Epanọ A re ro Ru Ewuhrẹ Uzuazọ Oleleikristi gbe Usi Uwoma Ota Mai

Eware nọ E Riẹe Eva

1. Eme nọ e rrọ obe nana i ti fiobọhọ kẹ ahwo kpobi nọ a wo ẹme evaọ Ewuhrẹ Uzuazọ Oleleikristi gbe Usi Uwoma Ota Mai. Nọ a tẹ kẹ owhẹ ẹme, rri epanọ a re ro ru ẹme nọ a kẹ owhẹ na evaọ obe nana, gbe Obe Ewuhrẹ Uzuazọ gbe Usi Uwoma Ota na taure who te ti mu oma họ ẹruẹrẹ kpahe. A rẹ ta kẹ iwhowho-uvie kpobi re a kere odẹ fihotọ re a sai ru ẹme ọmọ-isukulu evaọ ewuhrẹ na. Amọfa nọ a be ziọ ewuhrẹ kẹse kẹse a sai kere odẹ fihotọ otẹrọnọ a rọwo iwuhrẹ nọ e rrọ Ebaibol na, je bi koko izi Jihova. Ọsẹro Ewuhrẹ Uzuazọ gbe Usi Uwoma Ota na o re lele ohwo nọ ọ rrọ owhowho-uvie he nọ o kere odẹ fihotọ ta ẹme. Ọ rẹ vuẹe eware nọ ohwo o re ru re ọ sai ru ẹme evaọ ewuhrẹ, ọ vẹ jẹ ohwo na riẹ sọ o te. Yọ o re ru onana evaọ iraro oniọvo nọ o bi wuhrẹ Ebaibol kugbei (hayo evaọ iraro ọsẹ hayo oni riẹ otẹrọnọ a rrọ ukoko na). Eware nọ a re ro rri ohwo nọ ọ gwọlọ ru ẹme ọmọ-isukulu evaọ ewuhrẹ na, eye ọvona a re ro rri ohwo nọ ọ gwọlọ jọ owhowho-uvie nọ ọ re họ-ame he.—od uzou 8 edhe. 8.

ẸME EMUHỌ

2. Iminiti ọvo. Koka koka, nọ a tẹ rọ ole gbe olẹ mu ewuhrẹ na họ no, ohwo-agbara Ewuhrẹ Uzuazọ gbe Usi Uwoma Ota na ọ vẹ ta eme nọ e rẹ lẹliẹ inievo na rẹro eme sa-sa nọ a ti ru evaọ ewuhrẹ na. Eware nọ ohwo-agbara na ọ riẹ nọ e te mai fiobọhọ kẹ inievo ukoko na ọ rẹ ta kpahe.

EWARE AGHAE NỌ E RRỌ EBAIBOL NA

3. Ẹme: Iminiti ikpe. Uzoẹme na gbe igogo eme ivẹ hayo esa nọ a rẹ ta kpahe e rrọ Obe Ewuhrẹ Uzuazọ gbe Usi Uwoma Ota na. Ọkpako ukoko hayo odibo oruiruo nọ o te ziezi a rẹ rehọ ẹme nana kẹ. Nọ a te bi mu obe Ebaibol ọkpokpọ họ evaọ isase Ebaibol ẹkpoka yena, a rẹ kaki kporo ividio obe Ebaibol yena. Oniọvo nọ o ti ru ẹme na ọ sae ta kpahe epanọ ividio na avọ uzoẹme na e rọ jẹhọ ohwohwo. Rekọ ọ rẹ jẹ ruẹ nọ ọ ta kpahe igogo eme kpobi nọ e rrọ obe ewuhrẹ na. U te no ere no, ọ rẹ jẹ rehọ iwoho nọ e rrọ obe ewuhrẹ na fiẹgba họ igogo eme nọ a re kru họ obọ. Ọ sae jẹ ta ẹme no ebe efa ze thakpinọ e rọwokugbe ẹme nọ o bi ru na hayo ru ẹme na vẹ.

4. Eware Aghae nọ Whọ Kiẹ Via: Iminiti ikpe. Ẹme nana yọ ẹme enọ gbe iyo nọ a re muhọ ovavo. Ohwo nọ o bi ru ẹme nana ọ rẹ ta ẹme emuhọ hayo ẹme ekuhọ họ. Ọkpako ukoko hayo odibo oruiruo nọ o te ziezi o re ru ei. Ọ rẹ nọ ogbotu na enọ ivẹ na. U te no ere no, ọye ọ rẹ salọ sọ a re se eria Ebaibol nọ a fodẹ na hayo a re se ai hi. Jọ iyo ahwo nọ a te kuyo i theri vrẹ emaharo 30 ha.

5. Isase Ebaibol: Iminiti ene. Ọmọzae hayo ọzae o re ru ẹme nana. Ọmọ-isukulu na o re se oria Ebaibol na ovavo ababọ ẹme emuhọ hayo ẹme ekuhọ nọ ọ rẹ ta. Ohwo-agbara ewuhrẹ na ọ rẹ ruẹ nọ o fiobọhọ kẹ emọ-isukulu na se eme na gbagba, se ai vevẹ, fiẹgba họ ẹme evaọ oria nọ u fo, nwene edo uvou rai lele epanọ ẹme na ọ nya, dhizu evaọ oria nọ u fo, je se eme na lele ẹkoma ẹmeọta rai. Fikinọ eria isase Ebaibol jọ e rrọ kpẹkpẹe yọ efa e rrọ thethei, u fo nọ Ọsẹro Ewuhrẹ Uzuazọ gbe Usi Uwoma Ota na o re roro kpahe epanọ ẹgba emọ-isukulu na i te nọ ọ tẹ be kẹ ae ẹme.

WO ONAA ZIEZI EVAỌ USI UWOMA OTA NA

6. Iminiti Ikpegbisoi. Abọ nana ewuhrẹ na u re fiobọhọ kẹ inievo na wuhrẹ epanọ a rẹ ta usi uwoma. U re fiobọhọ kẹ inievo na wo onaa nọ a re ro lele ahwo ta ẹme nọ a tẹ be ta usi uwoma hayo nọ a te bi wuhrẹ ahwo Ebaibol. A rẹ sae rehọ ẹme ọmọ-isukulu kẹ ọkpako ukoko, nọ o tẹ gwọlọ ere. Uwuhrẹ nọ o rrọ ebrakẹte nọ a kere fihọ aro ẹme nọ ọ rrọ Obe Ewuhrẹ Uzuazọ gbe Usi Uwoma Ota na ọmọ-isukulu kpobi o re ru lele evaọ ẹme riẹ na. Ibroshọ Ewuhrẹ hayo You Ahwo na uwuhrẹ na o rẹ jọ, yọ ọye a re ro rri ọmọ-isukulu na. Ẹsejọ, ẹme jọ ọ rẹ jariẹ nọ ogbotu na a rẹ kpahe fihọ evaọ abọ nana. O tẹ via ere, ọkpako hayo odibo oriruo nọ o te ọye o re ru ẹme yena.—Rri edhe-ẹme avọ 15 re whọ ruẹ epanọ a re ru ẹme nọ a rẹ kpahe fihọ.

7. Epanọ A re ro Mu Ẹme Họ: Oniọvo-ọmọzae hayo oniọvo-ọmọtẹ ọ sai ru ẹme nana. A tẹ rehọ ẹme nana kẹ oniọvo-ọmọzae, ohwo nọ ọ be ta usi uwoma kẹ na ọ rẹ jọ ọmọzae hayo ọzae. Ere ọvona, otẹrọnọ oniọvo-ọmọtẹ a rehọ ẹme na kẹ, ọmọtẹ hayo aye ọ rẹ ta usi uwoma na kẹ, ajokpanọ ohwo nọ ọ te ta usi uwoma kẹ na yọ ohwo uviuwou ọmọ-isukulu na. Ọmọ-isukulu na avọ ohwo nọ a ti gbe ru ẹme na a sae keria hayo dikihẹ ru ẹme na.—Re whọ ruẹ eware nọ ọmọ-isukulu na o re ru gbe oghẹrẹ nọ a re ro ru ẹme nana, rri edhe-ẹme avọ 12 gbe 13.

8. Ozihebro: Oniọvo-ọmọzae hayo oniọvo-ọmọtẹ ọ sai ru ẹme nana. A tẹ rehọ ẹme nana kẹ oniọvo-ọmọzae, ohwo nọ ọ be ta usi uwoma kẹ na ọ rẹ jọ ọmọzae hayo ọzae. Ere ọvona, otẹrọnọ oniọvo-ọmọtẹ a rehọ ẹme na kẹ, ọmọtẹ hayo aye ọ rẹ ta usi uwoma na kẹ. (km 5/97 ẹwẹ. 2) Ọmọ-isukulu na avọ ohwo nọ a ti gbe ru ẹme na a sae keria hayo dikihẹ ru ẹme na. Ọmọ-isukulu na o re ru ẹme na wọhọ ẹsenọ o zihe bru ohwo nọ o lele ta ẹme no oke jọ.—Re whọ ruẹ eware nọ ọmọ-isukulu na o re ru gbe oghẹrẹ nọ a re ro ru ẹme nana, rri edhe-ẹme avọ 12 gbe 13.

9. Fiobọhọ kẹ Ahwo Zihe Ruọ Ilele: Oniọvo-ọmọzae hayo oniọvo-ọmọtẹ ọ sai ru ẹme nana. A tẹ rehọ ẹme nana kẹ oniọvo-ọmọzae, ohwo nọ ọ be ta usi uwoma kẹ na ọ rẹ jọ ọmọzae hayo ọzae. Ere ọvona, otẹrọnọ oniọvo-ọmọtẹ a rehọ ẹme na kẹ, ọmọtẹ hayo aye o re ru ẹme na kẹ. (km 5/97 ẹwẹ. 2) Ọmọ-isukulu na avọ ohwo nọ a ti gbe ru ẹme na a sae keria hayo dikihẹ ru ẹme na. Nọ ohwo o te bi ru ẹme na wọhọ uwuhrẹ Ebaibol nọ a muhọ no anwẹsiẹ, u du gwọlọ nọ o re wo ẹme emuhọ gbe ekuhọ họ ajokpanọ a jọ oria nọ ọmọ-isukulu na o bi rri ro ru ẹme riẹ na ta nọ o ru lele oware jọ. U du gwọlọ nọ a re se idhe-eme kpobi nọ e rrọ oria nọ a bi ro ru ẹme na do via ha, rekọ ọ tẹ gwọlọ, ọ sai ru ere.

10. Ta Oware nọ Whọ Rọwo kẹ Amọfa: Nọ a tẹ ta nọ a ru ẹme na ovavo, oniọvo-ọmọzae ọye o re ru ei. Rekọ a tẹ ta nọ a ru ẹme na epanọ a re ru odhesẹvia, a sae rehọ iẹe kẹ oniọvo-ọmọzae hayo oniọvo-ọmọtẹ. A tẹ rehọ ẹme nana kẹ oniọvo-ọmọzae, ohwo uwou na ọ rẹ jọ ọmọzae hayo ọzae. Ere ọvona, otẹrọnọ oniọvo-ọmọtẹ a rehọ ẹme na kẹ, ọmọtẹ hayo aye o re ru ẹme na kẹ, ajokpanọ ohwo nọ ọ te jọ ohwo uwou na yọ ohwo uviuwou ọmọ-isukulu na. Ọmọ-isukulu na ọ rẹ daoma ru uzoẹme nọ ọ be ta kpahe na vẹ ziezi, o ve je ru onaa họ ẹme riẹ na. Yọ obe nọ a rehọ ẹme riẹ na no ze o re ro ru ẹme na. Ọ tẹ gwọlọ, ọ sae fodẹ obe na hayo se iẹe ba.

11. Ẹme nọ A re Ru Ovavo: Oniọvo-ọmọzae ọye o re ru ẹme nana yọ o re ru ei ovavo. Otẹrọnọ ugogo ẹme jọ evaọ ẹme-ofiba 1 ọrọ ibroshọ You Ahwo na a rehọ ẹme na no ze, ọmọ-isukulu na ọ sae fodẹ epanọ a sae rọ rehọ eria Ebaibol nọ e rrọ etẹe ta usi uwoma. Wọhọ oriruo, ọ sae ta kpahe oke nọ u fo nọ a sai ro se oria Ebaibol yena, otofa riẹ gbe epanọ a sae rọ rehọ iẹe lele ahwo ta ẹme evaọ usi uwoma. Rekọ otẹrọnọ ugogo ẹme jọ evaọ usu iwuhrẹ nọ e rrọ ibroshọ You Ahwo na a rehọ ẹme na no ze, epanọ a sae rọ jọ usi uwoma ru oware nọ a jọ ugogo ẹme yena ta na, ọye ọmọ-isukulu na ọ rẹ mae ta kpahe. Ọ sae ta kpahe ugogo ẹme 1 nọ ọ rrọ uwuhrẹ yena hayo eria Ebaibol efa nọ e rrọ uwuhrẹ yena otẹrọnọ i ti fiobọhọ kẹe ru ẹme riẹ na vẹ.

12. Eware nọ Ọmọ-Isukulu na O re Ru: Eware nọ a te jọ edhe-ẹme nana gbe onọ o kẹle riẹ ta kpahe i re fiobọhọ kẹ ahwo nọ a bi ru ẹme “Epanọ A re ro Mu Ẹme Họ” gbe “Ozihebro.” Oware nọ a gwọlọ nọ ọmọ-isukulu na o re ru họ, o re lele ohwo jọ ta kpahe uzoẹme jọ nọ ọ lọhọ evaọ Ebaibol nọ o te were ohwo na. Ọ vẹ jẹ ta ẹme na jẹhọ re ọ sai zihe bru ohwo na oke ofa, ajokpanọ a ta nọ o ru oware ofa jọ. Ọmọ-isukulu na ọ rẹ salọ uzoẹme nọ u kiehọ nọ u re duobọte udu ahwo nọ e rrọ ẹkwotọ usi uwoma ota rai. Ọye ọ rẹ salọ sọ ọ rẹ rehọ obe hayo ividio jọ nọ ọ rrọ oria Ẹkpẹti Ekwakwa Ewuhrẹ mai na ta usi uwoma. Jọ ọmọ-isukulu na o ru odhesẹvia uzoẹme jọ nọ o wuhrẹ fihọ uzou no ho. Ukpoye, jọ o wuhrẹ onaa nọ a rẹ rọ ta ẹme ruọ ohwo oma, jọ ọ ta ẹme na no udu ze, je dhesẹ nọ o you ohwo nọ ọ be ta ẹme kẹ na.

13. Oghẹrẹ nọ a re ro Ru Ẹme Na: Ọmọ-isukulu na o re ru ẹme na oghẹrẹ nọ a fodẹ evaọ Obe Ewuhrẹ Uzuazọ gbe Usi Uwoma Ota na, yọ epanọ eware e rrọ evaọ ẹkwotọ usi uwoma ota rai o re rri ro ru ẹme na. Wọhọ oriruo:

(1) No Uwou Ruọ Uwou: Nọ usi uwoma ota no uwou ruọ uwou—te orọ ovao-dhe-ovao, orọ ifonu, hayo ileta—u te je te epanọ who re zihe bru ohwo nọ whọ ta usi uwoma kẹ okenọ whọ jọ usi uwoma no uwou ruọ uwou.
(2) Usi Uwoma Oke-Gheghe: Oghẹrẹ usi uwoma ota nana yọ onọ a rẹ rehọ imiku jọ gheghe muhọ, kẹsena whọ vẹ nwane rọ uvẹ yena ta usi uwoma kẹ ohwo na. Whọ sae ta usi uwoma kẹ ahwo nọ wha gbe bi ru iruo, ahwo nọ wha gbẹ rrọ ighẹ. Whọ sae jẹ ta usi uwoma kẹ ahwo nọ wha gbẹ rrọ edhere bi kpohọ erẹ, hayo ahwo nọ whọ ruẹ evaọ oria kpobi nọ whọ rrọ.
(3) Usi Uwoma Ota Ẹgbede: Oghẹrẹ usi uwoma ota nana o sae jọ onọ a rẹ rehọ oware nọ a re fi ebe họ ghelie ta, usi uwoma ota evaọ eria nọ a rẹ jọ zẹ eware, evaọ iyẹrẹ, evaọ eria arozaha, te eria nọ a rẹ jọ ruọ imoto hayo imotosaikoro gbe eria efa kpobi nọ whọ jọ ruẹ ahwo.

14. Nọ A tẹ be Rọ Ividio gbe Ebe Ukoko na Ru Ẹme: Nọ ọmọ-isukulu na o te rri epanọ ẹme riẹ na ọ rrọ, ọ sae salọ sọ ọ rẹ kẹ ohwo nọ ọ be ta usi uwoma kẹ obe hayo o re dhesẹ ividio kẹe. Otẹrọnọ ẹme ọmọ-isukulu na o wo ividio hayo ọye ọ salọ nọ ọ rẹ rọ ividio jọ ru ẹme riẹ na, jọ ọ ta kpahe eware nọ a dhesẹ evaọ ividio na ọvo, rekọ o du kporo iei hi.

UZUAZỌ OLELEIKRISTI

15. A rẹ rehọ ole mu abọ nana họ. Kẹsena a ve ru ẹme iminiti 15 nọ ọ rẹ sai wo abọvo hayo abava. Abọ nana o re fiobọhọ kẹ omai riẹ oghẹrẹ nọ ma re ro ru oware nọ Ebaibol ọ ta. A gbẹ fodẹ ohwo nọ a rẹ rehọ ẹme nana kẹ hẹ, a sae rehọ iẹe kẹ ọkpako ukoko hayo odibo oruiruo nọ o te ziezi. Rekọ ọkpako ukoko ọvo a rẹ rehọ abọ ẹgwọlọ ukoko na kẹ. Nọ abọ jọ ọ tẹ rrọ ẹme nọ a rẹ kpahe fihọ, ohwo nọ o bi ru ẹme na ọ sae nọ enọ efa kugbe enọ nọ i lele ẹme riẹ na ze. Jọ ẹme emuhọ riẹ ọ jọ kpẹkpẹe re ọ sai wo oke nọ o re ro ru igogo eme na vẹ. Inievo na a ve ti je wo uvẹ nọ a rẹ rọ kpahe fihọ ẹme na. Otẹrọnọ a te kiẹ ohwo jọ riwi, o te mai woma re o kpobọ eplatfọmo viukpenọ ọ rẹ ta ẹme no oria nọ ọ keria ze.

16. Uwuhrẹ Ebaibol Ukoko: Iminiti ọgba. Ọkpako ukoko nọ o te ziezi a rẹ rehọ iẹe kẹ. (Otẹrọnọ ekpako nọ e rrọ ukoko na a gbe bu tere he, idibo iruiruo nọ i te ziezi a rẹ sai ru ei.) Ugboma ekpako na ae a rẹ salọ oniọvo nọ o te, nọ ọ rẹ sai ru Uwuhrẹ Ebaibol Ukoko na. Inievo nọ a salọ na a re ru ewuhrẹ na ziezi lele oke, a re ru eria Ebaibol nọ a se vẹ, je fiobọhọ kẹ inievo na ruẹ epanọ eware nọ a wuhrẹ na i wuzou te. Nọ ahwo nọ a bi ru abọ nana a te se kpahe epanọ a re ru ẹme enọ gbe iyo, u ti fiobọhọ kẹ ae ru uwuhrẹ na ziezi. (w23.04 ẹwẹ. 24, ẹkpẹti) Otẹrọnọ oria nọ a bi wuhrẹ evaọ oka yena uvẹ ziezi no, u du gwọlọ nọ a gbe ru uwuhrẹ na theri vi ere he. O tẹ lọhọ, jọ a hai nwene inievo nọ i ti ru abọ nana koka koka gbe enọ i ti se idhe-eme na. Otẹrọnọ ohwo-agbara Ewuhrẹ Uzuazọ gbe Usi Uwoma Ota na ọ ta nọ a ru ewuhrẹ na kpẹre, oniọvo nọ o bi ru ei na ọye ọ rẹ jiroro epanọ o re ro ru ei kpẹre. Ọ sae tubẹ ta nọ a se idhe-eme jọ họ.

ẸME EKUHỌ

17. Iminiti esa. Ohwo-agbara Ewuhrẹ Uzuazọ Oleleikristi gbe Usi Uwoma Ota na o re ru ọkiẹkpemu igogo eware nọ a wuhrẹ evaọ ewuhrẹ na. Ro lele epanọ oke o riẹ te, ọ sai ru ere nọ ọ tẹ nọ ogbotu na re a ta eware jọ nọ a wuhrẹ nọ i ti fiobọhọ kẹ ae. Ọ rẹ jẹ ta kpahe igogo eware jọ nọ a ti wuhrẹ evaọ oka notha. O te wo oke, ọ sae jẹ fodẹ emọ-isukulu nọ i ti ru ẹme evaọ ewuhrẹ oka notha na. Ohwo-agbara na o re ru owhowhovia kpobi, je se ileta nọ ukoko na u wo nọ ọ tẹ be ta ẹme ekuhọ riẹ, ajokpanọ a fodẹ oghẹrẹ ofa nọ a re ro ru ei. Rọ kpahe eware jọ nọ ma be hai ru kẹse kẹse na, wọhọ, ọruẹrẹfihotọ hayo omaa nọ ma wo kẹ usi uwoma ota hayo orufuọ, a rẹ jọ eplatfọmo se iwhowhovia omaa otiọye he, ukpoye a re fi ai họ ebọdo evuẹ na. Otẹrọnọ oke ẹme ekuhọ na o ti te ohwo-agbara na ru iwhowhovia hayo se ileta ha, ọ rẹ ta kẹ inievo nọ i ti ru ẹme evaọ abọ Uzuazọ Oleleikristi na re a ru ẹme rai kpẹre. (Rri edhe-ẹme avọ 16 gbe 19.) A rẹ rehọ ole gbe olẹ ku ewuhrẹ na họ.

UYERE GBE OHRẸ

18. Nọ ọmọ-isukulu ọvuọvo o te ru ẹme riẹ no, ohwo-agbara Ewuhrẹ Uzuazọ gbe Usi Uwoma Ota na o wo enwenọ iminiti ọvo nọ o re ro yere oniọvo na jẹ kẹe ohrẹ. Yọ oria uwuhrẹ nọ a vuẹ riẹ nọ o muẹrohọ na, ọ rẹ kẹe ohrẹ no ze. Nọ ohwo-agbara na o te bi zizie ọmọ-isukulu kẹ ẹme riẹ, ọ rẹ fodẹ oria uwuhrẹ nọ o ti ro rri rie na ha. Rekọ nọ o te ru ẹme riẹ re no, o je yere iei no, ohwo-agbara na ọ sae fodẹ oria uwuhrẹ nọ a kẹ ọmọ-isukulu na, je dhesẹ oghẹrẹ nọ o ro ru oware nọ a jọ etẹe ta. Hayo ọ vẹ rọ areghẹ ta kpahe oria nọ u fo nọ ọ rẹ gbẹ daoma fihọ evaọ oria uwuhrẹ yena gbe epanọ ọ sai ro ru ei. Ohwo-agbara na ọ sae fodẹ eware efa jọ nọ o ru evaọ ẹme na otẹrọnọ i ti fiobọhọ kẹ ọmọ-isukulu na hayo ogbotu na. U te no ere no, ọ sae jẹ rọ ibroshọ You Ahwo, ibroshọ Ewuhrẹ na hayo obe Isukulu Odibọgba na kẹ ọmọ-isukulu na ohrẹ nọ ewuhrẹ na ọ tẹ fa no, hayo evaọ oke ofa. A sae ta kpahe oria uwuhrẹ nọ a ro rri rie ẹdẹ yena hayo uwuhrẹ ọfa jọ.—Rri edhe-ẹme avọ 19, 24, gbe 25 re whọ ruẹ eware efa nọ ohwo-agbara Ewuhrẹ Uzuazọ gbe Usi Uwoma Ota na gbe ọkohrẹ obufihọ a re ru.

OKE

19. Jọ ohwo ọvo o ru ẹme riẹ vrẹ oke nọ a kẹ riẹ hẹ, makọ ohwo-agbara Ewuhrẹ Uzuazọ gbe Usi Uwoma Ota na. Dede nọ a jọ Obe Ewuhrẹ Uzuazọ gbe Usi Uwoma na ta kpahe unu iminiti nọ a re ro ru ẹme kpobi, u du gwọlọ nọ whọ rẹ gbẹ ta eme efa re whọ sae re oke ra re he, otẹrọnọ ẹme na kpobi uvẹ ziezi no. Otẹrọnọ inievo nọ i bi ru ẹme evaọ ewuhrẹ na a re oke, ohwo-agbara Ewuhrẹ Uzuazọ gbe Usi Uwoma Ota hayo ọkohrẹ obufihọ na ọ rẹ kẹ ae ohrẹ nọ ewuhrẹ na o te kuhọ ho. (Rri edhe-ẹme avọ 24 gbe 25.) Oma ewuhrẹ na kpobi, te ile nọ a te so gbe olẹ o rẹ rehọ auwa 1 gbe iminiti 45.

NỌ ỌSẸRO OKOGHO Ọ TẸ NYAZE UKOKO RAI

20. Nọ ọsẹro okogho ọ tẹ rrọ kugbe ukoko jọ, a re ru ewuhrẹ na wọhọ epanọ o rrọ Obe Ewuhrẹ Uzuazọ gbe Usi Uwoma Ota na. Rekọ a rẹ rehọ ẹme iminiti 30 nọ ọsẹro okogho na o ti ru na ro nwene Uwuhrẹ Ebaibol Ukoko nọ o rrọ abọ Uzuazọ Oleleikristi na. Taure ọsẹro okogho na o te ti ru ẹme riẹ, ohwo-agbara Ewuhrẹ Uzuazọ gbe Usi Uwoma Ota na o re ru ọkiẹkpemu ewuhrẹ na, ọ vẹ jẹ ta kpahe eware jọ nọ a ti wuhrẹ evaọ oka notha. O ve je ru owhowhovia kpobi nọ ukoko na u wo, se ileta nọ e riẹ, kẹsena o ve zizie ọsẹro okogho na. Nọ ọsẹro okogho na o te ku ẹme riẹ họ no, ọ vẹ salọ ole nọ u je rie ro ku ewuhrẹ na họ. Ọsẹro okogho na ọ sai zizie oniọvo-ọmọzae ọfa re ọ lẹ olẹ ekuhọ. A rẹ rọ ẹvẹrẹ ukoko nọ ọsẹro okogho na ọ rrọ kugbe na ru eklase avivẹ hẹ evaọ oka nọ ọ rọ rrọ kugbe ai na. Otẹrọnọ ọsẹro okogho ọ rrọ kugbe ukoko nọ o be rẹrote utu, ahwo nọ a rrọ utu na a sai gbe ru ewuhrẹ na kẹ omobọrai. Rekọ, evaọ oke nọ ọsẹro okogho na o ti ru ẹme riẹ, inievo nọ e rrọ utu na a ve kuomagbe ukoko na.

OKA OKOKOHỌ OKOGHO HAYO OKOKOHỌ OLOGBO

21. Evaọ oka okokohọ okogho hayo okokohọ ologbo, a re ru ewuhrẹ ọvuọvo ho. A rẹ vuẹ inievo ukoko na inọ jọ uviuwou kpobi hayo omomọvo o ru ewuhrẹ oka yena kẹ omariẹ.

OKA EKAREGHẸHỌ

22. Nọ ẹdẹ Ekareghẹhọ na o te kie fihọ ẹdẹ jọ evaọ Ẹdọvo-Oka rite Edisoi-Oka, a re ru Ewuhrẹ Uzuazọ gbe Usi Uwoma Ota na ha.

ỌSẸRO EWUHRẸ UZUAZỌ GBE USI UWOMA OTA

23. Ugboma ekpako na o rẹ salọ ọkpako jọ re ọ jọ ọsẹro Ewuhrẹ Uzuazọ gbe Usi Uwoma Ota na. Ọsẹro ewuhrẹ na ọ rẹ ruẹ nọ a ru ewuhrẹ na epanọ a re ru Ewuhrẹ Uzuazọ gbe Usi Uwoma Ota na. Ọsẹro ewuhrẹ na avọ ọkohrẹ obufihọ na a rẹ nọ mi ohwohwo ziezi re a riẹ epanọ eware e be nya. Nọ Obe Ewuhrẹ Uzuazọ gbe Usi Uwoma Ota amara jọ ọ tẹ nwani kpozi no, ọsẹro Ewuhrẹ Uzuazọ gbe Usi Uwoma Ota na ọ rẹ ghale eme nọ a te jọ ewuhrẹ udevie oka na ru kẹ inievo nọ a ti ru ei. Yọ Obe Ewuhrẹ Uzuazọ gbe Usi Uwoma Ota kpobi nọ o kpozi, omaa emerae ivẹ e rẹ jariẹ eva. Enana họ eme nọ ọ rẹ ghale; eme nọ ekpako gbe idibo iruiruo ọvo a re ru, gbe ẹme emọ-isukulu. Ọ rẹ jẹ salọ ohwo nọ ọ rẹ jọ ohwo-agbara ewuhrẹ udevie oka na no usu ahwo nọ ugboma ekpako na a kuenu kẹ inọ a rẹ sai jọ ohwo-agbara. (Rri edhe-ẹme avọ 3-16 gbe 24.) Nọ ọ tẹ be ghale ẹme ọmọ-isukulu na, u fo re ọ kareghẹhọ eware nana. Unu ikpe ọmọ-isukulu na, epanọ o wo onaa te gbe sọ ọmọ isukulu na ọ rẹ sai ru ẹme yena ududu ababọ ozọ nọ u re mu ei inọ ahwo a te ta nọ o bi ru lele oware nọ ọ be ta na ha. Ọ rẹ jẹ kareghẹhọ eware nana re nọ ọ tẹ be ghale eme efa evaọ ewuhrẹ na nọ e rrọ eme emọ-isukulu hu. A rẹ kẹ ahwo nọ a wo ẹme evaọ ewuhrẹ na ẹme rai, o tẹ kawo eka esa taure ẹdẹ nọ a ti ro ru ẹme na o te ti te. Efọmo Ẹme Ewuhrẹ Uzuazọ Oleleikristi gbe Usi Uwoma Ota Mai (S-89) na ọye a rẹ rọ kẹ emọ-isukulu na ẹme. Ọsẹro Ewuhrẹ Uzuazọ gbe Usi Uwoma Ota na ọ rẹ ruẹ nọ o fi omaa ewuhrẹ nọ a jọ kẹ inievo na ẹme na họ ebọdo evuẹ na. Ugboma ekpako na a sae rehọ ọkpako ọfa hayo odibo oriruo jọ mu re o fiobọhọ kẹe. Rekọ, ekpako ọvo ae a rẹ ghale eme nọ ekpako gbe idibo iruiruo a re ru kẹ ai.

OHWO-AGBARA EWUHRẸ UZUAZỌ GBE USI UWOMA OTA

24. Koka koka, ọkpako ọvo jọ ọ rẹ jọ ohwo-agbara Ewuhrẹ Uzuazọ gbe Usi Uwoma Ota na. (Otẹrọnọ ekpako nọ e rrọ ukoko na a gbe bu tere he, idibo iruiruo nọ i te ziezi a sae jọ ohwo-agbara ewuhrẹ na.) Ohwo-agbara ewuhrẹ na họ ọnọ ọ rẹ ruẹrẹ ẹme emuhọ gbe ẹme ekuhọ ewuhrẹ na họ. Ọye o re zizie enọ i ti ru ẹme kpobi ziọ eplatfọmo, yọ otẹrọnọ ekpako ukoko na i bu tere he, ọ sae jọ ewuhrẹ na ru eme efa jọ re, maero enọ a te jọ dhesẹ ividio ọvo ababọ ẹme ọfa nọ a te ta fihọ iẹe. Eme nọ ọ rẹ ta evaọ udevie ẹme ọvuọvo e rẹ jọ kpẹkpẹe gaga. Ugboma ekpako na ae a rẹ salọ ekpako nọ i te nọ e rẹ sae jọ ohwo-agbara na. Ekpako nọ i te na a rẹ jọ ohwo-agbara unọjọ utọjọ. Wọhọ epanọ ẹgwọlọ ukoko na ọ rrọ, Ọsẹro Ewuhrẹ Uzuazọ gbe Usi Uwoma Ota na ọye ọ rẹ mae jọ ohwo-agbara ewuhrẹ na vi ekpako efa. Otẹrọnọ ọkpako jọ o te ọnọ ọ rẹ sai ru Uwuhrẹ Ebaibol Ukoko na, kiyọ o te ohwo nọ ọ rẹ jọ ohwo-agbara ewuhrẹ na re. Kareghẹhọ nọ ọkpako nọ ọ rrọ ohwo-agbara na o re jiri ahwo nọ a ru ẹme ọmọ-isukulu na, ọ vẹ jẹ rọ edhere oyoyou kẹ ae ohrẹ nọ u te fo. Ohwo-agbara na ọ rẹ jẹ ruẹ nọ ewuhrẹ na o kuhọ ẹruoke. (Rri edhe-ẹme avọ 17 gbe 19.) O tẹ were ohwo-agbara na, yọ oria jọ o riẹ, a sai fi emaekrofonu ọfa họ eplatfọmo na nọ o re dikihẹ, ọ vẹ jọ etẹe zizie oniọvo nọ o bi ti ru ẹme na, yọ oke yena oniọvo nọ o ti ru ẹme na o dikihẹ oria nọ o bi ti jo ru ẹme riẹ na no. Ere ọvona re, ohwo-agbara na ọ sae keria oria nọ a wọ emẹjẹ họ evaọ eplatfọmo na nọ a te bi ru ẹme isase Ebaibol gbe okenọ a te bi ru abọ Wo Onaa Ziezi Evaọ Usi Uwoma Ota Na. Onana u re ru nọ a gbẹ rọ raha oke kufiẹ hẹ.

ỌKOHRẸ OBUFIHỌ

25. Ọkohrẹ obufihọ na họ ọnọ ọ rẹ kẹ ekpako gbe idibo iruiruo na ohrẹ nọ o tẹ gwọlọ ere. Yọ oghẹrẹ ẹme kpobi nọ ohwo o ru a sae jọ kẹe ohrẹ. Wọhọ eme nọ a re ru evaọ Ewuhrẹ Uzuazọ gbe Usi Uwoma Ota na, ovuẹ ogbotu, enọ i re ru uwuhrẹ Uwou-Eroro hayo Uwuhrẹ Ebaibol Ukoko gbe enọ i re se Uwou-Eroro hayo Uwuhrẹ Ebaibol Ukoko.—Rri edhe-ẹme avọ 19.

EKLASE AVIVẸ

26. Nọ inievo nọ i re ru ẹme emọ-isukulu a tẹ rrọ buobu, ukoko na o sae jiroro sọ a re wo eklase avivẹ. Eklase avivẹ kpobi o re wo oniọvo nọ o te ziezi nọ ọ rẹ jọ ọkohrẹ, yọ o rẹ mai woma re oniọvo nana ọ jọ ọkpako ukoko. Rekọ nọ ọkpako otiọye ọ gbẹ riẹ hẹ, odibo oruiruo nọ o te ziezi ọ sae jọ ọkohrẹ na. Ugboma ekpako na ae a rẹ salọ oniọvo nana, yọ ae a rẹ jiroro na sọ a te hai nwene iei no oke te oke. Ọkohrẹ na o re lele eware nọ a ta kpahe evaọ edhe-ẹme avọ 18 na. Otẹrọnọ a wo eklase avivẹ, nọ a te ku ẹme Eware Aghae nọ Whọ Kiẹ Via na họ no, a vẹ vuẹ enọ i bi ru eklase avivẹ na re a kpohọ obọ eklase rai. A rẹ wariẹ kuomagbe ukoko na soso nọ a te ru ẹme ọmọ-isukulu urere ọrọ ẹdẹ yena no.

IVIDIO

27. A te hai dhesẹ ividio sa-sa evaọ ewuhrẹ na. Ividio nọ a ti ro ru ewuhrẹ udevie oka e te hae jọ JW Library^® yọ a sae rehọ ifonu gbe etablẹte hayo ekọmputa rọ danlodu rai.

S-38-IS 9/25