re a gbẹ ruẹ e riẹ hẹ.

Nọ Gidiọn o ru eware yena nọ i dhesẹ nọ ọ gudu no, u gbe kri hi, egbaẹmo Midian, erọ Amalẹk, gbe erọ ahwo obọ Ovatha-Ọre nọ a rrọ buobu gaga a te kuomagbe. A tẹ wọ ẹmo bru ahwo Izrẹl ze. A vọ ukiekpotọ Jezrẹl na soso wọhọ owa ebaka-ẹkpẹ. Ẹzi Jihova ọ tẹ ruọ Gidiọn oma. O te vi ahwo kpohọ erua sa-sa evaọ Izrẹl re a zizie ezae nọ i re kpohọ ẹmo na. Rekọ fikinọ Gidiọn ọ rẹ yọroma, ọ tẹ yare Jihova nọ o ru eware igbunu ivẹ jọ ro dhesẹ kẹe nọ ọ rrọ kugbei. Jihova o wo odiri kẹ Gidiọn, o te ru epanọ ọ yare na. Aso ẹdẹ yena nọ Gidiọn o fi uvovo họ oria nọ a rẹ jọ si ibi no igbe ekakọ na, Jihova o te ru nọ igrigri i ro kie fihọ uvovo na vo no, rekọ otọ na soso o jọ yaya. Evaọ aso ọfa, Jihova o te ru nọ uvovo na o rọ jọ yaya, rekọ igrigri i ru otọ na soso fihọ vuavo.

Eware igbunu nọ Ọghẹnẹ o ru na e kẹ Gidiọn udu. O te su ogbaẹmo riẹ re a wọ ẹmo bru ewegrẹ rai na. Ahwo Gidiọn a bu tere he nọ a tẹ rehọ ae wawo ewegrẹ na. Ezae idu ọgbagbivẹ (32,000) ọvo a jọ kugbe Gidiọn, rekọ ewegrẹ rai na a bu te egbaẹmo idu udhozeza gbe ikpegbisoi (135,000). Nọ Gidiọn avọ egbaẹmo riẹ a kokohọ Eyeri-ame Herọd, Jihova ọ tẹ ta kẹ Gidiọn nọ egbaẹmo riẹ na i bu hrọ! Jihova ọ tẹ vuẹ Gidiọn nọ ọ ta kẹ egbaẹmo kpobi nọ ozọ u bi mu inọ a zihe kpo. Egbaẹmo idu ikpe (10,000) ọvo i te kiọkọ. Rekọ Jihova ọ tẹ ta nọ ahwo na a gbe bu hrọ ghele. Jihova ọ tẹ ta kẹ Gidiọn nọ o ru oware jọ re ọ riẹ ahwo nọ a ti lele iei kpohọ ẹmo na. Ọ ta kẹe nọ o muẹrohọ ahwo na nọ a be da ame na. Ahwo kpobi nọ a kigwẹ totọ, nọ a vovao tu ame na be da, ọ ta kẹ ae nọ a zihe kpo. Rekọ egbaẹmo na jọ a je muẹrohọ otọ nọ a be da ame na. A ruwẹ, a tẹ robọ sẹrẹ ame da yọ a bi rri wariẹ re a riẹ oware nọ o be via. Egbaẹmo nana nọ i muẹrohọ otọ na Jihova ọ salọ re a kpohọ ẹmo na. Fikiere, egbaẹmo egba esa (300) ọvo e rrọ kugbe Gidiọn obọnana!

Gidiọn ọ tẹ be ruẹrẹ oma kpahe ududu re a kpohọ ẹmo na. Jihova o ru eware efa ro dhesẹ kẹe nọ ọ rrọ kugbei. Ọ ta kẹe nọ ọ lẹlẹ nyaruọ evuẹ ewegrẹ rai na evaọ aso. Gidiọn o te gine ru ere. O te yo nọ ọgbaẹmo jọ ọ jẹ ta ewezẹ nọ ọ wezẹ kẹ omọfa. Ewezẹ na i dhesẹ nọ ahwo Izrẹl a ti fi ẹmo na kparobọ. Ere Jihova o ro ru udu Gidiọn ga. O te zihe bru egbaẹmo riẹ, ọ tẹ ta kẹ ae nọ a lele iei re a ru oware nọ o ti ru. Ere a ti ro fi ẹmo na kparobọ. Evaọ aso, Gidiọn avọ egbaẹmo riẹ a tẹ wariẹ evuẹ ewegrẹ rai na họ. Gidiọn avọ ahwo riẹ na a wha ikpẹ, ithẹ-ame ilogbo, gbe enware. Nọ Gidiọn ọ kẹ ae oka, a te kporo enware na je kpe ithẹ ilogbo na, yọ a kru ikpẹ na họ abọ rai. Kẹsena a te bo nọ: “Ọgbọdọ Jihova avọ ọrọ Gidiọn!” Oware nọ a ru na o lẹliẹ ewegrẹ na riẹ nọ a vẹruọ ae je ko ai họ no. O tẹ wha ozighi họ ewegrẹ na oma! Jihova o te ru nọ a je ro kpe omoma rai. Egbaẹmo idu ikpegbisoi (15,000) ọvo e zọ, a te muhọ dhẹ.

Gidiọn o te le ai. Ukuhọ riẹ, o te fi ewegrẹ na kparobọ je kpe isu rai no. O te je dhesẹ akpọ kẹ amọfa jọ re fikinọ a rọwo kẹ ọyomariẹ avọ egbaẹmo riẹ nọ a be họre ewegrẹ Jihova emu hu. Ahwo na a tẹ jẹ gwọlọ rọ Gidiọn mu ovie rai. Rekọ Gidiọn ọ rọwo ho fikinọ o wo omaurokpotọ. Ọ ta nọ: “Jihova họ ọnọ o ti su owhai.” Ọghẹnẹ ọ ghale Gidiọn, keme ọ gudu, ọ tẹ jẹ yọroma. Evaọ oke nọ ọ rọ jọ obruoziẹ evaọ Izrẹl na, udhedhẹ o jọ ẹkwotọ na, yọ ọ rria tọ. Pọl ukọ na dede ọ fodẹ e riẹ evaọ okenọ ọ jẹ ta kpahe ezae gbe eyae nọ i wo ẹrọwọ ọgaga.—Hib. 11:32.

Se iku Ebaibol na:

• Ibruoziẹ 6:1–7:22; 8:4-23, 28

Onọ nọ a rẹ ta ẹme kpahe:

Eme gbe eme Gidiọn o ru ro dhesẹ nọ ọ gudu?

Gbẹ Kiẹ Kodo

1. 1. Ọgbaẹmo na ọ jọ ewezẹ ruẹ “ukulu ebrẹdi ebali nọ o rrọ gheghelie.” Fikieme ma sae rọ ta nọ “ukulu ebrẹdi ebali” na u gine dhesẹ ogbaẹmo Gidiọn? (Ibr. 7:13; it “Ebali” ¶7)

   Uyo ra

2. 2. Fikieme edo enware egba esa (300) u ro ru ozọ mu ahwo Midian jẹ wha ozighi họ ae oma? (it “Uzei Hayo Onware” ¶3) Uwoho 1

   Uyo ra

   

3. 3. Eme Gidiọn avọ ogbaẹmo riẹ a ru re a sai fi ahwo Midian kparobọ? (w04 11/1 16 ¶9-10) Uwoho avọ 2

   Uyo ra

   

4. 4. Eware jọ vẹ evaọ Ebaibol na i dhesẹ nọ iku nana ginọ uzẹme? (w05 4/15 32)

   Uyo ra

Roro Kpahe Eware nọ Who Wuhrẹ Noi Ze

• Gidiọn o su ahwo Ọghẹnẹ kpohọ ẹmo nọ a jọ fi kparobọ. Ghele na, o wo omaurokpotọ, ọ tẹ jẹ ta ẹme dhedhẹ kugbe amọfa. (Ibr. 8:1-3) Ẹvẹ ahwo nọ a wuzou uviuwou gbe ekpako ukoko a sae rọ rehọ aro kele Gidiọn nọ ohwo jọ o te ru oware nọ o dha rai eva?

  Uyo ra

• Oke vẹ o sae rọ gwọlọ nọ ma gudu jẹ yọroma? Uwoho avọ 3

  Uyo ra

  

• Ẹvẹ whọ sae rọ rehọ aro kele Gidiọn gudu evaọ uzuazọ ra?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Gidiọn nọ a tẹ kpare iẹe ze no?

  Uyo ra

Gbe Wuhrẹ Eware Efa

Nọ a tẹ kẹ owhẹ uvẹ iruo jọ evaọ ukoko na, ẹvẹ whọ sae rọ rehọ aro kele Gidiọn?

‘Areghẹ Ọ rẹ Jọ Rọ Kẹ Enọ E Kare Omorro’ (w00 8/1 26-28 ¶11-15)

Rọ ifoto iku Ebaibol nana wuhrẹ emọ ra re a fievahọ Ọghẹnẹ.

“Jihova Ọ Kẹ Gidiọn Ẹgba” (ijwis uzoẹme avọ 13)