OWARE NỌ MA RẸ SAI RU NỌ EWARE I BI DHE ẸGHẸGHARE NA

Wo Ẹruore

Evaọ oria nọ whọ be rria, kọ eware e be ghare ọvo yọ igho e riẹ tere he? Kọ whọ be ruawa epanọ whọ te sae rọ kuọ omara gbe ahwo uviuwou ra? O tẹ rrọ ere, ẹsejọhọ who bi roro nọ eware i gbe ti woma ofa ha. Rekọ ghelọ oghẹrẹ nọ eware e ga te kẹhẹ, u fo re who rẹro nọ eware i ti woma keme ẹruore o re fiobọhọ gaga.

OWARE NỌ U RO WOMA RE WHO WO ẸRUORE

Ahwo nọ a wo ẹruore a rẹ rọ abọ muoma ha be hẹrẹ bẹsenọ eware i re woma. Ẹruore na o re fi ọwhọ họ ae oma re a ru oware jọ kpahe ẹbẹbẹ nọ a wo na. Wọhọ oriruo, ahwo nọ a re ru ekiakiẹ a ruẹ no inọ ahwo nọ a wo ẹruore ae a rẹ mai . . .

thihakọ ebẹbẹ
kaki nwene nọ eware i te nwene
ru eware nọ i re fiobọhọ kẹ ae, jẹ whaha eware nọ i re si uye se ai

OWARE NỌ WHỌ RẸ SAI RU

Orọ ọsosuọ, lele ehrẹ Ebaibol nọ e rẹ sai fiobọhọ kẹ owhẹ obọnana. Emamọ ehrẹ buobu e rrọ Ebaibol na nọ e rẹ sai fiobọhọ kẹ owhẹ nọ eware e be ghare kẹdẹ kẹdẹ na. E sai fiobọhọ kẹ owhẹ riẹ oware nọ who re ru obọnana gbe oware nọ whọ rẹ sai ru evaọ obaro nọ eware i te yoma vi ere.

“Erorote ọ te sẹro ra, yọ orimuo ọ te thọ owhẹ.”—Itẹ 2:11.

Ọrọ avọ ivẹ, roro kpahe oware nọ Ebaibol na ọ ta inọ o te via evaọ obaro. Who te vuhumu nọ Ebaibol na yọ obe nọ emamọ ehrẹ buobu e rrọ eva, whọ te gwọlọ sei ziezi re whọ riẹ oware nọ Ebaibol na ọ ta nọ o te via evaọ obaro. Wọhọ oriruo, whọ te jọ Ebaibol ruẹ nọ Ọghẹnẹ ọ gwọlọ “ru eware woma” kẹ omai, jẹ gwọlọ nọ ma “wo ẹruore.” Rekọ ere ọvo ho, o dhesẹ oghẹrẹ nọ ẹruore na o ti ro rugba. (Jerimaya 29:11) Ọghẹnẹ ọ te rọ Uvie riẹ ru eyaa riẹ gba.

EME HỌ UVIE ỌGHẸNẸ, KỌ EME U TI RU?

Uvie Ọghẹnẹ yọ egọmeti nọ o ti su akpọ na soso. (Daniẹl 2:44; Matiu 6:10) Obọ odhiwu o ti su no ze, yọ o ti si uye-oruẹ gbe ọbẹwẹ notọ, udhedhẹ o vẹ te jọ akpọ na yọ ahwo kpobi a te reakpọ kuoma. Eria Ebaibol nọ ma be te fodẹ na i dhesẹ onana via vevẹ.

“Eva e te were owhẹ yọ eware i ti woma kẹ owhẹ.”—Olezi 128:2.

“[Ahwo nọ a te jọ Uvie na] a te ruẹ uye kufiẹ hẹ.”—Aizaya 65:23.

“Emu ọ te dafia evaọ otọakpọ na.”—Olezi 72:16.

Ahwo buobu a riẹ nọ eyaa nana i ti rugba keme u mu rai ẹro nọ Ọghẹnẹ “ọ rẹ sae ta ọrue he.” (Taitọs 1:2) U ti woma re whọ romatotọ se Ebaibol na re whọ ruẹ eyaa nana kẹ omara. Who te ru ere, who ti wo ẹruore nọ o te lẹliẹ owhẹ riẹ oware nọ who re ru evaọ akpọ ọgaga nana, whọ vẹ jẹ ruẹ nọ eware i ti woma evaọ obaro.