OWARE NỌ MA RẸ SAI RU NỌ EWARE I BI DHE ẸGHẸGHARE NA
Rehọ Eware Epanọ Whọ Ruẹ E Rai
Nọ a te bi fi ugho họ eware ẹmẹrera, ma rẹ kaki muẹrohọ họ, maero nọ a te bi fihọ osa nọ a be hwa omai. Rekọ nọ eware e tẹ ghare gaga ẹsiẹvo yọ ugho nọ u bi te omai obọ o gbẹ rrọ epọvo na, o rẹ sai fi awa họ omai oma maero nọ ma te wo uviuwou nọ ma be ko.
U wo oware ovo nọ ma rẹ sai ru kpahe eware nọ i bi dhe ẹghẹghare na ha. Fikiere ma tẹ rehọ eware epanọ ma ruẹ e rai, u re fiobọhọ kẹ omai.
OWARE NỌ U RO WOMA RE WHỌ REHỌ EWARE EPANỌ WHỌ RUẸ E RAI
Nọ ma tẹ rehọ eware epanọ ma ruẹ e rai . . .
ẹsiẹe o rẹ mae lọhọ re udu u te omai otọ. Nọ udu u te te omai otọ, ma ti roro oware te ziezi, ma vẹ jẹ emamọ iroro.
ẹsiẹe o rẹ mae lọhọ re ma ru oware nọ u fo. Wọhọ oriruo, ma te re esa ha yọ ma te raha ugho ogbẹraha ha.
ẹsiẹe o rẹ mae lọhọ re ma lele ahwo uviuwou mai ta ẹme kpahe ugho dhedhẹ ukpenọ ugho o rẹ wha ẹwhọ ze.
ẹsiẹe o rẹ mae lọhọ re ma riẹ oware nọ ma re ru. Wọhọ oriruo, ma te dẹ eware nọ e mai wuzou ọvo ukpenọ ma rẹ raha ugho kufiẹ.
OWARE NỌ WHỌ RẸ SAI RU
Nwene nọ eware i te nwene. Nọ eware e tẹ be ghare gaga, o mai woma re whọ siọ ugho ba ẹraha wọhọ epanọ whọ jẹ raha vẹre, o tẹ lọhọ. Ahwo jọ a rẹ gwọlọ yeri uzuazọ okpohwo dede nọ a wo ugho ho. A wọhọ ohwo nọ ọ rrọ ethẹ be ya ame rri ofẹ nọ ẹkẹre ọgaga o bi kporo no ze. Ukuhọ riẹ, a vẹ jọ awawa. Who te wo uviuwou, whọ te dhogbo epanọ whọ rẹ rọ ko ae, yọ oyena o thọ họ! Rekọ kareghẹhọ nọ oware nọ ahwo uviuwou ra a mae gwọlọ họ, uyoyou nọ who re dhesẹ kẹ ae, oke nọ whọ rẹ raha kugbe ai, gbe eware nọ wha re ru kugbe.
Ohwo nọ o bi yeri uzuazọ okpohwo yọ o wo ugho ho ọ wọhọ ohwo nọ ọ rrọ ethẹ be ya ame rri ofẹ nọ ẹkẹre ọgaga o bi kporo no ze