Gudu jẹ Talamu Jihova Wọhọ Benaya

Benaya yọ ọzae nọ ọ gudu gaga, jẹ riẹ epanọ a re fi ẹmo. Ọ jẹ hai lele Devidi ovie na kpohọ ẹmo yọ ọ họre kẹ Solomọn ovie na uwhremu na. Benaya yọ ọmọ ozerẹ. Ọmọ ozerẹ o re fi ẹmo vẹre he, rekọ Benaya o lele ahwo Jihova kpohọ ẹmo. Onana u dhesẹ nọ ọ gudu. U wo oke jọ nọ o ro kpe okpohrokpo evaọ ọgọdọ ame ọyaya jọ. Yọ o kpe ohwo jọ nọ ọ rro thesiwa. Devidi o fievahọ Benaya gaga. U te epanọ ọ rọ rehọ iẹe mu ọnọ o wuzou egbaẹmo nọ i re rou rie.—2 Sam. 23:20-23.

Benaya ọ rọwo no abọ Devidi hi okenọ Absalọm gbe Adonaejah a jẹ rọ gwọlọ nọ a rẹ jọ ovie. (2 Sam. 8:18; 15:18; 1 Iv. 1:8) Makọ okenọ Devidi ọ kpako no, Benaya ọ daoma gaga re Solomọn ọ jọ ovie wọhọ epanọ Devidi ọ gwọlọ. (1 Iv. 1:32-40) Enana kpobi i dhesẹ nọ Benaya ọ rọwo no abọ Jihova ha. Yọ o no abọ ivie nọ Jihova o ro mu gbe he o make rọnọ amọfa a ru ere na.

Ere u fo nọ ma re ru re. Ma rẹ gudu dede nọ ọwegrẹ mai na Ẹdhọ avọ ahwo riẹ a be họre omai. Ma rẹ jẹ gbaudu ru oware nọ Jihova ọ gwọlọ ẹsikpobi. (Ẹf. 6:11; 1 Pita 5:8, 9) Yọ o tẹ make rọnọ amọfa a dhẹ siọ Jihova ba, ma rẹ rọ aro kele ahwo yena ha. Ma re je fievahọ Jihova inọ ọ te hwosa kẹ omai.—2 Sam. 22:26.