OBUFIHỌ RỌKẸ UVIUWOU | ỌMỌ-ỌYỌRỌ
Epanọ Whọ Sae rọ Jọ Emamọ Ọsẹ
Ma te ta kpahe eware nana
Iruo vẹ ọsẹ o wo evaọ uwou?
Taure a te ti yẹ ọmọ ra. Oghẹrẹ ohwo nọ whọ rrọ obọnana ọye o ti dhesẹ oghẹrẹ ọsẹ nọ whọ te jọ evaọ obaro. A jọ obe jọ nọ a re se Do Fathers Matter? ta nọ:
“Ọsẹ nọ o re fiobọhọ kẹ aye riẹ nọ o dihọ dẹ eware nọ a gwọlọ evaọ uwou, wọ aye riẹ kpobọ ọspito nọ ọ tẹ gwọlọ nyae ruẹ edọktọ, daoma ruẹ uwoho ọmọ na nọ a tẹ be rọ emashini rri eva aye na hayo gaviezọ kẹ udu ọmọ na nọ u bi kie, ọsẹ otiọnana ọ rẹ daoma rẹrote aye gbe ọmọ na nọ a te yẹ ọmọ na no.”
“Nọ aye mẹ o dihọ, me fiobọhọ kẹe keme mẹ gwọlọ nọ ọye ọvo ọ rẹ ruẹ uye eva na ha. Mẹ avọ iẹe ma gbẹ ruẹrẹ eware họ evaọ ubruwou nọ ọmọ na ọ te jọ. Ma ruẹrẹ oma kpahe kẹ eyẹ ọmọ na yọ mẹ avọ iẹe ma je ru eware kugbe.”—James.
Ohrẹ Ebaibol: “Wha gwọlọ ewoma obọrai ọvo ho, rekọ ewoma amọfa re.”—Ahwo Filipai 2:4.
Okenọ a te yẹ ọmọ ra no. Nọ whọ tẹ be hae wọ ọmọ na je lele iei zaharo, usu ra avọ iẹe o te kpekpe gaga. Kuobọgbe rẹrote ọmọ na. Eware nọ who bi ru i re fiobọhọ kẹ ọmọ na nọ ọ be rro ze na. Whọ tẹ daoma wo usu okpekpe kugbe ọmọ ra, u ti dhesẹ kẹe epanọ who you rie te.
“Rọ omara ziọ otọ wọhọ ọmọ ra. Lele iei zaharo. Wha ru eware nọ wha sae rọ hwẹ. Kareghẹhọ nọ whẹ họ ohwo ọsosuọ nọ u fo nọ o re dhesẹ uyoyou kẹ ọmọ ra.”—Richard.
Ohrẹ Ebaibol: “Emọ yọ ukuoriọ nọ u no obọ Jihova ze; ubi edhede na yọ osohwa.”—Olezi 127:3, ẹme-obotọ.
Nọ ọmọ ra ọ be rro ze na. Ekiakiẹ i dhesẹ nọ emọ nọ avọ esẹ rai a kpekpe gaga a rẹ riẹ ru ziezi evaọ obọ isukulu, a rẹ ruawa tere he, yọ a rẹ kake lọ ibi-imu egaga hayo ru ikpehre eware he. Hae jọ kugbe ọmọ ra ziezi re who mu usu kugbei.
“Ọmọzae mẹ ọ ta kẹ omẹ nọ oware jọ nọ o te lẹliẹ ẹro mẹ voi gaga okenọ o te no uwou no họ, ẹme nọ ma be hae ta kugbe nọ ma tẹ rrọ omoto hayo nọ ma tẹ be re emu kugbe evaọ owọwọ. Ma ta ẹme kpahe eware jọ nọ i wuzou gaga evaọ oke gheghe nọ ma te bi gbiku. Ma ta kpahe eware nana keme ma jẹ hae jọ kugbe ohwohwo ziezi.”—Dennis.
Ohrẹ Ebaibol: “Wha fiẹrohotọ ziezi re wha ruẹ nọ oghẹrẹ nọ wha be nya o rrọ wọhọ igheghẹ hẹ rekọ wọhọ ahwo nọ a wo areghẹ, wha hae rehọ oke rai ruiruo evaọ edhere nọ ọ mai woma.”—Ahwo Ẹfisọs 5:15, 16.
Ẹvẹ iruo nọ ọsẹ o wo i wuzou te?
Evaọ eria buobu, iruo ọsẹ họ re ọ kuọ ahwo uviuwou riẹ jẹ thọ ae no enwoma, yọ iruo oni họ re ọ rẹrote emọ riẹ jẹ ruẹ nọ eva e be were ae. (Iziewariẹ 1:31; Aizaya 49:15) Evaọ iviuwou jọ, ọsẹ ọ sai ru iruo oni yọ oni ọ sai ru iruo ọsẹ. Rekọ ahwo nọ a rẹ kiẹ kpahe eware a ta nọ, ọsẹ avọ oni a wo ọvuọ iruo riẹ nọ a sai ro fiobọhọ evaọ ọmọ-ọyọrọ.a
Aye jọ nọ o wuhrẹ kpahe uzuazọ uviuwou nọ a re se Judith Wallerstein o gbiku oware jọ nọ o via kẹe ro ru ẹme nana vẹ. O kere nọ: “Nọ omoto ọ jamo ọmọtẹ mẹ nọ ọ jọ ikpe ikpegbivẹ, ọmọtẹ mẹ ọ gwọlọ nọ ọsẹ riẹ ọ rẹ jọ kugbei eva omoto nọ a jẹ rọ wọe kpobọ ọspito keme o fievahọ iẹe inọ ọ te thọe. Rekọ uwhremu na evaọ obọ ọspito, ọ gwọlọ nọ mẹ rẹ keria gbae okikpo evaọ ehwa nọ a fi rie họ re mẹ rẹrotei.”b
“Ọsẹ ọ sai ru udu te ahwo uviuwou riẹ otọ. O rẹ jọ bẹbẹ kẹ oni re ọye ọvo o ru onana. Yọ evaọ oke ovona, oni o re ru nọ emọ a rẹ rọ riẹ nọ a you rai, keme ọ rẹ romatotọ gaviezọ kẹ ae. Aimava na a re kuobọgbe fiobọhọ kẹ emọ rai.”—Daniel.
Ohrẹ Ebaibol: “Gaviezọ, ọmọzae mẹ, rọkẹ uthubro ọsẹ ra, who gbabọkẹ ohrẹ oni ra ha.”—Itẹ 1:8.
Esẹ gbe emetẹ rai
Ọmọtẹ ra o re wuhrẹ no eware nọ who bi ru ze kpahe oghẹrẹ nọ u fo nọ ezae a re yerikugbe eyae. Ọ sai wuhrẹ onana evaọ idhere ivẹ nana:
Nọ o te bi muẹrohọ epanọ who bi ro yerikugbe oni riẹ. Nọ who te you aye ra jẹ be hae kẹe adhẹẹ, ọmọtẹ ra ọ te ruẹ emamọ uruemu nọ u fo nọ ọzae o re dhesẹ, yọ oware yena o ti muẹrohọ ẹdẹfa nọ ọ tẹ gwọlọ wo ọzae.—1 Pita 3:7.
Nọ ọmọtẹ ra o te bi muẹrohọ epanọ who bi ro yerikugbe ei. Nọ whọ tẹ be hae kẹ ọmọtẹ ra adhẹẹ, yọ who bi wuhrẹ iẹe epanọ ọ rẹ rọ kẹ omariẹ adhẹẹ. Ọ vẹ te riẹ nọ ere u fo nọ ezae efa a rẹ kẹe adhẹẹ re.
Rekọ otẹrọnọ whọ rẹ fo ẹe evaọ oware kpobi, o ve ti rri omariẹ nọ o fioka ha. Onana u ti ru nọ ọ te rọ nyabru ezae efa sọ ọ be ginẹ daoma, yọ ẹsejọhọ ezae nana a wo ekpehre iroro kpahe iẹe.
“Ọmọtẹ ọ tẹ ruẹ nọ ọsẹ riẹ o you rie gaga yọ ọ be hai fiobọhọ kẹe, o rẹ nwane lọhọ re ọ dhẹ lele ọzae he nọ ọ tẹ ruẹ nọ ọzae na o wo emamọ uruemu nọ u fo nọ ọzae o re wo ho.”—Wayne.