O Rri Obemu Vievie He

SERA o wo ọzae nọ a re se Abraham, yọ o you ọzae riẹ na gaga. A jẹ rria Ọr nọ ọ rrọ ẹkwotọ Shaena. Ọr ọ jọ okpẹwho nọ ọ jẹ hai zurie nọ a di ogba wariẹ họ. Ọ jọ akotọ Ethẹ Yufretis ologbo na. Ahwo nọ a jọ okpẹwho na a duomahọ ẹdhọgọ le no, rekọ Abraham o je ru ere he. Jihova Ọghẹnẹ uzẹme na ọ jẹ gọ. Sera omariẹ o fi ẹrọwọ họ Ọghẹnẹ uzẹme na re. Rekọ ẹdẹ jọ, oware jọ o tẹ via nọ o dawo ẹrọwọ riẹ gbe epanọ ọ gudu te.

Abraham ọ ta kẹe nọ Jihova ọ ta ẹme jọ kẹ ọyomariẹ! O sae jọ nọ eva e were Sera. Rekọ oware nọ Jihova ọ ta kẹ Abraham nọ o ru na o gbẹdẹ gaga. A te nyasiọ uwou gbe imoni rai ba ẹwho Ọr, a vẹ kwa kpohọ ugbothabọ jọ. Ekamẹle a te rọ kwa eware rai jẹ nya onya na. Yọ iwou-udhu a te rria. Sera ọ gbẹ te rria okpẹwho nọ a di ogba wariẹ họ nọ a bi rou hu. Ọ gbẹ te rria okpuwou nọ o wo ighẹ lelele he, hayo nọ ame gbe emamọ eware efa e rrọ. Emamọ eki nọ ọ jẹ hae jọ dẹ eware na ọ gbẹ te jariẹ hẹ! Eware nọ Sera ọ be te nyase ba na e rrọ buobu. O make rrọ ere na, ọ rọwo nọ ọ rẹ nya. Fikinọ o fi ẹrọwọ họ Jihova, ọ tẹ kwa eyero akpọ riẹ. Nọ o yere imoni gbe egbẹnyusu riẹ no, o te lele Abraham ruọ edhere bi kpohọ obonọ a riẹ hẹ.

Sera o dhesẹ nọ ọ gudu evaọ edhere ọfa jọ re. Pọl ukọ na o kere kpahe iẹe avọ ọzae riẹ nọ: “O hae jọ nọ a jẹ kareghẹhọ oria nọ a no ze na, a hai ti wo uvẹ nọ a re ro zihe.” (Hib. 11:15) Sera ọ hae sai roro kpemu kpahe akpọ nọ o je yeri vẹre evaọ obọ Ọr gbe epanọ ọ jẹ hae wezẹ tehe ezọ di fiki oghẹrẹ nọ ẹwho na ọ foma te. Rekọ ọ gudu, o rri obemu vievie he.

Nọ a te obọ Kenan no, Sera ọ tẹ ruẹ nọ ethẹ ọvuọvo ọ rrọ obei hi nọ ọ wọhọ ọrọ Yufretis, nọ ihreki a re ro bi eware no ekẹloma gbe ugbothabọ ze te zẹ. Fikiere nọ ohọo u muhọ emu evaọ Kenan, o tẹ gba ae họ nọ a rẹ kwa no etẹe. Sera ọ rọ uvẹ yena si ikẹ hayo tẹzẹ ọzae riẹ hẹ inọ a zihe kpobọ Ọr nọ a no ze. Ukpoye, ọ rọwo nọ o re lele Abraham kpobọ Ijipti nọ ọ rrọ ofẹ ọfa.

Sera ọ jọ aye nọ o wo erru gaga. Fikiere ozọ u je mu Abraham nọ a sae rọ fiki riẹ kpe ọyomariẹ no re a rehọ iẹe. Abraham ọ tẹ ta kẹ Sera nọ o ru wọhọ ẹsenọ ọ rrọ oniọvo ọmọtẹ riẹ ọvo. Rekọ oyena o whaha oware ovo ho nọ osu Ijipti o yo kpahe epanọ Sera o wo erru te. Ọ tẹ ta nọ a rehọ Sera mi Abraham ziọ obọ uwou uvie riẹ. Ẹsejọhọ uzuazọ nọ ahwo a je yeri evaọ ighẹ ovie na o mai kiehọ. O tẹ jẹ foma vi onọ a je ro ghoro no oria ruọ oria, be rria iwou-udhu na. Kọ Sera ọ dhẹ siọ Abraham ba bru osu Ijipti na re o yeri uzuazọ nọ a rẹ jọ ruẹ uye he? Ijo. Ọ gudu, ọ tẹ talamu ọzae riẹ, yọ Jihova ọ thọ riẹ! U kri hi, o te zihe bru ọzae oyoyou riẹ na.a

Jihova ọ ya eyaa nọ orẹwho ulogbo o ti no oma Abraham ze. Rekọ Sera ọ re sai yẹ ọmọ họ. Ọ jẹ sai dihọ họ. Onana o jẹ kẹe uye gaga. Rekọ nọ ikpe buobu e vrẹ no, Jihova o te ru oware jọ kẹe. O make rọnọ o te ikpe udhone-gbikpe (90) no, Jihova ọ kẹ riẹ oware nọ o jariẹ oja gaga na. O yẹ ọmọzae! Jihova ọ ta nọ a se ọmọ na Aiziki, onọ otofa riẹ o rrọ “Ehwẹ.” Odẹ na u fo ọmọ na keme okenọ Abraham avọ Sera a yo nọ a ti yẹ ọmọzae, a hwẹ jẹ ghọghọ. U te je mu Sera ẹro nọ ahwo a ti lele iei ghọghọ nọ a te yo oware igbunu nọ Jihova o ru kẹe.

Sera ọ rria tọ te epanọ ọ sae rọ yọrọ ọmọ riẹ na te ọzae nọ o wo emamọ uruemu. Ọ sai ru onana fikinọ ọ jọ emamọ oni, ọ tẹ jẹ thọ ọmọ riẹ na ududu. Yọ bẹsenọ o ro whu, ọ rọwo rri obemu kpohọ uzuazọ akpọriọ nọ o je yeri vẹre he. Ukpoye, obaro akpọ nọ uye o te jọ họ, ọ jẹ tẹrovi. Dede nọ Sera avọ uviuwou riẹ a rria akpọ yena nọ Ọghẹnẹ ọ ya eyaa riẹ na evaọ oke yena ha, uviemenẹ a te rria oghẹrẹ akpọ otiọye na!

Se iku Ebaibol na:

• Emuhọ 12:1-20; 15:18; 16:1, 2; 17:3-8, 15-19; 18:9-15; 20:1-17; 21:1-13

• Iruẹru Ikọ 7:1-7

Onọ nọ a rẹ ta ẹme kpahe:

Eme gbe eme Sera o ru ro dhesẹ nọ ọ gudu?

Gbẹ Kiẹ Kodo

1. 1. Kọ o thọ nọ Sera ọ rọ rehọ Abraham nọ ọ jọ ọsọvo riẹ? (wp17.3 12 ¶5, ẹme-obotọ)

   Uyo ra

2. 2. Dhesẹ oghẹrẹ uzuazọ nọ o sae jọ nọ Sera ọ kwa seba evaọ obọ Ọr. (wp17.3 13 ¶3–14 ¶2) Uwoho 1

   Uyo ra

   

   Photograph taken by courtesy of the British Museum

3. 3. Eme u dhesẹ nọ oware areghẹ Abraham o ru evaọ okenọ ọ ta kẹ Sera nọ o du vuẹ ahwo nọ aye riẹ ọ rrọ họ? (wp17.3 14 ¶6–15 ¶2)

   Uyo ra

4. 4. O make rọnọ Sera ọ jẹ romakpotọ kẹ Abraham na, u dhesẹ nọ ọ ta oware nọ o jariẹ eva ha? Ru ei vẹ. (g 1/08 29 ¶4-5) Uwoho avọ 2

   Uyo ra

   

Roro Kpahe Eware nọ Who Wuhrẹ Noi Ze

• Rehọ Sera avọ aye Lọt wawo ohwohwo.

  • Ẹvẹ eware nọ e via kẹ ae i ro tho ohwohwo? (Emu. 12:1; 13:5-7; 19:12, 15)

    Uyo ra

  • Ẹvẹ aimava na a ro wo ohẹriẹ no ohwohwo? (Emu. 19:17, 26; Luk 17:28-32)

    Uyo ra

  • Eme ma rẹ sai wuhrẹ no iroro nọ a jẹ na ze, gbe oware nọ u no iroro rai na ze?

    Uyo ra

• Sera o wo erru gaga, ọzae riẹ ọ tẹ jẹ jọ ọdafe. Didi oriruo o fihotọ kẹ omai evaọ oghẹrẹ nọ u fo nọ ma re rri omamai otẹrọnọ ma wo erru hayo ma fe? (Itẹ 31:30; 1 Tim. 6:17-19)

  Uyo ra

• Ẹvẹ whọ sae rọ rehọ aro kele Sera gudu evaọ uzuazọ ra? Uwoho avọ 3

  Uyo ra

  

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Sera nọ a tẹ kpare iẹe ze no?

  Uyo ra

Gbe Wuhrẹ Eware Efa

Kọ eyae nọ e rọo no ọvo a rẹ sai wuhrẹ no oriruo Sera ze? Manikọ te ezae nọ e rọo no re?

Oware nọ Ma rẹ Sai Wuhrẹ Mi Ai—Sera (6:27)

Wuhrẹ kpahe oghẹrẹ nọ Sera avọ Abraham a je ru ohwohwo nọ o lẹliẹ e rai riẹ nọ a wo adhẹẹ kẹ ohwohwo.

“Whọ jọ ‘Ebruerae Jah’ O Fu Hu” (w23.05 24-25 ¶15-17)