Oware nọ U re Fiobọhọ kẹ Eyae nọ A bi Gboja Kẹ

Ẹme yena a ro mu uzoẹme jọ họ evaọ oria itanẹte mai na jw.org. Uzoẹme na o ta nọ “Women’s Safety—The Bible’s Perspective.” Koyehọ eme nọ Ebaibol ọ ta kpahe epanọ a sae rọ rẹrote eyae na. A fi ẹme jọ họ obọ oka uzoẹme na. Nọ whọ tẹ rọ obọ tei whọ vẹ sae danlodu uzoẹme na evaọ oghẹrẹ nọ whọ sai ro printi riẹ fihọ obe nọ whọ sae jọ kpiri ei fihọ ibro ene. Oniọvo-ọmọtẹ jọ nọ a re se Stacy nọ ọ be rria obọ United States ọ ta nọ, “Me printi rai buobu. Mẹ avọ oniọvo-ọmọtẹ ọfa, ma tẹ whae kpohọ oria jọ nọ a be jọ rẹrote eyae jọ nọ a bi gboja kẹ evaọ ẹkwotọ usi uwoma mai.”

Ohwo jọ nọ ọ be jọ etẹe ru iruo ọ tẹ vuẹ omai nọ ma kẹe efa re ọ ghale kẹ ahwo nọ a be rria etẹe. Kọ ere ma ro printi efa nọ i bu te udhuvẹ (40), kugbe ekade jw.org nọ i bu te ọgba (30) ro sei. Nọ ma wariẹ zihe ẹdẹfa, ohwo nọ o wuzou oria na ọ tẹ vuẹ omai nọ ma dhesẹ oghẹrẹ nọ ma re ro wuhrẹ ahwo Ebaibol kẹ ahwo nọ a be rria etẹe.

Stacy avọ inievo-emetẹ ivẹ efa a ru oware ovona re evaọ oria ofa nọ a rẹ jọ rẹrote eyae nọ a bi gboja kẹ. Omobe-ovẹvẹ na isoi a jọ etẹe kẹ ahwo. Ahwo na a ta nọ a rehọ efa se ai re. Aye jọ nọ ọ rrọ etẹe bi ru iruo ọ ta nọ, “Omobe na u ti fiobọhọ kẹ eyae nọ e rrọ etenẹ na gaga. Ivie wha rọ efa ze.” Nọ a wariẹ zihe, ahwo buobu nọ a rrọ etẹe a tẹ nyabru ae re a riẹ oghẹrẹ nọ ahwo Jihova a re ro wuhrẹ ahwo Ebaibol. Nọ a dhesẹ kẹ ae no, imava evaọ usu rai a tẹ ta nọ a gwọlọ kpohọ ewuhrẹ evaọ obọ Ọgwa Uvie evaọ Ẹdoka.

Stacy ọ ta nọ: “U gbe omai unu gaga inọ obe na o were rai gaga. Omobe na nọ ma printi je kpiri na, o were ahwo na gaga. Oyena yọ obọdẹ edhere nọ ma rọ ta usi uwoma Uvie na kẹ eyae nọ a bi gboja kẹ na. Eva e were omai gaga inọ ahwo buobu a mi omai omobe-ovẹvẹ na yọ o were rai. Ma bi rẹro nọ Jihova o ti gbe fiobọhọ kẹ omai re ma gbẹ rọ omobe na se ahwo re a sai yo usi uwoma na. Yọ eva e be were omai nọ ọ be ghale omai evaọ iruo na.”