OWARE NỌ MA RẸ SAI RU NỌ EWARE I BI DHE ẸGHẸGHARE NA
Hai Ru Ọghọ
Eware e tẹ rrọ gaga kẹ owhẹ fikinọ eware e be ghare, whọ sai roro nọ who wo oware ovo nọ who re ro ru ahwo ọghọ họ. Rekọ uzẹme riẹ họ, whọ tẹ be daoma ru ahwo ọghọ, u re tube fiobọhọ kẹ owhẹ. Whọ sai ru ọghọ whọ vẹ jẹ sai koko ugho họ ghele.
OWARE NỌ U RO WOMA RE WHỌ HAI RU ỌGHỌ
Eva e rẹ were omai nọ ma tẹ be hai ru ọghọ o tẹ make rọnọ oware nọ ma ro ru ọghọ na u te oware ovo ho. Edọktọ jọ e ta nọ ma tẹ be hai ru ọghọ, u re fiobọhọ kẹ ugboma mai je ru udu te omai otọ ziezi. Wọhọ oriruo, u re ru nọ ma gbẹ rọ ruawa tere he, ru BP mai kpotọ, je fiobọhọ nọ ezo-oma e gbẹ rọ da omai tere he. O sai tube ru nọ ma rẹ rọ hae wezẹ ziezi.
Ma tẹ be hai ru amọfa ọghọ, nọ a te ru omai ọghọ, o gbẹ jọ omai oma oghẹrẹ jọ họ. Howard nọ ọ be rria obọ England ọ ta nọ: “Mẹ avọ aye mẹ ma be daoma hai ru ọghọ kẹ amọfa je fiobọhọ kẹ ae, fikiere nọ a te ru ọghọ kẹ omai, ma re gbe roro ho inọ ma be rọ uye bẹ ae.” Orọnikọ ma re ru ọghọ kẹ ahwo re a ru kẹ omai hi. Rekọ nọ ma tẹ be hai ru ọghọ, ma re wo emamọ egbẹnyusu nọ i re fiobọhọ kẹ omai nọ eware e tẹ ga kẹ omai.
OWARE NỌ WHỌ RẸ SAI RU
Hai ru ọghọ. Whọ gbẹ maki wo tere he, whọ sae jọ umutho nọ who wo na ru ọghọ, o tẹ make rọnọ ememu who there kẹ ohwo. Duncan avọ uviuwou riẹ nọ a be rria obọ Uganda a wo ugho tere he, rekọ a re ru ọghọ gaga. Duncan ọ ta nọ: “K’Ẹdoka k’Ẹdoka, mẹ avọ aye mẹ ma re zizie ohwo jọ ziọ uwou mai te re emu. O rẹ were omai gaga re ma jọ kugbe ahwo.”
Dede nọ ma rẹ kẹ okẹ, u fo nọ ma re ru ei vrẹta ha. Who ru akpọ ga kẹ ahwo uviuwou ra ha fikinọ who bi ru ọghọ.—Job 17:5.
Dao onana: Daoma kẹ ohwo jọ ememu hayo udi. Otẹrọnọ who wo eware jọ nọ whọ gbẹ gwọlọ họ, whọ sae rehọ ae kẹ egbẹnyusu ra hayo ahwo nọ wha gbẹ rrọ oria nọ e gwọlọ e rai.
Gwọlọ idhere efa nọ whọ sai ro fiobọhọ kẹ ahwo. Emamọ eware buobu nọ whọ sai ro ru ọghọ kẹ ahwo, a rẹ rọ ugho dẹ ae he. Wọhọ oriruo, ma sae rọ oke gbe ẹgba mai fiobọhọ kẹ ahwo. Makọ emamọ ẹme nọ o no omai unu ze kẹ ohwo yọ obọdẹ okẹ! Fikiere hai jiri amọfa jẹ ta kẹ ae nọ who you rai.
Dao onana: Lele amọfa ru iruo uwou, ruẹrẹ eware uwou rai, hayo nya uwou kẹ ae. Kere emamọ oware jọ fihọ ekade rọkẹ ogbẹnyusu ra hayo rọ ifonu vi uwou sei, o tẹ make rọnọ who kere sei ọvo nọ who bi roro kpahe iẹe.
Whọ tẹ be hai ru emamọ eware kẹ ahwo, eghale buobu i re te owhẹ obọ.