Erao Ẹwọ nọ E Jọ Akpọ na Ikpe 50 nọ I Kpemu, Abọvo Abane Rai Ọvo I Kiọkọ Obọnana—Eme Ebaibol na Ọ Ta?

Evaọ ẹdẹ avọ 9 amara Akpe, 2024, utu nọ a re se World Wildlife Fund o niyẹrẹ jọ nọ e kẹ ahwo uye gaga kpahe erao nọ e rrọ akpọ na. Utu na o ta kpahe oghẹrẹ nọ eware nọ ahwo-akpọ a bi ru e be rọ lẹliẹ unu erao nọ e rrọ otọakpọ na kawo. Utu na o ta nọ “unu erao ẹwọ nọ e jọ akpọ na evaọ ikpe udhuvẹ-gbikpe (50) nọ e vrẹ na (1970 rite 2020), abọvo abane rai ọvo i kiọkọ obọnana.” A jọ iyẹrẹ nana ta nọ: “Orọnikọ ma bi bru okpa họ ẹme na ha, rekọ a gbe ru oware jọ kpata kpata evaọ ikpe isoi notha na ha, uzuazọ emama buobu o te jọ ọza evaọ otọakpọ na.”

Iyẹrẹ nana e kẹ ahwo buobu uye gaga. Otọakpọ owowoma mai na o were omai wumuo ho yọ ma gwọlọ nọ oware ovo o rẹ via kẹ erao nọ e riẹ hẹ. Oware nọ o rọ rrọ ere họ, Ọghẹnẹ ọ gwọlọ nọ ma rẹrote erao na.—Emuhọ 1:27, 28; Itẹ 12:10.

Fikiere whọ sai roro nọ, ‘Kọ ma te sae thọ erao ẹwọ nọ e rrọ akpọ na? Eme Ebaibol na ọ ta?’

Eware I ti Woma

Oghẹrẹ kpobi nọ ma rẹ daoma te kẹhẹ, ma wo ẹgba nọ ma sae rọ thọ erao nọ e rrọ akpọ na ha. Ọghẹnẹ ọvo o wo ẹgba yena. Ebaibol na ọ jọ obe Eviavia 11:18 ta nọ Ọghẹnẹ ọ te “raha enọ e be raha otọakpọ na.” Ma jọ oria Ebaibol yena wuhrẹ eware ivẹ jọ:

1. Ọghẹnẹ ọ te kẹ ahwo-akpọ uvẹ hẹ re a raha otọakpọ na no riẹriẹriẹ.
2. Kẹle na, Ọghẹnẹ ọ te jowọ. Ẹvẹ ma rọ riẹ? Oke mai na ahwo-akpọ a be mai ru eware nọ e rẹ wha uwhu se erao vi epaọ anwẹdẹ kpobi, yọ Ọghẹnẹ ọ te kẹ ahwo-akpọ uvẹ ere vrẹ ọvo ho.

Eme Ọghẹnẹ o ti ru ro ku ẹbẹbẹ nana họ? Ọ te rọ Uvie riẹ su otọakpọ na soso. Uvie riẹ yọ egọmeti nọ o ro mu evaọ obọ odhiwu. (Matiu 6:10) Ọ te rọ egọmeti riẹ na wuhrẹ ahwo-akpọ ziezi epanọ a rẹ rọ rẹrote erao nọ e rrọ otọakpọ na.—Aizaya 11:9.