Jehoyada Ọ Gudu

Jezibẹl o yẹ ọmọtẹ jọ nọ a re se Atalaya, yọ ọ geva wọhọ oni riẹ Jezibẹl. Ovie Juda ọye ọ rehọ Atalaya. Nọ ovie na o whu no, ọmọ riẹ o te muhọ esu. Rekọ nọ ọmọ na o whu no, Atalaya ọ tẹ rọ omariẹ mu osu Juda. Kẹsena ọ tẹ gwọlọ nọ o re kpe emezae ovie na kpobi no, makọ iruọmọ obọriẹ dede, re ohwo ọvuọvo ọ gbẹ jariẹ nọ o re mi ei esuo na ha. Ohwo kpobi ọ jẹ dhozọ riẹ.

Ozerẹ okpehru nọ a re se Jehoyada avọ aye riẹ nọ a re se Jehoshẹba a riẹ nọ oware nọ Atalaya o bi ru na u yoma gaga. A te si oruọmọ Atalaya nọ a re se Jehoash no re Atalaya ọ se ẹe ba ekpe no, dede nọ onana o lẹliẹ uzuazọ rai jọ ọza. A tẹ yọrọ Jehoash evaọ obọ etẹmpol na.

Nọ Jehoash o te ikpe ihrẹ no, Jehoyada o te se ahwo Livae na gbe iletu na koko, jẹ vuẹ ae nọ: ‘Wha rou ethẹ etẹmpol na, wha jọ ohwo ọvo ọ ruẹe eva ha.’ Kẹsena Jehoyada ọ tẹ rehọ Jehoash mu ovie Juda, ọ tẹ rehọ etu-uvie ro tu iei. Ahwo Juda kpobi a te bo nọ: “Jọ ovie na ọ rria tọ!”

Nọ Atalaya o yo edo ahwo nọ a bi bo, ọ tẹ họrọ kpobọ etẹmpol na. Nọ ọ ruẹ ovie ọkpokpọ na, o te bo nọ: “Nọ ẹgwae omuomu! Nọ ẹgwae omuomu!” Iletu na a tẹ jabọ kru Atalaya, a te si ei ruọ otafe je kpei no. Kọ ẹvẹ kpahe eware iyoma nọ o ru kpobi no evaọ orẹwho na?

Jehoyada o fiobọhọ kẹ orẹwho na soso reọvọ kugbe Jihova. Ahwo na kpobi a tẹ ya eyaa nọ Jihova ọvo a rẹ gọ. Jehoyada ọ tẹ vuẹ ahwo na re a kporo etẹmpol Bale gbe emedhọ nọ e jọ orẹwho na kpobi fihọ otọ. Ọ tẹ rehọ izerẹ na gbe ahwo Livae mu re a ru etẹmpol na fo, re ahwo a sae wariẹ jọ eva riẹ gọ Jihova. Ọ tẹ rehọ ahwo mu nọ a re rou unuẹthẹ etẹmpol na, re ahwo nọ a fo ho a siọ etẹmpol na ba ẹrro. Kẹsena Jehoyada avọ iletu na a tẹ rehọ Jehoash kpobọ uwou nọ a bọ kẹ ovie na, a tẹ rehọ iẹe keria agbara-uvie na. Eva e tẹ were ahwo Juda gaga. Obọnana a sae gọ Jihova ababọ ozọ Atalaya ovie-aye ọgeva na, yọ a wo ufuoma no egagọ Bale no. Kọ whọ gbẹ ruẹ epanọ udu nọ Jehoyada o wo u ro fiobọhọ kẹ ahwo buobu?