Ha Re Ọkhọle Nọnsẹ Muno Okha Ne Ribhi Baibo

Baibo tẹmhọn okha ne bunbun ne sunu bhi ẹghe ẹdẹle ne re emhin kpataki man. Ahamiẹn mhan rẹ ọkhọle ha muno ọne okha nan kẹkẹ, mhan ki manman dọ lẹn otọ ebi mhan tie ye manman miẹn elele bhọ. Mhan fẹ emhin eso ghe ne ha sabọ rẹkpa mhan rẹ ha re ọkhọle nọnsẹmhan muno okha ne ribhi Baibo.

• Ha tie ọle dagbare. Ahamiẹn mhan tie Baibo dagbare, ọ dẹ rẹkpa mhan rẹ lẹn ebi sunu bhi eji mhan tie, yẹ sabọ lẹn otọ ọle nọnsẹn. Ahamiẹn ghe uwẹ bi azagba-uwa nọnsẹ ko ha tie Baibo kugbe, taman ọdeọde bhi azagba-uwa nọnsẹ nin ele tie ọne Baibo, la ọta nin eria kẹkẹ tale bhi ẹkẹ ọnin Baibo bọsi ghe ele gene talọ. Bha ha lu iriọ, ọ ki diabe ghe ibha wo ha ribhi eji ọne okha da sunu tee.

• Re ọkhọle muno emhin ne sunu. Dọnmhegbe rẹ lẹn ebi ẹbho ne ribhi ọne okha rẹ ria eria yẹ bi ebi emhin dia ele yẹ bhi egbe. Bhi ọsi ijiẹmhin, uwẹ sabọ nọọn egbe ẹ: ‘Bezẹle nin ọne ọria da talọ bhi ọne uwedẹ nan, la lu emhin nọn sẹriọ? Be mẹn ha sabọ ha ria ẹmhọnlẹn bhi ọkhọle la be emhin ha rẹ dia mẹn yẹ bhi ẹgbe sade imẹn ribhi ọne idia nin?’

• Drọ ebi uwẹ tie ọbhi otọ. Ahamiẹn mhan drọ ebi mhan tie bhi Baibo ọbhi otọ, ọ ki rẹkpa mhan rẹ ha ye okha nin mhan tie bhọ re nọnsẹn, aharẹmiẹn ebi mhan drọ bha de ọbhọ nọnsẹn.