Ọ Salọ Jihova Siọ Ahwo Riẹ Ba

OGBERẸ jọ nọ a re se Rehab ọ jẹ rria uwou nọ o rrọ ugbẹhẹ Jẹriko evaọ oke anwae. A jọ Ebaibol se okpẹwho nana “okpẹwho iriẹ na.” Yọ uvo o jẹ hai mu okpẹwho na ziezi. Nọ Rehab ọ tẹ jọ unwido riẹ rri otafe okpẹwho na, ọ rẹ sae ruẹ epanọ o woma te. (Izie. 34:3) Rekọ nọ ọ tẹ nya lahwe evaọ obeva okpẹwho na, ahwo nọ a si ovao họ nọ ozọ u bi mu ọvo ọ jẹ ruẹ. Ahwo ẹwho na a riẹ nọ Jihova ọ rrọ kugbe ahwo Izrẹl. Rekọ ọ be te raha okpẹwho Jeriko no. Yọ u gine fo nọ a rẹ raha ae kufiẹ.

Evaọ oke yena yọ orẹwho Izrẹl a fa evuẹ kẹle okpẹwho na. Ikpe udhuvẹ nọ e vrẹ, Jihova o siwi ahwo riẹ no obọ ogbaẹmo Fẹro okenọ o ru Fẹro avọ egbaẹmo riẹ da ame whu evaọ Abade Ọwawae na. Yọ dede nọ ahwo Izrẹl a jọ ahwo gheghe nọ a je ghoro evaọ udhude, u ri kri hi nọ Jihova o ro ru ai fi ivie egaga ivẹ Amọ kparobọ. A fi ovie Saehọn avọ ovie Ọg kparobọ. Obọnana, a be wọ ze Jẹriko wọhọ epanọ Jihova ọ ta kẹ ae, re a raha iẹe kufiẹ fiki umuomu nọ a bi ru!

Rehab ọ riẹ nọ ahwo riẹ a je ru eware imuomu. Makọ ọyomariẹ dede ọ jọ ogberẹ. Yọ o wọhọ nọ oghẹrẹ uzuazọ nọ o je yeri na o were riẹ hẹ. Oware nọ o wuhrẹ kpahe Jihova u ru rie wo ẹruore, u ru ozọ mu ei hi. Jihova yọ Ọghẹnẹ nọ ọ rẹ thọ ahwo riẹ je bru ọghọ họ ae oma. Ọ wọhọ eghẹnẹ ahwo Kenan he. Ọ tẹ gwọlọ nọ ọ rẹ kẹle Ọghẹnẹ nana nọ a re se Jihova na. Ọghẹnẹ nọ ọ rrọ fuafo, nọ o re kienyẹ ohwo ho, jẹ thọ ahwo riẹ.

Aso ẹdẹ jọ, erara ivẹ e tẹ nyaziọ uwou riẹ re a wezẹ etẹe asohẹrioke. Nọ Rehab o muẹrohọ ae ziezi, ọ tẹ nwane riẹ nọ ekiotọ Izrẹl a rrọ! Yọ orọnikọ ọye ọvo o vuhu ezae na ha. Keme ovie Jẹriko dede o vi ahwo bru ei re ọ rehọ ezae ivẹ na lahwe no uwou riẹ ze. O gwọlọ mi Rehab nọ ọ rẹ jiroro jọ. Sọ abọ ahwo riẹ nọ a rrọ muomu na ọ rẹ jọ, hayo abọ Jihova. Yọ iroro nọ ọ jẹ kpobi i ti dhesẹ oghẹrẹ nọ uzuazọ riẹ o te jọ no umuo ẹdẹ yena vrẹ.

Rehab ọ gbaudu salọ Jihova. O te si ekiotọ na no fihọ obọ ehru uwou riẹ. Ọ tẹ vuẹ ezae nọ ovie na o vi ze na nọ a nyavrẹ no. Nọ ahwo ovie na a nyavrẹ no, o te kpobọ ehru uwou na. Ọ tẹ vuẹ ezae Izrẹl na oware nọ ọ rọ ko ai dhere na. Ọ ta kẹ ae nọ: “Mẹ riẹ nọ Jihova ọ te kẹ owhai ẹkwotọ na.” Rehab o fi ẹrọwọ họ Ọghẹnẹ rai! Ọ tẹ vuẹ ezae na ẹme jọ nọ o kru rai udu ga. Ọ ta kẹ ae nọ ozọ ahwo Izrẹl u bi mu ahwo Jẹriko, yọ udu u no rai awọ no. Ọ tẹ lẹ ekiotọ na nọ okenọ Jihova ọ te rọ ahwo Izrẹl raha okpẹwho na, jọ a siwi uzuazọ riẹ.

Rehab o siwi uzuazọ ekiotọ na. Yọ a ruẹ nọ abọ Jihova ọ rrọ. A tẹ rọwo nọ a re siwi uzuazọ riẹ wọhọ epanọ ọ lẹ rai na. A ti siwi Rehab avọ ahwo uviuwou riẹ. Rekọ re a sae zọ, ọ rẹ vuẹ ohwo ọvo kpahe oria nọ ekiotọ na e rrọ họ. O re thuru ufi ọwawae fihọ unwido riẹ nọ o rrọ ugbẹhẹ okpẹwho na. Yọ a rẹ jẹ jọ eva uwou riẹ evaọ etoke ẹmo na.

Rehab ọ tẹ jọ unwido rehọ ufi si ezae na kpotọ, ere a rọ vabọ. Kẹsena o te ru oware nọ ekiotọ na a vuẹ riẹ nọ o ru dẹẹ. O thuru ufi ọwawae fihọ unwido riẹ. Yọ ọ vuẹ uvumọ ohwo kpahe ekiotọ na ha. Oware nọ o ru na u dhesẹ nọ ọ gudu, keme ahwo ẹwho riẹ a te yo kpahe iẹe, a sai kpei no. Yọ o koko ahwo uviuwou riẹ họ uwou riẹ wọhọ epanọ ekiotọ na a vuẹ riẹ. Okenọ Rehab o yo nọ Jihova o ru ame Ethẹ Jọdan seba esu re ahwo Izrẹl a sae fa vrẹ, ma riẹ nọ u mu rie ẹro ziezi nọ emamọ iroro ọ jẹ na. Ogbaẹmo Izrẹl o nya okpẹwho na wariẹ họ evaọ edẹ ihrẹ. Yọ ozọ o jọ ahwo ẹwho na oma gaga. Nọ ẹdẹ avọ ihrẹ o te, izerẹ na i te fu izei na, ahwo Izrẹl a te bo ubo ẹmo. Ere igbẹhẹ okpẹwho na e rọ fia fihọ otọ. Rekọ Rehab avọ ahwo uviuwou riẹ nọ a jọ eva uwou riẹ a zọ!

Nọ ẹmo na o kuhọ no, ekiotọ na a tẹ rehọ Rehab avọ ahwo uviuwou riẹ ruọ otafe. Omoria jọ nọ o kiọkọ evaọ ugbẹhẹ na nọ o kie he, uwou riẹ o jọ. A dhobọte Rehab avọ ahwo uviuwou riẹ hẹ wọhọ epanọ Joshua ọ ta. Nọ oke o be nya na, Rehab o te ti zihe ruọ ohwo Izrẹl no. Ohwo Izrẹl jọ ọ tẹ rehọ iẹe, a te ti yẹ emọ. Ikpe buobu nọ i lele i rie, ọzae nọ ọ mae gudu nọ ọ rria akpọ na no o no uyẹ riẹ ze. Ọye họ Jesu Kristi. (Mat. 1:5, 16) Jihova o ku eghale ku Rehab fikinọ o wo ẹrọwọ, ọ tẹ jẹ gudu.

Se iku Ebaibol na:

• Joshua 2:1-24; 5:1; 6:14-25

• Ahwo Hibru 11:30, 31

• Jemis 2:24, 25

Onọ nọ a rẹ ta ẹme kpahe:

Eme gbe eme Rehab o ru ro dhesẹ nọ ọ gudu?

Gbẹ Kiẹ Kodo

1. 1. Gbiku oghẹrẹ uzuazọ nọ Rehab o yeri evaọ Jẹriko. (w13 11/1 12 ¶4–13 ¶1)

   Uyo ra

2. 2. Ẹvẹ ma rọ riẹ nọ orọnọ fiki ọfariẹ-ogbe ekiotọ na a ro kpobọ uwou Rehab ho? (it “Ogberẹ” ¶16)

   Uyo ra

3. 3. Fikieme ẹbe eflase ọ rọ jọ obọ ehru uwou Rehab? Kọ eme a jẹ hae rọ ẹbe eflase ru? (it “Eflase” ¶2-4) Uwoho 1

   Uyo ra

   

   Thanks for your interest in my photos/Moment Open via Getty Images

4. 4. Fikieme o gbẹ rọ thọ họ inọ Rehab ọ viẹ ahwo ovie na họ? (w04 12/1 4 ¶1) Uwoho avọ 2

   Uyo ra

   

Roro Kpahe Eware nọ Who Wuhrẹ Noi Ze

• Fikieme o rọ gwọlọ nọ Rehab ọ rẹ gudu re ọ sae siọ igberẹ-ibro ba, o ve kuomagbe ahwo Izrẹl gọ Jihova? Eme ohwo nọ a bi wuhrẹ Ebaibol ọ sai wuhrẹ no iku riẹ ze?

  Uyo ra

• Oghẹrẹ ọfa vẹ whọ sae rọ rehọ aro kele Rehab gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Rehab nọ a tẹ kpare iẹe ze no?

  Uyo ra

Gbe Wuhrẹ Eware Efa

Eme ma jọ iku Rehab na wuhrẹ kpahe oware nọ u fo nọ ma re ru re ma sae zọ evaọ ẹdẹ Jihova?

“Diẹse Whọ te Jọ Okenọ Akpọ na O ti Kuhọ?” (w09 5/15 6-8)

Rọ ifoto iku Ebaibol nana fiobọhọ kẹ emọ ra re a jọ iroro rai ruẹ eware nọ e via evaọ iku na.

“Rehab O Ru Eware nọ A Ta Kẹe” (ijwis uzoẹme avọ 11)