O Fiobọhọ kẹ Ahwo na Zihe Bru Jihova Ze

IKPE ezeza ọvo Josaya ọ jọ evaọ okenọ Manasẹ ọsẹ ologbo riẹ nọ ọ jọ ovie o ro whu. O wọhọ nọ Josaya ọ riẹ nọ ọsẹ ologbo riẹ na o je ru eware iyoma vẹre. Rekọ o kurẹriẹ, ọ tẹ wariẹ mu Jihova họ ẹgọ. O sae jọ nọ oware yena o thọrọ Josaya ẹro vievie he. Nọ ọsẹ ologbo riẹ o whu no, Amọn ọsẹ Josaya o te muhọ esu. Amọn ọ jọ ohwo ọgeva. Yọ ọ jẹ lẹliẹ ahwo nọ o je su ru eware iyoma. O tube ru ai jẹ gọ emedhọ dede. Nọ Amọn o su ikpe ivẹ ọvo no, o te whu. Fikiere a tẹ rehọ Josaya mu ovie. Oke yena yọ ọ jọ ikpe eree.

O wọhọ nọ Josaya o wo emamọ ahwo jọ nọ a je fiobọhọ kẹe gọ Jihova evaọ oke riẹ. Ahwo wọhọ Zẹfanaya avọ Jerimaya nọ e jọ eruẹaro. Họlda nọ ọ jọ ọruẹaro-aye, gbe Hilkaya nọ ọ jọ ozerẹ okpehru. Ebaibol na ọ ta kpahe Josaya nọ: “Nọ ọ gbẹ jọ ọmọzae, [oware wọhọ ikpe ikpegbezeza (16)], o te mu Ọghẹnẹ Devidi ọsẹ-esẹ riẹ họ ẹkiẹ gwọlọ.” Evaọ okenọ ọ jọ oware wọhọ ikpe udhe (20), o te je si emedhọ kpobi no Juda no. Fikinọ Josaya ọ gudu na, Jihova ọ rehọ e riẹ fiobọhọ kẹ ahwo na siọ eware iyoma ba eru. A tẹ wariẹ mu Jihova họ ẹgọ.

Josaya ọ jọ Juda serihọ họ. Ọ nyaruọ ikpewho nọ ahwo nọ a jọ uvie erua ikpe Izrẹl a jọ vẹre. Oke yena yọ a mu ahwo Izrẹl buobu kpohọ igbo no evaọ obọ Asiria. Ahwo erẹwho efa a tẹ jẹ rria eria yena. Ghele na Josaya ọ raha eria nọ ahwo na a jẹ jọ gọ emedhọ no evaọ obei.

Evaọ ikpe jọ nọ i lele i rie, oghale jọ nọ Josaya o rẹro riẹ hẹ o te tei obọ. Nọ a jẹ ruẹrẹ etẹmpol Jihova, Hilkaya ozerẹ okpehru na ọ tẹ ruẹ obọdẹ oware jọ. Ọ ruẹ uko-obe nọ a kere uzi nọ Jihova ọ kẹ Mosis fihọ. Uko-obe na o who gaga no. O sae jọ nọ uko-obe na yọ onọ Mosis ọvo ọ rọ obọ riẹ kere. A tẹ rehọ iẹe se Josaya. A te je sei kẹe yọ ọ be gaviezọ. Eme nọ a je se kẹ Josaya na, e da riẹ gaga. Keme ọ ruẹ nọ ahwo na a raha izi Ọghẹnẹ gaga no. Josaya ọ ruẹ nọ Jihova o bi mu ofu kẹ ahwo na gaga. Kọ Josaya ọ te gudu re o ru oware jọ kpahe ẹme nọ o yo na?

Josaya ọ tẹ nwani vi ezae isoi bru Họlda ọruẹaro-aye na. O vi rai nyae nọ oware nọ Jihova o ti ru. Họlda ọ tẹ ta kẹ ae nọ eva e be dha Jihova gaga, keme ahwo Juda a nyase iẹe ba no evaọ ikpe buobu. Fikiere, okpẹtu o ti te Juda avọ Jerusalẹm. Rekọ Jihova ọ ruẹ nọ Josaya o wo emamọ eva. Yọ ọ gudu nọ o bi ro fiobọhọ kẹ ahwo na zihe bru Jihova ze. Fikiere okpẹtu na ọ te ze evaọ oke riẹ hẹ.

Ghele na, Josaya ọ gbẹ jẹ dawo ẹgba riẹ kpobi re o fiobọhọ kẹ ahwo na zihe bru Jihova ze. Tei te ahwo riẹ a tẹ jọ ẹgbede ya eyaa nọ a re koko izi Ọghẹnẹ kpobi. Kẹsena o te je ru epanọ o re ro si emedhọ kpobi no, re ohwo ọvuọvo ọ gbẹ gọ emedhọ họ. Re ọ sai fiobọhọ kẹ ahwo na mu Jihova họ ẹgọ, o te ru Ehaa Ọnyavrẹ ilogbo. Tei te ikpahwo-esuo na a rehọ erao buobu ze re a ro dhe idhe kẹ Jihova. Yọ eso-ile a jẹ so ile ro jiri Jihova. Ehaa nana e jọ usu ehaa nọ e mae rro nọ ahwo Ọghẹnẹ a ru no.

Josaya o gbe je dhesẹ nọ ọ gudu yọ o wo ẹrọwọ ọgaga. O je fiobọhọ kẹ ahwo na re a siọ eghẹnẹ erue gbe emedhọ ba ẹgọ. Evaọ oria jọ, ọ jọ agbada-idhe nọ a jẹ rọ gọ eghẹnẹ erue mahe igbenwa ahwo re ahwo a gbẹ sae jọ etẹe gọ ofa ha. Ọ tẹ rọ enẹ ru eruẹaruẹ jọ nọ a ruẹ ikpe egba esa (300) nọ i kpemu gba. (1 Iv. 13:2) Josaya ọ jọ Juda raha eria nọ ahwo na a jẹ hae jọ gọ emedhọ rai kuotọ, makọ eria nọ a jẹ jọ gọ emedhọ no ugbanwọ oke Solomọn Ovie na ze dede. Rekọ nọ oke jọ o vrẹ no, Josaya o te ru oware ugheghẹ jọ. Ọ nyae họre Fẹro ahwo Ijipti jọ nọ a re se Niko. Dede nọ Jihova ọ rehọ Niko vuẹ Josaya nọ o kpohọ ẹmo na ha, Josaya ọ rọwo gaviezọ họ. Yọ o wọhọ nọ Josaya ọ nọ mi eruẹaro Jihova ha sọ ẹme nọ Niko ọ ta na ginọ uzẹme. Ukpoye, o duwu uzou họ ẹmo na. Ahwo jọ a sai roro nọ oware nọ o ru na u dhesẹ nọ ọ gudu, keme ogbaẹmo ologbo ọ nyae họre na. Rekọ uzẹme na họ, oware nọ Josaya o ru na o thọ gaga. Yọ u si uwhu kpei evaọ okenọ ọ jọ ikpe ọgbagbizii (39) gheghe.

Kọ eware iwoma nọ Josaya o ru na kpobi e thọrọ Jihova ẹro? Kakaka! Jerimaya ọruẹaro na o kere ole uweri jọ kpahe emamọ ovie nana. Yọ o wọhọ nọ evaọ ikpe buobu, ahwo Ọghẹnẹ a gbẹ jẹ hae so ole yena. Nọ a tẹ kpare Josaya ze no evaọ obaro, ẹsejọhọ ẹdẹ jọ o ti se iku eware nọ o ru nọ a kere fihọ Ebaibol na. Yọ o sae jọ nọ o ti tube se ole uweri nọ a kere ro jiri ei na dede. O rrọ vevẹ nọ Jihova o you Josaya. Yọ oghẹrẹ nọ o ro dhesẹ nọ ọ gudu je wo ẹrọwọ na o te thọrọ iẹe ẹro vievie he.

Se iku Ebaibol na:

• 2 Ivie 22:1–23:30

• 2 Iruẹru-Ivie 33:21–35:27

Onọ nọ a rẹ ta ẹme kpahe:

Eme gbe eme Josaya o ru ro dhesẹ nọ ọ gudu?

StockStudio/Alamy Stock Photo

1. 4. Họlda ọ ruẹaro nọ a “ti ki [Josaya] fihọ uki [riẹ] dhedhẹ.” Nọ orọnọ Josaya o whu evaọ ẹmo na, ẹvẹ eruẹaruẹ nana i ro rugba? (2 Iv. 22:20; w00 9/15 30 ¶2-3)

   Uyo ra

Roro Kpahe Eware nọ Who Wuhrẹ Noi Ze

• Ileleikristi jọ evaọ ukoko na a reoja gaga evaọ okenọ a jọ emaha. Eme a rẹ sae wuhrẹ mi Josaya, ọnọ ọsẹ riẹ ọ jẹ gọ emedhọ?

  Uyo ra

• Josaya ọ ruẹ nọ ọ gwọlọ obufihọ re ọ sai wo otoriẹ Ikereakere na. (2 Irv. 34:21) Ẹvẹ ma sae rọ rehọ aro kele iei? Uwoho avọ 2

  Uyo ra

  

• Oghẹrẹ ọfa vẹ whọ sae rọ rehọ aro kele Josaya gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Josaya nọ a tẹ kpare iẹe ze no?

  Uyo ra

Gbe Wuhrẹ Eware Efa

Josaya avọ izoge ivẹ jọ nọ i zihe ruọ ivie Juda a jẹ emamọ iroro. Eme ma rẹ sai wuhrẹ mi ai?

“Whai Izoge na, Ẹvẹ Wha ti Yeri Uzuazọ Rai?” (w23.09 8-13)

Kọ ogaga obọriẹ Josaya ọ sai ro si emedhọ nọ e jọ ẹkwotọ na no? Rri ividio nana re whọ ruẹ uyo na.

Iku Josaya: You Jihova; Mukpahe Oware Uyoma—Abọ Avivẹ—Amabọ Jọ Riẹ (3:43)